ကုန်ဈေးနှုန်းကောက်ယူမှုလုပ်ငန်းဆောင်ရွက်နိုင်ရေး လုပ်ငန်းညှိနှိုင်းအစည်းအဝေးလမ်းညွှန်ချက်များကို အကောင်အထည်ဖော်ဆောင်ရွက်နိုင်ရေးအတွက် ဗဟိုစာရင်းအင်းအဖွဲ့ရန်ကုန် တိုင်းဒေသကြီးဦးစီးမှူး‌ ဒေါ်ချိုချိုလွင်နှင့်ဝန်ထမ်း(၂)ဦး၊ စားသုံသူရေးရာဦးစီးဌာန၊ ရန်ကုန်တိုင်း ဒေသကြီးဦးစီးမှူးရုံးမှ ဒေါ်ထူးမြတ်အိ(လက်ထောက်ညွှန်ကြားရေးမှူး)၊ ဒေါ်အင်ကြင်းမွှေး (ကြီး/ ရေး)၊ ရန်ကုန်တိုင်းဒေသကြီး  အရှေ့ပိုင်းခရိုင်ဦးစီးမှူးရုံးမှ ဦးသိန်းထွန်း (ဌာနခွဲစာရေး)၊ ‌ဒေါ်နီနီတိုး (စာရင်းကိုင်-၃)တို့သည်  အလုံမြို့နယ် ၊ ဆင်မင်းဈေးတာဝန်ခံ ဒေါ်ယဉ်ယဉ်ကြည်နှင့် တာဝန်ရှိသူများပူးပေါင်းပြီး ၆.၈.၂၀၂၅ ရက်နေ့၊နံနက် (၀၉:၀၀)အချိန်တွင် ရန်ကုန်မြို့တော်စည် ပင်သာယာရေးကော်မတီ လက်အောက်ရှိအထက်ဌာနများသို့တင်ပြလျက်ရှိသည့် ဆင်မင်းဈေး အတွင်းရှိ အခြေခံစားသောက်ကုန်များ၏ဈေးနှုန်း (လက်လီ)ရောင်းချနေသည့် ဈေးနှုန်းများ မှန်ကန်မှုရှိစေရေးနှင့် ဈေးကွက်အတွင်းဝင်ရောက်မှုအခြေအနေတို့ကို ကွင်းဆင်းစိစစ်ဆောင်ရွက် ခဲ့ကြောင်း သိရှိရပါသည်။

    ထိုသို့ ကွင်းဆင်းစစ်ဆေးခဲ့သည့် စားဖိုဆောင်သုံးပစ္စည်းများမှာ ကြက်သွန်နီ၊ ကြက်သွန်  ဖြူ ၊ ငရုတ်ရှည်၊ငရုတ်ပု၊အာလူး၊ သကြား၊ ကုလားပဲ စသည့်တို့ကို စားသုံးသူရေးရာဦးစီးဌာန၊ ဗဟိုစာရင်းအင်းအဖွဲ့၊ ဈေးစည်ပင်သာယာရေးကော်မတီတို့နှင့် ပူးပေါင်းဆောင်ရွက်ခြင်းဖြင့် မြေပြင်တွင် အမှန်တကယ်ဖြစ်ပေါ်နေသည့် ဈေးနှုန်းအခြေအနေများကိုသိရှိနိုင်ပြီး လိုအပ်သည် များကို စီမံဆောင်ရွက်သွားနိုင်မည်ဖြစ်ကြောင်း သိရှိရပါသည်။

DOCA (ရန်ကုန်)

   စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်း(၃) ဦးတို့သည် (၂၅.၇.၂၀၂၅) ရက်နေ့ နံနက်(၁၀:၀၀) နာရီအချိန်တွင် မုံရွာမြို့၊ ချမ်းမြသာစညရပ်ကွက်ရှိ Yati Bakery နှင့် Surprise Gift Monywa တို့အား အွန်လိုင်းစနစ်ဖြင့် ရောင်းချခြင်းလုပ်ငန်းနှင့် ပတ်သက်၍ အသိပညာပေးဆွေးနွေးပွဲ ကျင်းပခဲ့ပါသည်။

      ထိုသို့ဆောင်ရွက်ခဲ့ရာတွင် ခရိုင်ဦးစီးမှူးမှ စားသုံးသူများ အွန်လိုင်းစနစ်ဖြင့် ရောင်းချခြင်းလုပ်ငန်း၏ အဓိပ္ပါယ်ဖွင့်ဆိုချက်များ စားသုံးသူ၏အခွင့်အရေးများ၊ တာဝန်များ၊ အွန်လိုင်းစနစ်ဖြင့် ဈေးဝယ်ယူခြင်းအတွက် အားနည်းချက်၊ အားသာချက်များကို၎င်း၊ ကုန်စည် (သို့) ဝန်ဆောင်မှုနှင့် စပ်လျဉ်း၍ စားသုံးသူများ စိစစ်သင့်သည့်အချက်အလက်များ၊ အွန်လိုင်း စနစ်ဖြင့် ရောင်းချခြင်းလုပ်ငန်းနှင့် စပ်လျဉ်း၍ သက်ဆိုင်ရာဌာနများ၏ ဆောင်ရွက်မှုများ၊ လိမ်လည်မှုများနှင့် မှတ်ပုံတင်ထားသည့်အွန်လိုင်းရောင်းချမှုလုပ်ငန်းမှ ဈေးဝယ်ယူခြင်းဖြင့် ရရှိသည့်အကျိုးရလဒ်များနှင့် စီးပွားရေးလုပ်ငန်းရှင်များအနေဖြင့် လိုက်နာရမည့်ကျင့်ဝတ်များ အကြောင်း အသိပညာပေးဟောပြောခဲ့ပါသည်။

DOCA(စစ်ကိုင်း)

     ဖျာပုံခရိုင်၊ ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းတို့သည် ၂၀၂၅ ခုနှစ်၊ ဩဂုတ်လ (၄) ရက်နေ့၊ နေ့လည် (၁၅:၀၀) နာရီအချိန်တွင် ဒေးဒရဲမြို့နယ်ရှိ အသင့်စားခေါက်ဆွဲ ရောင်းချနေသော ကုန်မျိုးစုံ ဆိုင်(၃) ဆိုင်သို့ ကွင်းဆင်းစစ်ဆေးခဲ့ကြပါသည်။

          ထိုသို့ ကွင်းဆင်းစစ်ဆေးရာတွင် စားသုံးသူရေးရာဦးစီးဌာနမှ မြို့နယ်တာဝန်ခံဦးသိန်းမောင်က စားသုံးသူကာကွယ်ရေး ဥပဒေ အခန်း(၁၈) အရ ကုန်အညွှန်းအမှတ်အသား ဖော်ပြချက်နှင့် ကိုက်ညီမှုရှိ/မရှိ၊ ဈေးကွက်အတွင်းရောင်းချနေသော အသင့်စားခေါက်ဆွဲခြောက်ထုပ်များအား စစ်ဆေးခဲ့ကြရာ ရောင်းချနေသော Jumbo ၊ Shin Shin ၊ Yum Yum ၊ Wah–Lah ခေါက်ဆွဲ ခြောက်ထုပ်များတွင် FDA ထောက်ခံချက်အမှတ်နှင့် ကုန်အညွှန်းအမှတ်အသားများ ပြည့်စုံစွာ ဖော်ပြ ထားရှိမှု အခြေအနေတို့အား  ကွင်းဆင်းစစ်ဆေးခဲ့မှုအရ သတင်းရရှိခဲ့ပါသည်။

(Doca ဧရာဝတီ)

      ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ် တာဝန်ခံနှင့် ဝန်ထမ်းတို့သည် ၂၀၂၅ ခုနှစ်၊ ဩဂုတ်လ (၁) ရက်နေ့၊ နေ့လည် (၁၂:၀၀) နာရီအချိန်တွင် ချောင်းဖျားကျေးရွာရှိ “ဒေါ်ထွေး” ငါးပိ၊ ငံပြာရည် လုပ်ငန်းသို့ စားသုံးသူများ ဘေးအန္တရာယ်ကင်းရှင်း စေရေးနှင့် ထုတ်ကုန်လုံခြုံစိတ်ချရမှု ရှိစေရေးအတွက် ကွင်းဆင်းခဲ့ကြပါသည်။

     လုပ်ငန်းရှင်က ငါးပိ၊ငံပြာရည် ထုတ်လုပ်ရန်အတွက် ကုန်ကြမ်းကို ဖျာပုံမြို့နယ် ၊ ဘုန်းကြီးသောင် ကျေးရွာမှ ရေငန်ထွက်ပစ္စည်း ဖြစ်သော ငါးတံခွန်၊မျှင်ငါးပိ အစရှိသည့် ကုန်ကြမ်း ပစ္စည်းများကို ဝယ်ယူရသည်။ အဆိုပါကုန်ကြမ်းများကို ဆားနှင့်နယ်ပြီး အိုးထဲတွင် (၃) လခန့် သိုလှောင်ရပြီး ထွက်ရှိလာသော ငံပြာရည် အကြည်ကို ခပ်ပြီးလျှင် မိုးပြဲဒယ်နှင့် ကျိုရပြီး အနည်နှင့် စွန့်ပစ်ပစ္စည်းများကို ဇကာဖြင့် စစ်၍စွန့်ပစ်သည်။ ထို့နောက်ရရှိလာသော ငံပြာရည်ကြည်များကို အအေးခံကာ ဒေးဒရဲမြို့နယ်နှင့် အခြားမြို့နယ်များသို့ ရောင်းချလျက်ရှိပါသည်။ ဈေးနှုန်း အနေဖြင့် ငါးပိတစ်ပိဿာလျှင် (၃၅၀၀) ကျပ်၊ မျှင်ငါးပိ တစ်ပိဿာလျှင် (၅၀၀၀) ကျပ်၊ ငံပြာရည် တစ်ပိဿာ လျှင် (၁၅၀၀) ကျပ်ဖြင့် ရောင်းချလျက်ရှိကြောင်း ၊ မြိုနယ်တာဝန်ခံမှ စားသုံးသူများ ဘေးအန္တရာယ် ကင်းရှင်းစေရေးအတွက် ဓာတုဆိုးဆေးနှင့် ဖော်မလင်များ ထည့်သွင်းသုံးစွဲမှုမရှိစေရေး အတွက် တွေ့ဆုံဆွေးနွေး ကွင်းဆင်းခဲ့ကြောင်း သတင်းရရှိပါသည်။

(Doca ဧရာဝတီ)

      ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ်နှင့် တိုင်းအတွင်းစီးပွားရေးလုပ်ငန်းရှင်များတွေ့ဆုံပွဲကို ဩဂုတ် ၃ရက်နေ့တွင် ကျင်းပပြုလုပ်၍ စားသုံးသူရေးရာဦးစီးဌာန တိုင်းဦးစီးမှူး၊ဒုတိုင်းဦးစီးမှူးနှင့်သက်ဆိုင်ရာများ ဧရာဝတီကုန်သည်စက်မှုလက်မှုဥက္ကဋ္ဌနှင့် တိုင်းအတွင်းရှိ စီးပွားရေးအသင်းအဖွဲ့များ စီးပွားရေးလုပ်ငန်းရှင်များ ရာဘာ၊သီဟိုဠ်စိုက်ပျိုးထုတ်လုပ်သူ တောင်သူများ စပါးစိုက်တောင်သူများ ကြိမ်၊ဝါး၊ဗေဒါလုပ်ငန်းရှင်များ၊ ငါး၊ပုဇွန်၊ဝက်မွေးမြူရေးလုပ်ငန်းရှင်များ ပဲစိုက်တောင်သူများ စုစုပေါင်း ၂၀၀ ဦးခန့်တက်ရောက်ခဲ့ပါသည်။

     ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ်မှအဖွင့်အမှာစကားပြောကြားရာတွင် တိုင်းဒေသကြီးအတွင်း စီးပွားရေးဖွံ့ဖြိုးတိုးတက်စေရန် စိုက်ပျိုးမွေးမြူရေးထုတ်ကုန်များ တန်ဖိုးမြှင့်ထုတ်လုပ်နိုင်ရေး ဆီထွက်သီးနှံ တိုးချဲ့စိုက်ပျိုးရေး ဆီစက်များတည်ဆောက်နိုင်ရေး  MSME ကဏ္ဍများအဆင့်မြှင့် ပြည်ပတင်ပို့နိုင် ရေးဆွေးနွေးပြောကြားခဲ့ပါသည်။

    သက်ဆိုင်ရာအသင်းအဖွဲ့များမှလည်း စီးပွားရေးဖွံ့ဖြိုးတိုးတက်ရေးအတွက် စိုက်မွေးထုတ်ကုန်များကို တန်ဖိုးမြှင့်ထုတ်ကုန်များ ထုတ်လုပ်ရန် လိုအပ်ကြောင်းအခက်အခဲများရှိပါက တိုင်းဒေသကြီးအစိုးရအဖွဲသို့ တင်ပြဆွေးနွေးလိုကြောင်းဆွေးနွေးပြောကြားခဲ့ပါသည်။တိုင်းအတွင်းဖူလုံမှုရှိသည့်အပြင်ဆီဖူလုံမှုရှိစေရေး၊ ပဲအထွက်နှုန်းကောင်းရှိအောင် ဆောင်ရွက်ပေးမှာဖြစ်ကြောင်း လုပ်ငန်းရှင်များမှ တင်ပြလို သည်များလိုအပ်ချက်များကိုစာဖြင့်ရေး၍ တင်ပြစေလိုကြောင်းဝန်ကြီးချုပ်မှ နိဂုံးချုပ်အမှာ စကားပြော ကြားခဲ့ပါသည်။

( DOCA ဧရာဝတီ)