စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်း(၃)ဦးသည် (၆.၈.၂၀၂၅) ရက်နေ့တွင် စားသုံးသူရေးရာဦးစီးဌာန၊ “BoB” အမှတ်တံဆိပ်ဖြင့် ထုတ်လုပ်သည့် မုန့်လုပ်ငန်းရှင်နှင့်တွေ့ဆုံ၍ ကုန်အညွှန်းအမှတ်အသား ဆိုင်ရာများနှင့် ပတ်သက်၍ ဆွေးနွေးခဲ့ပါသည်။

      ထိုသို့ဆွေးနွေးရာတွင် ကုန်အညွှန်းအမှတ်အသားပြုလုပ်ရာတွင် လိုအပ်သည် များကို ခရိုင်ဦးစီးမှူးက လုပ်ငန်းရှင်အား ၎င်းတို့၏ ထုတ်ကုန်ပစ္စည်းများပေါ်တွင် စားသုံးသူ ကာကွယ်ရေး ဥပဒေ ၂၀၁၉ အခန်း (၁၈) တွင် ဖော်ပြထားသောပြဌာန်းချက်အတိုင်း ကုန်အညွှန်း အမှတ်အသားကို ပြည့်စုံစွာဖော်ပြရန်၊ ကုန်စည်အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းတို့ကို မြန်မာဘာသာဖြင့်ဖြစ်စေ၊ မြန်မာဘာသာဖော်ပြမည့် အချက်များ အကြောင်း အသိပညာပေးဆွေးနွေးခဲ့ပြီး ကုန်အညွှန်းအမှတ်အသား ဖော်ပြချက်၊ မူပိုင်ခွင့် လျှောက်ထားခြင်းနှင့် စီးပွားရေးလုပ်ငန်းရှင်၏ လိုက်နာရမည့်တာဝန်များအကြောင်း အသိပညာပေး ဆွေးနွေးခဲ့ကြောင်း သိရှိရပါသည်။  

DOCA(စစ်ကိုင်း)

       နိုင်ငံ့စီးပွားမြှင့်တင်ရေးအစီအစဉ်တွင်အကျုံးမဝင်သည့်တောင်သူများအား ဓာတ်မြေဩဇာများ တိုက်ရိုက်သက်သာစွာ ဖြန့်ဖြူးပေးနိုင်ရေးနှင့် အရည်အသွေးမြင့် Drum Seeder များ တောင်သူများလက်ဝယ်ဖြန့်ဖြူးပေးနိုင်ရေး လုပ်ငန်းညှိနှိုင်းအစည်းအဝေးကို ယနေ့ညနေပိုင်းက ပုသိမ်မြို့၊ ဩဂုတ် ၈ ရက်နေ့ ဧရာရွှေဝါခန်းမတွင်ပြုလုပ်ခဲ့ရာ အစည်းအဝေးသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ ဌာနဆိုင်ရာများ၊ ဝယ်ယူကြိတ်ခွဲ တင်ပို့သူအစု အဖွဲ့များ တက်ရောက်ခဲ့ကြသည်။

        ဦးစွာ တိုင်းဒေသကြီးဝန်ကြီးချုပ်က တိုင်းဒေသကြီးအတွင်း မိုးစပါးစိုက်ဧက (၃၇)သိန်း (၅)သောင်းကျော်ရှိပြီး ရေတော်မိုးတော်စိုက်ဧက(၂၇)သိန်းကျော်ပါဝင်ပါကြောင်း၊ နိုင်ငံ့စီးပွား မြှင့်တင်ရေးရန်ပုံငွေဖြင့် သွင်းအားစုများပံ့ပိုးပေးအပ်ရာတွင် တောင်သူများလက်ဝယ် အချိန်မီ ရောက်ရှိရန်လိုအပ်ပါကြောင်း၊ ယခုနှစ်တွင် တိုင်းဒေသကြီးအနေဖြင့် သီးနှံစုံပန်းတိုင်အထွက်နှုန်း ရောက်ရှိရမည့်နှစ်ဖြစ်ပါကြောင်း၊ ပန်းတိုင်အထွက်နှုန်းရောက်ရှိရေးအတွက် ခရိုင်၊ မြို့နယ် စိုက်တိုးမြှင့်အဖွဲ့များ၊ သွင်းအားစုအဖွဲ့များ၊ တောင်သူကြီးများစသည့် supply chain တစ်ခုလုံးတွင် ပါဝင်ပတ်သက်သူများအားလုံး  ပူးပေါင်းဆောင်ရွက်ကြရမည် ဖြစ်ပါကြောင်း၊ နိုင်ငံ့စီးပွားမြှင့်တင်ရေး အစီအစဉ်တွင် အကျုံးမဝင်သည့်တောင်သူများအား ဓာတ်မြေဩဇာများတိုက်ရိုက်သက်သာစွာ ဖြန့်ဖြူးပေးနိုင်ရေးအတွက် နိုင်ငံ့စီးပွားမြှင့်တင်ရေး ရန်ပုံငွေဖြင့် သွင်းအားစုများပေးအပ်သည့်အတိုင်း စနစ်တကျဆောင်ရွက်ရန်လိုပါကြောင်း၊ ဒေသနှင့်ကိုက်ညီသည့် အရည်အသွေးမြင့် Drum Seeder များ တောင်သူများလက်ဝယ် ဖြန့်ဖြူးပေးနိုင်ရေးအတွက် Drum Seeder များထုတ်လုပ်ရာတွင် ပေါင်းစပ်ညှိနှိုင်းမှု ကောင်းကောင်းဖြင့် ဆောင်ရွက်ရန်လိုပါကြောင်း၊ တိုင်းဒေသကြီးအတွင်း ကြဲခင်းစနစ်များလျော့နည်းပပျောက်စေရေးနှင့် ပန်းတိုင်အထွက်နှုန်းရရှိရေးအတွက် မျိုးစေ့ချကိရိယာ (Drum Seeder)များ၊ လက်ဆွဲကောက်စိုက်စက်၊ ကောက်စိုက်စက်၊ ကောက်စိုက်သမများဖြင့် စိုက်ပျိုးခြင်းစနစ်များကို ဆောင်ရွက်လျက်ရှိပါကြောင်း၊  မိုးစပါးပန်းတိုင်အထွက်နှုန်း ရောက်ရှိရေး အတွက် ရည်မှန်းချက်ပေးထားသကဲ့သို့ တောင်သူအားလုံး မျိုးစေ့ချကိရိယာ(Drum Seeder)များ ပိုင်ဆိုင်နိုင်ရေး နည်းလမ်းများရှာဖွေကြိုးပမ်းဆောင်ရွက် လျက်ရှိပါကြောင်း" တက်ရောက် အမှာစကားပြောကြားခဲ့သည်။

(DOCA ဧရာဝတီ)

      ဘိုကလေးမြို့နယ် စားသုံးသူရေးရာဦးစီးဌာန မြို့နယ်တာဝန်ခံနှင့် ဝန်ထမ်းတို့သည် ၂၀၂၅ ခုနှစ်၊ ဩဂုတ်လ (၈) ရက်နေ့၊ နံနက် (၁၀:၃၀) နာရီ အချိန်တွင် (၁) ရပ်ကွက်၊ ဗိုလ်ဗထူးလမ်းရှိ “မိုး” သုံးထောင့်မုန့် လုပ်ငန်းသို့ ထုတ်ကုန်လုံခြုံစိတ်ချရမှုရှိစေရေးအတွက် ကွင်းဆင်းစိစစ်ခဲ့ကြပါသည်။

          “မိုး” သုံးထောင့်မုန့် လုပ်ငန်း မှ ထုတ်လုပ်မှုအနေဖြင့် တစ်နေ့လျှင် သုံးထောင့်မုန့် ဘူး(၂၅၀) ခန့် ထုတ်လုပ်လျက်ရှိပါသည်။ တစ်ဘူးလျှင် (၅) ခုပါဝင်ပြီး ဈေးနှုန်းအနေဖြင့် (၂၇၀၀) ကျပ်ဖြင့် ဖြန့်ဖြူးရောင်းချပေးလျက်ရှိပါသည်။ ပါဝင်ပစ္စည်းများမှာ ဂျုံ၊သကြား၊ ကြက်ဥ၊ ဆီ၊ ရေသန့် တို့ဖြစ်ကြ ပါသည်။ လုပ်သားဦးရေ (၄) ဦးခန့်ရှိပြီး လုပ်ခနှုန်းထားအနေဖြင့် တစ်လလျှင် (၂) သိန်းဖြင့် စားစရိတ်ငြိမ်းပေးချေရပါသည်။ဈေးကွက်အနေဖြင့် ဖျာပုံ၊ မော်ကျွန်း၊ စက်စု နှင့် အနီးတဝိုက်ရှိ ကျေးရွာများသို့ ဖြန့်ဖြူးရောင်းချလျက်ရှိပါသည်။

          ထို့နောက် မြို့နယ်တာဝန်ခံမှ ထုတ်လုပ်သော ကုန်စည်နှင့်ပက်သက်၍ စားသုံးသူများ ဘေးအန္တရာယ်ကင်းရှင်းစေရေးနှင့်ထုတ်ကုန်လုံခြုံစိတ်ချရမှုရှိစေရေးအတွက် ကွင်းဆင်းစိစစ်ခဲ့ကြောင်း သတင်းရရှိပါသည်။

(Doca ဧရာဝတီ)

      ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ်သည် ဆန်/စပါးကို အဓိကထား စိုက်ပျိုးထုတ်လုပ်ပြီး အခြားတိုင်းဒေသကြီးများသို့ ဆန်တင်ပို့ ရောင်းချခြင်း လုပ်ကိုင်လျက်ရှိပါသည်။ ဒေးဒရဲမြို့နယ်၊ လမုဝကျေးရွာရှိ အောင်နန်းတော် ဆန်စက်မှ မြိတ်မြို့သို့ ဧည့်မထ ဆန်တင်ပို့လျက်ရှိသည့် လုပ်ငန်းများကို မြို့နယ်တာဝန်ရှိသူများက ကွင်းဆင်းစစ်ဆေးခဲ့ကြပါသည်။

          အဆိုပါကွင်းဆင်းစစ်ဆေးခြင်းကို မြို့နယ်အုပ်ချုပ်ရေးမှူး ဦးဆောင်၍ မြို့နယ်စားသုံးသူရေးရာဦးစီးဌာနနှင့် သက်ဆိုင်ရာဌာနဆိုင်ရာများက ၂၀၂၅ ခုနှစ်၊ ဩဂုတ်လ (၇) ရက်နေ့၊ နံနက် (၈:၀၀) နာရီအချိန်တွင်  အောင်နန်းတော် ဆန်စက်မှ ဧည့်မထ (ရက် ၉၀) ဆန် (၂၈၀၀) အိတ် ရေယဉ်ပေါ်သို့ တင်ဆောင်ထားရှိမှု၊ ရေယဉ်ကြံခိုင်မှု၊ ဆန်များသယ်ဆောင်ရာတွင် ကန့်သတ်ပစ္စည်းများ သယ်ဆောင် ခြင်းမရှိစေရေးနှင့် သက်ဆိုင်ရာဌာနမှ ထောက်ခံချက်များ ပြည့်စုံမှုရှိ/မရှိနှင့် တရားဥပဒေနှင့်အညီ ညီညွတ်မှုမရှိသည့် ကိစ္စရပ်များ ဖြစ်ပွားမှုမရှိစေရေးတို့ကို ကွင်းဆင်းစစ်ဆေးခဲ့ပြီး လိုအပ်သည်များကို မှာကြားဆွေးနွေးခဲ့ကြောင်း သတင်းရရှိပါသည်။

(Doca ဧရာဝတီ)

    ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံ ဦးသိန်းမောင်သည် စိုက်ပျိုးရေး ဘဏ်နှင့် ပူးပေါင်း၍ တောင်သူများအား စိုက်/ဘဏ်ရုံးတွင် Myro သိုလှောင်ရုံ မှတ်ပုံတင်ခြင်းနှင့် ပက်သက်၍ အသိပညာပေး ဟောပြောခြင်းကို ၂၀၂၅ ခုနှစ် ၊ ဩဂုတ်လ (၇) ရက်နေ့၊ နေ့လယ် (၁၂:၀၀) နာရီအချိန်တွင် ပြုလုပ်ဆောင်ရွက်ခဲ့ပါသည်။

  စားသုံးသူရေးရာ မြို့နယ်တာဝန်ခံမှ Myro တွင် ဆန်/စပါး သိုလှောင်ရုံ မှတ်ပုံတင်ခြင်း ဆောင် ရွက်ရသည့် ရည်ရွယ်ချက်များ၊ Myro တွင် ဆန်/စပါး သိုလှောင်ရုံ မှတ်ပုံတင်ခြင်းကို ၂၀၂၃ ခုနှစ်၊ နိုဝင်ဘာလ မှ စတင်ဆောင်ရွက်ခဲ့ကြောင်း၊ Online စနစ်ဖြင့် မှတ်ပုံတင်ဆောင်ရွက်ရကြောင်း၊ စပါး(၂၅၀၀) နှင့် အထက်၊ ဆန်အိတ် (၅၀၀) နှင့် အထက် သိုလှောင်သူ လုပ်ငန်းရှင်များ အနေဖြင့် မှတ်ပုံတင်ပြုလုပ်ရမည်ဖြစ်ပြီး ဖော်ပြပါ ပမာဏ အထက် သိုလှောင်သူများကို ညွှန်ကြားချက်နှင့်အညီ မှတ်ပုံတင်ပြီး မိမိတို့ အင်အားရှိသလောက် လွတ်လပ်စွာ သိုလှောင်နိုင်ကြောင်း၊ Myro နှင့် ပက်သက်၍ ကောလဟာလ ထွက်ပေါ်နေသည့် သတင်းများမှာ မဟုတ်မမှန်ကြောင်း စပါးတင်း(၂၅၀၀) အောက်နှင့် ဆန်အိတ်ရေ (၅၀၀) အောက် သိုလှောင်သူများ၊ တောင်သူများ အနေဖြင့် မှတ်ပုံတင်ရန် မလိုသေးကြောင်း လွတ်လပ်စွာ သိုလှောင်နိုင်ကြောင်း အသိပညာပေး ဟောပြောခဲ့ပြီး အဆိုပါ အခမ်းအနားသို့ တောင်သူ (၅၀) ဦးခန့် တက်ရောက်ခဲ့ကြောင်း သိရသည်။

(Doca ဧရာဝတီ)