သတင်းနှင့် လှုပ်ရှားမှုများ

 စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံး၌ စားသုံးသူကာကွယ်ရေးဆိုင်ရာ ဝန်ထမ်းစွမ်း‌ဆောင်ရည်မြှင့်တင်ရေးသင်တန်းကို ၂၀၂၃ခုနှစ်၊ စက်တင်ဘာလ (၅)ရက်နှင့် (၆)ရက်နေ့တို့တွင် ဖွင့်လှစ်ခဲ့ရာ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးမှ ဝန်ထမ်း(၁၂)ဦးတက်ရောက်ခဲ့ကြပါသည်။

  စစ်ကိုင်းခရိုင်၊ ခရိုင်ဦးစီးမှူး ဒေါ်သန်းသန်းတင်က အဖွင့်အမှာစကားပြောကြားခဲ့ပြီးနောက် စားသုံးသူရေးရာဦးစီးဌာနပေါ်ပေါက်လာပုံသမိုင်းအကြောင်း၊ စားသုံးသူကာကွယ်ရေးဥပဒေကို ၂၀၁၉ခုနှစ်၊ မတ်လ (၁၅)ရက်နေ့တွင်ပြဋ္ဌာန်းခဲ့ပြီး အခန်း(၂၅)ခန်းနှင့် ပုဒ်မ ၈၄ခုပါဝင်ကြောင်း၊ စားသုံးသူကာကွယ်ရေးနည်းဥပဒေကို ၂၀၂၂ခုနှစ်၊ ဇန်နဝါရီလ(၁၈)ရက်နေ့တွင်ပြဋ္ဌာန်းခဲ့ပြီးဖြစ်ကြောင်းနှင့် စားသုံးသူကာကွယ်ရေးဥပဒေအကြောင်း သိကောင်းစရာများကိုလည်းကောင်း၊ စစ်ကိုင်းခရိုင်၊ ဒု-ခရိုင်ဦးစီးမှူး ဒေါ်ခင်မြတ်မူ (ဦးစီးအရာရှိ)က တိုင်ကြားနိုင်မှုနည်းလမ်းတို့ကို အသိပညာပေးဟောပြောရာတွင် ပါဝင်ရမည့်အချက်များကိုလည်းကောင်း၊ စားသုံးသူရေးရာဦးစီးဌာန၊ စစ်ကိုင်းမြို့နယ်တာဝန်ခံ ဒေါ်ကေသီအောင်(ဦးစီးမှူး)က စားသုံးသူအငြင်းပွားမှုဖြေရှင်းရာတွင် စားသုံးသူကာကွယ်ရေးဥပဒေ အခန်း (၁၉)ပါ တိုင်ကြားခြင်းနှင့် စိစစ်ညှိနှိုင်းဖြေရှင်းဆောင်ရွက်ခြင်းအပိုင်းကိုလည်းကောင်း၊ စစ်ကိုင်းခရိုင်၊ စားသုံးသူရေးရာဦးစီးဌာန၊ မူဝါဒလေ့လာရေးနှင့်စီမံကိန်းစာရင်းအင်းဌာနခွဲတာဝန်ခံ ဒေါ်ခင်စောဝင်း(ဒု-ဦးစီးမှူး)က အသင်းအစု/အဖွဲ့များအကြောင်းကိုလည်းကောင်း၊ စစ်ကိုင်းခရိုင်၊ စားသုံးသူရေးရာဦးစီးဌာန၊ ထုတ်ကုန်လုံခြုံစိတ်ချရမှုဌာနခွဲတာဝန်ခံ ဒေါ်ခင်လေးနွယ်(ဒု-ဦးစီးမှူး)က ဈေးကွက်စောင့်ကြည့်ရာတွင် လိုက်နာရမည့်အချက်များနှင့် ဆောင်ရွက်ရမည့်အကြောင်းများကိုလည်းကောင်း ပို့ချခဲ့ကြောင်းသိရှိရပါသည်။

DOCA(စစ်ကိုင်း)

   (၂၀-၉-၂၀၂၃) ရက်နေ့၊ နေ့လယ် (၁၃:၀၀)နာရီအချိန်တွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံး၌ ပြည်နယ်ဦးစီးမှူး ဦးသန်းဦးသည် ကရင်ပြည်နယ်ဆန်စက်လုပ်ငန်းရှင်များအသင်းအလုပ်အမှုဆောင်အဖွဲ့ဝင်များ၊ ရွှေဂွန်းကျေးရွာရှိ မွေးမြူရေးလုပ်ငန်းရှင်များနှင့်တွေ့ဆုံ၍ ဆန်နှင့်ဆန်ထွက်ပစ္စည်းများ ဈေးကွက်ရရှိစေရေးနှင့် မွေးမြူရေးလုပ်ငန်းရှင်များ၏ အခြေခံတိရစ္ဆာန်အစားအစာဝယ်ယူရရှိနိုင်ရေးအတွက် ပေါင်းစပ်ဆောင်ရွက်နိုင်ရေး ဆွေးနွေးခဲ့ပါသည်။

   အဆိုပါ ဆွေးနွေးပွဲတွင် စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးသန်းဦးက မွေးမြူရေးလုပ်ငန်းများအတွက် လိုအပ်သောတိရစ္ဆာန်အစာများကို အလွယ်တကူဝယ်ယူရရှိနိုင်ရေး ဆန်စက်လုပ်ငန်းရှင်များအသင်းနှင့်တွေ့ဆုံ၍ ချိတ်ဆက်ဆောင်ရွက်ပေးခြင်းဖြစ်ကြောင်း၊ မွေးမြူရေးလုပ်ငန်းများအတွက် လိုအပ်သည့်အခြေခံတိရစ္ဆာန်အစာတို့ကို ဆန်စက်လုပ်ငန်းရှင်များအသင်းနှင့်ချိတ်ဆက်ဝယ်ယူနိုင်ကြောင်း၊ ဆန်စက်လုပ်ငန်းရှင်များအသင်းကလည်း မွေးမြူရေးလုပ်ငန်းများအတွက် လိုအပ်သောအခြေခံတိရစ္ဆာန်အစားအစာဆန်နှင့် ဆန်ထွက်ပစ္စည်းတို့ကို ဈေးနှုန်းသင့်တင့်စွာဝယ်ယူရရှိနိုင်ရေး ကူညီဆောင်ရွက်ပေးစေလိုကြောင်း၊ မွေးမြူရေးလုပ်ငန်းများတိုးချဲ့လုပ်ဆောင်နိုင်ရန်အတွက် ကရင်ပြည်နယ်မွေးမြူရေးလုပ်ငန်းရှင်များအသင်းအဖွဲ့ဖွဲ့စည်း၍ ဆောင်ရွက်စေလိုကြောင်း ဆွေးနွေးခဲ့ပါသည်။

   ထို့နောက် ပြည်နယ်ဦးစီးမှူး ဦးသန်းဦးက မွေးမြူရေးလုပ်ငန်းများဖြစ်ထွန်းအောင်မြင်အောင်ဆောင်ရွက်ခြင်းဖြင့် ဒေသတွင်းစားနပ်ရိက္ခာဖူလုံစေနိုင်မည်ဖြစ်ကြောင်း၊ အလုပ်အကိုင်အခွင့်အလမ်းနှင့် ကုန်ထုတ်လုပ်မှုလုပ်ငန်းများဖွံ့ဖြိုးတိုးတက်ကာ ဒေသဖွံ့ဖြိုးတိုးတက်ရေးကိုလည်း အထောက်အကူဖြစ်မည်ဖြစ်ပါကြောင်း ရှင်းလင်းပြောကြားပြီး မွေးမြူရေးလုပ်ငန်းရှင်များက လက်ရှိဆောင်ရွက်လျက်ရှိသော မွေးမြူရေးလုပ်ငန်းအခြေအနေများနှင့် လုပ်ငန်းလည်ပတ်ပုံ၊ တွက်ခြေကိုက်မှု၊ အရှုံး/အမြတ်နှင့် လုပ်ငန်းဆောင်ရွက်ရာတွင် တွေ့ကြုံရသောအားနည်းချက်/ အားသာချက်များကို ပြန်လည်ရှင်းလင်းဆွေးနွေးခဲ့ပြီးနောက် ပြည်နယ်ဦးစီးမှူးကလည်း စိုက်ပျိုး/မွေးမြူရေးလုပ်ငန်းများဖွံ့ဖြိုးတိုးတက်၍ ကုန်ထုတ်လုပ်ငန်းများတိုးတက်မြင့်မားလာစေရေးအတွက် ဌာန၏ဆောင်ရွက်လျက်ရှိသည့် ပြည်တွင်းကုန်သွယ်ရေးဖွံ့ဖြိုးမှုဆိုင်ရာလုပ်ငန်းများနှင့် လုပ်ငန်းရှင်များအနေဖြင့် လိုအပ်လျက်ရှိသော နည်းပညာ၊ ငွေကြေးအရင်းအနှီးလိုအပ်ချက်များအပေါ်  နိုင်ငံတော်အနေဖြင့် နိုင်ငံ့စီးပွားမြှင့်တင်ရေးကဏ္ဍမှ  ကူညီဆောင်ရွက်ပေးနေသည့်အခြေအနေများကို ရှင်းလင်းဆွေးနွေး ခဲ့ကြောင်းသိရပါသည်။

DOCA(ကရင်)

       စားသုံးသူရေးရာဦးစီးဌာန ပြည်ခရိုင်ဦးစီးမှူးရုံးအနေဖြင့် ပြည်ခရိုင်အတွင်းရှိ ပြည်သူတို့အနေဖြင့် စားသုံးသူပြည်သူများ ကုန်စည်နှင့် ဝန်ဆောင်မှုများကိုရယူ အသုံးပြုရာတွင် ဘေးအန္တရာယ်ကင်းရှင်းစွာ သုံးစွဲနိုင်စေရေး ရည်ရွယ်၍ ဈေးကွက်အတွင်း ရောင်းချနေသော ကလေးအာဟာရဖော်စပ်ဖြည့်စွက်စာအမျိုးမျိုးတို့၏ ကုန်အညွှန်းအမှတ်အသားများ ပြည့်စုံ မှန်ကန်မှုရှိစေရေး ဈေးကွက်စောင့်ကြည့်စစ်ဆေးလျက်ရှိရာ (၈.၉.၂၀၂၃)နေ့တွင် ပြည်မြို့၊ မြို့ပေါ်ဆေးဆိုင်သို့လည်းကောင်း၊ (၆.၉.၂၀၂၃)နေ့တွင် ရွှေတောင်မြို့၊ ကြာနီကန်ရပ်ကွက်၊ ကုန်စုံဆိုင်၊ (၈.၉.၂၀၂၃)နေ့တွင် ယွန်းတန်းရပ်ကွက်၊ ကုန်စုံဆိုင်၊ (၁၁.၉.၂၀၂၃) နေ့တွင် သရက်တောရပ်ကွက်၊ ကုန်စုံဆိုင်နှင့် (၁၄.၉.၂၀၂၃)နေ့တွင် စက်ရုံနယ်မြေစံပြရပ်ကွက် ကုန်စုံဆိုင်များသို့လည်းကောင်း၊ ပန်းတောင်းမြို့တွင် (၅.၉.၂၀၂၃)နေ့တွင် ဥသျှစ်ပင်ဒေသရှိ ဆေးဆိုင်သို့လည်းကောင်း၊ (၁၅.၉.၂၀၂၃)နေ့တွင် ပေါက်ခေါင်းမြို့ပေါ် စတိုးဆိုင်များသို့ လည်းကောင်း၊ သက်ဆိုင်ရာမြို့နယ် တာဝန်ခံများဦးဆောင်၍ ပူးပေါင်းအဖွဲ့ဖြင့်  ဝန်ထမ်းများသည် ကွင်းဆင်း သွားရောက်၍ ကလေးအာဟာရဖေါ်စပ် ဖြည့်စွက်စာအမျိုးမျိုးတို့၏ ကုန်အညွှန်းအမှတ်အသားများ ပြည့်စုံမှန်ကန်စွာဖေါ်ပြမှုရှိ/မရှိ ဈေးကွက်စောင့်ကြည့် စစ်ဆေးခဲ့ပါသည်။

   ယင်းသို့ ကွင်းဆင်းစစ်ဆေးခြင်းဆောင်ရွက်ခဲ့ရာတွင် ပြည်ခရိုင်အတွင်း ဈေးကွက်များတွင် ရောင်းချနေသော ကလေးအာဟာရဖေါ်စပ် ဖြည့်စွက်စာအမျိုးမျိုးတို့၏ ကုန်အညွှန်း အမှတ်အသားရေးသားဖေါ်ပြခြင်းများ ပြည့်စုံမှန်ကန်မှုရှိကြောင်း၊ ရောင်းချနေသော လုပ်ငန်းရှင်များအားလည်း စားသုံးသူအသိပညာပေးဟောပြော ဆွေးနွေးမှုများ ပြုလုပ်ခဲ့ပြီး အသိပညာပေး လက်ကမ်းစာစောင်များလည်း ဝေငှခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

    စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ  ဦးကျော်မိုးလွင်(ဌာနခွဲစာရေး)သည် (၂၀-၉-၂၀၂၃) ရက်နေ့တွင် မိုးညှင်းမြို့၊ နားခါရပ်ကွက်အတွင်းရှိ ဒေါ်မိုးခိုင် (ကုန်စုံဆိုင်) သို့သွားရောက်ကာ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ စားသုံးသူကာကွယ်ရေးဥပဒေပါ ပြဋ္ဌာန်းချက်များနှင့်ကိုက်ညီခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

   ထိုသို့ ဈေးကွက်စောင့်ကြည့်စစ်ဆေးခဲ့ရာ SIP(Pure Coffee) အမှတ်တံဆိပ်ပါ အသင့်ဖျော်ကော်ဖီထုပ်အမျိုးမျိုးတို့တွင် ကုန်စည်အမျိုးအစားအလိုက် သတ်မှတ်ချက်များနှင့်အညီ မြန်မာဘာသာဖြင့် ပြည့်စုံစွာဖော်ပြရမည့် ကုန်စည်၏အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ သုံးစွဲပုံနည်းလမ်းတို့ကို မဖြစ်မနေဖော်ပြထားရှိခြင်းရှိ/မရှိ ဈေးကွက်စောင့်ကြည့်စစ်ဆေးခဲ့ရာ ကုန်အညွှန်းအမှတ်အသားပြည့်စုံစွာဖော်ပြထားရှိကြောင်း စစ်ဆေးတွေ့ရှိရပြီး ကုန်စုံဆိုင်ပိုင်ရှင်အား ကုန်အညွှန်းအမှတ်အသားပြည့်စုံမှန်ကန်မှုမရှိသော ကုန်စည်များကိုရောင်းချခြင်းမပြုရန် အသိပညာပေးဆွေးနွေးခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ လက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(ကချင်)

   ကျောင်းသား၊ကျောင်းသူများ သိသင့်သိထိုက်သည့် အသိပညာဗဟုသုတများ သိရှိစေရန် ရည်ရွယ်၍ စားသုံးသူရေးရာဦးစီးဌာန၊ ဖြူးမြို့နယ်တာဝန်ခံရုံးနှင့် ဖြူးမြို့နယ် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနဦးစီးဌာနတို့ ပူးပေါင်းကျင်းပသည့် အသိပညာပေးဟောပြောပွဲကို ၂၀၂၃ခုနှစ်၊စက်တင်ဘာလ ၁၄ ရက်နေ့ ၊နံနက်ပိုင်းတွင် ဖြူးမြို့၊ မြို့မ(၁) အခြေခံပညာမူလတန်းလွန်ကျောင်း၌  ကျင်းပပြုလုပ်ပါ သည်။

   ဟောပြောပွဲတွင် စားသုံးသူရေးရာဦးစီးဌာန၊ ဖြူးမြို့နယ်တာဝန်ခံရုံးမှ ဌာနခွဲစာရေး ဒေါ်ပပလင်းက စားသုံးသူ၏အခွင့်အရေးနှင့်တာဝန်များ၊ စားသုံးသူကာကွယ်ရေးဆောင်ရွက်ချက်များ၊ ကုန်စည်များ ဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်သည့်အကြောင်းများကို ဟောပြောခဲ့ပါသည်။

    ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူး ဒေါ်အိမာဟိန်းက စာကြည့်တိုက်များထူထောင်ခြင်းအကြောင်းနှင့် စာဖတ်ခြင်း၏ အကျိုးကျေးဇူးကို ဟောပြောခဲ့ကြောင်းနှင့် ဟောပြောပွဲသို့ ကျောင်းသား၊ကျောင်းသူ ၁၀၉ ဦး တက်ရောက်ခဲ့ကြောင်း သိရပါသည်။

DOCA(ပဲခူး)