HighLight News

(၃.၇.၂၀၂၅)ရက်နေ့ နံနက်(၀၈:၀၀) နာရီအချိန်တွင် တိုက်ကြီးခရိုင်၊ တိုက်ကြီးမြို့နယ်၌ အထွေထွေအုပ်ချုပ်ရေးဦးစီးဌာနမှ ခရိုင်အုပ်ချုပ်ရေးမှူး ဦးသူအောင်ဦးဆောင်၍ စားသုံးသူရေးရာဦးစီးဌာန၊ ဆည်မြောင်းဦးစီးဌာန၊ ငါးလုပ်ငန်းဦးစီးဌာန၊ စိုက်ပျိုးရေးဦးစီးဌာနနှင့် စက်မှုလယ်ယာဦးစီး ဌာနတို့ပါဝင်သော အဖွဲ့ဖြင့် မိုးစပါးစိုက်ပျိုးမှုအား ကွင်းဆင်းစစ်ဆေးခဲ့ပါသည်။ ထိုသို့စစ်ဆေးခဲ့ရာတွင် တိုက်ကြီးမြို့နယ်ရှိ ရင်းတိုက်ကွင်းကျေးရွာ၊ ကျိုက်စကိုင်းကျေးရွာသို့ ရောက်ရှိခဲ့ရာ တောင်သူများအား စိုက်ပျိုးသီးနှံများ၏ အထွက်နှုန်းများ တိုးတက်တည်ငြိမ်မှုရရှိစေရန် အတန်းလိုက်၊ အကန့်လိုက်စိုက်ပျိုးစနစ်များ လေ့ကျင့်စိုက်ပျိုးကြရန် ခရိုင်အုပ်ချုပ်ရေးမှူး ဦးသူအောင်မှ လမ်းညွှန်မှာကြားခဲ့ကြောင်း သိရှိရပါသည်။ DOCA (ရန်ကုန်)

စားသုံးသူရေးရာဉီးစီးဌာန၊ မြောက်ပိုင်းခရိုင်ဉီးစီးမှူးရုံး ကွပ်ကဲမှုအောက်ရှိ မှော်ဘီ မြို့နယ်ခွဲမှ ဒေါ်ဖြူဖြူမြင့်၊ ဒုကြီးကြပ်ရေးမှူးသည် (၄.၇.၂၀၂၅)ရက်နေ့ နံနက်(၀၉:၀၀) နာရီအချိန်တွင် အမှတ်(၄၀၅)၊ ရဲဘော်ဈေး(၉)လမ်း၊ ရဲဘော်ဈေးစံပြရပ်ကွက်၊ မှော်ဘီမြို့နယ်ရှိ ဖိုးသင်္ကြန်အစိုးရ ရာထူးဝင်သင်တန်းအွန်လိုင်အား မြေပြင်ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။ ထိုသို့မြေပြင်ကွင်းဆင်းစစ်ဆေးရာတွင် ပညာရေးနှင့်သင်ကြားရေးဝန်ဆောင်မှုလုပ်ငန်းများ ပိုင်ရှင်ဦးအောင်သင်္ကြန်မိုးနှင့်တွေ့ဆုံကာ ဆွေးနွေးရာ၌ e-Commerce Registration စနစ်မှ တစ်ဆင့်လျှောက်ထားသော အွန်လိုင်းစနစ်နဲ့ရောင်းချခြင်းလုပ်ငန်းများ၏ လျှောက်လွှာများနှင့် သက်တမ်းတိုးလျှောက်လွှာများကို သက်ဆိုင်ရာတာဝန်ရှိသူများက ဖော်ပြပါအချက်အလက်များ မှန်ကန်မှုရှိမှသာ Online Sale လုပ်ငန်းမှတ်ပုံတင်လက်မှတ်များထုတ်ပေးသွားမှာဖြစ်သည့်အတွက် မှန်ကန်စွာဖြေကြားပေးရန်နှင့် စားသုံးသူကာကွယ်ရေး၊ ဥပဒေပါ စီးပွားရေးလုပ်ငန်းရှင်များ လိုက်နာရမည့်တာဝန်များအကြောင်း အသိပညာပေးပြောကြားခဲ့ကြောင်း သိရှိရပါသည်။ DOCA(ရန်ကုန်)

စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဒေါ်သိင်္ဂီဇံ (အကြီးတန်းစာ ရေး)နှင့်ဝန်ထမ်းများသည် (၃.၇.၂၀၂၅) ရက်နေ့ ၊ နေ့လယ်(၁၂:၀၀) နာရီအချိန်တွင် ပုဇွန်တောင် မြို့နယ်၊ အမှတ်-၂၇-ကုန်ဈေးတန်းလမ်း (၆)ရပ်ကွက်အတွင်းရှိ ဆန်လက်လီရောင်းချနေသော ထွန်းတောက် (ဆန်ရောင်းဝယ်ရေးဆိုင်) အား သွားရောက်၍ ဆန်ရောင်းချမှု ကွင်းဆင်းစစ်ဆေးမှု များဆောင်ရွက်ခဲ့ကြကြောင်း သိရှိရပါသည်။ ထိုသို့ ကွင်းဆင်းအသိပညာပေးရာတွင် ဆန်ဆိုင်ရှိ ရောင်းချနေသော ဆန်များသည် (ရွှေဘို ပေါ်ဆန်း)၊ ပေါ်ဆန်း(လတ်) ၊ပေါ်ဆန်း(ရိုးရိုး) ၊ ဧရာမင်း(သီးထပ်) ၊(ရက် ၉၀) ၊ ဧည့်မထ(ရိုးရိုး) စသည့် ဆန်များ၏(၁ပြည်) ဈေးနှုန်းများကို စစ်ဆေးရာ သတ်မှတ်ရည်ညွှန်းဈေးအတိုင်း ရောင်းချလျက်ရှိကြောင်း တွေ့ရှိရပြီး ၊ ဆန်ဈေးနှုန်းကြီးမြှင့်မှုမဖြစ်ပေါ်စေရေးအတွက် ဈေးကစားရန်အလို့ငှာ ဆန်များ သိုလှောင်ထားခြင်းမပြုရန်၊ သတ်မှတ်ထားသောဈေးနှုန်းများအတိုင်း ရောင်းချသွားရန်၊ လိုက်နာမှုမရှိပါက ဥပဒေအရ အရေးယူခံရမှာဖြစ်ကြောင်း အသိပညာပေးပြောကြားခြင်းများ ဆောင်ရွက်ခဲ့ကြောင်း သိရှိရပါသည်။ DOCA(ရန်ကုန်)

ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ် စည်ပင်သာယာရေးအဖွဲ့ရုံးတွင် ဇူလိုင်လ(၃)ရက်နေ့၊ နံနက်(၀၉:၃၀)နာရီအချိန်တွင် အစားအသောက်ရောင်းချသော ထမင်းဆိုင် ပိုင်ရှင်များအား စားသုံးသူရေးရာဦးစီးဌာန၊ ခရမ်းမြို့နယ် တာဝန်ခံ ဒေါ်ကျော့ကေခိုင်က စားသုံး သူကာကွယ်ရေး အသိပညာပေး ဟောပြောခဲ့ကြောင်း သိရှိရပါသည်။ ထိုသို့ အသိပညာပေး ဟောပြောရာတွင် စားသုံးသူကာကွယ်ဥပဒေ ပြဌာန်းထားရှိမှု၊ ဥပဒေတွင် ပြဌာန်းထားသော စားသုံးသူများ၏ အခွင့်အရေးများ၊ စီးပွားရေးလုပ်ငန်းရှင်များ၏ တာဝန်များအား ရှင်းလင်းပြီး စားသောက်ဆိုင် လုပ်ငန်းလုပ်ကိုင်သော သူများသည် လုပ်ငန်းရှင် များဖြစ်သလို စားသုံးသူများလည်း ဖြစ်သည့်အတွက် စားသုံးသူအခွင့်အရေး ဦးစားပေးဆိုသည့် ဆောင်ပုဒ်နှင့်အညီ စားသုံးသူများ ဘေးအန္တရာယ်ကင်းရှင်း၍ လုံခြုံစိတ်ချရသော အစား အသောက်များ ရရှိစေရန်အတွက် မိမိတို့ဆိုင်များတွင် ရောင်းချသော အစားအသောက်များ သန့်ရှင်းမှုရှိစေရေး၊ လုပ်သားများ တစ်ကိုယ်ရည်သန့်ရှင်းပြီး ကျန်းမာရေးကောင်းမွန်သူများ ဖြစ် စေရန်နှင့် ဝန်ဆောင်မှုများ ပေးရာတွင်လည်း စားသုံးသူများ စိတ်ကျေနပ်မှု ရရှိစေရန် အလေး ထားဆောင်ရွက်ကြရန်နှင့် မိမိတို့၏ စားဖွယ်စုံများကို Online မှရောင်းချနေမှုများ ရှိခဲ့လျှင်လည်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၏ www.ecom.gov. mm တွင် အွန်လိုင်းမှတ်ပုံတင် ဆောင်ရွက်ထားကြရန်တို့အား အသိပေးခဲ့ပြီး လိုင်းမှတစ်ဆင့် ဈေးဝယ်လျှင်လည်း စားသုံးသူရေးရာဦးစီးဌာန၏ Call Center No.1535 သို့ မည်သည့်ဖုန်းဖြင့် မဆို ဆက်သွယ်တိုင်ကြားနိုင်ပြီး စားသုံးသူရေးရာဦးစီးဌာန၏ လုပ်ငန်းဆောင်ရွက်မှုများကိုလည်း လေ့လာလိုပါက www.doca.gov.mm သို့ ဝင်ရောက်လေ့လာဖတ်ရှု့နိုင်ပါကြောင်း အသိပညာ ပေးခဲ့ပြီး ဟောပြောပွဲသို့ လုပ်ငန်းရှင်(၃၀)ဦးခန့် ဝင်ရောက်ခဲ့ကြောင်း သိရှိရပါသည်။ DOCA(ရန်ကုန်)

ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် စည်ပင်သာယာမြို့မဈေးရုံး၌ ဇူလိုင်လ(၃)ရက်နေ့၊ နံနက်(၀၉:၃၀)နာရီအချိန်တွင် စွန့်ပစ်ပစ္စည်းများ စနစ်တကျခွဲခြားစွန့်ပစ် တတ်စေရန် ရည်ရွယ်၍ အသိပညာပေးဟောပြောသရုပ်ပြပွဲ ကျင်းပခဲ့ကြောင်း သိရသည်။ ရှေးဦးစွာ ကော့မှူးမြို့နယ် စည်ပင်သာယာရေးအဖွဲ့မှ အမှုဆောင်အရာရှိ ဦးတင်ထွန်း‌ အောင်က စွန့်ပစ်ပစ္စည်းအမှိုက်အမျိုးအစားလေးမျိုးနှင့် ပတ်သတ်၍ အမှိုက်ခြောက်၊ အမှိုက်စို ဘေးအန္တရာယ်ရှိအမှိုက်၊ ပလပ်စတစ်အမှိုက်များကို သက်ဆိုင်ရာ အမှိုက်ပုံးများ၌ စနစ်တကျ ခွဲခြားစွန့်ပစ်တတ်စေရန်၊ ပတ်ဝန်းကျင်ညစ်ညမ်းမှုတို့ ကာကွယ်ပြီး သယံဇာတအရင်းအမြစ်များ ကိုထိထိရောက်ရောက် အသုံးချနိုင်ရေး၊ အန္တရာယ်ကင်းသည့် စွန့်ပစ်မှုများ ဖြစ်စေရေးအတွက် စာသင်ကျောင်းများ၊ ဌာနဆိုင်ရာရုံးများ၊ ဈေးများနှင့် ပြည်သူများ ပူးပေါင်းပါဝင်ပြီး အမှိုက်ခွဲခြား စွန့်ပစ်တတ်သည့် အလေ့အကျင့်ကောင်းများ ရရှိစေရန်ရည်ရွယ်၍ အသိပညာပေး သရုပ်ပြပွဲ ကျင်းပခြင်းဖြစ်ကြောင်း ပြောကြားခဲ့ပါသည်။ အဆိုပါ အခမ်းအနားသို့ မြို့နယ်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ် အုပ်ချုပ်ရေးမှူးနှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့မှ အမှုဆောင်အရာရှိနှင့် ဝန်ထမ်းများ မြို့နယ်စားသုံးသူရေးရာဦးစီးဌာနမှ မြို့နယ်ကျန်းမာရေးဦးစီးဌာ၊ သက်ဆိုင်ရာရပ်ကွက် အုပ်ချုပ်ရေးမှူးများ ဈေးသူဈေးသားများ တက်ရောက်ခဲ့ကြောင်း သိရှိရပါသည်။ DOCA(ရန်ကုန်)