ပြည်ပကုန်သွယ်မှုသတင်းများ

      ဒေသတွင်း စားနပ်ရိက္ခာဖူလုံရေးနှင့် နှစ်နိုင်ငံကြား ကုန်သွယ်မှုဆက်ဆံရေး ခိုင်မာစေရန် ရည်ရွယ်လျက် ထိုင်းနှင့် စင်ကာပူ နှစ်နိုင်ငံ အစိုးရများအကြား ဆန်ကုန်သွယ်မှုဆိုင်ရာ ပူးပေါင်း ဆောင်ရွက်ရေး စာချွန်လွှာ (Memorandum of Cooperation ̶ MOC) ကို နိုဝင်ဘာလ ၇ ရက်နေ့တွင် လက်မှတ်ရေးထိုးခဲ့ကြကြောင်း၊ အဆိုပါ သဘောတူညီချက်အား ထိုင်းနိုင်ငံဘက်မှ နိုင်ငံခြား ကုန်သွယ်မှုဌာနနှင့် စင်ကာပူနိုင်ငံဘက်မှ စင်ကာပူစားနပ်ရိက္ခာအေဂျင်စီ (SFA) တို့က အဓိကပါဝင် သည့် အေဂျင်စီများအဖြစ် အကောင်အထည်ဖော် ဆောင်ရွက်မည်ဖြစ်ကြောင်း သိရှိရပါသည်။

      အဆိုပါ MOC တွင် ပါဝင်သည့် အဓိကအချက်များအနက် လက်မှတ်ရေးထိုးသည့်နေ့မှစပြီး ငါးနှစ်အတွင်း စင်ကာပူအစိုးရထံ ဆန်တန်ချိန် တစ်သိန်းအထိ ရောင်းချရန် ထိုင်းအစိုးရ၏ ကတိ ကဝတ်များ ပါဝင်ကြောင်း သိရသည်။ စင်ကာပူ၏ လိုအပ်ချက်နှင့် နှစ်နိုင်ငံလုံး၏ ထုတ်လုပ်မှုနှင့် သုံးစွဲမှု အခြေအနေများပေါ် မူတည်၍ အဆိုပါ သဘောတူညီချက်အား ငါးနှစ်အထိ ပြန်လည် သက်တမ်းတိုးနိုင်မည်ဖြစ်သည်။

     ရောင်းဝယ်မှုစနစ်သည် ပုံသေစျေးနှုန်း ကြိုတင်သတ်မှတ်ထားခြင်းမရှိပဲ အရောင်းအ၀ယ် တစ်ကြိမ်ပြုလုပ်တိုင်း ယင်းအချိန်ကာလ၌ ဖြစ်ပေါ်လျက်ရှိသော နိုင်ငံတကာဈေးကွက် ပေါက်ဈေး အပေါ် မူတည်၍ ပေးချေရန် သဘောတူညီထားသည်။ ၎င်း MOC လက်အောက်ရှိ ငွေပေးငွေယူ ကိစ္စရပ်များကို နိုင်ငံတကာ ကုန်သွယ်မှု ကျင့်ထုံးများအတိုင်း ဆောင်ရွက်သွားမည်ဖြစ်သည်။

     စင်ကာပူအနေဖြင့် တန်ချိန် ၁၀၀၀၀၀ ကို အပြည့်ဝယ်ယူရန်မလိုအပ်ကြောင်း၊ ၎င်းပမာဏ သည် ငါးနှစ်အတွင်း ဝယ်ယူရန် အများဆုံးတန်ချိန် သတ်မှတ်ထားခြင်းဖြစ်ပြီး အမှန်တကယ် ကုန်သွယ်မှုသည် စင်ကာပူဘက်မှ လိုအပ်ချက်အပေါ် မူတည်ကြောင်း၊ ငါးနှစ်တာကာလအတွင်း မည်သည့်ဘက်မှမဆို စာချွန်လွှာကို ပြန်လည်သုံးသပ်ခြင်း၊ ပြင်ဆင်ခြင်း သို့မဟုတ် ပြုပြင်ပြောင်း လဲခြင်းများကို နှစ်ဖက်သဘောတူချက်ဖြင့် တောင်းဆိုနိုင်ကြောင်း၊ မည်သည့်ဘက်မှမဆို သံတမန် လမ်းကြောင်းများမှတစ်ဆင့် အနည်းဆုံးခြောက်လ ကြိုတင်၍ အကြောင်းကြားစာပေးပို့လျက် သဘောတူညီချက်ကို ရပ်စဲနိုင်ကြောင်း သိရှိရသည်။

     ထိုင်းနိုင်ငံသည် ၂၀၂၄ ခုနှစ်တွင် စင်ကာပူသို့ တန်ဖိုးအားဖြင့် အမေရိကန်ဒေါ်လာ ၁၀၂.၁၄ သန်းရှိသော ဆန် ၁၁၃၅၄၉ တန်ကို တင်ပို့နိုင်ခဲ့သည်။ ၂၀၂၅ ခုနှစ် ပထမကိုးလအတွင်း ထိုင်းနိုင်ငံမှ စင်ကာပူနိုင်ငံသို့ ဆန်တန်ချိန် ၉၀၀၃၁ တင်ပို့ထားပြီးဖြစ်ရာ ပမာဏအားဖြင့် ၈၅၇၄၂ တန်ရှိခဲ့သည့် ၂၀၂၄ ခုနှစ် အလားတူကာလထက် ၅% တိုးတက်လာခဲ့ပါသည်။ ထိုသို့ တင်ပို့သည့် ဆန်ပို့ကုန် အများစုမှာ ထိုင်းစံပယ်ဆန် (၄၉.၉၉%)၊ ဆန်ဖြူ (၂၉.၀၄%) နှင့် ထိုင်းဆန်မွှေး (၁၆.၂၆%) တို့ဖြစ်သည်။ လက်ရှိကာလ၌ ထိုင်းသည် စင်ကာပူသို့ တတိယမြောက် ဆန်အများဆုံး တင်ပို့သည့် နိုင်ငံဖြစ်ပြီး စျေးကွက်ဝေစု ၂၂.၃၄% ဖြင့်လည်းကောင်း၊ အိန္ဒိယမှ ၄၂.၈၂% ဖြင့်လည်းကောင်း၊ ဗီယက်နမ်မှ ၂၈.၁၀% ဖြင့်လည်းကောင်း အသီးသီး ရပ်တည်လျက်ရှိကြသည်။

Source: The Nation Thailand, November 07, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

   အိန္ဒိယနိုင်ငံ၏ နေရာ‌ဒေသများစွာ၌ မိုးရွာသွန်းမှုများကြောင့် သီးနှံများထိခိုက်ပျက်စီးခဲ့ရာ ၂၀၂၅ ခုနှစ် မိုးသီးနှံရာသီတွင် စိုက်ပျိုးထုတ်လုပ်မှုမှ ပဲမျိုးစုံထွက်ရှိနိုင်မှုမှာ ယခင်နှစ်အောက် လျော့နည်းကျဆင်းမည်ဟု လေ့လာဆန်းစစ်သူများက ပြောဆိုကြောင်း၊ အထူးသဖြင့် မိုးရာသီ၌ စိုက်ပျိုးမှု အများဆုံးဖြစ်သော ပဲစင်းငုံသည် ယခင်နှစ်တွင် တန်ချိန် ၃.၅၆ သန်း ထွက်ရှိခဲ့ရာမှ ယခုနှစ်၌ တန်ချိန် ၃ သန်းမှ ၃.၄ သန်း အတွင်းသာ ထွက်ရှိနိုင်မည်ဟု ခန့်မှန်းလျက်ရှိကြကြောင်း Informist Media သတင်းဝက်ဘ်ဆိုက်က ဖော်ပြထားသည်။

     အလားတူ မတ်ပဲထုတ်လုပ်မှုသည်လည်း ယခင်နှစ်တွင် တန်ချိန် ၁.၃ သန်းခန့်ရှိခဲ့ရာမှ ၂၀၂၅ မိုးသီးနှံရာသီ၌ တန်ချိန် ၉ သိန်းမှ ၁.၂ သန်း အကြားသို့ လျော့နည်းထွက်ရှိနိုင်ကြောင်း၊ မိုးပဲတီစိမ်း ထုတ်လုပ်မှုမှာ ယခင်နှစ်၌ တန်ချိန် ၁.၇၅ သန်းရှိပြီး ယခုနှစ်တွင် တန်ချိန် ၁ သန်းမှ ၁.၇ သန်း အကြားသို့ ကျဆင်းနိုင်ကြောင်း လေ့လာဆန်းစစ်သူများက ပြောဆိုထားသည်။

     စိုက်ပျိုးရေးဝန်ကြီးဌာန၏ ၂၀၂၅ ခုနှစ် မိုးသီးနှံစိုက်ပျိုးမှုဧရိယာ အပြီးသတ်စာရင်းများအရ အိန္ဒိယနိုင်ငံတစ်ဝန်းလုံး၌ ပဲစင်းငုံ ဟက်တာ ၄.၆၆ သန်းရှိပြီး ယခင်နှစ် စိုက်ဧရိယာ ဟက်တာ ၄.၆၅ သန်းထက် အနည်းငယ် ပိုမိုခဲ့သည်။ မတ်ပဲစိုက်ဧရိယာသည် ဟက်တာ ၂.၄၄ သန်းဖြင့် ယခင်နှစ် စိုက်ပျိုးမှုထက် ၇ ရာခိုင်နှုန်း ပိုမိုခဲ့သည်။ ပဲတီစိမ်းမှာမူ ယခင်နှစ် စိုက်ပျိုးနိုင်မှု ဟက်တာ ၃.၅၀ သန်း အောက်သို့ အနည်းငယ်လျော့နည်းလျက် ဟက်တာ ၃.၄၉ သန်း စိုက်ပျိုးနိုင်ခဲ့သည်။

     အနောက်တောင်မုတ်သုံလေ တိုက်ခတ်မှုရာသီ နောက်ဆုံးအချိန်ကာလ၌ နိုင်ငံတစ်ဝန်းလုံး ရှိ နယ်မြေဒေသအများအပြားတွင် ပြင်းထန်သည့်အဆင့်မှ အလွန်အမင်း ပြင်းထန်သောအဆင့်ရှိ သည့် မိုးသည်းထန်စွာ ရွာသွန်းမှုများကို ကြုံတွေ့ခဲ့ကြရပြီး အခြေခံအဆောက်အအုံများ ထိခိုက် ပျက်စီးမှုဖြစ်ပေါ်ခဲ့သည်။ ဇွန် ၁ ရက်မှ စက်တင်ဘာ ၃၀ ရက်အထိ အနောက်တောင်မုတ်သုံရာသီ ကာလအတွင်း မိုးရွာသွန်းမှုမှာ ပုံမှန်အထက်တွင် ၉၃၇.၂ မီလီမီတာဖြင့် မိုးရေချိန်ရရှိခဲ့ကြောင်း အိန္ဒိယမိုးလေဝသဌာန၏ အချက်အလက်များအရ သိရှိရသည်။

  မုတ်သုံလေ ပြန်လည်ဆုတ်ခွာမှု ရက်သတ္တနှစ်ပတ်ခန့် ရပ်တန့်နေခဲ့သည့် ကာလအတွင်း နိုင်ငံ၏ နေရာဒေသ အများစု၌ စိုစွတ်သည့်ရာသီဥတု ဖြစ်ပေါ်နေခဲ့ခြင်းက မုတ်သုံရာသီကာလကို တိုးချဲ့ရရှိသည့် အခြေအနေဖြစ်စေခဲ့သည်။ ပုံမှန်အားဖြင့် မုတ်သုံဆုတ်ခွာသည့် အောက်တိုဘာ ၁ ရက်မှ ၁၅ ရက်ထိ ကာလ၌ နယ်မြေဒေသများစွာသည် ခြောက်သွေ့သော ရာသီဥတုကို ကြုံတွေ့ရ လေ့ရှိသည်။

   အနောက်တောင်မုတ်သုံလေ ဆုတ်ခွာပြီးစီးသည့် အောက်တိုဘာ ၁၆ ရက်နေ့ နောက်ပိုင်း တွင်လည်း နိုင်ငံအတွင်း နေရာဒေသ အများအပြားသည် ကာလရှည် မိုးဆက်လက်ရွာသွန်းမှုကို ကြုံ တွေ့ခဲ့ကြရသည်။ နေရောင်ခြည် ဆက်တိုက်ရရှိချိန် တိုတောင်းခြင်းက စိုက်ခင်းများကို ခြောက်သွေ့ စေရမည့်အစား ရိတ်သိမ်းပြီးသီးနှံများကို ထိခိုက်ပျက်စီးမှုဖြစ်ပေါ်စေခဲ့ပြီး ပြည်နယ်များစွာက သီးနှံ မျိုးစုံ ပျက်စီးမှုဖြစ်ပေါ်ခဲ့ကြောင်း သတင်းပေးပို့တင်ပြခဲ့ကြသည်။ အောက်တိုဘာ ၁ ရက်မှ နိုဝင်ဘာ ၆ ရက်အထိ ကာလအတွင်း အိန္ဒိယနိုင်ငံအနေဖြင့် မိုးရေချိန် ၁၂၀.၆ မီလီမီတာ စံချိန်တင် ရရှိခဲ့ပြီး ပုံမှန်မိုးရေချိန် ၈၃.၆ မီလီမီတာထက် ၄၄ ရာခိုင်နှုန်း ပိုမိုကြောင်း အိန္ဒိယမိုးလေဝသဌာနက ဖော်ပြ ခဲ့သည်။

     မူဝါဒဆိုင်ရာမျက်မှောက်ရေးရာတင်ဆက်သူနှင့် ကုန်စည်ဈေးကွက်ကျွမ်းကျင်သူ တစ်ဦးဖြစ် သော G. Chandrashekhar က မိုးသီးနှံရာသီမှ ပဲစင်းငုံ၊ မတ်ပဲနှင့် ပဲတီစိမ်း ထုတ်လုပ်မှု စုစုပေါင်း သည် စက်တင်ဘာ ၂၉ ရက်နေ့၌ တန်ချိန် ၆.၄ သန်းရှိလိမ့်မည်ဟု ခန့်မှန်းခဲ့ပြီး ယခင်နှစ် အလားတူ ကာလ၌ ထုတ်လုပ်မှု တန်ချိန် ၆.၆၁ သန်းအောက် ကျဆင်းခဲ့သည်။ မိုးသီးနှံရာသီမှ ပဲစင်းငုံ တန်ချိန် ၃.၄ သန်း၊ မတ်ပဲ တန်ချိန် ၁ သန်းနှင့် ပဲတီစိမ်း တန်ချိန် ၁.၇ သန်း အသီးသီးထွက်ရှိနိုင်ကြောင်း သို့သော် အောက်တိုဘာလ၌ မိုးဆက်လက်ရွာသွန်းမှုရှိနေသဖြင့် ၎င်း၏ခန့်မှန်းချက်မှာ ပြင်ဆင်ရန် လိုအပ်လိမ့်မည်ဖြစ်ကြောင်း၊ ထုတ်လုပ်မှုအပေါ် အရေအတွက်အရ ဆုံးရှုံးမှုနှင့် အရည်အသွေးအရ ဆုံးရှုံးမှုဟူ၍ ထိခိုက်နိုင်သည့် အချက်နှစ်ရပ်ရှိကြောင်း၊ ကိန်းဂဏန်းအရ တိုးတက်မှုရှိသော်လည်း ရိတ်သိမ်းရရှိမှုမှာ အရေအတွက် လျော့ကျနိုင်ကြောင်း၊ ထိုသို့ထွက်ရှိလာရာတွင်လည်း သီးနှံအချို့ သည် သင့်တင့်မျှတသော ပျမ်းမျှအရည်အသွေး (FAQ) ကို ပြည့်မီခြင်းမရှိသော စံချိန်စံညွှန်း မပြည့်မီ သည့် အခြေအနေရှိနိုင်ကြောင်း Mr. Chandrashekhar က ပြောဆိုထားသည်။

   မိုးရွာသွန်းမှု လွန်ကဲခြင်းကြောင့် သီးနှံစိုက်ပျိုးမှုနှင့် ထွက်ရှိမှုတို့ကို ရိုက်ခတ်မှုဖြစ်ပေါ်ခဲ့ချိန်၌ ရိတ်သိမ်းရရှိလာမည့် ကောက်ပဲသီးနှံများ၏ တစ်စိတ်တစ်‌ဒေသသည်လည်း အရည်အသွေးပိုင်း  ထိခိုက်မှုဖြစ်ပေါ်နေခဲ့သည်။ မဟာရဋ္ဌပြည်နယ် Solapur မြို့ အခြေစိုက် ကုန်သည်တစ်ဦးဖြစ်သူ Mukesh Sanklecha က ပဲတီစိမ်းဈေးကွက်တွင် အရည်သွေးကောင်းမွန်သည့် ကုန်ပစ္စည်းများ ဝင် ရောက်မှု ကင်းမဲ့နေကြောင်း၊ စက်တင်ဘာ ဒုတိယလဝက် ကာလအတွင်း မိုးလွန်ကဲစွာ ရွာသွန်းခြင်း က ရိတ်သိမ်းပြီးနှင့် သိုလှောင်ထားသည့် ပဲများကို အစိုဓာတ်မြင့်မားစေလျက် ထိခိုက်ပျက်စီးစေ ကြောင်း၊ လက်ရှိကာလတွင် ဈေးကွက်၌ အရည်အသွေး နိမ့်ကျသည့်အဆင့်မှ အလယ်အလတ်တန်း အဆင့်ရှိသော ပဲများကိုသာ လက်ခံရရှိလျက်ရှိကြောင်း ပြောကြားခဲ့သည်။

   အလားတူ IGrain ကုမ္ပဏီမှ ဒါရိုက်တာ Rahul Chauhan က မိုးသီးနှံ ပဲမျိုးစုံထုတ်လုပ်မှုမှာ အထွက်ကျဆင်းပြီး စုစုပေါင်း တန်ချိန် ၅.၈ သန်းခန့်သာရှိမည်ဟု ခန့်မှန်းထားသည်။ ထိုကဲ့သို့ ကိန်းဂဏန်းပမာဏ ကြီးမားစွာ ကျဆင်းသည့် အကြောင်းအရင်းမှာ အဓိကအားဖြင့် မိုးကြီးမှုကြောင့် သီးနှံများ ထိခိုက်မှုနှင့် ပျက်စီးဆုံးရှုံးမှုပင် ဖြစ်ကြောင်း၊ ပဲမျိုးစုံနှင့် ပဲပုပ်သီးနှံများ ထိခိုက်ပျက်စီးမှု ရှိသည်ဟု အစီရင်ခံတင်ပြချက်များရှိပြီး ထုတ်လုပ်မှုသည် ယခင်နှစ်ကထက် နည်းပါးလိမ့်မည်ဖြစ် ကြောင်း၊ ကျန်ရှိသည့် အခြားသီးနှံများမှာမူ ယခင်နှစ်ကထက် အထွက်များပြားဖွယ်ရှိကြောင်း၊ ၂၀၂၅ ခုနှစ် မိုးသီးနှံရာသီမှ ပဲစင်းငုံ တန်ချိန် ၃ သန်း၊ မတ်ပဲ တန်ချိန် ၁.၂ သန်းနှင့် ပဲတီစိမ်း တန်ချိန် ၁.၆ သန်း အသီးသီးထွက်ရှိနိုင်မည်ဟု ခန့်မှန်းထားကြောင်း ပြောဆိုခဲ့သည်။

      Mr. Sanklecha ၏ ပြောဆိုချက်အရ ပဲစင်းငုံ အဓိကစိုက်ပျိုးရာ မဟာရဋ္ဌနှင့် ကာနာတကာ ပြည်နယ်များတွင် ရာသီဥတု မျက်နှာသာမပေးမှုနှင့် အချိန်အခါမဟုတ် မိုးရွာသွန်းမှုများကြောင့် ပဲစင်းငုံထွက်ရှိမှုသည် ၁၅ ရာခိုင်နှုန်းမှ ၂၀ ရာခိုင်နှုန်းအထိ လျော့နည်းဖွယ်ရှိကြောင်း သိရှိရသည်။

     အိန္ဒိယ ပဲမျိုးစုံနှင့်ကောက်ပဲသီးနှံအသင်း (IPGA) မှ အတွင်းရေးမှူး Satish Upadhyay က ယခုနှစ်တွင် ၎င်းတို့အသင်းအနေဖြင့် ကွင်းဆင်းစစ်တမ်းကောက်ယူမှုများ လုပ်ဆောင်နိုင်ခြင်း မရှိ သော်လည်း ဈေးကွက်အရင်းအမြစ်များအရ မိုးသီးနှံ ပဲမျိုးစုံထွက်ရှိမှု ကျဆင်းမည်ဟု ခန့်မှန်းထား ကြောင်း၊ ပဲစင်းငုံသည် တန်ချိန် ၂.၈ သန်းမှ ၃ သန်းအတွင်း လျော့နည်းထွက်ရှိနိုင်ပြီး ပဲတီစိမ်းမှာမူ တန်ချိန် ၁ သန်းမှ ၁.၅ သန်းအတွင်း ထွက်ရှိမည်ဟု ခန့်မှန်းရကြောင်း၊ မတ်ပဲထွက်ရှိမှုမှာ သိသာစွာ လျော့နည်းပြီး တန်ချိန် ၉ သိန်းမှ ၁ သန်းအကြား ရှိမည်ဟု ခန့်မှန်းထားကြောင်း ပြောကြားခဲ့သည်။

    Mr. Upadhyay ၏ အဆိုအရ မဒ္ဒရာပရာဒေ့ရှ်ပြည်နယ်မြောက်ပိုင်းရှိ နိုင်ငံ၏မတ်ပဲထုတ်လုပ် ရာ အဓိကဒေသတစ်ခုဖြစ်သော Bundelkhand တွင် မိုးအဆက်မပြတ် ရွာသွန်းမှုကြောင့် ယခုနှစ် မတ်ပဲအထွက်ကို ထိခိုက်မှုဖြစ်စေခဲ့ကြောင်း၊ ထို့အပြင် မတ်ပဲ အဓိကစိုက်ပျိုးသည့် အခြားဒေသ တစ်ခုဖြစ်သော ဥတာပရာဒေ့ရှ်ပြည်နယ်ရှိ Saharanpur ဒေသတွင်လည်း မိုးသည်းထန်မှုကြောင့် မတ်ပဲစိုက်ပျိုးမှု၏ ၅၀ ရာခိုင်နှုန်းခန့် ပျက်စီးခဲ့ရကြောင်း၊ သို့သော် ၎င်းပြည်နယ်ရှိ Chandausi ဒေသ ၌မူ မတ်ပဲအထွက် ကောင်းမွန်ကြောင်း သိရှိရသည်။

     ထိုကဲ့သို့ သီးနှံများ ထိခိုက်ပျက်စီးခြင်းအပြင် မိုးသည်းထန်စွာရွာသွန်းခြင်းကြောင့် စိုက်ပျိုးမှု သက်တမ်းတိုတောင်းသော ရက် ၉၀ ပဲစင်းငုံစိုက်ခင်းများမှ သီးနှံရိတ်သိမ်းခူးဆွတ်မှုမှာ နှောင့်နှေးမှု များဖြစ်ပေါ်လျက်ရှိသည်ဟု ဈေးကွက်အတွင်းလုပ်ကိုင်သူများက ပြောဆိုသည်။ မဟာရဋ္ဌပြည်နယ် Akola မြို့အခြေစိုက် ကုန်သည်တစ်ဦးဖြစ်သော Ashok Gupta က ကာနာတကာပြည်နယ်၌ အဆိုပါ ပဲစင်းငုံမျိုးကို ရိတ်သိမ်းမှုမှာ ၁၅ ရက်ခန့် နှောင့်နှေးဖွယ်ရှိသော်လည်း ၎င်းတို့ပြည်နယ်တွင်မူ တစ်လ ကြာအထိ ကြန့်ကြာမှုရှိနိုင်ကြောင်း ပြောကြားခဲ့သည်။

   အိန္ဒိယနိုင်ငံ၌ ၂၀၂၅ ခုနှစ်တွင် မိုးသီးနှံရာသီမှ ပဲမျိုးစုံထွက်ရှိနိုင်မည့် အခြေအနေကို လေ့လာ ဆန်းစစ်သူ ၃ ဦးက ခန့်မှန်းထားရှိမှုအား အောက်ပါဇယားအတိုင်း တွေ့ရှိရသည်။

Source: Informist Media, 8 November 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

   ကမ္ဘောဒီးယားနိုင်ငံ၊ ဖနွမ်းပင်မြို့တွင် ၂၀၂၅ ခုနှစ်၊ နိုဝင်ဘာ ၇ ရက်မှ ၉ ရက်အထိ ကျင်းပခဲ့သော The Rice Trader (TRT) ကမ္ဘာ့ဆန်ညီလာခံတွင် ကမ္ဘောဒီးယားနိုင်ငံမှ Malys Angkor သည် ၂၀၂၅ ခုနှစ်၏ ကမ္ဘာ့အကောင်းဆုံးဆန်ဆုကို ရရှိခဲ့သည်။ ယခင် ၂၀၁၂၊ ၂၀၁၃၊ ၂၀၁၄၊ ၂၀၁၈၊ ၂၀၂၂ နှင့် ၂၀၂၄ တို့တွင် ရရှိခဲ့ပြီးနောက် ကမ္ဘောဒီးယားဆန်သည် ဤဂုဏ်သိက္ခာရှိသော နိုင်ငံတကာဆုကို ခုနစ်ကြိမ်မြောက် ရရှိခဲ့ခြင်းဖြစ်သည်။ ကမ္ဘာ့ဆန်ညီလာခံသည် ဆန်လုပ်ငန်းနှင့်ထုတ်လုပ်မှု၊ ကုန်သွယ်ရေး၊ ထောက်ပံ့ပို့ဆောင်ရေး နှင့် စားသုံးမှုတို့တွင် ပါဝင်ပတ်သက်သော အကျိုးတူပါဝင်သူများကို စုစည်းပေးသည့် နှစ်စဉ် ကမ္ဘာလုံးဆိုင်ရာပွဲတစ်ခုဖြစ်သည်။ ကမ္ဘောဒီးယားဆန်စပါးအဖွဲ့ချုပ် (CRF) မှ အစီရင်ခံစာ တစ်ခုအရ ၂၀၂၅ ခုနှစ် ပထမ (၉) လအတွင်း နိုင်ငံတော်သည် ဆန်တန်ချိန် ၅၉၆,၃၄၁ တန် တင်ပို့ခဲ့ပြီး ယမန်နှစ်ကာလတူတွင် တန်ချိန် ၄၄၅,၉၁၃ တန် တင်ပို့ခဲ့ပြီး ၃၃.၇ ရာခိုင်နှုန်း မြင့်တက်လာခဲ့သည်။ ၂၀၂၅ ခုနှစ် ဇန်နဝါရီလမှ စက်တင်ဘာလအတွင်း တင်ပို့မှုမှ ဝင်ငွေ အမေရိကန်ဒေါ်လာ ၄၀၈ သန်း ရရှိခဲ့ပြီး ၂၀၂၄ ခုနှစ်တွင် မှတ်တမ်းတင်ထားသော အမေရိကန်ဒေါ်လာ ၃၃၅ သန်းမှ ၂၁ ရာခိုင်နှုန်း မြင့်တက်လာခဲ့သည်။

DOCA(ရန်ကုန်)

  နိုင်ငံ၏အစားအစာဖူလုံမှုအားကောင်းရန်ကြိုးပမ်းမှု တစ်စိတ်တစ်ပိုင်းအနေဖြင့် အင်ဒိုနီးရှားသည် ၂၀၂၆ ခုနှစ်တွင် သကြားကိုယ်တိုင်ဖူလုံရန် ရည်ရွယ်ထားကြောင်း စိုက်ပျိုးမွေးမြူရေးဝန်ကြီး Andi Amran Sulaiman က နိုဝင်ဘာလ ၈ ရက်နေ့က ပြောကြားခဲ့ပါ သည်။ Sulaiman က လာမည့်နှစ်တွင် ၎င်းတို့သည် သကြားကိုယ်တိုင်ဖူ လုံနိုင်စွမ်းရှိပြီဖြစ်ကြောင်း ရင်းနှီးမြှုပ်နှံမှုဝန်ကြီး Rosan Perkssa Roeslani နှင့် Plantation and Industry Downstream ပရိုဂရမ်နှင့်ပတ်သတ်၍ အစည်းအဝေးအပြီးတွင် ပြောကြားခဲ့ကြောင်း သိရပါသည်။ အစိုးရသည် ကြံပင်ထုတ်လုပ်နိုင်စွမ်းတိုးမြှင့်ခြင်းနှင့် သကြားစက်များကို ခေတ်မီစေရန် ဆောင်ရွက်ခြင်းအားဖြင့် လာမည့် ၃ နှစ်မှ ၄ နှစ်အတွင်း သကြားအပြည့်အဝကိုယ်တိုင်ဖူလုံနိုင်ရန် ရည်ရွယ်ထားကြောင်း သိရပါသည်။ Sulaiman က ထိုကနဦးဆောင်ရွက်မှုသည် စိုက်ပျိုးမှုကဏ္ဍအားကောင်းရေးနှင့် ကမ္ဘာလုံးဆိုင်ရာစိန်ခေါ်မှုများ အကြား စီးပွား‌ရေးအမီအခိုကင်းလွတ်မှုမြှင့်တင်ရေးတို့တွင် အဓိက ကျသောခြေလှမ်းတစ်ရပ် ဖြစ်ကြောင်းနှင့် အစိုးရသည်ကမ္ဘာ့ဒုတိယအကြီးမားဆုံးသကြားတင်ပို့သူ အဖြစ်ရပ်တည်ခဲ့သည့် နိုင်ငံ၏ ၁၉၃၀ ခုနှစ်များကရွှေရောင်နေ့ရက်များဆီသို့ပြန်လည်ရောက်ရှိရန် ရည်ရွယ်ထား ကြောင်း ပြောကြားခဲ့ပါသည်။ စိုက်ပျိုးမွေးမြူရေးဝန်ကြီးဌာနက မူကြမ်းရေးဆွဲထား သည့် နိုင်ငံတော်သကြားကိုယ်တိုင်ဖူလုံနိုင်ရေးလမ်းပြမြေပုံသည် စားသုံးရန်သကြားလိုအပ်ချက် ကို ၂၀၂၈ ခုနှစ်တွင် ဖူလုံရန်နှင့် စက်မှုကဏ္ဍနှင့် ဘိုင်အိုအီသနောလိုအပ်ချက်ပါဝင်သော စုစုပေါင်း သကြားဖူလုံနိုင်စွမ်းကို ၂၀၃၀ ခုနှစ်တွင် ပြည့်မီရန် ရည်ရွယ်ထားကြောင်း သိရပါသည်။ သမ္မတ Prabowo Subianto က ဝန်ကြီးဌာနအား ထိုအချိန်အတွင်းအရှိန်အဟုန်မြှင့်ဆောင်ရွက်ရန် တိုက်တွန်းထားကြောင်း သိရပါသည်။ ၂၀၂၅ ခုနှစ်တွင် အင်ဒိုနီးရှားသည် ကြံစိုက်ခင်း ၅၃၈၀၀၀ ဟတ်တာမှ တန်ချိန် ၂.၇၅ သန်းထွက်ရှိရန် မျှော်မှန်းရကြောင်း သိရပါသည်။ ကိုယ်တိုင်ဖူလုံနိုင်စွမ်း ရရှိရန်အတွက် အစိုးရသည် ပိုမိုကောင်းမွန်သော မျိုးစေ့များအသုံးပြုခြင်း၊ ဆည်မြောင်းစနစ်များ အဆင့်မြှင့်တင်ခြင်းနှင့် ကြံစိုက်ခင်းကို ဟတ်တာ ၅၀၀၀၀၀ ထပ်မံတိုးချဲ့ခြင်းတို့ဖြင့် ထုတ်လုပ်မှု တိုးမြှင့်ရန်စီစဉ်နေကြောင်း သိရပါသည်။ သကြား စက်ရုံ ၁၀ ခုကိုလည်း ဂျဗားနှင့် အခြားဒေသများ တွင်တည်ဆောက်ခြင်းသို့မဟုတ် ပြန်လည်လည်ပတ် ခြင်းတို့ဆောင်ရွက်သွားမည်ဟု သိရပါသည်။

DOCA (ရန်ကုန်)

   ထိုင်းနိုင်ငံမော်တော်ဆိုင်ကယ်ဈေးကွက်သည် ၂၀၂၅ ခုနှစ်၏ စတုတ္ထ ၃ လပတ်ကာလတွင် ဆက်လက်နှေးကွေးရန်ခန့်မှန်းရကြောင်း Yamaha မော်တော်ဆိုင်ကယ်များကို ဖြန့်ဖြူးသူ ဖြစ်သည့် Thai Yamaha Motor က ပြောကြားခဲ့ပါသည်။ Thai Yamaha Motor ၏ စီးပွားရေး အကြီးအကဲ Panupol Kittikamron က ဘဏ်များနှင့် ဘဏ္ဍာရေးကုမ္ပဏီများထံမှ တင်းကြပ်သည့် ငွေချေးမှုတို့ကြောင့် ဈေးကွက်ကြီးထွားမှုကို ဆက်လက်အကန့်အသတ်ဖြစ် နေကြောင်းနှင့် ၎င်း သည် စတုတ္ထ ၃ လပတ်ကာလတွင် လုပ်ငန်းနယ်ပယ်ကိုသက်ရောက်စေ သည့် အဓိကအကြောင်း အရာဖြစ်ကြောင်းပြောကြားခဲ့ပါသည်။ အောက်တိုဘာလမှစ၍ ပြည်တွင်းဘဏ္ဍာရေးအသင်းများ သည် စီးပွားရေးမသေချာမရေရာမှုများကြောင့် ငွေ‌ချေးမှုများကို တင်းကြပ်ခဲ့ကြောင်း သိရပါသည်။ ကုမ္ပဏီက ထိုစီမံချက်များ၏နောက်ကွယ်ရှိအကြောင်း ပြချက်သည် မြင့်မားသောအိမ်ထောင်စု ကြွေးမီနှင့် စားသုံးသူဝယ်လိုအားကျဆင်းမှုတို့ ဖြစ်ကြောင်း ပြောကြားခဲ့ပါသည်။ အခြားဖိအားများ တွင် စိုက်ပျိုးမွေးမြူရေးထုတ်ကုန် ဈေးနှုန်းများကျဆင်းမှု၊ အိမ်ထောင်စုများ၏ဝင်ငွေနှင့် ငွေသုံးစွဲမှု ကိုထိခိုက်စေသည့် ရေလွှမ်းမိုးမှုတို့ပါဝင်ကြောင်း သိရပါသည်။ ထိုစိန်ခေါ်မှုများရှိနေသော်လည်း Thai Yamaha သည် ၂၀၂၅ ခုနှစ်အတွက် ရောင်းအားကို အစီးရေ ၂၈၀၀၀၀ သတ်မှတ်ထားပြီး ဈေးကွက်ဝေစုကို လက်ရှိ ၁၄ ရာခိုင်နှုန်းမှ ၁၆ ရာခိုင်နှုန်းနှင့် လာမည့် ၃ နှစ်အတွင်း ၂၀ ရာခိုင်နှုန်း ထိရရှိရန် ရည်မှန်းထားကြောင်း သိရပါသည်။ ၂၀၂၄ ခုနှစ်တွင် Yamaha သည် ထိုင်းနိုင်ငံတွင် အစီးရေ ၂၃၂၀၀၀ စီးရောင်းချခဲ့ရကြောင်း သိရပါသည်။ ကြီးထွားမှုကိုပံ့ပိုးရန်အတွက် ကုမ္ပဏီ သည် ၂၀၂၆ ခုနှစ်တွင် မော်ဒယ်သစ် ၃ မျိုးထပ်မံထုတ်လုပ်ပြီး ၎င်းတို့၏ အရောင်းကိုယ်စားလှယ် ကွန်ယက်ကို ၃၀ ခုထပ်မံတိုးချဲ့ရန် စီစဉ်နေကြောင်း သိရပါသည်။ အခြေခံအဆောက်အအုံမလုံ လောက်မှုနှင့် မယှဉ်ပြိုင်နိုင်သောဈေးနှုန်းကြောင့် Yamaha သည် ထိုင်းနိုင်ငံတွင် လျှပ်စစ် မော်တော်ဆိုင်ကယ်ကိုမိတ်ဆက်ရန် အစီအစဉ်မရှိသေးကြောင်း သိရပါသည်။ ထိုင်းနိုင်ငံစက်မှု လုပ်ငန်းအဖွဲ့ချုပ်၏အဆိုအရ ၂၀၂၅ ခုနှစ်၏ ပထမ ၉ လတွင် ပြည်တွင်းမော်တော်ဆိုင်ကယ် ရောင်းချရမှုမှာ အစီးရေ ၁.၃၁ သန်းဖြင့်၂၀၂၄ ခုနှစ် တူညီသည့်ကာလနှင့်နှိုင်းယှဉ်ပါက ၂.၆ ရာခိုင်နှုန်းမြင့်တက်ခဲ့ကြောင်း သိရပါသည်။ အဖွဲ့ချုပ်က တင်ပို့မှုအပါအဝင် ၂၀၂၅ ခုနှစ်အတွက် စုစုပေါင်းထုတ်လုပ်နိုင်စွမ်းကို အစီးရေ ၂.၁ သန်းခန့်မှန်းထားကြောင်း သိရပါသည်။ Thai Yamaha သည် ယခုနှစ်အတွက် စုစုပေါင်းပြည်တွင်းရောင်းချရမှုကို အစီးရေ ၁.၇ သန်း မျှော်မှန်းထား ကြောင်း သိရပါသည်။

 DOCA (ရန်ကုန်)