ပြည်တွင်းကုန်သွယ်မှုသတင်း

         ဧရာဝတီတိုင်းဒေသကြီး၊ ပန်းတနော်မြို့နယ်တွင် ယခုနှစ် မိုးသီးနှံစိုက်ပျိုးရာသီတွင် ကွမ်းဈေးကွက်ကောင်းမွန်နေ၍ ဒေသခံတောင်သူများက မြေအောက်ရေကိုအမှီပြုပြီး တစ်နိုင်တစ်ပိုင် ကွမ်းစိုက်ပျိုးရေးလုပ်ငန်းကို အားထားလုပ်ကိုင်ကြကြောင်း ပန်းတနော်မြို့နယ်အတွင်းရှိ ဒေသခံတောင်သူများထံမှသိရသည်။ မိုးစိုက်သည် ကွမ်းပိုးကျလွယ်သည့်အတွက် ဆောင်းစိုက်ကိုသာ ဦးစားပေးစိုက်ပျိုးကြကြောင်း၊ စိုက်ပျိုးသည့်ကွမ်းအမျိုးအစားများမှာ ကွမ်းနုဝါနှင့် ကွမ်းရွက်စိမ်းနှစ်မျိုးရှိသည့်အနက် ကွမ်းနုဝါကို ပိုမိုစိုက်ပျိုးကြကြောင်းသိရသည်။

           ကွမ်းစိုက်ပျိုးရန်အတွက် ကွမ်းမျိုး(ကွမ်းအညွန့်)များကို တစ်ညွန့်လျှင် လက်ကားဈေး ၁၈၀ကျပ်၊ ကွမ်းတိုင် ၁၈၀ကျပ်ဖြင့်ဝယ်ယူကာ ၁၀လံ ၁ကွက်ကို ၂၅၀၀ညွန့်စိုက်ပျိုးကြောင်း၊ မိုးခြံဆိုလျှင် တပေါင်း၊ တခူးလတွင် စတင်စိုက်ပျိုးပြီးကြကြောင်း၊ နွေခြံဆိုလျှင် သီတင်းကျွတ်၊ တန်ဆောင်မုန်းလတို့တွင် စတင်စိုက်ပြီး ၃လခွဲကြာလျှင် စတင်ခူးဆွတ်ရကြောင်း၊ ၁လကို ၂ခါခူးဆွတ်၍ (၁၅)ရက် ၁ခါခူး၍ အများဆုံး ၉လအထိခူးရကြောင်းနှင့်  အနည်းဆုံး ၆လအထိခူးရသည်။  တစ်ခါခူးလျှင် (၅၀)ပိဿာခန့်ထွက်ပြီး (၁၅)ရက်တစ်ခါ ရန်ကုန်သို့ ကွမ်းရွက်များတင်ပို့ကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် တစ်ဧကလျှင် ငွေကျပ်၃၅သိန်းခန့်ကုန်ကျကြောင်း၊ ၁၅ရက် ၁ခါ ကွမ်းခူး၊ ဆေးဖြန်း၊ လုပ်သားခ ၁၅၀၀၀၀ကျပ်(သို့မဟုတ်) ၂၀၀၀၀၀ကျပ်ကုန်ကျကြောင်း၊ အထွက်နှုန်းအနေဖြင့် ကွမ်းရွက်ကို ၁၅ ရက်ခြားတစ်ကြိမ်ခူးဆွတ်ရပြီး တစ်ကြိမ်ခူးဆွတ်လျှင် ၅၀ပိဿာခန့်ထွက်ရှိရာ တစ်လလျှင် ပိဿာချိန်၁၀၀ထွက်ရှိကြောင်း၊ ဈေးနှုန်းဈေးကွက်အနေဖြင့် လက်ကားဈေးတစ်ပိဿာလျှင် ငွေကျပ်၂၈၀၀၀ဖြင့် ရန်ကုန်မြို့ ကွမ်းဒိုင်များသို့လည်း တင်ပို့ရောင်းချကြောင်းသိရှိရပါသည်။

DOCA(ဧရာဝတီ)

     ၂၀၂၄ခုနှစ်၊ စက်တင်ဘာလ မြန်မာနိုင်ငံသဘာဝရေဘေးဒဏ်ကြောင့် နိုင်ငံတဝှမ်းလမ်းပန်း ဆက်သွယ်မှု့ပြတ်တောက်ခြင်း၊ သီးနှံစိုက်ခင်းများ ပျက်စီးဆုံးရှုံးခြင်း၊လုပ်ကိုင်အကျိုးစီးပွားထိခိုက်နစ်နာမှုများတွင် ရှမ်းပြည်နယ်တောင်ပိုင်းဒေသအတော်များများခံစားခဲ့ရပြီး အင်းလေးဒေသဆိုလျှင် ယခုတိုင်ဘေးဒုက္ခခံစားနေရတုံးပင်ဖြစ်ပါသည်။

     အင်းလေးဒေသသည် အရည်အသွေးကောင်းသော ခရမ်းချဉ်(အင်းသီး)ကို အမြောက်အများ ထုတ်လုပ်ရာဒေသဖြစ်ပါသည်။ ယခုအခါရေလွှမ်းဒဏ်ကြောင့် ခရမ်းချဉ်စိုက်ခင်းများနှင့် အင်းလေး ကန်စပ်တလျောက်ကျေးရွာများမှအခြား သီးနှံစိုက်ခင်းများလည်းပျက်စီးဆုံးရှုံးခဲ့ရာ ကုန်စိမ်းသီးနှံဈေးကွက် လိုအပ်ချက်ဖြစ်လာနိုင်ကြောင်း ပွဲရုံလုပ်ငန်းရှင်များထံမှ သိရှိရပါသည်။

    ညောင်ရွှေ၊ရွှေညောင်၊အင်းလေးနှင့်ကလောမြို့နယ်တဝိုက်စိုက်ခင်းများပျက်စီးခဲ့သဖြင့် ကာလ အတန်ကြာဈေးပြန်ကျဦးမည်မဟုတ်ပေ၊ ခရမ်းချဉ်ယခင်လရှယ်သီး ၁၂၀၀ကျပ်မှယခု ၃၂၀၀ကျပ်၊ ရှယ်သီး ၂၀၀၀ကျပ်မှ ၃၀၀၀ကျပ်၊ အသေး၈၀၀ကျပ်မှ ၂၀၀၀ကျပ်၊ မုန့်ညှင်းယခင်လ ၁၂၀၀ကျပ်မှ ယခု ၆၀၀၀ကျပ်၊ ဘိုစားပဲ ၂၅၀၀/၂၈၀၀ကျပ်မှ ၆၀၀၀ကျပ်၊ ဥနီ ၂၃၀၀ကျပ်မှ ၃၈၀၀ကျပ်၊ ဖရုံသီး ၉၀၀ကျပ်မှ ၁၈၀၀ကျပ်၊ ခရမ်းသီး၂၂၀၀ကျပ်မှ ၂၉၀၀ကျပ်၊ ငြုပ်ပွ ၃၇၀၀ကျပ်မှ ယခု၁၂၀၀၀ကျပ် အထိမြင့်တက်ခဲ့သည်ဟု ကုန်စိမ်းဈေးကွက်မှ သိရှိရပါသည်။

   ကုန်စိမ်းသီးနှံဈေးနှုန်းဈေးကွက်ပြန်လည်တည်ငြိမ်ဖို့အတွက် သီးနှံကုန်ထုတ်လမ်းများ၊ နယ်ဈေးကွက်စီးဆင်းမှု့လမ်းကြောင်းများ ကောင်မွန်ခြင်းနှင့် ဈေးကွက်လိုအပ်ချက်ပြည့်မှီရေးထွက်ကုန် များများဝင်ရောက်နိုင်မှသာ စားသုံးသူများနှင့် ရောင်းဝယ်ဖောက်ကားသူများ အဆင်ပြေချောမွေ့နိုင်ကြောင်း လေ့လာတင်ပြအပ်ပါသည်။

DOCA(ရှမ်း)

         ဧရာဝတီတိုင်းဒေသကြီးအတွင်းရှိ စိုက်ပျိုးရေးကဏ္ဍတွင် ပြည်တွင်း/ ပြည်ပဝယ်လိုအားရှိသော နှစ်ရှည်သီးနှံ (စက်မှုကုန်ကြမ်း) ရော်ဘာကို ပုသိမ်ခရိုင်၊ ကျုံပျော်ခရိုင်၊ ဟင်္သာတခရိုင်၊ မြန်အောင်ခရိုင်နှင့် မြောင်းမြခရိုင်အပါအဝင် တစ်တိုင်းလုံးအနေဖြင့် စိုက်ဧက ၃၆၂၇၅ဧကစိုက်ပျိုးလျက်ရှိပြီး ထွက်ရှိလာသောရော်ဘာစေးများကို ဖောမစ်အက်စစ်နှင့် သတ်မှတ်ထားသော အချိုးအစားအတိုင်းရောစပ်ပြီး ခွက်ဖြင့်ပုံသွင်း၍ အေးခဲပြီး ၂ပေါင်၊ ၃ပေါင်၊ ၄ပေါင်အလေးချိန်ရှိ ရော်ဘာပြားများကို ၄/ ၅/ ၆ ရက်နေလှမ်းပြီး ပုသိမ်မြို့ရှိ ရော်ဘာစိုက်ပျိုးသော ကုမ္ပဏီ၊ တောင်သူများက ရန်ကုန်မှတစ်ဆင့် ပြည်ပနှင့် ပြည်တွင်းဈေးကွက်သို့ ရောင်းချလျက်ရှိကြောင်းသိရသည်၊၊

          ပုသိမ်ရော်ဘာဈေးကွက်၌ ယခင် ၂၀၂၃ခုနှစ်၊ အောက်တိုဘာလမှ ၂၀၂၄ခုနှစ်၊ မေလအထိ ရော်ဘာတစ်ပေါင်ဈေးနှုန်းမှာ ကျပ် ၁၆၅၀/ ၂၂၅၀ ဈေးနှုန်းဖြင့်ရောင်းဝယ်လျက်ရှိပြီး ယခု ၂၀၂၄ခုနှစ်၊ အောက်တိုဘာလတွင် ရော်ဘာတစ်ပေါင်ဈေးနှုန်းမှာ ကျပ်၃၀၀၀ခန့်ရှိ၍ ယခင်နှစ်ကာလတူဈေးနှုန်းနှင့်နှိုင်းယှဉ်ပါက ရော်ဘာတစ်ပေါင်လျှင် ကျပ်၁၄၀၀ခန့်မြင့်တက်လျက်ရှိကြောင်း ရော်ဘာဈေးကွက်မှသိရှိရပါသည်။

DOCA(ဧရာဝတီ)

    ဝါလကင်းလွတ်သီတင်းကျွတ်အချိန်အခါကာလသို့ ရောက်ရှိတော့မည်ဖြစ်သဖြင့် တောင်ကြီး မြို့ရှိ ဈေး၊ Market နှင့် စတိုးဆိုင်များတွင် အရောင်းအဝယ်အသွက်ဆုံး ကုန်ပစ္စည်းများထဲတွင် ဖယောင်းတိုင်နှင့်လက်လုပ်မီးပုံးများအပါအဝင် ဖြစ်ပါသည်။

     တောင်ကြီးဈေးကွက်တွင် အရောင်းအဝယ်အသွက်ဆုံးဖယောင်းတိုင်များမှာ ကမ္ဘာ့ဖလား၊ နေလ၊ ရွှေတောင်၊ လက်(ချ်)မီး စသည့်တံဆိပ်များမှာ ရောင်းရအသွက်ဆုံးတံဆိပ်များဖြစ်ပါသည်။ ဖယောင်းတိုင်များမှာ အရွယ်အစားအလိုက် ဈေးအမျိုးမျိုးဖြင့် ရောင်းချလျက်ရှိရာ ဖယောင်းတိုင် အသေး(၂၀)တိုင်ပါတစ်ထုပ်လျှင် (၁၅၀ဝိ/-)ကျပ်၊ ဖယောင်းတိုင်အလတ်(၂၀)တိုင်ပါတစ်ထုပ်လျှင် (၁၉၀ဝိ/-)ကျပ်၊ ဖယောင်းတိုင်အကြီး(၆)တိုင်ပါ တစ်ထုပ်လျှင် (၂၂၀ဝိ/-)ကျပ်ဖြင့် အသီးသီး ရောင်းချလျက်ရှိပါသည်။ လက်လုပ်မီးပုံးများမှာလည်း အရွယ်အစားအလိုက် ဈေးအမျိုးမျိုးဖြင့် ရောင်းချလျက်ရှိပြီး (၃၀၀ဝိ/-)ကျပ်မှ (၅၀၀ဝိ/-)ကျပ် ဈေးနှုန်းဖြင့် ရောင်းချလျက်ရှိကြောင်း သိရှိရသည်။

DOCA(ရှမ်း)

         ဧရာဝတီတိုင်းဒေသကြီးအတွင်းရှိ ပြည်ပပို့ကုန်များတွင် ဈေးကွက်ခိုင်မာစွာရရှိနေသော ပဲတီစိမ်းကို ၂၅၆၀၅၉ဧကစိုက်ပျိုးလျက်ရှိပြီး ထွက်ရှိလာသောပဲတီစိမ်းများကို ရန်ကုန်မြို့သို့ တင်ပို့ရောင်းချလျက် ရန်ကုန်မှတစ်ဆင့် တရုတ်၊ အိန္ဒိယနှင့် အခြားပြည်ပနိုင်ငံများသို့ တင်ပို့ရောင်းချလျက်ရှိကြောင်းသိရသည်၊၊

          မြန်မာနိုင်ငံမှထွက်ရှိသော ပဲတီစိမ်းများကို ပြည်ပနိုင်ငံများသို့ ကုန်သွယ်ရေးနည်းလမ်းများဖြစ်သော ပင်လယ်ရေကြောင်းနှင့် နယ်စပ်ကုန်သွယ်ရေးလမ်းကြောင်းများဖြင့်တင်ပို့လျက်ရှိပြီး ကျုံပျော်ခရိုင်တွင် ပဲတီစိမ်းစိုက်ဧက (၆၇၆၂၂) ရှိ၍ ယခင်နှစ်ကျုံပျော်ဈေးကွက်တွင် ပဲတီစိမ်း ၁တင်းလျှင် ကျပ်၉၀၀၀၀ဈေးနှုန်းဖြင့်အရောင်းအဝယ်ဖြစ်ပြီး ယခုနှစ်ဈေးကွက်တွင် ပဲတီစိမ်း ၁တင်းလျှင် ကျပ်၁၁၀၀၀၀ဈေးဖြစ်သွား၍ ယခင်နှစ်ကာလတူဈေးနှုန်းနှင့်နှိုင်းယှဉ်ပါက ပဲတီစိမ်း ၁တင်းလျှင် ကျပ်၂၀၀၀၀ဈေးနှုန်းပိုမိုရရှိသည့်အတွက် ပဲတီစိမ်းစိုက်ပျိုးသောတောင်သူများ ဈေးကောင်းရလျက်ရှိကြောင်း ကျုံပျော်ဈေးကွက်မှသိရှိရပါသည်၊၊

DOCA(ဧရာဝတီ)