ပြည်တွင်းကုန်သွယ်မှုသတင်း

          ပြည်ဈေးကွက်အတွင်း နံနံပင်ဈေးနှုန်းများမှာ အဆမတန်မြင့်တက်လျက်ရှိပြီး စိုက်ပျိုးသော နံနံပင်အခင်းများ ရေဝပ်၍ အထွက်နှုန်းနည်းကာ ရှားပါး၍ ဈေးမြင့်တက်ရခြင်းဖြစ်ကြောင်းသိရပါသည်။ ပြည်အနီးတဝိုက်ရှိကျေးရွာများနှင့် ဝက်ထီးကန်၊ ရွှေတောင်၊ ပေါင်းတလည်၊ ဆင်တဲ စသည့်နယ်များတွင် စိုက်ပျိုးမှုရှိသော်လည်း မိုးများ၍ရေဝပ်သဖြင့် အထွက်နှုန်းနည်းကာ ဈေးကွက်သို့ ရွှေတောင်မြို့နယ်၊ ဘို့လယ်ကုန်းရွာဘက်မှသာ အဝင်ရှိကြောင်းသိရသည်။ တစ်ပတ်လျှင် (၂)ကြိမ်အဝင်ရှိကာ တစ်ကြိမ်လျှင် ပိဿာချိန်(၁၀)ခန့်သာဝင်ရောက်မှုရှိပြီး နံနံပင်(၁၀) ကျပ်သားလျှင် ကျပ်(၂၀၀၀)နှုန်းခန့်ရှိကြောင်းသိရပါသည်။ ဈေးကွက်အတွင်းရှိ လက်လီဈေးနှုန်းများတွင် (၅)ပင်စည်းတစ်စည်းလျှင် ကျပ်(၃၀၀)နှုန်းခန့်ဖြင့်ရောင်းချမှုရှိပြီး ယခင်ဆောင်းရာသီ ဇန်နဝါရီလအတွင်းတွင် နံနံပင်တစ်ပိဿာလျှင် (၁၃၀၀-၁၅၀၀)ကျပ်နှုန်းရှိခဲ့ကြောင်းသိရသဖြင့် ဈေးပိုမိုမြင့်တက်လျက်ရှိကြောင်းသိရပါသည်။

DOCA(ပဲခူး)

    ဧရာဝတီတိုင်း၊ မအူပင်ခရိုင်၊ ဓနုဖြူမြို့နယ်တွင် အသေးစားအငယ်စားနှင့် အလတ်စား စီးပွားရေးလုပ်ငန်းဖြစ်သည့် မာဃပဲမုန့်လုပ်ငန်းကို အမှတ် ၇ရပ်ကွက် ၊ ရတနာသီရိလမ်းတွင် ထုတ်လုပ်ဖြန့်ဖြူးရောင်းချနေသော  တပိုင်တနိုင် ပဲမုန့်လုပ်ငန်းတစ်ခုဖြစ်သည်။

      မာဃပဲမုန့်လုပ်ငန်းကို ၂၀၁၈ခုနှစ်က စတင်ပြုလုပ်ခဲ့သည်။ ပဲမုန့် ထုတ်လုပ်ရာတွင် ပါဝင်ကုန်ကြမ်းများမှာ ဆီ၊ ဂျုံ၊ ပဲ၊ သကြား၊ ကပ်စေးနဲ၊ ဘဲဥတို့ ပါဝင်ထုတ်လုပ်ပြီး ဂျုံကို နယ်၍ ပဲအနှစ်ထည့်ကာ ပုံစံခွက်နှင့် ထည့်၍ ပြုလုပ်ကာ ဘဲဥ သုတ်လိမ်းပြီး ဗန်းထဲထည့်ကာ မုန့်ပေါင်းခံစက်ဖြင့် မုန့်ကို ပေါင်း၍ အခြောက်ခံပြီး ပလတ်စတစ်အိတ်ဖြင့် တစ်ခုခြင်းထုတ်ကာ ၁၀ခုပါ မုန့်ဗူးကြီး တစ်ဗူးထုတ်၍ ရောင်းတန်းဝင်ထုတ်လုပ်ကြောင်း၊ လုပ်ငန်းအတွက် ရင်နှီးမတည်ငွေ ၃၅သိန်း ဖြင့် စတင်ရင်းနှီးလုပ်ကိုင်ခဲ့ပြီး လုပ်သား၄ဦး မိသားစုတို့ပါ လုပ်ကိုင် ကြပြီး၊ တစ်နှစ်ကို ဗူးရေ ၇သောင်းခန့် ထုတ်လုပ်နိုင်ကြောင်း၊ မာဃပဲမုန့် တစ်ဗူးကို   ၄၀၀၀/-ဖြင့် ရောင်းချ ကြောင်း သိရသည်။ တင်ပို့ရောင်းချမှုအနေဖြင့် ဇလွန်၊ ဟင်္သတ၊ ကျော်၊ ကျုံမငေး၊ ရန်ကုန်-ပုသိမ်ကားလမ်းအကြီးဘေးရှိ ကောင်းမုန့်ဆိုင်တွင်လဲ ရောင်းချကြောင်း၊ မာဃပဲမုန့် လုပ်ငန်းသည် အသေးစား စက်မှုလုပ်ငန်းနှင့် စားသုံးသူရေးရာဦးစီးဌာန၏ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ အသိအမှတ်ပြု ထောက်ခံချက် လက်မှတ်ရရှိထားကြောင်း မာဃပဲမုန့်လုပ်ငန်းရှင်ကို အခြားဒေသနှင့် တိုင်း/ပြည်နယ်များသို့ လုပ်ငန်းတိုးချဲ့လုပ်ကိုင်ဆောင်ရွက်သွားရန် ဈေးကွက်ရှာဖွေလျက်ရှိကြောင်းကို မထက်ထက်ဝင်းမှ ပြောပြချက်အရ သိရသည်။

DOCA(ဧရာဝတီ)

         ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်ရှိဈေးကွက်များတွင်  ရုံးပတီသီးများရှားပါး၍ ဈေးကောင်းရလျက်ရှိသည်။ ရုံးပတီပင်ကိုစိုက်ပျိုးပြီး (၄၅)ရက်အကြာတွင် ခူးဆွတ်ရောင်းချ၍ရပြီး သက်တမ်းအားဖြင့် (၃)လကြာမြင့်သည်အထိခူးဆွတ်နိုင်ပါသည်။ ယခင်က ရုံးပတီသီးဈေးကွက်၊ ဈေးနှုန်းများအနေဖြင့် ကုန်စိမ်းပွဲစားများက စိုက်ခင်းထဲထိဆင်း၍ဝယ်ယူကြ၍ တစ်တောင့်လျှင် လက်ကားဈေး (၈)ကျပ်နှုန်းဖြင့်ရောင်းချကြောင်းသိရပါသည်။

         ယခုရုံးပတီသီးဈေးကွက်မှာ  လက်လီဈေးတစ်တောင့်လျှင် (၄၀)ကျပ်နှုန်းဖြင့်ရောင်းချလျက်ရှိပြီး အတောင့်(၁၀၀)လျှင် ၄၀၀ကျပ်၊ (၅)တောင့်လျှင် (၂၀၀)ကျပ်အထိရောင်းချလျက်ရှိပြီး များသောအားဖြင့် ရွှေတောင်မြို့နယ်ရှိ ရုံးပတီသီးစိုက်ပျိုးသူများထံမှ အများဆုံးတင်သွင်းလျက်ရှိကြောင်းသိရှိရပါသည်။

DOCA(ပဲခူး)

        ပိန်းဥကို ဇွန်လအစောပိုင်းတွင် စတင်စိုက်ပျိုးပြီး စက်တင်ဘာလ နောက်ဆုံးပတ်မှ ဈေးကွက်အတွင်းသို့ စတင်ဝင်ရောက်ရောင်းချကြပါသည်။ ပိန်းဥမှာ အောက်တိုဘာလတွင် လှိုင်လှိုင်ထွက်ပေါ်လာမည်ဖြစ်ပါသည်။ ပိန်းဥကိုသပ်သပ်လွတ်ဟင်းလျာအဖြစ်လည်းကောင်း၊ သားရေစာအဖြစ်လည်း ကောင်းစားသုံးကြပါသည်။ ပြည်မြို့ရှိဈေးကွက်အတွင်းတွင် ယခုရောင်းချနေသောပိန်းဥများမှာ ရှမ်းပြည်နယ်မှ ဝင်ရောက်လာသောပိန်းဥများဖြစ်ပါသည်။ ဒေသထွက်ပိန်းဥမျိုးမှာ ဈေးကွက်ပေါ်ရောင်းချခြင်းမရှိသေးဘဲ ရှမ်းပြည်ဒေသမှဝင်ရောက်လာသော ပိန်းဥဈေးများမှာ ယခင်နှစ်တွင် (၁)ပိဿာလျှင် (၂၅၀၀)ကျပ်ဖြစ်ခဲ့သော်လည်း ယခုနှစ်ရှမ်းပြည်‌ဒေသထွက် ပိန်းဥဈေးနှုန်းမှာ (၃၀၀၀-၄၀၀၀)ကျပ်ဖြင့် အရောင်းအဝယ်ဖြစ်နေကြောင်းသိရပါသည်။

DOCA(ပဲခူး)

         ပြည်ခရိုင်၊ ပြည်မြို့နယ်ရှိ မှော်ဇာကျေးရွာအုပ်စုတွင် စပါး၊ ပဲ၊ ပြောင်းတို့ကို အဓိကထားစိုက်ပျိုးကြပြီး ဟင်းသီးဟင်းရွက်ဖြစ်သော သခွားသီးကိုလည်းစိုက်ပျိုးကြပါသည်။ သခွားသီးကို မိုးသခွားသီးနှင့် ‌ဆောင်းသခွားသီးဟူ၍ အမျိုးအစား(၂)မျိုးခွဲခြား၍ ရာသီအလိုက် စိုက်ပျိုးကြပါသည်။ သခွားသီးကို မြေအမျိုးမျိုးတွင် စိုက်ပျိုးနိုင်သော်လည်း နုန်းမြေ၊ သဲနုန်းမြေ၊ နုန်းစနယ်မြေများတွင် စိုက်ပျိုးခြင်းသည် ပိုမိုဖြစ်ထွန်းစေပါသည်။ မိုးသခွားသီးကို မိုးရာသီဖြစ်သော မေလနှင့်ဇွန်လတို့တွင်စိုက်ပျိုးကြပြီး ဆောင်းသခွားသီးကို ဆောင်းရာသီဖြစ်သော အောက်တိုဘာလနှင့် နိုဝင်ဘာလတို့တွင် စိုက်ပျိုးကြပါသည်။ သခွားသီးတစ်ဧကစိုက်ပျိုးလျှင် သခွားသီးအလုံးရေ (၂)ထောင်ကျော်ထွက်ရှိသည်ဟုသိရှိရပါသည်။

         ပြည်မြို့နယ်အတွင်းရှိ ဈေးကွက်များတွင် သခွားသီးများကို အချိန်မရွေးရောင်းချနေသော်လည်း ယခုအချိန်ဖြစ်သော မိုးတွင်းကာလ၌ မိုးသခွားများပေါ်ချိန်ဖြစ်သော်လည်း စိုက်ခင်းများတွင် ရေများဝင်ရောက်မှုရှိသဖြင့် ထွက်ရှိမှုနည်း၍ သခွားသီးဈေးများအနည်းငယ်မြင့်တက်လာပါသည်။ သခွားသီးဈေးနှုန်းအနေဖြင့် ယခင်နှစ်တွင် အသေးတစ်လုံးလျှင် (၅၀-၁၀၀)ကျပ်နှင့် သုပ်၍စားရသော အရွယ်တစ်လုံးလျှင် (၂၅၀-၃၀၀)ကျပ်ရှိခဲ့ပြီး ယခုနှစ်တွင် သခွားသီးအသေးတစ်လုံးလျှင်(၂၀၀-၂၅၀)ကျပ်ရှိပြီး သုပ်၍စားရသော အရွယ်တစ်လုံးလျှင် (၈၀၀)ကျပ်ဖြင့် ဈေးကွက်အတွင်း ရောင်းချနေကြကြောင်းသိရှိရပါသည်။

DOCA(ပဲခူး)