ပြည်တွင်းကုန်သွယ်မှုသတင်း

         ပြည်ခရိုင်တွင် မိုးဆီထွက်သီးနှံများဖြစ်သော နှမ်းနှင့် မြေပဲသီးနှံများမှာ ယခုနှစ် ဩဂုတ်လ လဆန်းပိုင်းမှစ၍ ထွက်ပေါ်လာပြီဖြစ်၍ စက်တင်ဘာလတွင် သီးနှံများလှိုင်လှိုင်ပေါ်ထွက်လာ၍ အရောင်းအဝယ်လည်းဖြစ်လျက်ရှိပါသည်။

မိုးနှမ်းသီးနှံ

         နှမ်းသီးနှံဖြစ်သော မိုးနှမ်းကို မေလနှင့် ဇွန်လတို့တွင်စိုက်ပျိုးပြီး ဩဂုတ်လတွင် စတင်ထွက်ပေါ်လာပါသည်။ ပြည်ခရိုင်အနေဖြင့် မိုးနှမ်းစိုက်ဧကမှာ (၂၇၈၈၄)ဧကစိုက်ပျိုးရိတ်သိမ်းနိုင်ခဲ့ပြီး တစ်ဧကအထွက်နှုန်းအနေဖြင့် ပျမ်းမျှ (၁၄.၅၀)တင်းထွက်ရှိကြောင်းသိရပါသည်။ မိုးနှမ်းတစ်ဧကစိုက်ပျိုးထုတ်လုပ်ကုန်ကျစရိတ်အနေဖြင့် (၅)သိန်းကျပ်ကျော်ကုန်ကျကြောင်းသိရပါသည်။ ဈေးနှုန်းအနေဖြင့် ယခုစက်တင်ဘာလ နောက်ဆုံးပတ်တွင် နှမ်းနီတစ်တင်းလျှင် (၁၁၃၀၀၀)ကျပ်၊ နှမ်းနက်တစ်တင်းလျှင်  (၁၇၃၀၀၀)ကျပ်နှင့် စမုံနက်နှမ်းတစ်တင်းလျှင် (၂၀၀၀၀၀)ကျပ်ဖြင့် အရောင်းအဝယ်ဖြစ်လျက်ရှိပါသည်။ ယခင်ဩဂုတ်လ လကုန်ပတ်နှင့်နှိုင်းယှဉ်လျှင် နှမ်းနီတစ်တင်းလျှင် (၁၀၀၀၀)ကျပ်ဈေးကျခဲ့ပြီး၊ နှမ်းနက်မှာ တစ်တင်းလျှင် (၂၃၀၀၀)ကျပ်နှင့် စမုံနက်နှမ်းတစ်တင်းလျှင် (၃၀၀၀၀)ကျပ်ဈေးမြင့်တက်လာခဲ့ပါသည်။ ဈေးကွက်အနေဖြင့် ပြည်ဈေးကွက်သို့ မိုးနှမ်းများကို ပြည်ဒေသရှိ ကျေးရွာများမှထွက်ရှိသော နှမ်းများအပြင် နယ်မြို့များဖြစ်သော ရွှေတောင်၊ ပေါက်ခေါင်း၊ ပန်းတောင်းနှင့် ကံမဘက်မှ နှမ်းအိတ်များ နေ့စဉ် တစ်နေ့လျှင် အိတ်၅၀၀ကျော်ဝင်ရောက်မှုရှိပါသည်။ ထိုသို့ဝင်ရောက်လာသော မိုးနှမ်းများကို မန္တလေးတိုင်းနှင့် မကွေးတိုင်း၊ အောင်လံမြို့တို့မှဝယ်ယူမှုရှိ၍ တစ်နေ့လျှင် အိတ်(၉၀၀)ခန့်အရောင်းအဝယ်ဖြစ်လျက်ရှိပါသည်။ နှမ်းနီမှာ ဒေသတွင်းသာအရောင်းအဝယ်ဖြစ်၍ ဈေးအနည်းငယ်ကျဆင်းလာပြီး နှမ်းနက်နှင့် စမုံနက်နှမ်းကို အခြားတိုင်းများက ဝယ်ယူမှုရှိ၍ ဈေးမြင့်တက်လာကြောင်းသိရပါသည်။

မိုးမြေပဲ

       မိုးမြေပဲကို ဇွန်လတွင်စိုက်ပျိုးပြီး ဩဂုတ်လတွင် စတင်ထွက်ပေါ်လာပါသည်။ ပြည်ခရိုင်အနေဖြင့် မိုးမြေပဲစိုက်ဧကမှာ (၄၀၇၅၂)ဧကစိုက်ပျိုး၍ (၄၆၅၆)ဧကရိတ်သိမ်းနိုင်ခဲ့ပြီး တစ်ဧကအထွက်နှုန်းအနေဖြင့် ပျမ်းမျှ (၅၆.၄၄)တင်းထွက်ရှိကြောင်းသိရပါသည်။ မိုးမြေပဲတစ်ဧကစိုက်ပျိုးထုတ်လုပ်ကုန်ကျစရိတ်အနေဖြင့် (၇၆၀၀၀၀)ကျပ်ကျော်ကုန်ကျကြောင်း သိရပါသည်။ ဈေးနှုန်းအနေဖြင့် ယခုစက်တင်ဘာလ နောက်ဆုံးပတ်တွင် ဆီဆန်(အဖြူ)တစ်ပိဿာလျှင် (၇၄၀၀)ကျပ်၊ ဆီဆန်(အနီ)တစ်ပိဿာလျှင် (၇၂၀၀)ကျပ်၊ လုံးဆန်(အဖြူ)တစ်ပိဿာလျှင် (၈၄၀၀)ကျပ်၊ လုံးဆန်  (အနီ)တစ်ပိဿာလျှင်(၈၁၀၀)ကျပ်ဖြင့်အရောင်းအဝယ်ဖြစ်လျက်ရှိပါသည်။ ဈေးကွက်အနေဖြင့် ပြည်ဈေးကွက်သို့ မိုးမြေပဲများကို ပြည်ဒေသရှိကျေးရွာများ၊ ပေါက်ခေါင်း၊ ရွှေတောင်တို့မှ တစ်နေ့လျှင် (၂၅)ပိဿာဝင်အိတ် ၁၀၀၀ကျော်ဝင်ရောက်မှုရှိပါသည်။ ထိုသို့ဝင်ရောက်လာသော မိုးမြေပဲများကို မန္တလေးတိုင်းနှင့် အောင်လံမြို့တို့မှဝယ်ယူမှုရှိ၍ တစ်နေ့လျှင် အိတ်(၁၀၀၀)ခန့်အရောင်းအဝယ်ဖြစ်လျက်ရှိပါသည်။ မိုးမြေပဲဆန်များကို ဒေသတွင်းဆီစက်လုပ်ငန်းရှင်များက အဝယ်ရှိသကဲ့သို့ ပဲလှော်ဖိုသမားများလည်းဝယ်ယူမှုရှိကြောင်းသိရှိရပါသည်။

DOCA(ပဲခူး)

        မွန်ပြည်နယ်သည် ရော်ဘာစိုက်ပျိုးထုတ်လုပ်သူများ နှစ်စဉ်တိုးတက်လျက်ရှိသော ပြည်နယ်တစ်ခုဖြစ်၍  ထွက်ရှိသောရော်ဘာများအား ပြည်နယ်တွင်းဝယ်ယူလျက်ရှိသော လုပ်ငန်းရှင်များ၊ အဝယ်ဒိုင်များ၊ ကုမ္ပဏီများမှစုစည်း၍ ရန်ကုန်/ မန္တလေးရှိ ၎င်းတို့၏ကုမ္ပဏီကြီးများသို့ တင်ပို့ပြီး ပို့ကုန်ကိစ္စရပ်များဆောင်ရွက်လျက်ရှိကြောင်း သိရသည်။

         မွန်ပြည်နယ်အတွင်းရှိ ရော်ဘာအဝယ်ဒိုင်များအနေဖြင့် အပတ်စဉ် အရောင်းအဝယ်ပုံမှန်ရှိနေသည်။ ယခုအောက်တိုဘာလ ၈ ရက်နေ့တွင်မော်လမြိုင်မြို့၌ရော်ဘာဈေးနှုန်းမှာ RSS-3 တစ်ပေါင် လျှင် ကျပ် (၃၅၀၀ )၊RSS-5 တစ်ပေါင်လျှင် ကျပ်(၃၄၀၀) ပေါက်ဈေးဖြစ်ပေါ်နေပြီး ယခင်တစ်ပတ် ဈေးနှုန်းနှင့်နှိုင်းယှဉ်ပါက တစ်ပေါင်လျှင်ကျပ်(၁၅၀)၊ ယခင်နှစ်ဈေးနှုန်းနှင့် နှိုင်းယှဉ် ပါက တစ်ပေါင်လျှင် ကျပ်(၁၈၀၀)ခန့် ဈေးနှုန်းတက်လာခဲ့သည်။ ‌မော်လမြိုင်မြို့မှရန်ကုန်မြို့သို့ သယ်ယူခနှုန်းထားမှာ (50)kg ပါတစ်ထုပ်လျှင် ကျပ်(၂၅၀၀)၊ ရော်ဘာတစ်တန်လျှင် ကျပ် (၅၀၀၀၀) ဖြင့်လည်းကောင်း၊ မော်လမြိုင်မြို့မှ မန္တလေးမြို့ သို့ (50)kg ပါတစ်ထုပ်လျှင် ကျပ် (၃၆၀၀)၊ ရော်ဘာတစ်တန် လျှင် ကျပ် (၇၂၀၀၀) ဖြင့် သယ်ယူပို့ဆောင်ပေးရကြောင်း ကုန်သည်များ ထံမှသိရှိရသည်။

DOCA(မွန်)

          ဧရာဝတီတိုင်းဒေသကြီးအတွင်း   သင်ဖြူးဖျာထုတ်လုပ်သော မြို့များအနက် ပန်းတနော်မြို့နယ်မှာ လူဦးရေ၏ ၈ဝရာခိုင်နှုန်းခန့်က  သင်ဖျာလုပ်ငန်းကို အဓိကလုပ်ကိုင်ကြပြီး  အသက်အရွယ်မရွေး သင်ဖျာလုပ်ငန်းအကြောင်းကို အနည်းနှင့်အများဆိုသလို သိရှိတတ်ကျွမ်းကြသူများဖြစ်သည်။ သင်ဖျာယက်လုပ်သလို သင်ပင်ကိုလည်းစိုက်ပျိုးလျက်ရှိသည်။ မြို့နယ်အတွင်းရှိ ကျေးရွာအုပ်စု  ၃၄ အုပ်စုတွင်  သင်ခြံစိုက်ပျိုးမှု  ၁၀၅၂၅ဧကရှိပြီး ပန်းတနော်ဒေသမှထွက်သည့်သင်မှ ကုန်ကြမ်းများကို ဓနုဖြူ၊ မအူပင်၊ ညောင်တုန်း၊ ဝါးခယ်မ၊ အိမ်မဲ၊ ကျုံပျော်၊ ဟင်္သာတ၊  ကျောင်းကုန်း  အစရှိသည့် အနီးအနားရှိ  မြို့နယ်များနှင့်  စစ်ကိုင်း၊  မန္တလေး စသောဒေသများကပါ ဝယ်ယူမှုများရှိသည့်အတွက် သင်ခြံစိုက်ပျိုးရေးသည်  ၎င်းမြို့နယ်၏   အောင်မြင်သောလုပ်ငန်းတစ်ခုဟုဆိုနိုင်သည်။

         သင်ပင်စိုက်ပျိုးမှုအနေဖြင့် သင်၁ပင်လျှင် ၁၅၀ကျပ်ဖြင့်ဝယ်ယူရပြီး ၁ဧကလျှင် အပင် ၅၀၀၀ပင်စိုက်ပျိုးရကြောင်း၊ နှစ်တစ်နှစ်၏ မိုးဦးကျမှာ စတင်စိုက်ပျိုးပြီး  ၅နှစ်အကြာတွင် ၁ခါခုတ်ရကြောင်း၊ ၁ဧကလျှင် သင်စိုက်ဧကကုန်ကျစရိတ် ၁သိန်းခန့်ကုန်ကျပြီး၊ ပေါင်းရှင်းရေတင်ခမှာ ၁နှစ်လျှင် ၃သိန်းရိတ်သိမ်းချိန်အထိ ကုန်ကျစရိတ် ၁၅သိန်းကုန်ကျကြောင်းသိရသည်။ စစိုက်ပျိုးခါစနှစ်တွင် ရောင်းချသောသင်ဈေးနှုန်းအနေဖြင့် ၁ကွက်ကို ၂သိန်းကျပ်ရရှိပြီး၊ ၁ဧကလျှင် ၂၄သိန်းရရှိကြောင်း၊ နောက်ပိုင်းတွင် ၃နှစ်တစ်ခါခုတ်နိုင်ကြောင်း၊ သင်ရောင်းချမှုအနေဖြင့် ဟင်္သတ၊ ကျိုတ်လတ်၊ တံတားဦး၊ အင်းဝဘက်သို့ တင်ပိုပေးရကြောင်းသိရှိရပါသည်။

DOCA(ဧရာဝတီ)

        ရှမ်းပြည်နယ်မှ မော်လမြိုင်မြို့သို့ ဝင်ရောက်မှုရှိသည့်အာလူးများသည် အပတ်စဉ်ကုန်စည်ဒိုင်သို့ ဝင်ရောက်လျက်ရှိသည်။ ယင်းမှ တစ်ဆင့်ဈေးကွက်တွင် ဖြန့်ဖြူးရောင်းချကြသည်။ ယခင်လက အားလူးဈေးနှုန်းသည် တစ်ပိဿာလျှင် ၆၀၀၀ကျပ် ဖြစ်ခဲ့ရာမှ ယခုလ အောက်တိုဘာလ၌ အာလူးဈေးနှုန်း တစ်ပိဿာလျှင်   ၈၀၀၀ ကျပ်ရှိရာ  ဈေးနှုန်း ၂၀၀၀ ကျပ် မြင့်တက်လာခဲ့ကြောင်း သိရှိရသည်။

       ထိုသို့ အာလူးဈေးမြင့်တက်ရခြင်းမှာ မော်လမြိုင်မြို့ ဈေးကွက်အတွင်းသို့ အာလူးဝင်ရောက်မှုနည်းပါး၍လည်းကောင်း၊  ရှမ်းပြည်နယ်မှ မော်လမြိုင်သို့ လမ်းခရီးအခက်အခဲဖြစ်၍ အာလူးတင်ပို့မော်တော်ယာဉ်ကား ဝင်ရောက်မှုနည်းပါးမှုကြောင့်လည်းကောင်း ဈေးနှုန်းမြှင့်တက်မှုဖြစ်ကြောင်း  အာလူးရောင်းချသူများမှ သိရှိရပါသည်။

DOCA(မွန်)

        ရန်ကုန်တိုင်းဒေသကြီး၊ တောင်ပိုင်းခရိုင်၊ သန်လျင်မြို့နယ်ရှိ  သီလဝါစက်မှုဇုန် Wilmar ဆီကန်မှတစ်ဆင့် ရန်ကုန်တိုင်းဒေသကြီးအတွင်း မြို့နယ်များနှင့်အခြားတိုင်းဒေသကြီး၊ ပြည်နယ် များရှိ ကိုယ်စားလှယ်များသို့ စားအုန်းဆီနေ့စဉ် ထုတ်ပေးလျက်ရှိပါသည်။ စားအုန်းဆီအား ပြည်တွင်းဈေးကွက်၌ ရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီး ဌာန၊ စားအုန်းဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ အပတ်စဉ်ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည်ဖြန့်ဖြူး ရောင်းချသူများအနေဖြင့် ဒေသအရောက်ဈေးနှုန်းများအပေါ် (၂)ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချစေရေး ဈေးနှုန်းအဆမတန်မြှင့်တင်ရောင်းချခြင်းများ မပြုလုပ်စေရေးတို့အတွက်လည်း ဝန်ထမ်းများမှ ကွင်းဆင်းကြပ်မတ်ဆောင်ရွက်လျက်ရှိကြောင်းနှင့် (၃၀.၉.၂၀၂၄)ရက်နေ့မှ(၅.၁၀.၂၀၂၄) ရက်နေ့အထိ ဆီကုမ္ပဏီ(၁၂) ခုနှင့် စားအုန်းဆီတန်ချိန် (၃၄၀၃.၅၁၇)တန်ကို ထုတ်ပေးခဲ့ကြောင်းသိရှိရပါသည်။

DOCA(ရန်ကုန်)