ပြည်တွင်းကုန်သွယ်မှုသတင်း

     ကန်စွန်းဥအား ပြုတ်စား၊ မီးဖုတ်စား၊ ကြော်စား၊ ပေါင်းစား၊ ယိုထိုးခြင်း သီးနှံအခြောက် ခံခြင်းနှင့် ပူတင်းဖုတ်ခြင်းစသည့်ဖြင့် အမျိုးမျိုးစားသုံးကြောင်း သိရပါသည်။ ကန်စွန်းဥအတွင်းသား များမှာ အဖြူရောင်၊ ခရမ်းရောင်၊ ပန်းရောင်၊ လိမ္မော်ရောင်နှင့် အဝါနုရောင်တို့အား ဈေးကွက်တွင် အများဆုံး တွေ့ရပါသည်။ ကန်စွန်းဥ စားသုံးခြင်းဖြင့် အာဟာရဓာတ်ကြွယ်ဝခြင်း၊ သွေးတွင်း သကြား ဓာတ် ထိန်းညှိပေးခြင်း၊ ကိုယ်ခံအားကောင်းခြင်း၊ အမြင်အာရုံကောင်းမွန်ခြင်း၊ ရေဓာတ်ဆုံးရှုံးမှုကို ကာကွယ် ပေးခြင်း စသည့်အကျိုးကျေးဇူးများ ရရှိစေပါသည်။

      ၂၀၂၅ ခုနှစ်၊ ဧပြီလ နောက်ဆုံးပတ်တွင် ဈေးကွက်အတွင်းရောင်းချသည့် ကန်စွန်းဥ တစ်ပိဿာ ဈေးနှုန်း ခရမ်းရောင် (၆၀၀၀/-) ကျပ်နှင့် (၇၀၀၀/-) ကျပ်၊ လိမ္မော်ရောင်နှင့် အဝါနုရောင် (၅၀၀၀/-) ကျပ်နှင့် (၆၀၀၀/-) ကျပ် ဈေးတို့ဖြင့် ရောင်းချလျက်ရှိကြောင်း သိရှိရပါသည်။

DOCA (ဧရာဝတီ)                                                     

     ဧရာဝတီတိုင်းဒေသကြီး၊ ပုသိမ်မြို့နယ်အပါအဝင် ဒေသအနှံ့အပြားတွင် ကွမ်းသီးအရည် သောက် ဟုခေါ်သော ကွမ်းသီးအနုမှာ ဈေးကွက်တွင် တွင်ကျယ်စွာ အရောင်းအဝယ် ဖြစ်ထွန်း လျက်ရှိကြောင်း သိရှိရပါသည်။ မြန်မာနိုင်ငံတွင် ကွမ်းသီးအနုဈေးကွက်မှာ လွန်ခဲ့သော ဆယ်စု နှစ်ဝန်းကျင်ကတည်းက တွင်ကျယ်ခဲ့သော်လည်း ပုသိမ်မြို့နယ်တွင် ၂၀၁၆ ခုနှစ်မှ အရောင်း အဝယ်ဖြစ်လာခဲ့ပါသည်။

       ကွမ်းသီးအနုသည် ကွမ်းသီးစတင်သီးချိန်၊ အရည်နုလေးများ စတင်ထည့်ချိန် အရွယ်အစားလုံးပတ် ၁ လက်မခန့်တွင် စတင်ဆွတ်ခူး၍ရောင်းချကြသည်။ ကွမ်းသီးတွင် အဝိုင်း သီးနှင့် အချွန်းသီးဟူ၍ ပုံစံ(၂)မျိုးရှိရာ အချွန်းသီးများကိုသာ အဝယ်ဒိုင်များက ဈေးကောင်းပေး၍ ဝယ်လေ့ရှိသည်။

        ၎င်းကွမ်းသီးအနုများအား တရုတ်နိုင်ငံသို့ အများအပြားရောင်းချရပြီး ကွမ်းသီးအနုများ အား မီးအပူဖြင့်ပေါင်း၍ အခြောက်ခံပြီး တရုတ်နိုင်ငံသို့ တင်ပို့ရောင်းချကြောင်း သိရှိရပါသည်။ မြန်မာနိုင်ငံတွင် ကွမ်းသီးစိမ်း၊ ကွမ်းသီးခြောက်များကို ကွမ်းယာအတွင်း ထည့်သွင်းစားသုံးကြ သော်လည်း တရုတ်နိုင်ငံတွင် သားရေစာအဖြစ်ထုတ်လုပ်ရောင်းချကြောင်းသိရပါသည်။

          လက်ရှိပုသိမ်မြို့တွင် ကွမ်းသီးအရင့်တစ်လုံးသည် (၁၀၀)မှ(၁၅၀)အတွင်းထိ ဈေးကောင်း ရရှိနေပြီး ကွမ်းသီးအနုများသည် ၁၅၀ ကျပ်အထိ ဈေးကောင်းရရှိနေသဖြင့် ခြံလုပ်ငန်းရှင်များ  အနေဖြင့် ကွမ်းသီးအနုများအား ရောင်းချရန် စိတ်ဝင်စားလာခဲ့ကြပါသည်။

        ဧရာဝတီတိုင်းဒေသကြီး၊ ပုသိမ်မြို့နယ်အပါအဝင် နေရာဒေသအများအပြားတွင် ကွမ်းသီး အနုများ ဈေးကွက်အတွင်း ဆွတ်ခူးရောင်းချလာကြပြီး ကွမ်းသီးအရင့်ထက် အနုက ပို၍ တွက်ခြေကိုက်ကြောင်း သိရှိရပါသည်။ ကွမ်းသီးအနုဆွတ်ခူးရောင်းချမှုများပြားလာသဖြင့် ကွမ်းသီးအခြောက်လုပ်ငန်းမှာ ဈေးကောင်းပိုမိုရရှိပြီး ယခင်နှစ်များထက် ဈေးကွက်အတွင်း ဈေးတက်လာရကြောင်း သိရှိရပါသည်။

DOCA (ဧရာဝတီ)     

   မွန်ပြည်နယ်၊ ကျိုက်မရောဒေသထွက် ယိုးဒယားမျိုးစပ် ဒူးရင်းသီးမျိုးများ စတင်ထွက်ရှိကာ ဈေးကွက်အတွင်း ဈေးကောင်းရရှိနေပြီး အဝယ်လိုက်နေသောကြောင့် ဒူးရင်းခြံပိုင်ရှင်များ စီးပွားရေး အဆင်ပြေလျက်ရှိကြောင်း သိရသည်။

   ယခုလအတွင်း စတင်ထွက်ရှိနေသော ဒူးရင်းသီးမျိုးများမှာ ကလိုင်းကနိုင်ကျေးရွာ အပေါ်ရွာ၌ရှိပြီး ဒူးရင်းခြံတစ်ခုလျှင် တစ်ပင်ကို အလုံးရေ ၃၀ခန့်ရှိပြီး ယခုချိန် ပေါ်ဦးပေါ်ဖျား တွင် ဒူးရင်းသီး တစ်လုံးလျှင် (၆၀၀၀၀) ခန့်မှ (၈၀၀၀၀) အထိ ရရှိနေသဖြင့် ဒူးရင်းသီး ခြံစိုက်ပျိုးသူများ မိသားစု ဝင်ငွေကောင်းနေပြီး စီးပွားရေး အဆင်ပြေလျက်ရှိကြောင်း ကလိုင်းကနိုင်အပေါ်ရွာ ဒူးရင်းခြံပိုင်ရှင် ဦးသန်းဦးက ပြောသည်။ အဆိုပါ ဒူးရင်းသီး ကိုင်းဆက်မျိုးများကို မုဒုံစိုက်ပျိုးရေးခြံမှ မျိုးဝယ်ယူကာ စိုက်ပျိုးရကြောင်း ယိုးဒယားမျိုးဖြစ်၍ အသီးအရွယ်အစားလည်းကြီး၍ အသားထူပြီး အစေ့သေးကာအရသာမှာလည်း ချိုသဖြင့် စားသုံးသူများ အလွန်နှစ်သက်ကြောင်း၊ ကျိုက်မရော ဒူးရင်းသီးများကို မော်လမြိုင်၊ ရန်ကုန်မြို့ကြီးများသို့ တင်ပို့ရောင်းချကြောင်း၊ အနယ်နယ်အရပ်ရပ်သို့လည်း တင်ပို့ပေးရသဖြင့် နာမည်ကြီးကြောင်း ဒူးရင်းသီး စီးပွားဖြစ် စိုက်ပျိုးသူ ဦးသန်းဦးထံမှ သိရသည်။

DOCA (မွန်)

   မော်လမြိုင်ခရိုင်၊ ကျိုက်မရောမြို့နယ်၊ ဘိန်းဗျောကျေးရွာ၌ မေမြို့ပန်းများ လှိုင်လှိုင် ထွက်ရှိကာ ပန်းဈေးလည်း ကောင်းသဖြင့် စီးပွားဖြစ် ပန်းစိုက်တောင်သူများ မိသားစုဝင်ငွေ တိုးလျှက်ရှိကြောင်း သိရသည်။

   ဘိန်းဗျောကျေးရွာမှ ပန်းစိုက်ခင်းများ အောင်မြင်လျှက်ရှိပြီး ယခုနှစ်တွင် ဂန္ဓမာပန်း အပြင် မေမြို့ပန်း ပန်းပင်များကိုပါ စမ်းသပ်စိုက်ပျိုးကြရာ ယခုချိန်၌ လှိုင်လှိုင်ထွက်ရှိပြီး ဖြစ်သည်။

   မေမြို့ပန်းများကို ယခုနှစ်ဆောင်းရာသီတွင် မေမြို့ဘက်မှ အစေ့များ မှာယူပြီး ပျိုးထောင်ကာ စိုက်ပျိုးကြကြောင်း မေမြို့ပန်းသည် မြေပွ၍ သဲနှုန်းဆန်သည့် မြေဆီလွှာကို ပို၍ နှစ်သက်ပြီး အထွက်နှုန်းလည်းကောင်းသဖြင့် မေမြို့ပန်းကို တစ်နိုင်တစ်ပိုင် စိုက်ပျိုးသူ များလာကာ ပန်းဈေးများမှာလည်း ယခင်နှစ်များထက် ပိုမိုကောင်းပြီး ပန်းစည်း လက်တစ်ဆုပ် တစ်စည်းလျှင် ဆယ်ပွင့်ပါပြီး တစ်စည်းကို (၃ဝဝဝ) ကျပ်အထိ ဈေးကောင်း ရရှိနေသဖြင့် အဆင်ပြေပြီး မိသားစု အပိုဝင်ငွေလည်း ရရှိကြောင်း မေမြို့ပန်း စိုက်ပျိုး ရောင်းချသူ ဒေါ်ယမင်း ထံမှ သိရသည်။

   ယခုရာသီတွင် နေပူရှိန်ပြင်းလွန်း၍ ပန်းခက်လေးတွေ နေမလောင်ရအောင် အထူးဂရုစိုက်ရကြောင်း နေပြင်းချိန်မှာ ရေမလောင်းရပဲ ညနေခင်း နေပူချိန်ကျမှသာ ရေလောင်းခြင်း၊ ပိုးကောင်လေးများအား ဖမ်းပေးခြင်း ဆေးဖျန်းခြင်းများကို ဂရုစိုက်၍ ဆောင်ရွက်ပေးရကြောင်း သိရသည်။ ဒေသထွက် မေမြို့ပန်းများကို အခြားသော မြို့ကြီးများ အထိ ဖောက်သည်ပေးရကြောင်း သိရသည်။

DOCA (မွန်)

   တနင်္သာရိတိုင်းဒေသကြီး မြိတ်ခရိုင် မြိတ်မြို့နယ်အတွင်းရှိ မီးဖိုချောင်သုံးသီးနှံတစ်မျိုး ဖြစ်သည့် ကြက်သွန်ဖြူကို နေရာအနှံ့အပြားတွင် ရောင်းချကြပါသည်။ မြိတ်မြို့ဈေးကွက်အတွင်း အပတ်စဥ်ဝင်ရောက်လျက်ရှိပြီး ဈေးကွက်အတွင်း ဒေသအတွင်းလက်လီ/လက်ကားဝယ်ယူသူ များ၊ မြို့နယ်မှတစ်ဆင့်ပြန်လည်ရောင်းချသူများဖြင့် ပုံမှန်ဝယ်ယူ‌ရောင်းချနေကြောင်း သိရှိရပါ သည်။

     ၂၀၂၅ခုနှစ်၊ မေလဒုတိယပတ်တွင် ကြက်သွန်ဖြူ(ရှမ်းစ)တစ်ပိဿာလျှင် (၁၁၀၀၀)ကျပ် ထိ ဈေးနှုန်းအသီးသီးရှိပြီး ကြက်သွန်ဖြူ(ကြူဂုတ်)တစ်ပိဿာလျှင် (၁၆၀၀၀)ကျပ်ထိ အသီးသီးရှိကြောင်း သိရှိရပါသည်။

DOCA(မြိတ်)