ပြည်တွင်းကုန်သွယ်မှုသတင်း

                စစ်ကိုင်းတိုင်းဒေသကြီး၊ မုံရွာမြို့၊ မန်ကျည်းပင်ဈေးအတွင်းတွင်  ထောပတ်သီးနှင့် ဖီးကြမ်းငှက်ပျောသီးများ အများအပြား ရောင်းချလျက်ရှိကြပါသည်။ ဈေးကွက်အတွင်း ရောင်းချနေသော ထောပတ်သီးများကို ရှမ်းပြည်နယ်(တောင်ပိုင်း၊ မြောက်ပိုင်း )  တောင်ကြီး၊ ဟိုပုံ၊ ညောင်‌ရွှေ၊ ဆီဆိုင်၊ ကလော၊ ပင်းတယ၊ ရွာငံ၊ ရပ်စောက်၊ ပင်လောင်၊ လားရှိုး၊ ကွက်ခိုင်၊ ကျောက်မဲ၊ သီပေါ၊ နောင်ချို စသည့်ဒေသများမှ တင်သွင်းကြပါသည်။ မုံရွာမြို့နယ်ဒေသ အတွင်း စိုက်ပျိုးရေးကို အဓိကထား လုပ်ကိုင်ပြီး  ဥယျာဉ်ခြံ စိုက်ပျိုး လုပ်ကိုင်ရာတွင် ရာသီစာ ဟင်းသီးဟင်းရွက်များကို စိုက်ပျိုးကြသလို ဖီးကြမ်းငှက်ပျောကိုလည်း အများအပြား စိုက်ပျိုးကြကြောင်း သိရှိရပါသည်။

            ၂၀၂၅ ခုနှစ် ၊ ဒီဇင်ဘာ တတိယအပတ်အတွင်း မုံရွာမြို့ မန်ကျည်းပင်ဈေးရှိ  သစ်သီးဆိုင်များတွင် ထောပတ်သီးဈေးနှုန်းမှာ ထောပတ်သီးအသေး (၁)လုံး လျှင် (၇၀၀) ကျပ်၊ ထောပတ်သီးအလတ်(၁)လုံးလျှင် (၉၀၀) ကျပ်နှင့် ထောပတ်သီးအကြီး (၁)လုံးလျှင် (၁၀၀၀) ကျပ် ၊ ဖီးကြမ်းငှက်ပျောသီးဈေးနှုန်းမှာ ငှက်ပျောတစ်ဖီးလျှင် (၂၈၀၀-၃၉၀၀) ကျပ် ဖြင့်ရောင်းချပြီး ဖီးကြမ်းငှက်ပျောသီးကို ဈေးကွက်အတွင်းတွင် အဖီးလိုက်၊ အခိုင်လိုက် ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ မုံရွာမြို့၊ သံလမ်းဈေးတွင် ‌ရှောက်ချိုသီးနှင့် သလဲသီးများ အရောင်းအဝယ်ဖြစ်လျက်ရှိကြောင်း သိရှိရပါသည်။ ရှောက်ချိုသီးများကို ကျောက်မဲနှင့် သီပေါနယ်များမှ ဝင်ရောက်လျက်ရှိပြီး သလဲသီးများကို မုံရွာမြို့ပတ်ဝန်းကျင်ရှိ ကျေးရွာများမှ မိမိတို့၏နေအိမ်ခြံဝင်းများနှင့် ယာတောများတွင် တစ်နိုင်တစ်ပိုင်စိုက်ပျိုးကြပြီး လာရောက်ရောင်းချကြကြောင်း သိရှိရပါသည်။

          ၂၀၂၅ ခုနှစ်၊ ဒီဇင်ဘာလ တတိယပတ်တွင် သံလမ်းဈေးတွင် ဖြစ်ပေါ်နေသော  ရှောက်ချိုသီးဈေးနှုန်းများမှာ ရှောက်ချိုသီးတစ်လုံးလျှင် (၅၀၀)ကျပ်မှ (၁၃၀၀)ကျပ်ဖြင့်လည်းကောင်း၊ သလဲသီးဈေးနှုန်းမှာ သလဲသီးအကြီး(၁)လုံးလျှင် (၁၂၀၀) ကျပ်၊ အသေး (၁)လုံး လျှင်(၇၀၀)ကျပ် ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

   မွန်ပြည်နယ်၊ ချောင်းဆုံမြို့နယ်အတွင်း ဆီထွက်သီးနှံဧကသုံးထောင်ကျော် စိုက်ပျိုးသွားရန် လျာထားကြောင်း သိရသည်။

       ၂၀၂၅-၂၀၂၆ ဆောင်းသီးနှံစိုက်ပျိုးထုတ်လုပ်မှုအနေဖြင့် နေကြာ ၃၅၂၀ ဧက၊ မြေပဲ ၁၁၉ ဧက၊ နှမ်း ၂၅ ဧက စုစုပေါင်း ဆီထွက်သီးနှံ ၃၆၆၄ ဧက စိုက်ပျိုးနိုင်ရန် လျာထားဆောင်ရွက်လျက်ရှိသည်။

         အလားတူ ပဲမျိုးစုံ ၅၂၇၁ ဧကနှင့် ပိုက်ဆံလျှော် ၂၀ ဧက စိုက်ပျိုးနိုင်ရန်အတွက် လျာထား ဆောင်ရွက်လျက်ရှိကြောင်း သိရသည်။

DOCA (မွန်)

      မြင်းခြံမြို့၊ မြို့မစည်ပင်သာယာဈေး၊ အေးမြသီတာဈေးနှင့် စံပြဈေးများတွင် စားဖိုဆောင် ဟင်းသီးဟင်းရွက်မျိုးစုံ ရောင်းချလျက်ရှိရာ ရာသီပေါ်မုန်ညင်းစိမ်းများကိုလည်း ရောင်းချလျက်ရှိသည်။ ၂၀၂၅ခုနှစ်၊ ဒီဇင်ဘာလ၌ မုန်ညင်းစိမ်းတစ်စည်းလျှင် (၄၀၀) ကျပ်ခန့် ပေါက်ဈေးများဖြင့် အရောင်းအဝယ်ဖြစ်လျက်ရှိကြောင်း၊ ယခင်လနှင့် နှိုင်းယှဉ်ပါက ယခုလတွင် မုန်ညင်းစိမ်း တစ်စည်းလျှင် (၂၀၀)ကျပ်ခန့် ဈေးနှုန်းများကျဆင်းခဲ့ကြောင်း၊ အညာဒေသတွင် ဆောင်းရာသီ၌ စိုက်ပျိုးထွက်ပေါ်သော ရာသီစာမုန့်ညင်းစိမ်းများ လှိုင်လှိုင်ထွက်ပေါ်၍ ဈေးနှုန်းများကျဆင်းပြီး စားသုံးသူများအနေဖြင့် ဈေးနှုန်းချိုသာစွာ စားသုံးရကြောင်း၊ စိုက်ပျိုးသော ကျေးရွာများမှာ အနိမ့်ကျေးရွာ၊ ဂေါင်းကွဲကျေးရွာနှင့် ပတ္တာကျေးရွာများ၌ စိုက်ပျိုးထားရှိကြောင်း၊ ရာသီစာမုန်ညင်းစိမ်း များအား စားသုံးမှုများ၍ နေ့စဉ်ကုန်ချိန်(၂၅၀-၄၀၀)စည်းခန့် အရောင်းအဝယ် ဖြစ်လျက်ရှိကြောင်း၊ ‌ဖောက်သည်များလည်း ပေးရကြောင်း၊ ကုန်စိမ်းရောင်းချသူများထံမှ သိရှိရသည်။

DOCA(မန္တလေး)

       စစ်ကိုင်းတိုင်းဒေသကြီး၊ မုံရွာမြို့နယ်အတွင်းရှိ ကျေးရွာများတွင်  စိုက်ပျိုးရေးကို အဓိကထားလုပ်ကိုင်ကြရာ မိမိပိုင် အိမ်ခြံဝင်းများနှင့် ယာကွက်များတွင်  ပိန်းဥနှင့် ပီလောပီနံဥကို တစ်ပိုင်တစ်နိုင် စိုက်ပျိုးလျက်ရှိကြောင်း သိရှိရပါသည်။

          ၂၀၂၅ ခုနှစ်၊ ဒီဇင်ဘာလ  တတိယပတ်တွင် မုံရွာမြို့၊ မြသလ္လာဈေးနှင့် ချင်းတွင်းရတနာဈေးတို့တွင်   ရောင်းချနေသော  ပိန်းဥဈေးနှုန်းမှာ လက္ကားဈေး (၁)ပိဿာလျှင် (၂၆၀၀) ကျပ်၊ လက်လီ(၁)ပိဿာလျှင်(၂၈၀၀)ကျပ်နှင့် ပီလောပီနံဥဈေးနှုန်းမှာ လက္ကားဈေး (၁)ပိဿာ လျှင်(၂၅၀၀)ကျပ်၊ လက်လီ(၁)ပိဿာလျှင် (၂၇၀၀)ကျပ်နှင့်ဖြင့် ရောင်းဝယ်လျက်ကြောင်း  သိရှိရပါသည်။

DOCA(စစ်ကိုင်း)