ပြည်တွင်းကုန်သွယ်မှုသတင်း

             ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ်၊ သရက်ကုန်းကျေးရွာတွင် အိမ်ခြေ၄၀၀ ကျော်ရှိသည့်အနက် မိရိုးဖလာလုပ်ငန်းဖြစ်သည့် ဝါးခမောက်လုပ်ငန်းကို ၉၅ရာခိုင်နှုန်းခန့် လုပ်ကိုင်လျက်ရှိပါသည်။ ဝါးခမောက်လုပ်ကိုင်ရာတွင် ဝါးပိုးဝါး၏ဝါးဖတ်ကို အဓိကကုန်ကြမ်းအဖြစ် အသုံးပြုပြီး ခွေတင်ရန်အတွက် သိုက်ဝါး၊ ဝါးကြီးတို့ကို လိုအပ်သလိုပုံဖော်ရန်နှင့် ပျော့ပျောင်းရန် ရေထဲမှာ၄၅ရက်စိမ်ပြီး ခိုင်ခံ့ရန်ပျားဖယောင်းသုတ်ထားသောအပ်ချည်ကိုအသုံးပြုချုပ်လုပ်၍အကြမ်းထည်မှ အချောထည်ရရှိသည့်အထိ အဆင့်ဆင့်ပြုလုပ်ရသည့်ရိုးရာလက်မှုလုပ်ငန်းဖြစ်ပါသည်။ မိမိ ဒေသထွက်ကုန်ကြမ်းဝါးဖတ်များအပြင် နီးစပ်ရာဒေသများဖြစ်သော ကလော၊ တီကျစ်၊ ရပ်စောက်၊ ရွာငံ၊ တောင်ပေါ်ကြီး ဒေသများမှလည်းကုန်ကြမ်းများရယူပြီး ကုန်ချောများပြန်လည်ရောင်းချလျက် ရှိပါသည်။ တောင်ယာလုပ်ငန်းတွင်အဓိကအသုံးပြုသောဝါးခမောက် အကြမ်းဆောင်း အမျိုးသား၊ အမျိုးသမီးဆောင်းတစ်ချပ်လျှင်၂၀၀၀ကျပ်မှ၂၅၀၀ကျပ်ဝန်းကျင်ရှိပြီး အကြမ်းထည်ကို ဘော်ကြယ်၊ ကာလာဆေးရောင်စုံများနှင့် အသေးစိတ်ဝါးချောင်းများဖြင့် ပြန်လည်အလှဆင်ထားသော (အချော) တစ်ချပ်လျှင် ၃၅၀၀ကျပ်မှ၄၀၀၀ကျပ်အထိရောင်းချလျက်ရှိပါသည်။ အသေးစိတ်ပုံဖော်အလှဆင်ထားသော ရောင်စုံဝါးခမောက်များကို ဟိုတယ်များ၊ စားသောက်ဆိုင်များ၊ ဒေသထွက်လက်ဆောင် ပစ္စည်းအရောင်းဆိုင်များနှင့် ရိုးရာပွဲတော်များတွင် Decoration ပြုလုပ်ရန် အလှဆင်အသုံးပြုကြပြီး ဒေသတွင်းသာမက မန္တလေး၊ မိတ္ထီလာ၊ ရပ်စောက်နှင့် မြန်မာနိုင်ငံ့အနှံ့အပြားသို့ ခမောက်အချပ်ရေ ၅၀ချပ်ကိုတစ်တွဲစီး၍ လက်လီလက်ကားဖြန့်ဖြူးရောင်းချလျက်ရှိကြောင်းသိရှိရပါသည်။ ယခုအခါ သရက်ကုန်းကျေးရွာတွင် နှစ်စဉ်ဝါးခမောက်အလုံးရေ လေးသိန်းမှ ငါးသိန်းကျော်အထိ ထုတ်လုပ်လျက်ရှိပြီး ဝါးခမောက်အကြမ်းသုံးသည် အကြမ်းသုံးဆိုသည့်အတိုင်း အကြမ်းခံပြီး စိုက်ပျိုးရေး လုပ်ကိုင်ရာတွင် တောင်သူများအတွက် လေဒဏ်၊ မိုးဒဏ်၊ နေဒဏ်ကာကွယ်ပေးသည့် မရှိမဖြစ်လို အပ်သောအရာဖြစ်ပြီး ရိုးရာလက်မှုပစ္စည်းဖြစ်သည်နှင့်အညီရိုးရာပွဲများတွင်လည်းကောင်း၊ အလှဆင် ရန်တွင်လည်းကောင်း၊ လက်မှုပစ္စည်းမြတ်နိုးသူများလည်းကြိုက်နှစ်သက်ကြ၍လည်းကောင်းအချော ရောအကြမ်းပါ ကြိုက်နှစ်သက်သူများပြားသော အသုံးအဆောင်ပစ္စည်းဖြစ်သည့် မိရိုးဖလား တစ်နိုင် တစ်ပိုင်အသေးစားလုပ်ငန်းဖြစ်၍ ပြည်တွင်းဖြစ်  ဓနုဒေသထွက် သရက်ကုန်း ဝါးခမောက်လုပ်ငန်းသည် ရေရှည်ရပ်တည်နေနိုင်ခြင်းဖြစ်ပါကြောင်း တင်ပြလိုက်ရပါသည်။

DOCA(ရှမ်း)

   မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည် နှင့်အညီ စစ်ကိုင်းတိုင်းဒေသကြီး ၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ကန့်ဘလူခရိုင်၏ အဓိကစိုက်ပျိုးသီးနှံတစ်ခုဖြစ် သည့် အစေ့ထုတ်ပြောင်းများလည်း စိုက်ပျိုးကြကြောင်းသိရသည်။

ကန့်ဘလူခရိုင်၌ အစေ့ထုတ်ပြောင်း စိုက်ပျိုးရာတွင် မျိုးအနေဖြင့် C.P.808 နှင့် C.P.888မျိုး တို့ကို အများဆုံးစိုက်ပျိုးကြကြောင်း၊ ယခုအခါ အစေ့ထုတ်ပြောင်းများ ဈေးကွက်အတွင်း ဝင်ရောက် မှုနည်းသော်လည်း ပုံမှန်အရောင်းအဝယ်ဖြစ်လျက်ရှိကြောင်း၊ ၂၀၂၅ ခုနှစ်၊ ဖေဖော်ဝါရီလ တတိယ ပတ်အတွင်း အစေ့ထုတ်ပြောင်း(၁)တင်းလျှင် (၂၁၀၀၀)ကျပ်၊ ပြောင်းအရည်အသွေးညံ့လျှင် (၂၀၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊  ယခင်ပတ်ဈေးနှုန်းများနှင့် နှိုင်းယှဉ်ပါက ယခုပတ်တွင် အစေ့ထုတ်ပြောင်း(၁)တင်းလျှင်(၁၀၀၀)ကျပ် ကျဆင်းသွားကြောင်း၊ ဒေသတွင်းပွဲရုံ လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

          ရွှေဘိုမြို့ရှိ ဈေးများတွင် စားဖိုဆောင်သီးနှံတစ်မျိုးဖြစ်သည့် ခရမ်းသီးခြောက်များကို ရောင်းချလျက်ရှိပါသည်။ ခရမ်းသီးမျိုးများမှာ ပဒေသာသီး(ခေါ်)ခရမ်းညိုသီး၊ အက်တောသီးနှင့် ခရမ်းသီး(အစိမ်း)သီးဟူ၍ (၃)မျိုးရှိကြောင်း၊ ခရမ်းသီးများလှိုင်လှိုင်ပေါ်သည့်အချိန်တွင် နေပူ အခြောက်လှမ်းကာ ရောင်းချကြကြောင်း၊ ပေါ်ဉီးပေါ်ဖျားခရမ်းသီးခြောက်များမှာ တပို့တွဲလမှ စတင်၍ လှိုင်လှိုင်ပေါ်ကြောင်း၊ ခရမ်းသီးခြောက်များကို နှစ်ပေါက်စားသုံးရန်နှင့် လက်ဆောင်ပေးရန် ဝယ်ယူကြကြောင်း၊ ခရမ်းသီးခြောက်များကို ရွှေဘိုမြို့နယ်အပြင် ရေဉီးမြို့နယ်မှလည်း လာရောက် ရောင်းချကြောင်း သိရှိရပါသည်။

          အချို့ဒေသများတွင် ခရမ်းသီးခြောက်များကို ပြည်ချင့်ရောင်းချသည့်အပြင် ရွှေဘိုမြို့တွင် အလေးချိန်ဖြင့် ရောင်းချချကြောင်း၊ ရွှေဘိုမြို့၌ ၂၀၂၅ခုနှစ်၊ ဖေဖော်ဝါရီလ (ဒုတိယ)အပတ်တွင် ရောင်းချသည့် ခရမ်းသီးခြောက်ဈေးနှုန်းမှာ (၁၀)ကျပ်သားလျှင်(၂၀၀ဝိ/-)ကျပ်ဖြစ်ကြောင်း သတင်း ရရှိပါသည်။

DOCA(စစ်ကိုင်း)

             စစ်ကိုင်းတိုင်းဒေသကြီး၊ ရွှေဘိုခရိုင်၊ ရွှေဘိုမြို့ရှိ မြို့မဈေးကြီးနှင့် ကြက်သွန်ရောင်းချသည့် ပွဲရုံများတွင်  ၂၀၂၅ခုနှစ်၊ ဇန်နဝါရီလ (ဒုတိယ)အပတ်မှ စတင်၍ ကြက်သွန်ဖြူ (အသစ်)များ စတင် ဝင်ရောက်လျက်ရှိပါသည်။ ကြက်သွန်ဖြူ(အသစ်)များမှာ ဝက်လက်မြို့နယ်ရှိ ရွှေပန်းကုန်းရွာ၊ သမံသာရွာ၊ ကျောက်တိုင်ရွာများမှ လာရောက် ရောင်းချချကြ သည့်အပြင် ရေဦးမြို့နယ်များမှလည်း လာရောက်ရောင်းချချကြောင်း သိရှိရပါသည်။

            ၂၀၂၅ခုနှစ်၊ ဖေဖော်ဝါရီလ (ဒုတိယ)အပတ်တွင် ရောင်းချသည့် ကြက်သွန်ဖြူ(အသစ်) ဈေးနှုန်းများမှာ အရွယ်အစားအကြီးအသေးပေါ်မူတည်၍ (၁)ပိဿာလျှင် (၉၀၀ဝိ/-)ကျပ်မှ (၁၃၀၀ဝိ/-)ကျပ်ထိ ‌အရောင်းအဝယ် ဖြစ်လျက်ရှိကြောင်း ရောင်းချသည် လုပ်ငန်းရှင်ထံမှ သိရှိ ရပါသည်။      

DOCA(စစ်ကိုင်း)

ရက်စွဲ၊ ၁၆.၂.၂၀၂၅

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ကျေးရွာများနှင့် မြို့ပေါ်ရပ် ကွက်များမှ မိမိတို့တောင်ယာများတွင် တစ်ပိုင်တစ်နိုင် စိုက်ပျိုးရေးကို လုပ်ကိုင်လျက်ရှိရာ စွန်တာနီပဲ (ခေါ်)ပဲနီကိုလည်း စိုက်ပျိုးလျက်ရှိပြီး ပဲနီကို ကန့်ဘလူမြို့ပွဲရုံများနှင့်မမြို့ပေါ်ဈေးကွက်သို့ လာရောက် ရောင်းချကာ ဈေး‌ကောင်ရရှိ၍ အရောင်းအဝယ် ဖြစ်လျက်ရှိ ကြောင်းသိရသည်။

          စွန်တာနီပဲ(ခေါ်)ပဲနီရေပွသည် ဘာသာမရွေး လူသားတိုင်း ကြိုက်နှစ်သက်ပြီး စားအလွန် ကောင်းကာ  နုညံ့သည့် ပဲတစ်မျိုးဖြစ်သည်။ စွန်တာနီပဲ(ခေါ်)ပဲနီအစိမ်းကို လှော်ပြီးမှ ပြုတ်ရကြောင်း ပဲနီ(၁)ပြည်ပွလျှင်(၂)ပြည်ရကြောင်း၊ (၁)ရက်ကို ပဲနီ(၄)ပြည်ပွရကြောင်း၊  စွန်တာနီပဲ(ခေါ်)ပဲနီအစိမ်း (၁)ပြည်ကို (၇၀၀၀)ကျပ်ဖြင့်ဝယ်ရကြောင်း စွန်တာနီပဲ(ခေါ်)ပဲနီပွပြီးသား ပဲရေပွကို အရန်ဟင်းကြမ်း တစ်ခွက်အဖြစ် ကြော်စားကာ ထမင်းအရမ်းမြိန်စေသော ပဲတစ်မျိုးဖြစ်ကြောင်း စွန်တာနီပဲ(ခေါ်)ပဲနီရေပွ ရောင်းချသူထံမှ သိရသည်။

          ယခု ၂၀၂၅ ခုနှစ်၊ ဖေဖော်ဝါရီလ တတိယပတ်အတွင်း ဖြစ်ပေါ်နေသော ကန့်ဘလူမြို့၏ စွန်တာနီပဲ(ခေါ်)ပဲနီရေပွ ဈေးနှုန်းများမှာ စွန်တာနီပဲ(ခေါ်)ပဲနီရေပွ တစ်ပြည်လျှင်(၄၈၀၀)ကျပ်၊ စွန်တာနီ ပဲ(ခေါ်)ပဲနီရေပွ  နို့ဆီ တစ်ဘူးလျှင် (၆၀၀)ကျပ် ဈေးနှုန်းဖြင့် ရောင်းချလျက်ရှိပြီး  (၁)ရက်ကို ပဲနီ(၄)ပြည် ပွရကြောင်း၊  စွန်တာနီပဲ(ခေါ်)ပဲနီအစိမ်း(၁)ပြည်ကို(၇၀၀၀)ကျပ်ဖြင့်ဝယ်ရပြီး  စွန်တာနီပဲ(ခေါ်)ပဲနီရေပွ (၁)ပြည်ပွလျှင်(၂)ပြည်ရပြီး စွန်တာနီပဲ(ခေါ်)ပဲနီရေပွကို (၁)ပြည်လျှင်(၄၈၀၀)ကျပ်ဖြင့် ရောင်းချ‌ ရသော ကြောင့် တရက်လျှင် အမြတ်ငွေ(၁၀၀၀၀)ကျပ်အနိမ့်ဆုံးရရှိကြောင်း စွန်တာနီပဲ(ခေါ်)ပဲနီရေပွ ရောင်းချ သူထံမှသတင်းရရှိပါသည်။

DOCA(စစ်ကိုင်း)