ပြည်တွင်းကုန်သွယ်မှုသတင်း

       စစ်ကိုင်းတိုင်းဒေသကြီး၊ ချင်းတွင်းမြစ်ရိုးအရှေ့ဘက်ကမ်းရှိ မုံရွာမြို့နယ်သည် အပူပိုင်း‌အညာဒေသဖြစ်သည့်အတွက် အပူပိုင်းတွင် ပေါက်ရောက်တက်သော ဆေးဖတ်ဝင်အပင် တစ်မျိုးဖြစ်သည့် သမားမုန်းသည့် ဆေးဘက်ဝင် သမုန်းဖူး(သမုန်းပွင့်)များဖူးပွင့်လျက်ရှိသည်။           သမုန်းဖူးများအား ခူးယူ၍ အပွင့်အစိမ်းအတိုင်း ရောင်းချကြသလို အဖူးအပွင့်များကို ရေနွေးဖြင့်ဖျော၍ ရောင်းချကြသည်။ ယခု တပို့တွဲနှင့် တပေါင်းလများတွင် မြိုင်မြိုင်ထွက်ပေါ် လေ့ရှိသည်။ ရာသီပေါ်သမုန်းဖူးများကို ဆေးဖက်ဝင်သောကြောင့် စားသုံးသူ များ   ကြိုက်နှစ်သက်ကြသည်။  သမုန်းပွင့်ပြုတ်ပြီးသားများကို ဈေးထဲတွင် လက်ပုံများပုံ၍ တစ်ပုံလျှင်(၅၀၀-၁၀၀၀)ကျပ်အထိ ရောင်းချရကြောင်း၊ ပိဿာဖြင့် ဝယ်ယူမည်ဆိုပါက သမုန်းဖူး ပြုတ်ပြီးသား (၁)ပိဿာလျှင် (၁၈၀၀၀)ကျပ်အထိ ရောင်းချရကြောင်း၊ ရောင်းချသူများမှာ နေ့စား အလုပ်သမားများမှ မိသားစုဝင်ငွေတိုးရန်အတွက် ခူးဆွတ်၍ရောင်းချခြင်းဖြစ်ပါသည်။ ပြုတ်ပြီးသော သမုန်းပွင့်အရွက်နုနုလေးများကို ကတ်ကြေးဖြင့်ညှပ်၍ မြေပဲဆံထောင်း၊ ကြက်သွန်နီ၊ ကြက်သွန်ဖြူများဖြင့် ဆီသပ်ပြီး သုပ်၍စားခြင်း၊ ခရမ်းချဉ်သီးငပိချက်နှင့် အတို့အနေဖြင့် လည်းကောင်း တွဲဖက်စားသုံးကြသည်။ ရာသီအလိုက် လအလိုက်ပေါ်သော အညာဒေသ၏ ဆေးဖက်ဝင် ရာသီစာသမုန်းဖူးများကို ဝယ်ယူစားသုံးမှုများကြောင်း မိသားစုအပိုဝင်ငွေရရှိရန် သမုန်းဖူးခူးယူရောင်းချနေသူများထံမှ သိရပါသည်။

DOCA(စစ်ကိုင်း)

စစ်ကိုင်းတိုင်းဒေသကြီး၊ မုံရွာမြို့နယ်၊ ကန်သာယာဈေးအတွင်းတွင် ကုန်စိမ်းသီးနှံအစုံ ရောင်းချလျက် ရှိရာ  ရာသီပေါ်အသီးအရွက်များဖြစ်သည့် တမာရွက်၊ ညောင်ရွက်၊ ထနောင်းဖူး၊ သမုန်းဖူး(သမုန်းပွင့်)၊ ကန့်လန့်ဖူး၊ မုန့်ညှင်းရွက်၊ နံနံပင်၊ ပဲကြီးအစို၊ ပန်းမုံလာပွင့်၊ မုံလာထုတ်၊ ခါကြက်ဥ၊ ခရမ်းသီး၊ သံပုရာသီး၊ နှင့် ခရမ်းချဉ်သီး စသည့်သီးနှံများ ရောင်းချလျက် ရှိကြောင်း သိရသည်။

တမာပင်သည် အပူပိုင်းအမြဲစိမ်းအပင်တစ်မျိုးဖြစ်ပြီး အညာဒေသများတွင် ပေါက်ရောက် သော အပင်ကြီးမျိုးဖြစ်သည်။ တမာရွက် အမျိုးအစား အမျိုးမျိုးရှိရာ ခြံစည်းရိုးတမာ၊ ရေတမာနှင့် စားတမာ ဟူ၍ ရှိသည့်အနက် စားတမာဖူး/တမာရွက်နုသည် လူတိုင်းနီးပါး ကြိုက်နှစ် သက်သော အရွက်တစ်မျိုးဖြစ်ပြီး ထမင်းမြိန်စေသော အရန်ဟင်းကြမ်းတစ်မျိုးအဖြစ် အသုံးပြုကြပါသည်။ တမာရွက်နုတွင် အမျှင်ဓာတ်၊ အဆီဓာတ်၊ ကယ်လ်ဆီယမ်၊ သံဓာတ်၊ ဆိုဒီယမ်၊ ပိုတက်ဆီယမ်နှင့် ဗီတာမင်ဓာတ်တို့ပါဝင်ပြီး အသင့်အတင့်စားသုံးပေးပါက ကျန်းမာရေးအတွက် အထူးကောင်းမွန် ပါသည်။         

ယခင်နှစ်က တမာရွက်နု(၁၀)သားလျှင် (၈၀၀/၁၀၀၀)ကျပ်၊ ယခုနှစ်တွင်မူ (၁၀၀၀/၁၅၀၀)ကျပ်အထိ ရောင်းချရကြောင်းသိရသည်။ တမာရွက်နုများကို ပြုတ်၍ ခရမ်းချဉ်သီး ငါးပိချက်၊ ငံပြာရည်ချက်၊ ငါးပိရည်နှင့် ငါးခြောက်ချက်များ တို့ဖြင့် တွဲဖက်စားသုံးကြသည်။ တမာရွက်နုများသည် ပြာသိုလနှင့် တပိုတွဲလများတွင် ထွက်ရှိပြီး ဈေးကွက်အတွင်းသို့ စတင်ဝင်ရောက်လျက်ရှိပြီး အရောင်းအဝယ်ဖြစ်လျက်ရှိကြောင်းသိရသည်။

DOCA(စစ်ကိုင်း)

စစ်ကိုင်းတိုင်းဒေသကြီး၊ ကန့်ဘလူခရိုင်သည် စိုက်ပျိုးရေးလုပ်ငန်းကို အဓိကလုပ်ကိုင်ကြပြီး မြေပဲလုံးဆံနှင့် မြေပဲအတောင့်များကို မြေပဲစိုက်ပျိုးရာ၌လည်းကောင်း ၊ ဆီစက်လုပ်ငန်းရှင်အချို့မှ မြေပဲဆီကြိတ်ကာ ကုန်ချောထုတ်လုပ်၍ ပြန်လည်ရောင်းချကြောင်း၊ မြေပဲလုံးဆံကို မြေပဲယို၊ မြေပဲဆားလှော်စသည်ဖြင့်လည်းကောင်း၊ အစားအသောက်များနှင့်တွဲဖက်စားသုံးခြင်းတို့ ပြုလုပ်ကြ ကြောင်း၊ ကန့်ဘလူခရိုင်တွင် အရောင်းအဝယ်ဖြစ်နေသည့် မြေပဲလုံးဆံများသည် ဒေသတွင်းမှလည်း ကောင်း၊ မန္တလေးမြို့နှင့်ရွှေဘိုမြို့တို့မှလည်းကောင်း ဝင်ရောက်ကြောင်း သိရသည်။

ကန့်ဘလူခရိုင်၌ ဖေဖေါ်ဝါရီလ ပထမပတ်အတွင်း မြေပဲအတောင့်(၁)တင်းလျှင် ငွေကျပ် (၃၇၀၀၀)နှင့် မြေပဲလုံးဆံ(၁)တင်းလျှင် ငွေကျပ်(၁၂၉၀၀၀)ဖြင့် အရောင်းအဝယ်ဖြစ်ခဲ့ကြောင်း၊ ဖေဖေါ်ဝါရီလဒုတိယပတ်အတွင်း မြေပဲအတောင့်(၁)တင်းလျှင်(၃၈၀၀၀)ကျပ်နှင့် မြေပဲလုံးဆံ(၁) တင်းလျှင်(၁၃၆၀၀၀)ကျပ်ဖြင့် အရောင်းအဝယ်လျက်ရှိသောကြောင့် မြေပဲအတောင့်(၁)တင်းလျှင် (၁၀၀၀)ကျပ်နှင့် မြေပဲလုံးဆံဈေးမှာ(၇၀၀၀)ကျပ် ပြန်လည်မြင့်တက်လာကြောင်း လုပ်ငန်းရှင်များ ထံမှ သိရသည်။

DOCA(စစ်ကိုင်း)

 စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးသည့်အပြင် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။

ယခုအခါ ကန့်ဘလူမြို့နယ်အတွင်းရှိ နတ်ပေးကျေးရွာ၊ တောက္ကရှပ်ကျေးရွာနှင့် အခြားသော ကျေးရွာများတွင် ထောပတ်ပဲများကို စိုက်ပျိုးကြကြောင်း၊ ထောပတ်ပဲအစိုများကို ကန့်ဘလူမြို့မ ဈေးတွင်ရောင်းချကြောင်း ၊ ဖေဖေါ်ဝါရီလ ဒုတိယပတ်အတွင်း ထောပတ်ပဲစို(၁)ပြည်လျှင် ၅၅၀၀ ကျပ်၊ ထောပတ်ပဲနို့ဆီဗူး(၂)ဗူးလျှင် ၁၃၀၀ကျပ်နှင့် ထောပတ်ပဲနို့ဆီဗူး(၁)ဗူးလျှင် ၇၀၀ကျပ် ဖြင့်ရောင်းချကြောင်း၊ ရာသီစာဖြစ်သည့်အတွက် ထောပတ်ပဲအစိုများ အရောင်းအဝယ်သွက်လျက် ရှိကြောင်း မြို့မဈေးရှိ ကုန်စိမ်းရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

စစ်ကိုင်းတိုင်းဒေသကြီး၊ ကန့်ဘလူခရိုင်တွင် ကွမ်းသီးပင်များကို နေအိမ်ခြံဝင်းများ၌ မိသားစုဝင်ငွေရရှိသည့်အတွက် တစ်နိုင်တစ်ပိုင်စိုက်ပျိုးကြကြောင်း ၊ ကွမ်းသီးများကို ကန့်ဘလူ ခရိုင်အတွင်းမှလည်းကောင်း၊ ဘိတ်ဒေသမှလည်းကောင်းဝယ်ယူပြီး ကွမ်းသီးစိတ်များပြုလုပ်၍ ပြန်လည်ရောင်းချလျက်ရှိကြောင်း သိရသည်။

          ၂၀၂၅ ခုနှစ် ၊ ဖေဖေါ်ဝါရီလ ဒုတိယပတ်တွင် ကန့်ဘလူခရိုင်၏ ကွမ်းသီးစိတ်ဈေးနှုန်းများ မှာအရည်အသွေးပေါ်မူတည်၍ ကွမ်းသီးစိတ်လက်ကားဈေး(ရှယ်)တစ်ပိဿာလျှင် (၁၈၅၀၀)ကျပ်၊ လက်လီဈေး(ရှယ်)တစ်ပိဿာလျှင်(၁၉၅၀၀)ကျပ်၊ ကွမ်းသီးစိတ်(လတ်)တစ်ပိဿာလျှင် (၁၈၀၀၀) ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခင်ပတ်ဈေးနှုန်းများနှင့်နှိုင်းယှဉ်ပါက ကွမ်းသီးစိတ် (ရှယ်)လက်လီ/လက္ကားဈေးမှာ (၅၀၀)ကျပ်၊ ကွမ်းသီးစိတ်(လတ်)တစ်ပိဿာလျှင် (၂၀၀၀)ကျပ် မြင့်တက်လာကြောင်း၊ ဈေးကွက်အနေဖြင့် ကန့်ဘလူမြို့ပေါ်ရှိဆိုင်များနှင့်ကျေးရွာများ၊ ကျွန်းလှမြို့ နယ်သို့ လက်လီ/လက္ကားဖြန့်ဖြူးလျက်ရှိကြောင်း  ကန့်ဘလူမြို့၊ အမှတ်(၃)ရပ်ကွက်ရှိ ကွမ်းသီးစိတ် ရောင်းဝယ်ရေး လုပ်ငန်းရှင်၏ပြောပြချက်အရ သိရသည်။

DOCA(စစ်ကိုင်း)