ပြည်တွင်းကုန်သွယ်မှုသတင်း

             ထောပတ်ပဲသည် ခန္ဓာကိုယ်အတွက် အကျိုးပြုသော အာဟာရဓာတ်များစွာပါဝင်ပြီး ကျန်းမာရေးအတွက် များစွာအထောက်အကူပြုသော ပဲအမျိုးအစားဖြစ်သည်။ ပရိုတင်းဓာတ် များစွာပါဝင်သဖြင့် သက်သတ်လွတ်စားသူများအတွက် အထူးသင့်လျော်ကြောင်း၊ အမျှင်ဓာတ် ကြွယ်ဝသောကြောင့် အစာခြေစနစ်ကိုကောင်းမွန်စေပြီး ဝမ်းချုပ်ခြင်းကို ကာကွယ်ပေးနိုင်ကြောင်း၊ ထောပတ်ပဲတွင်ပါဝင်သော ပရိုတင်းဓာတ်နှင့် အမျှင်ဓာတ်များသည် သွေးတွင်းကိုလက်စထရောကို လျှော့ချပေးနိုင်ပြီး နှလုံးရောဂါဖြစ်နိုင်ခြေကို လျှော့ချပေးနိုင်သောကြောင့် လူအများ အားပြုစားသုံး သင့်သော ပဲဖြစ်သည်။

             မြင်းခြံခရိုင်တွင် စိုက်ပျိုးရေးအတွက် အရေးပါသော  ဆည်ရေသောက်အသင့်အတင့် ရှိသဖြင့် ဒေသခံတောင်သူများ၏ စိုက်ပျိုးရေးလုပ်ငန်းများသည် ဆည်ရေသောက်ဧရိယာများတွင် ရာသီမရွေး လုပ်ကိုင်ဆောင်ရွက်နိုင်ကြောင်း သိရသည်။ မြင်းခြံခရိုင်တွင် ထောပတ်ပဲကို ရာသီချိန်အဖြစ် မိုးနှင့်ဆောင်းဟူ၍ နှစ်ရာသီစိုက်ပျိုးကြကြောင်းသိရှိရသည်။

             ၂၀၂၄-၂၀၂၅ ဆောင်းထောပတ်ပဲကို ခရိုင်ချုပ်အနေဖြင့် (၂၉၄၃)ဧကစိုက်ပျိုးထားရှိပြီး ယခင်နှစ်ထက် (၂၅)ဧကပိုမိုစိုက်ပျိုးထားကြောင်းသိရှိရသည်။ ခရိုင်အတွင်း စိုက်ပျိုးထားရှိမှုမှာ မြင်းခြံမြို့နယ်တွင်(၈၉၆)ဧက၊ နွားထိုးကြီးမြို့နယ်တွင်(၂၀၄၇)ဧကနှင့် တောင်သာမြို့နယ်တွင် ဆောင်းထောပတ်ပဲစိုက်ပျိုးထားမှု မရှိကြောင်း သိရှိရသည်။ ဆောင်းထောပတ်ပဲကို ဩဂုတ်လ၊ စက်တင်ဘာလနှင့် အောက်တိုဘာလတို့တွင် စိုက်ပျိုးလေ့ရှိပြီး မတ်လ၊ဧပြီလနှင့် မေလတို့တွင် ရိတ်သိမ်းထွက်ပေါ်လေ့ရှိကြောင်း၊ မြင်းခြံခရိုင်အနေဖြင့် မတ်လနှင့်ဧပြီလတို့တွင် ရိတ်သိမ်း ထွက်ပေါ်လာမည်ဖြစ်ကြောင်း သိရှိရသည်။

DOCA(မန္တလေး)

                 ထူးကဲသောအနံ့အရသာနှင့်ပြည့်စုံသောသရက်သီးသည် အပူပိုင်းဒေသ၏အမည်ကျော်       အသီးတစ်မျိုးဖြစ်သည်။ မန္တလေးတို်ငးဒေသကြီးအတွင်း ကျောက်ဆည်၊ ဟန်မြင့်မိုရ်၊ မြစ်သား၊  စဉ်ကိုင်၊ တံတားဦး၊ ပုသိမ်ကြီးမြို့နယ်များတွင်စိန်တလုံးနှင့် ဟင်္သာသရက်မျိုးများကို စီးပွားဖြစ် စိုက်ပျိုးဖြစ်ထွန်းလျက်ရှိကြောင်းသိရသည်။ မန္တလေးအညာဒေသ၌ ယခုဖေဖော်ဝါရီလတွင်းပေါ်ဦး ပေါ်ဖျားဖြစ်သည့် သရက်သီးစိမ်း(ခေါ်)သရက်ကင်းများစတင်သီး၍ဈေးကွက်အတွင်း၌ ဈေးကောင်း      ရရှိကာ သရက်ခြံစိုက်ပျိုးသူများ ဝင်ငွေတိုးလျက်ရှိကြောင်း သိရှိရပါသည်။

                 သရက်ပင်သည် စိုက်ပျိုးပြီးအသီးအသီးရန် အချိန်အားဖြင့်(၃)နှစ် ကြာမြင့်ပါသည်။ သရက်သီးမှည့်ချိန်မရောက်မီ လေများတိုက်ခတ်၍ရာသီဥတုကြောင့်သော်လည်းကောင်း၊ အပင်ပိုး ကျ၍သော်လည်းကောင်း၊ အကြောင်းအမျိုးမျိုးကြောင့် အစေ့မယှက်ခင်နှင့်အစေ့ယှက်ပြီးအချိန်များ  တွင်အသီးများကြွေကျတတ်ကြောင်း၊ ထိုသို့ကြွေကျသောသရက်သီးများကို အလေလွင့်မဖြစ်စေရန် ဈေးထဲသို့ရောင်းချခြင်း၊အိမ်တွင်နှစ်ပေါက်စားသုံးရန် အသုံးပြုခြင်းများပြုလုပ်ကြပါသည်။ဈေးကွက် များအတွင်း သီးခါစသီးကင်းအလုံးကလေးများအား အသီးအနေထားပေါ်မူတည်၍ တို့စရာအဖြစ် (၁)လုံးလျှင် အနိမ့်ဆုံးဈေးငွေ(၃၀၀မှ၃၅၀)ကျပ် ၊(၃)လုံးလျှင်(၁၀၀၀)ကျပ်၊ အသီးအရွယ်အစား ကြီးလျှင်(၅၀၀) ကျပ်နှုန်းဖြင့် ရောင်းချလျက်ရှိ‌ပါသည်။ သရက်ခြံစိုက်တောင်သူများအနေဖြင့်လည်း  တစ်ရာသီလျှင်(၇)လနီးပါးပြုစုပျိုးထောင်ရပြီး သွင်းအားစုအနေဖြင့် အပင်တစ်ပင်ခြင်းပြုပြင်ခြင်း၊ အသီးအိတ်စွပ်ခြင်း၊ ဆေးဖြန်းခြင်း၊ မြေဩဇာထည့်ခြင်းများပြုလုပ်ရကြောင်း သိရှိရပါသည်။ သီးနှံ/ ကုန်သည်ပွဲစားများမှ မန္တလေးမြို့အနီးတစ်ဝိုက်ရှိ သရက်ခြံများသို့သရက်ပန်းပွင့်သည့် ဇန်နဝါရီလမှ စရံငွေများပေးချေကာ ခြံပြတ်၊ပင်ပြတ်ဝယ်ယူမှုများရှိကြောင်း၊ သရက်ကင်းသည် အေး၊ခါး၊ဖန် အရသာရှိ၍ ချဉ်၊ငန်၊စပ် အရသာကိုနှစ်သက်သော မြန်မာလူမျိုးများအတွက် ငါးပိရည်တို့စရာ အဖြစ်စားသုံး၍ အချဉ်ဓာတ်အရသာဖြစ်ပေါ်ချိန်ရင့်သည့် သရက်သီးစိမ်းကိုမူ သရက်သီးသုပ်၊ သရက်ကင်၊ သရက်သီးခြောက်၊ သရက်သီးဆားရေစိမ်၊သရက်သီးသနပ်၊ သရက်သီးကလည်တည် အဖြစ်နှစ်ပေါက်စားရန်အတွက်သော်လည်းကောင်း သီးနှံအမှည့်ပေါများချိန်တွင် မိသားစုတစ်နိုင် တစ်ပိုင် သရက်ပျဉ်လုပ်ငန်းများဖြင့်လည်း စီးပွားဖြစ်လျက်ရှိကြောင်းသိရှိရသည်။ သရက်ကင်း စတင်ပေါ်ထွက်ချိန် မေလနှင့်ဇွန်လများတွင် ဈေးနှုန်းများကျဆင်းလာတတ်ကြောင်း၊ နောက်ပိုင်း လများတွင်သာ ဈေးနှုန်းပြန်လည်မြင့်တက်လေ့ရှိကြောင်းသိရှိရပါသည်။

                 ”အသားမှာဝက်၊အရွက်မှာလက်ဖက်၊အသီးမှာသရက်” ဆိုသည့်အတိုင်း သရက်သီး သည်အရွက်နုချိန်၊သရက်ဖူးချိန်မှစဝါဝင်းမှည့်ချိန်ထိဝင်ငွေရရှိသောအသီးဖြစ်သည်။ မြန်မာနိုင်ငံ၏ စိန်တစ်လုံးသရက်သီးသည် ပြည်တွင်းစားသုံးမှုအပြင် နိုင်ငံခြားသို့တင်ပို့ရောင်းချသည့် သစ်သီးဝလံ တွင်ပါဝင်ပြီး နိုင်ငံခြားဝင်ငွေကိုဖော်ဆောင်ပေးနိုင်သဖြင့်အရေးကြီးသော အခန်းကဏ္ဍ တစ်ခုဖြစ် သည်။သရက်ခြံစိုက်တောင်သူများအနေဖြင့်လည်း အရည်အသွေးပြည့်မှီသော သရက်သီးများကို ခေတ်မှီနည်းစနစ်များဖြင့်အထွက်နှုန်းတိုးစိုက်ပျိုးခြင်းဖြင့် သရက်သီးတင်ပို့မှုရောင်းဝယ်မှု ဖွံ့ဖြိုးလာ စေနိုင်ပါသည်။ မန္တလေးတိုင်း ကျောက်ဆည်ခရိုင်မှထွက်ရှိသော စိန်တစ်လုံးသရက်ကိုပြည်တွင်း စားသုံးမှုအပြင် ပြည်ပသို့တင်ပို့ရောင်းချလျက်ရှိပါသည်။ တိုင်းဒေသကြီး/ပြည်နယ်အသီးသီးတွင် သရက်စိုက်ပျိုးမှု အများအပြားရှိကြသော်လည်း မန္တလေးတိုင်းဒေသကြီး၊ စစ်ကိုင်းတိုင်းဒေသကြီး ၊ ပဲခူးတိုင်းဒေသကြီးနှင့် ရှမ်းပြည်နယ်တောင်ပိုင်းတို့တွင် အများအပြား စိုက်ပျိုးလျက်ရှိကြောင်း  မန္တလေးတိုင်းအညာဒေသမှထွက်ရှိသော သရက်သီးများကိုလည်း နီးစပ်ရာမြို့ကြီးများသို့တင်ပို့ ရောင်းချကြကြောင်း သိရှိရပါသည်။

DOCA(မန္တလေး)

            မြိတ်ခရိုင်ဆီကိုယ်စားလှယ်မှ မြိတ်မြို့အတွက်လိုအပ်သော စားအုန်းဆီများကို ရန်ကုန်မြို့ကုမ္ပဏီများမှ ထုတ်ယူလျက်ရှိပြီး  ၂၀၂၅ခုနှစ်၊ ဖေဖော်ဝါရီလ(၁၀)ရက်နေ့မှ (၁၃)ရက်နေ့ ထိထုတ်ယူခဲ့သော ယာဉ်အမှတ် 2H-8765 တွင် Yadanarbon Global Network Distribution ကုမ္ပဏီမှ ပေပါ (၄၀)သည် (၁၇.၂.၂၀၂၅) ရက်နေ့တွင် မြိတ်မြို့သို့  ရောက်ရှိလာခဲ့ကြောင်း သိရှိရပါသည်။ အဆိုပါစားအုန်းဆီများကို ၂ ရာခိုင်နှုန်းအမြတ်ဖြင့် ခွဲဝေရောင်းချ ပေးသွားမည်ဖြစ်ကြောင်း သိရှိရပါသည်။

DOCA(ဧရာဝတီ)

            မအူပင်မြို့နယ်တွင် ဘုရင့်နောင်ကုန်စည်ဒိုင်များမှ ပဲအမျိုးမျိုးမှာယူ၍ ရောင်းချနေပြီး အခြေခံစားသောက်ကုန် မွန်းလိုက် လက်လီ/ လက်ကားအရောင်းဆိုင်တွင် ပဲမျိုးစုံ ရောင်းဝယ်လျက်ရှိသည်။ ရောင်းချနေသော ပဲမျိုးစုံများတွင် ပဲကြီး၊ ခေတ်သစ်ပဲ၊ ကုလားပဲဇံ ဘိုကိတ်အဖြူ၊ ဘိုကိတ်အနက်၊ ပဲအဖြူပြား၊ ပဲနီပြား၊ မြေပဲ၊ စတော်ပဲ၊ ပဲထောပတ် တို့ရောင်းချလျှက်ရှိသည်။ 

            ယနေ့ ၂၀၂၅ခုနှစ် ဖေဖော်ဝါရီလ တတိယပါတ် ပဲဈေးနှုန်းများမှာ ကုလားပဲဆံ ၁ပိဿာ ၆၅၀၀ကျပ် မြေပဲ ၁ပြည် ၉၅၀၀ကျပ်၊ စတော်ပဲ ၁ပြည် ၉၅၀၀ကျပ်၊ ပဲနီပြား ၁ပြည် ၈၀၀၀ကျပ်၊ ပဲဖြူပြား ၁ပြည် ၈၀၀၀ကျပ်၊ ဘိုကိတ်ဖြူ ၁ပြည် ၆၀၀၀ကျပ်၊ ဘိုကိတ်အနက် ၁ပြည် ၆၀၀၀ကျပ်၊ ပဲကြီး ၁ပြည် ၈၀၀၀ကျပ်၊ ခေတ်သစ်ပဲ ၁ပြည် ၉၅၀၀ကျပ်၊ ဖြင့်ရောင်းချလျှက်ရှိကြောင်း သိရသည်။

            ယခင် ၂၀၂၄ခုနှစ် အောက်တိုဘာလ ကုလားပဲဈေး  ၉၀၀ကျပ်၊ မြေပဲ  ၂၅၀၀ကျပ်၊ ပဲနီပြား ၄၀၀၀ကျပ်၊ ပဲပြားအဖြူ ၅၀၀ကျပ်၊ ဘိုကိတ်အဖြူ ၅၀၀ကျပ်၊ ဘိုကိတ်အနက် ၁၉၀၀ ကျပ်၊ ကျဆင်းကြောင်း တွေ့ရှိရပြီး ပွင့်လင်းရာသီ ပဲပေါ်ချိန်ဖြစ်၍ ဈေးနှုန်းကျဆင်းခြင်း ဖြစ်ကြောင်းနှင့် ၂၄ပြည် ပဲတစ်အိတ်ကို ၂ရက်-၃ရက်အတွင်းရောင်းချရပြီး၊ ပဲအမျိုးမျိုးအရောင်းအဝယ် ဆိုင်မှ မိုးတွင်းတွင် ရောင်းအားကောင်းပြီး ယခုသီးနှံပေါ်ချိန်တွင် အရောင်းအနည်းငယ်ပါးကြောင်း သိရသည်။ ပဲများကို ၁ပတ်တစ်ခါ ပဲတစ်မျိုးကို ၅အိတ်နှုန်းဖြင့် ရန်ကုန် ဘုရင့်နောင်မှ မှာယူရောင်းချကြောင်းသိရှိရပါသည်။

DOCA(ဧရာဝတီ)

             ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်တွင် ကျောက်မြောင်းမြို့နယ်ထွက် စဉ်အိုးရောင်းချသည့် စဉ့်အိုးဒိုင် ၂ခုရှိသည်။ ရောင်းချနေသော စဉ်အိုးများမှာ ၁၅၀ ဝင်စဉ့်အိုး၊ အလှပန်းစိုက်အိုး၊ ဘုရားပန်းအိုးများ၊  ၅ပိဿာဝင်စဉ်အိုး၊ ၃ပိဿာဝင်စဉ့်အိုး၊ စဉ့်အင်တုံ၊ ကျောက်ငရုတ်ဆုံ၊ ရန်တာဘိုကထုတ်လုပ်သော သဲသောက်ရေအိုးများ၊ ရောင်းချနေကြောင်း တွေ့ ရှိရသည်။

           ရောင်းချမှုအနေဖြင့် ၁၅၀ဝင် စဉ်အိုးကို လက်ရှိရောင်းဈေး ငွေကျပ် ၁၀၀၀၀၀ဖြင့် လည်းကောင်း၊ အလှပန်းစိုက်အိုး ငွေကျပ် ၃၅၀၀၀၊ ဘုရားပန်းအိုး ငွေကျပ် ၃၀၀၀-၅၀၀၀ကျပ်၊  ၅ပိဿာ၊ ၃ပိဿာ ဝင်စဉ်အိုး ငွေကျပ် ၁၀၀၀၀-၁၅၀၀၀ကျပ်၊  ငရုတ်ဆုံ ၁၀၀၀၀ကျပ်၊ သဲရေအိုး ရိုးရိုး ငွေကျပ် ၇၅၀၀ကျပ်၊ ရေဂေါက်ပါ သဲရေအိုး ငွေကျပ် ၂၅၀၀၀ကျပ်ဖြင့် ရောင်းချကြောင်း သိရသည်။ စဉ်အိုးကို ကျောက်မြောင်းမြို့ နွယ်ငြိမ်းရွှေဂွန် အိုးထုတ်လုပ်သူထံမှ မှာယူရောင်းချပြီး မှာယူသည့် လက်ကားဈေး ၆၀၀၀၀ကျပ်ကျသင့်ပါက ပြန်လည်ရောင်းချမှု ကုန်ကျစရိတ်ပေါင်း၍ အမြတ် ၄၀၀၀၀ ကျပ်ခွာ၍ ရောင်းချကြောင်း မအူပင်စဉ်အိုးဒိုင်လုပ်ငန်းရှင်မှ ရှင်းလင်း ပြောပြ၍ သိရသည်။

            ၎င်းစဉ်အိုးများကို ပင်လယ်ဒေသရေငံပိုင်းမှ လူမျိုးများသည် စဉ်အိုးအသုံးပြုသည့် အခါ ကျောက်မြောင်းထွက်စဉ်အိုးသည် ခံနိုင်ရည်ကောင်းမွန်မှုကြောင့်  ရေချိုအသုံးပြုသော ဒေသ တို့ထက် ပိုမိုအသုံးပြုကြသည်။ စဉ့်အိုးရောင်းချသူ လုပ်ငန်းရှင်သည် ၂၀၂၄နောက်ပိုင်း အိုးမှာယူရောင်းချမှု ၅သောင်းကျော်သာ မှာယူရောင်းချပြီး ယခင်နှစ်များက တစ်နှစ်ကို စဉ်အိုးအလုံးရေ အမျိုးအစားအမျိုးမျိုး ၁သိန်းခန့်မှာယူ ရောင်းချကြောင်းသိရသည်။ ယခုနောက်ပိုင်း မှာယူရခက်ခဲ၍ အနည်းငယ်သာရောင်းချနေကြောင်း သိရှိရပါသည်။

DOCA(ဧရာဝတီ)