ပြည်တွင်းကုန်သွယ်မှုသတင်း

  မေမြို့ပန်းများသည် အရောင်အသွေးလှပမှုဖြင့် ဆွဲဆောင်မှုရှိတဲ့ ပန်းတစ်မျိုးဖြစ်ပါသည်။ ဘုရား ပန်းထိုးရာတွင်လည်း အမြတ်တနိုးထား အလှဆင်ကြသည်။ မေမြို့ပန်းသည် အခိုင်လိုက် အစုလိုက် ပွင့်သော ပန်းဖြစ်ပြီး အရောင်အားဖြင့် အဖြူ၊ အနီ၊ ပန်းရောင်၊ ဗေဒါရောင် တို့ရှိသည်။ မြန်မာနိုင်ငံတွင် Aster အဖြူ နှင့် Color မျိုးစေ့ပုလင်းများ မှာယူ၍ စိုက်ပျိုးကြပါသည်။ ရိုးစိမ်းအဖြူ ၊ ကျောက်နီ၊ ချင်းမိုင် စသည်ဖြင့် အပွင့်အရောင်၊ ပန်းပွင့်ပုံကို မူတည်၍ မြန်မာအခေါ်များရှိသည်။ နေရောင်အပြည့်အဝရရှိ မှု ကို ကြိုက်နှစ်သက်သော်လည်း မြင့်မားလွန်းသော အပူချိန်က ပန်းပွင့်ခြင်းကို နှောင့်နှေး ကြန့်ကြာစေပါ သည်။ မိုးဆက်တိုက် ရွာသောအခါ၊ အေးလွန်းသောအခါများတွင် ပန်းပွင့်ခြင့်ကို လျော့ကျစေပါသည်။ မည်သည့်မြေအမျိုးအစားတွင်မဆို ရှင်သန်ပေါက်ရောက်နိုင်သော်လည်း ခြောက်သွေ့ပြီးမြေဆီ ညံဖျင်း ပါက ပန်းအနည်းငယ်သာ ပွင့်ပါမည်။ ရေငတ်ဒဏ်ကို အနည်းငယ် ခံနိုင်ရည်ရှိသည်။ ပျိုးပင်များအား ပင်ကြားတန်းကြား ၁၈-၂၄ လက်မ အကွာ မိမိ စိုက်ပျိုးမည့်မျိုးမှ ပန်းပွင့်မည့် အနေအထားပေါ် မူတည် ၍ စိုက်ပျိုးရပါမည်။ မိမိစိုက်ပျိုးသည့်မျိုး၏ ပန်းပွင့်အနေအထားပေါ် မူတည်၍ ခေါင်နှိမ်ပေးရမည် ဖြစ်ပါ သည်။ ခေါင်နှိမ်ခြင်းဖြင့် ပန်းပွင့်များရရှိမည့် ဘေးကိုင်းဖြာမှုကို ဖြစ်စေပါမည်။ နေရောင်ခြည် အပြည့်အဝ ရရှိပြီး ပင်ကြားတန်းကြား လေဝင်လေထွက်ကောင်းရန် ဖန်တီးပေးရန် လိုအပ်ပါသည်။ ထိုသို့ ပြုလုပ် ခြင်းဖြင့် Powndery Mildew မှိုရောဂါကို မဖြစ်ရန်အတွက် ကာကွယ်ပြီး ဖြစ်သည်။အပင်ဖြစ်ရန် လွယ်ကူ သော်လည်း ပန်းပွင့်ရန်အတွက် ဂရုတစိုက်စောင့်ရှောက်ရသော ပန်းပင်ဖြစ်သည်။ အစိုဓာတ်သည် ပန်းပွင့်ခြင်းကို လွှမ်းမိုးသည်။ မြန်မာနိုင်ငံတွင် မေမြို့ပန်းများကို အပင်လိုက် နှုတ်စည်း၍ ဈေးများတွင် ရောင်းချကြသည်။ အပင်ကြီးထွားမှုနှင့် အပွင့်အရောင်သွေးပေါ် မူတည်ပြီး ဒေသအလိုက်ဈေးနှုန်း မတူ ကြပါ။ ဥပမာ အဖြူရောင်ပန်းများသည် အခြားအရောင်ပန်းများထက် ဈေးရရှိမှု လျော့နည်းပါသည်။ အပင်ငယ်များမှာ အပင်ကြီးများထက် ဈေးလျော့နည်းပါသည်။ လက်လီဈေးတွင် အပင်ကြီးများ နှစ်ပင် စီး တစ်စီးလျှင် ၅၀ဝ ကျပ် ဖြစ်ပြီး အပင်ငယ် ၅ ပင်ပါ တစ်စီးလျှင် ကျပ် ၈၀၀ ဖြစ်သည်။ တချို့ဒေသများ တွင် အပင်အရေတွက် အရွယ်အစား အပင်လိုက်နှုတ်၍ရောင်းချသည်။ တချို့ဒေသများတွင် အပင်လိုက် နှုတ်၍ လက်ဆုတ်စည်းများဖြင့် ရောင်းကြပါသည်။ တစ်ဧကအထွက်နှုန်းမှာ မိမိစိုက်ပျိုးသော မျိုး အလိုက် ပင်ကြားတန်းကြားဖြင့် စိုက်ပျိုးသည့် အပင်အရေအတွက် ဝင်ဆန့်မှုပင် ဖြစ်ပါသည်။

DOCA(ပဲခူး)

   ပဲခူးတိုင်းဒေသကြီး၊ ပြည်ခရိုင်၊ ပြည်မြို့၊ မြို့မစည်ပင်သာယာဈေးကြီးအပါအဝင် အခြားဈေး များတွင် ရှောက်ရွက်များ ရောင်းချနေကြောင်း သိရပါသည်။ ရာသီပေါ် ဟင်းသီးဟင်းရွက် သစ်သီးဝလံ များအပြင် ရှောက်ရွက် များလည်း ရောင်းချနေကြောင်း သိရပါသည်။ ရှောက်ရွက်များကို လူနေအိမ်ခြံဝန်းအတွင်းနှင့် ခြံစည်းရိုးများတွင် မြေပို၊ မြေကွက်လွတ်များတွင် စိုက်ပျိုးကြောင်းသိရ သည်။

    ရှောက်ရွက်သည် အိမ်ရှင်မများ၏ မီးဖိုချောင်သုံးအနေဖြင့် အဓိကဟင်းလျာမဟုတ်သော်လည်း ဖြည့်စွက်စာ အဖြစ် စားသုံးကြသည်။ အသုပ်စုံအမျိုးမျိုးနှင့် ငါးချဉ်၊ ပုဇွန်ချဉ်၊ နှမ်းဖတ်ချဉ်များ သုပ်စားရာတွင်လည်း အနံ့မွေးစေရန် ရှောက်ရွက်ကို ပါးပါးလှီးထည့်လေ့ရှိပါသည်။ ဟင်းရည်ပူ တွင်လည်း ထည့်၍ စားသုံးကြသည်။ရှောက်ရွက်ကို တို့စရာ အဖြစ် အစည်းလေးများပြုလုပ်ကာ ဈေးများတွင် ရောင်းချကြသည်။ ရှောက်ရွက်ကို တို့စရာအဖြစ်သာမက ကျန်းမာရေးအတွက်လည်း အထောက်အကူပြုသဖြင့် စားသုံးသင့်သည်။ ငွေကုန်ကြေးကျ အလွန်များသည့် ရောဂါများ ဖြစ်သော ဆီးချိုရောဂါနှင့် သွေးတိုးရောဂါ၊ ကင်ဆာရောဂါတို့ကို ရှောက်ရွက်စားသုံးခြင်းဖြင့် ထိရောက်စွာ ကာကွယ်ပေးသော ဓါတ်စာဖြစ်ပါသည်။

      ရှောက်ရွက် ဈေးနှုန်းများမှာ ရှောက်အညွှန့် (၅)ညွှန့်ပါ (၁)စည်းလျှင် (၃၀၀)ကျပ်၊ (၂)စည်း (၅၀၀)ကျပ်တို့ဖြင့် ရောင်းဝယ်လျက်ရှိကြောင်း ကုန်စိမ်းရောင်းသူ တစ်ဦးထံမှ သိရပါသည်။

DOCA(ပဲခူး)

  ၂၀၂၅ ခုနှစ်၊ စက်တင်ဘာလ ဒုတိယပတ်အတွင်း ပြည်ခရိုင်၊ ပြည်မြို့နယ်ရှိ အခြေခံစားကုန်များဖြစ်သော ပေါ်ဆန်းမွှေး တစ်ပြည်လျှင် (၅၂၀၀)ကျပ်၊ ဧည့်မထဆန် တစ်ပြည်လျှင် (၂၇၅၀)ကျပ်ဖြင့် ရောင်းဝယ်လျှက်ရှိပါသည်။ စားဖိုဆောင်စားကုန်များအနေဖြင့် ကြက်သွန်နီ (၁)ပိဿာလျှင် (၁၈၀၀)ကျပ်၊ ကြက်သွန်ဖြူ (ရှမ်းအသစ်) (၁)ပိဿာ လျှင် (၉၀၀၀)ကျပ်၊ ကုလားပဲ (၁)ပိဿာလျှင် (၆၇၀၀)ကျပ်၊ အာလူး (၁)ပိဿာလျှင် (၆၅၀၀)ကျပ်၊ ဆား(ချော) (၁)ပိဿာလျှင် (၁၈၀၀) ကျပ်၊ သကြား (၁)ပိဿာလျှင် (၄၉၀၀)ကျပ်၊ ငရုတ်ရှည် (၁)ပိဿာလျှင် (၁၁၅၀၀)ကျပ်၊ ငရုတ်ပွ (၁)ပိဿာလျှင် (၁၉၀၀၀)ကျပ်၊ ကြက်သား (CP)(၁)ပိဿာလျှင် (၁၄၀၀၀)ကျပ်၊ ကြက်သား(ဒေသကြက်) (၁) ပိဿာလျှင် (၂၄၀၀၀)ကျပ်၊ ဝက်သား (၁)ပိဿာလျှင် (၁၉၀၀၀)ကျပ်၊ အမဲသား (၁)ပိဿာလျှင် (၁၈၀၀၀)ကျပ်၊ ဆိတ်သား (၁)ပိဿာလျှင် (၂၅၀၀၀)ကျပ်၊ ငါးကြင်း (၁)ပိဿာလျှင် (၁၀၀၀၀)ကျပ်၊ ကြက်ဥ (၁)လုံးလျှင် (၃၆၀)ကျပ်၊ ဘဲဥ (၁)လုံးလျှင် (၄၁၀)ကျပ်၊ ငါးပိ (၁)ပိဿာလျှင် (၅၀၀၀)ကျပ်၊ ငါးတံခွန်ခြောက် (၁)ပိဿာလျှင် (၁၅၀၀၀)ကျပ် တို့ဖြင့် ဈေးနှုန်းများ တည်ငြိမ်လျှက်ရှိကြောင်း သိရပါသည်။         

DOCA(ပဲခူး)

     ပြည်ထောင်စုနယ်မြေ၊ နေပြည်တော်အတွင်း မိုးသီးနှံစိုက်ပျိုးမှုများတွင် နေကြာသီးနှံရိတ် သိမ်းမှုများသာကျန်ရှိနေသည့်အနေအထားကို တွေ့ရှိရပါသည်။ ဆောင်းမြေပဲအဖြစ် စိုက်မှုများ ကြားလိုက်၊ ပေါင်းပေါက်လုပ်ငန်းများဆောင်ရွက်နေမှုများကိုတွေ့ရှိလာရသည်။ သီးနှံပွဲရုံများသို့ နှမ်းဝင်ရောက်မှုနည်းပါးခဲ့ပြီး၊ မြေပဲဝင်ရောက်မှုအား‌ကောင်းနေဆဲရှိနေပါသည်။ နှမ်း(နက်)အနေ ဖြင့် မန္တလေးစျေးကွက်သို့တင်ပို့မှုအနည်းငယ်ရှိခဲ့ပြီး၊ မြေပဲ(လုံးဆံ)မန္တလေးနှင့် ရန်ကုန်သို့ တင်ပို့ မှုရှိခဲ့သည်ကိုတွေ့ရှိရပါသည်။ နှမ်း(နက်)စျေးနှုန်းမြင့်တက်မှုရှိခဲ့ပြီး၊ နှမ်း(နီ) စျေးနှုန်း တည်ငြိမ်ပါ သည်။ မြေပဲစျေးနှုန်းများတွင် အတောင့်၊အဆံစျေးနှုန်းများတည်ငြိမ်မှုရှိနေပါသည်။ စျေးကွက်များ သို့ဖြန့်ဖြူးမှုတွင်ပုံမှန်ကြိတ်ခွဲမှုရှိနေပြီး၊ မြေပဲကြိတ်ခွဲမှုအများဆုံးတွေ့ရှိရပါ သည်။ နဝလီကြိတ်ခွဲမှု လျော့ကျသွားခြင်းမရှိခဲ့ပါ။ ဆီစျေးနှုန်းများတည်ငြိမ်မှုရှိနေပြီး၊ မြေပဲဆီ (16000)ကျပ်၊ နှမ်းဆီ (16000)ကျပ်၊ နေကြာဆီ(18000)ကျပ် စျေးနှုန်းဖြစ်ပေါ်မှုကို‌ တွေ့ရပါသည်။ ဆီကြိတ်ဖတ် တင်ပို့ မှု  ရန်ကုန်နှင့် မန္တလေးသို့ စျေးကွက်များသို့တင်ပို့မှုရှိခဲ့ပြီး၊ မြေပဲဖတ် (5200)ကျပ်၊ နှမ်းဖတ် (3000)ကျပ်၊ နေကြာဖတ်(2100)ကျပ်တို့ဖြင့်စျေးနှုန်းဖြစ်ပေါ်နေမှုကို တွေ့ရှိရပါသည်။

DOCA(ပြည်ထောင်စုနယ်မြေ)

     စစ်ကိုင်းတိုင်းဒေသကြီး၊ မုံရွာမြို့ပေါ်တွင် စားဖိုဆောင်သီးနှံများနှင့် ပဲအမျိုးမျိုးကို ကုန်ဆုံဆိုင်းများ၊ ရပ်ကွက်ဈေးများတွင် ရောင်းချလျက်ရှိကြောင်း သိရပါသည်။ ပဲများကို စားသောက်ဆိုင်များနှင့် စီးပွားဖြစ်မုန့်လုပ်သူများက အများဆုံးဝယ်ယူလျက်ရှိကြောင်း သိရပါ သည်။

          ၂၀၂၅ ခုနှစ်၊ စက်တင်ဘာလ ဒုတိယပတ်တွင် မြို့ပေါ်တွင်ရောင်းချလျက်ရှိသော ကုလားပဲဈေးနှုန်းမှာ ၅၀ ကျပ်သားလျှင် (၃၆၀၀)ကျပ်ဖြင့်လည်ကောင်း၊ ၁ပိသာလျှင် (၇၂၀၀)ကျပ်ဖြင့်လည်ကောင်း ရောင်းချလျက်ရှိပြီး၊ ပဲနီလေးစျေးနှုန်းမှာ (၅၀) ကျပ်သားလျှင် (၇၅၀၀)ကျပ်ဖြင့်လည်းကောင်း၊ (၁)ပိသာလျှင် (၁၅၀၀၀)ကျပ်ဖြင့်လည်ကောင်း ရောင်းချလျက်ရှိကြောင်း စျေး‌ရောင်းချသူများထံမှ သိရပါသည်။ကုလားပဲနှင့် ပဲနီလေးစျေးနှုန်းများကို ယခင်အပတ်နှင့် နှိုင်းယှဥ်ရာတွင် စျေးနှုန်းတည်ငြိမ်လျက်ရှိကြောင်း တင်ပြအပ်ပါသည်။

DOCA(စစ်ကိုင်း)