ဧရာဝတီတိုင်းဒေသကြီး၊ ပုသိမ်မြို့နယ်အတွင်း ယခုရက်ပိုင်းတွင် ရာသီစာဖြစ်သော ပိန်းဥများ ဈေးကွက်သို့ စတင်ဝင်ရောက်လာပြီး ဒေသခံစားသုံးသူများ၏ ဝယ်ယူမှုဖြင့် အရောင်းအဝယ်သွက်လက်လျက်ရှိကြောင်း သိရသည်။

     ပုသိမ်မြို့နယ်အတွင်းရှိ ဈေးကြီးများနှင့် ကျေးရွာများမှ တင်ပို့ရောင်းချသည့် ပိန်းဥများကို စားသုံးသူများက ပြုတ်၍ဖြစ်စေ၊ ပိန်းဥရွက်နှင့်ရောချက်ပြုတ်၍ဖြစ်စေ နှစ်သက်စွာ စားသုံးလျက် ရှိသည်။ ပိန်းဥသည် သွေးလည်ပတ်မှုကောင်းစေခြင်း၊ ကိုယ်ခံအားစနစ် မြှင့်တင်ပေးခြင်း၊ မျက်စိကျန်းမာရေး ကောင်းစေခြင်း အပါအဝင် ကျန်းမာရေးကောင်းကျိုးများစွာ ရှိသည့် ရာသီစာ ဟင်းသီးဟင်းရွက်တစ်မျိုးလည်း ဖြစ်သည်။

     လက်ရှိဈေးကွက်အခြေအနေအရ ပုသိမ်မြို့နယ်အတွင်းသို့ ကျေးရွာဒေသများမှ တင်ပို့ ရောင်းချသည့် ပိန်းဥ၏ လက်ကားဈေးနှုန်းမှာ ကျပ် (၂,၅၀၀) မှ (၂,၈၀၀) (တစ်ပိဿာ) ဖြင့် ရောင်းချနေကြောင်း သိရသည်။ မြို့နယ်အတွင်းရှိ ဈေးများတွင် လက်လီဈေးနှုန်းအနေဖြင့် ကျပ် (၃,၀၀၀) မှ (၃,၅၀၀) (တစ်ပိဿာ) အထိ ရောင်းချလျက်ရှိပြီး ညနေဈေးသည်များနှင့် လှည့်လည်ရောင်းချသူများမှာ ပြုတ်ပြီးသား ပိန်းဥများကို တစ်လုံးချင်းစီရောင်းချနေကြောင်း သိရသည်။

   ပိန်းဥများ ဈေးကွက်ဝင်ရောက်လာခြင်းနှင့်အတူ ဒေသခံစားသုံးသူများအနေဖြင့် ဈေးနှုန်း သင့်တင့်စွာဖြင့် ဝယ်ယူစားသုံးနိုင်ခြင်းကြောင့် ရောင်းအားကောင်းလျက်ရှိကြောင်း သတင်းရရှိ ပါသည်။

DOCA (ဧရာဝတီ)

     ဧရာဝတီတိုင်းဒေသကြီး၏ ပင်လယ်ဆိပ်ကမ်းမြို့တစ်မြို့ဖြစ်သော ပုသိမ်မြို့နယ်အတွင်းရှိ ငါးခြောက်ဈေးကွက်သည် ယခုလက်ရှိတွင် တည်ငြိမ်ကာ အရောင်းအဝယ် သွက်လက်လျက် ရှိကြောင်း သိရသည်။ မုတ်သုန်မိုးကာလအတွင်း ပင်လယ်ပြင်အခြေအနေကြောင့် ငါးဖမ်းရန် အနည်းငယ်ခက်ခဲမှုရှိသော်လည်း ယခင်က သိုလှောင်ထားသော ကုန်ပစ္စည်းများ လုံလောက်စွာ ရှိခြင်းကြောင့် ဈေးနှုန်းများ သိသိသာသာ မြင့်တက်ခြင်းမရှိဘဲ ယခင်ဈေးနှုန်းအတိုင်းသာ အဓိကရောင်းချနေကြောင်း ဈေးသည်များက ဆိုသည်။

      ပုသိမ်မြို့နယ်အတွင်းရှိ ဈေးကြီးများနှင့် ငါးခြောက်ကုန်သည်ကြီးများထံမှ ရရှိသော သတင်းများအရ လက်ရှိ ငါးခြောက်ဈေးနှုန်းများမှာ ငါးနီတူးခြောက် (တစ်ပိဿာ) လျှင် ကျပ် ၂၂,၀၀၀ မှ ၂၆,၀၀၀ ငါးဖောင်ရိုးခြောက် (တစ်ပိဿာ)လျှင် ကျပ် ၄၅,၀၀၀ မှ ၅၅,၀၀၀  ငါးပုတ်သင်ခြောက် (လုံး) (တစ်ပိဿာ) လျှင် ကျပ် ၁၈,၀၀၀ မှ ၂၂,၀၀၀ ငါးပုတ်သင်ခြောက် (ပြား) (တစ်ပိဿာ) လျှင် ကျပ် ၂၂,၀၀၀ မှ ၂၈,၀၀၀ ငါးရောင်ခြောက် (တစ်ပိဿာ) လျှင် ကျပ် ၅၀,၀၀၀ မှ ၆၅,၀၀၀ ငါးရံ့ခြောက် (လုံး) (တစ်ပိဿာ) လျှင် ကျပ် ၇၀,၀၀၀ မှ ၈၀,၀၀၀ ငါးရံ့ခြောက် (ပြား) (တစ်ပိဿာ)  လျှင် ကျပ် ၉၀,၀၀၀ မှ ၁၀၀,၀၀၀ ပုဇွန်ခြောက် (တစ်ပိဿာ) လျှင် ကျပ် ၃၀,၀၀၀ မှ ၆၅,၀၀၀ (အရည်အသွေးနှင့် အရွယ်အစားကိုလိုက်၍) တို့ဖြစ်ပါသည်။         ပုသိမ်မြို့နယ်သည် ကမ်းရိုးတန်းဒေသတွင်တည်ရှိပြီး ငါးခြောက်လုပ်ငန်း စည်ပင်သာယာ သော ဒေသဖြစ်သဖြင့် ဒေသထွက် ငါးခြောက်များကို အရည်အသွေးကောင်းမွန်စွာဖြင့် ရရှိနိုင်ခြင်းကြောင့် ပြည်တွင်းဈေးကွက်သာမက ပြည်ပဈေးကွက်အထိ တင်ပို့ရောင်းချလျက်ရှိသည်။ မိုးရာသီအကုန်တွင် ငါးဖမ်းရေယာဉ်များ ပုံမှန်ထွက်ခွာနိုင်ပါက ငါးခြောက်ရိက္ခာများ ပိုမိုဝင်ရောက်လာကာ ဈေးနှုန်းများ ပိုမိုတည်ငြိမ်လာနိုင်ကြောင်း ကုန်သည်များက မျှော်လင့်ထားကြောင်း သတင်းရရှိပါသည်။

DOCA (ဧရာဝတီ)

       ဧရာဝတီတိုင်းဒေသကြီး၊ ပုသိမ်ခရိုင်အတွင်း ယခုအခါ မိုးရာသီစိုက်ပျိုးထုတ်လုပ်မှုများ အထွက်တိုးလာချိန်ဖြစ်သဖြင့် ပြောင်းဖူးများ ဈေးကွက်တွင် လှိုင်လှိုင်ပေါများလျက်ရှိသည်။ ပေါများချိန်နှင့်အညီ ဈေးနှုန်းများလည်း သင့်တင့်မျှတစွာ ရှိနေသဖြင့် စားသုံးသူများ အဆင်ပြေစွာ ဝယ်ယူစားသုံးနိုင်ကြောင်း သိရသည်။

    ပြောင်းဖူးသည် ကျန်းမာရေးအတွက် အထောက်အကူပြုသော သီးနှံတစ်မျိုးဖြစ်ကာ ဗီတာမင် B12၊ သံဓာတ်၊ ဖောလစ်အက်ဆစ်တို့ ကြွယ်ဝစွာ ပါဝင်ပြီး သွေးအားနည်းရောဂါကို ကာကွယ်ပေးသည်။ သွေးတွင်းကိုလက်စထရောကို ကျဆင်းစေကာ ပရိုတင်းဓာတ်ကြွယ်ဝခြင်း ကြောင့် ကြွက်သားများကို သန်မာစေပြီး နေ့စဉ်လှုပ်ရှားမှုအတွက် စွမ်းအင် ပြည့်ဝစေသည်။ အဖူးလိုက်ပြုတ်၍ဖြစ်စေ၊ အစေ့ခြွေ၍ဖြစ်စေ၊ ထောင်း၍ကြော်ကာဖြစ်စေ စားသုံးနိုင်သော စုံလင်သည့် စားစရာတစ်ခုလည်း ဖြစ်သည်။

   လက်ရှိဈေးကွက်အခြေအနေအရ ပုသိမ်ခရိုင်အတွင်းရှိ စိုက်ပျိုးသူများထံမှ ကုန်စိမ်းဒိုင်များသို့ ရောင်းချသည့် ပြောင်းဖူး (၁)ဖူး၏ လက်ကားဈေးနှုန်းမှာ ကျပ် (၄၅၀) မှ (၅၅၀) ကြား ရှိပြီး၊ မြို့နယ်အတွင်းရှိ ဈေးများတွင် လက်လီဈေးအနေဖြင့် ကျပ် (၇၀၀) မှ (၈၀၀) ကြား ရောင်းချလျက်ရှိကြောင်း သိရှိရသည်။ ယခုကဲ့သို့ ပြောင်းဖူးပေါချိန်တွင် ဈေးနှုန်းများ သင့်တင့်နေခြင်းသည် စားသုံးသူများအတွက် အာဟာရပြည့်ဝသောသီးနှံကို ဈေးနှုန်း ချိုသာစွာ ဖြင့် ဝယ်ယူစားသုံးနိုင်ရန် ဖြစ်သည့်အလျောက် မိသားစုဝင်ငွေကို များစွာမထိခိုက်ဘဲ စားသုံးနိုင်ကြမည်ဟု မျှော်လင့်ရကြောင်း သိရသည်။

DOCA (ဧရာဝတီ)

    ဧရာဝတီတိုင်းဒေသကြီး၊ ပုသိမ်မြို့နယ်၊ ရန်ပုံနှစ်ကျေးရွာတွင် ပန်းမုံလာသီးနှံကို စီးပွားဖြစ်စိုက်ပျိုးလျက်ရှိပါသည်။ ပန်းမုံလာများကို စတင်ဘာလ၊ အောက်တိုဘာလများတွင် စတင်စိုက်ပျိုးပြီး၊ တစ်ဧကစိုက်ပျိုးမည်ဆိုပါက မျိုးထုပ် (၅) ထုပ်ကို ပျိုးထောင်ရကြောင်း၊ ပျိုးပင်သက် (၁)လခွဲခန့် ရလျှင် စိုက်ခင်းထဲသို့ ပြောင်းရွှေ့ စိုက်ပျိုးရကြောင်း၊ တစ်ဧကလျှင် ပျိုးပင်အရေအတွက် တစ်သောင်းခန့် စိုက်ပျိုးနိုင်ကြောင်း၊ ပန်းမုံလာပင်များသည် ရာသီဥတုဒဏ်နှင့် ပိုးမွှားအန္တရာယ်ကျရောက်ပါက ပျက်စီးမှုလွယ်သည့် သီးနှံဖြစ်သည့်အတွက် နေ့စဉ်ကြည့်ရှုပြီး အထူးဂရုစိုက်ရသည့် သီးနှံဖြစ်ပါသည်။ စတင်စိုက်ပျိုးချိန်မှ ခူးဆွတ်သည့် အချိန်အထိ ပိုးသတ်ဆေး (၃)ကြိမ်ခန့် ဖြန်းပေး ရကြောင်း၊ စိုက်ပျိုးမှု တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် (၉၀၀၀၀၀/- မှ ၁၀၀၀၀၀၀/-)ကျပ်ခန့် ကုန်ကျကြောင်း၊ ပန်းမုံလာများအား စတင်စိုက်ပျိုးပြီး (၂)လ၊ (၂)လခွဲခန့်အကြာတွင် စတင်ခူးဆွတ်နိုင်ကြောင်း၊ တစ်ဧကလျှင် ပန်းမုံလာ(၆၀၀၀-၆၅၀၀) ပွင့်ခန့် ခူးဆွတ်နိုင်ကြောင်း၊ စတင်ခူးဆွတ်ချိန်တွင် ပွဲစားများမှ ပန်းမုံလာတစ်ပွင့်လျှင် (၇၀၀/- မှ ၈၀၀/-)ကျပ်နှုန်းဖြင့် အပွင့်အသေး/အကြီးပေါ် မူတည်၍ စိုက်ခင်းထဲအရောက် ဝယ်ယူကြကြောင်း၊ ဈေးများအတွင်း၌လည်း ပန်းမုံလာတစ်ပွင့်လျှင် (၁၀၀၀/- မှ ၁၅၀၀/-)ကျပ်နှုန်းဖြင့် ဈေးကောင်းရရှိ ကြောင်း၊ အကျိုးအမြတ်အနေဖြင့် ပန်းမုံလာတစ်ဧကလျှင် (၃၀၀၀၀၀၀/-)ကျပ်ခန့် အမြတ်ရရှိကြောင်း၊ တောင်သူများအနေဖြင့် အကျိုးအမြတ်ရရှိသည့် ပန်းမုံလာသီးနှံအား စိုက်ပျိုးသင့်ကြောင်း ရေးသားတင်ပြအပ်ပါသည်။

(DOCA ဧရာဝတီ)

      ပုသိမ်မြို့နယ်၌ ဖူးစားပြောင်းကို သီးထပ်စိုက်ပျိုးကာ နှစ်ပတ်လည် စဉ်ဆက်မပြတ် စိုက်ပျိုးလျှက်ရှိကြောင်း ထိုဒေသထွက်ပြောင်းများကို ဝယ်လိုအားကောင်းမွန်သည့် ဒေသဈေးကွက်  နှင့် အနယ်နယ်အရပ်ရပ်ရှိ ပြောင်းဈေးကွက်များသို့ တစ်နှစ်ပတ်လုံး ရောင်းချနိုင်၍ ပြောင်းစိုက်    တောင်သူများ အကျိုးဖြစ်ထွန်းလျက်ရှိကြောင်း ဒေသခံတောင်သူများထံမှသိရှိရပါသည်။ ပြောင်းစိုက်တောင်သူများသည်ယခင်က ဒေသတွင်း စားသုံးရန်သာ စိုက်ပျိုးခဲ့ကြပြီး ယခုအခါ ပြည်တွင်း ပြည်ပသို့ တင်ပို့ရောင်းချနိုင်ရေး ကြိုးပမ်းလာကြပြီး အထွက်ကောင်းသော မျိုးကောင်း မျိုးသန့်ပြောင်းမျိုးများကို ရွေးချယ်စိုက်ပျိုးလျက်ရှိပါသည်။

      ပုသိမ်မြို့နယ် ပြောင်ဈေးကွက်၌ ယခု ဒုတိယပတ်တွက် ပြောင်းဖူးစိမ်း တစ်ဖူးလျှင် (၅၀၀-၄၀၀)ကျပ်နှုန်း၊ ပြောင်းဖူးမီးဖုတ် တစ်ဖူးလျှင် (၆၀၀)ကျပ် တို့ဖြင့် ရောင်းချနေပြီး ဈေးကောင်းရရှိလျက်ရှိရာ ပြောင်းစိုက်တောင်သူများသာမက ဝယ်ယူရောင်းချသူဒေသခံပြည်သူ များလည်း အကျိုးအမြတ်ခံစားရပြီး မိသားစုဝင်ငွေတိုးလျက်ရှိကြောင်း သိရှိရပါသည်။

(DOCA ဧရာဝတီ)