ပြည်တွင်းကုန်သွယ်မှုသတင်း

           လက်ပံပင်သည် မြန်မာနိုင်ငံတွင် လူသိများသော အပင်တစ်မျိုးဖြစ်ပြီး၊ လက်ပံပွင့်သည် နွေရာသီ၏ သင်္ကေတတစ်ခုဖြစ်ရာ  လက်ပံပွင့်များတစ်ပင်လုံးပွင့်လန်းကာ ကျေးငှက်သံများနှင့် မြင်တွေ့ရသူ၏ စိတ်နှလုံးကို သာယာကြည်နူးဖွယ်ဖြစ်စေပါသည်။ ကန့်ဘလူခရိုင်၌လည်း လက်ပံပင်များ အလေ့ကျပေါက်နေသည်ကို နေရာအနှံ့အပြားတွင်တွေ့ရသည်။ လက်ပံပင်များကို နေအိမ်ခြံစည်းရိုးများ၌လည်းကောင်း၊ လယ်တော၊ ယာတောများတွင် ‌ပေါက်ရောက်သဖြင့် လက်ပံပွင့်များ ကိုကောက်ယူကာ ပွင့်ဖတ်လေးများကိုခြွေပစ်ပြီး လက်ပံခေါင်းများကို နေလှန်းကာ ကန့်ဘလူမြို့မဈေးတွင် လာရောက်ရောင်းချကြောင်း သိရသည်။

            လက်ပံခေါင်းများကို လက်ပံခေါင်းအချဉ်ရည်အဖြစ်ချက်စားကြသလို၊ ပုန်းရည်ကြီးဖြင့်လည်းကောင်း၊ ဝက်သားဖြင့်ရော၍လည်းကောင်း  စသည်ဖြင့်အမျိုးမျိုးစားသုံးကြကြောင်း၊  ယခုအခါ ကန့်ဘလူမြို့၊ မြို့မဈေးတွင် လက်ပံခေါင်း(၁)ပုံလျှင်(၃၀၀)ကျပ်၊ လက်ပံခေါင်း(၂)ပုံလျှင်(၅၀၀) ကျပ်ဖြင့်ရောင်းချလျက်ရှိရာ အရောင်းအဝယ်သွက်လျက်ရှိကြောင်း ကုန်စိမ်းရောင်းချသူများထံမှ သိရှိရပါသည်။

DOCA(စစ်ကိုင်း)

          မအူပင်ခရိုင်တွင် ၂၀၂၄-၂၀၂၅ခုနှစ် နွေစပါးစိုက်ဧက ၈၃၉၄၈ဧက ရှိကြောင်း သိရသည်။ တလုတ်လပ် အနောက် ဦးအေးလှိုင် ၏ နွေစပါး GW-11 စိုက်ပျိုးထွက်ရှိ ရိတ်သိမ်းလျက်ရှိကြောင်း သိရသည်။ တောင်သူမှ စပါး ၁၂ဧက စိုက်ပျိုးထားပြီး အခြားသီးနှံများ သံပုရာ၊ ရုံးပတီ၊ ချဉ်ပေါင်၊ ဆလပ်၊ သင်္ဘောသီးနှံများ စိုက်ပျိုးနေကြောင်း သိရသည်။

          စပါးစိုက်ပျိုးရာတွင် GW-11 မျိုး နွေစပါးကို စိုက်ပျိုးနေပြီး မျိုးစပါးဈေး ၁တင်းကို ၈၀၀၀၀ကျပ်ဖြင့် ဝယ်ယူရပြီး စိုက်ပျိုးဧက ၁ဧကတွင် မျိုးစပါး ၂တင်း စိုက်ပျိုးကြောင်း သိရသည်။ ကုန်မြေမြင့်လယ်မြေများတွင် ၁၅ရက်စောစိုက်ပျိုးပါက စောစောထွက်ရှိကြောင်း၊ နွေစပါူကို ၂၀၂၄ခုနှစ် ဒီဇင်ဘာလက စတင်စိုက်ပျိုး ယခု ၂၀၂၅ခုနှစ် မတ်လ (၁၀)ရက်နေ့တွင် ရိတ်သိမ်းပြီဖြစ်ကြောင်းသိရသည်။ ၁ဧက စိုက်ပျိုးမှု ကုန်ကျစရိတ်အနေဖြင့် ငွေကျပ် ၆၀၀၀၀၀ ကုန်ကျကြောင်း သိရသည်။ အထွက်နှုန်းအနေဖြင့် ၁ဧကလျှင် ၁၂၀ မှ ၁၄၀ တင်းနှုန်း ထွက်ရှိကြောင်း စိုက်ပျိုးတောင်သူပြောပြချက်အရသိရပြီး နွေစပါး GW-11  ဈေးနှုန်း ၁တင်းလျှင် ကွင်းဈေး ၁၄၅၀၀ ကျပ်အရောင်းအဝယ် ဖြစ်နေကြောင်းသိရသည်။ အကျိုးအမြတ်အနေဖြင့် ၁၇၄၀၀၀၀ ကျပ် ရရှိသဖြင့် တောင်သူမှ GW-11 နွေစပါး ၁ဧက ကို ၁၁၄၀၀၀၀ ကျပ် အကျိုးအမြတ်ရရှိကြောင်း ယခင်နှစ်ထက် အကျိုးအမြတ်နည်းပြီး ယခုနှစ် စပါးအထွက်ကောင်းသော်လည်း ဖြုတ်ပိုးကျသဖြင့် ပိုကျအန္တရာယ်များ ဖြေရှင်နေရကြောင်း တောင်သူထံမှ သိရှိရပါသည်။

DOCA(ဧရာဝတီ)

             ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်မှ နှစ်စဉ် မိုးစပါး။ နွေစပါး စိုက်ပျိုးနေပြီး မအူပင်ခရိုင် အနေဖြင့် မြို့နယ်များအပါအဝင် ဆန်စက်အလုံးရေ (၁၀၇)လုံး ရှိပြီး စိုက်ပျိုးပြီး ၂၀၂၄-၂၀၂၅ခုနှစ်ထွက် နွေစပါး ရိတ်သိမ်းထွက်ရှိပြီးဖြစ်၍ ဝယ်ယူကြိတ်ခွဲလျက်ရှိသည်။ စပါးကြိတ်ခွဲထွက်ရှိမှုမှ ဆန်များကို ရန်ကုန်တိုင်းဒေသကြီးသို့ အဓိကထား၍ တင်ပိုနေပြီး ရန်ကုန်မှတဆင့်  အခြားဒေသများသို့ (စီးထွက်) လျက်ရှိပြီး သီလဝါဆိတ်ကမ်း၊သံလျှင်မြို့၊ ဆူးလေဆိတ်ကမ်း ပန်းပဲတန်းမြို့၊ Asiaworld ဆိတ်ကမ်းအလုံမြို့၊ ဇုန်-၂ ရွှေပြည်သာမြို့၊ ကျိုတ်ဝိုင်းဈေး မရမ်းကုန်းမြို့၊ ကားကြီးဝန်း ဘုရင့်နောင်မြို့၊   ဇုန်-၃ လှိုင်သာယာမြို့၊ ယုဇန ၂လမ်း၊ ဘုရင့်နောင်မြို့၊ ၁ရပ်ကွက်မရမ်းကုန်းမြို့၊ ကျိုတ်ဝိုင်းဈေး၊ မရမ်းကုန်းမြို့၊ ပဲခူးဈေးကြီး၊ ပဲခူးမြို့၊ သုဇနလမ်း၊ ထောက်ကြံမြို့၊ ရွှေလင်ပန်းစက်မှုဇုန်းလှိုင်သာယာမြို့၊ ပိတောက်လမ်း ဘုရင့်နောင်၊ AWPT ဆိတ်ကမ်းအလုံမြို့ တို့သို့ တင်ပိုလျက်ရှိကြောင်း သိရသည်။

             ရန်ကုန်သို့ ဆန်စီးထွက်မှုမှာ ၂၀၂၅ ခုနှစ် ဇန်နဝါရီလ ၁လတွင်း (၄)မြို့နယ် ဆန်အိတ် ၂၆၄၆၄၃ အိတ်နှင့် တန်အားဖြင့် ၁၃၂၀၀တန် တင်ပို့နိုင်ခဲ့ကြောင်း အခြားမြို့နယ်များ ဆန်တင်ပို့မှုအနေဖြင့် ၄၁၁၀၁၂ အိတ် တန်အားဖြင့် ၂၀၅၀၀ တန် တင်ပို့ကြောင်း သိရသည်။

           ၂၀၂၅ ခုနှစ် ဖေဖော်ဝါရီလ ၁လအတွင်း မအူပင်  ဆန်တင်ပို့မှု အိတ် ၁၁၂၁၁၊ ပန်းတနော် ဆန်တင်ပို့မှု ၁၉၅၇၈၊ ညောင်တုန်းဆန်တင်ပို့မှု ၂၈၀၃၉၈၊ ဓနုဖြူဆန်တင်ပို့မှု ၆၅၆၆၂ အိတ်နှင့် စုစုပေါင်း (၃၇၆၈၄၉) တင်ပို့ပြီး တန်အားဖြင့် ၁၈၈၄၂ တန်တင်ပို့နိုင်ခဲ့ကြောင်း၊ အခြားမြို့နယ်များမှ တင်ပို့မှုနိုင်မှု အနေဖြင့် ၄၀၂၅၂၂ အိတ် နှင့် တန်အားဖြင့် ၂၀၁၂၆ တန် ကိုလည်းကောင်း တင်ပို့နိုင်ခဲ့ကြောင်း သိရသည်။

           ယခင်လနှင့် နှိုင်းယှဉ်ကြည့်ပါက  ၄မြို့နယ် တင်ပို့မှု ဆန်အိတ်  ၁၁၂၂၀၆ အိတ်ပိုမိုတင်ပိုနိုင်ပြီး ၅၆၁၀ တန် ပိုမိုတင်ပို့နိုင်ခဲ့သည်။ အခြားမြို့နယ် တင်ပို့မှုကို နှိုင်းယှဉ်ပါက ၈၄၉၀ အိတ် လျော့နည်း တင်ပို့နိုင်ခဲ့ကြောင်း နယ်စပ်ဖြတ်ကျော်ပန်တိုင် စစ်ဆေးရေးစာရင်းများအရ သိရှိရပါသည်။

DOCA(ဧရာဝတီ)

            မအူပင်မြို့သည် ကျေးရွာအုပ်စု (၇၆)အုပ်စု ရှိပြီး ယခုအခါတွင် ကျေးရွာအုပ်စု ၃ပုံ ၂ပုံတွင် နွေစပါးနှင့် ရေကျနောက်စိုက် စပါးများစိုက်ပျိုးလျက်ရှိကြောင်း မအူပင်မြို့နယ် လယ်ယာမြေစီမံခန့်ခွဲရေးဦးစီးဌာန၏ စာရင်းများအရ သိရှိရသည်။

          မအူပင်မြို့နယ်၏ နွေစပါး လျာထားဧက (၈၃၉၄၈)ဧကစိုက်ပျိုးလျှက်ရှိကြောင်း ၊ ယခုတပေါင်းလတွင် နွေစပါးနှင့် ရေကျနောက်စိုက်စပါးများဖြစ်သော စဖိုးသာ၊ ကရင်မစပါး၊ ဆင်းသုခစပါးနှင့် ရက်(၉၀)စပါးများသည် ရိတ်သိမ်းပြီး ပွဲစားများနှင့် မအူပင်မြို့ပေါ်ရှိ ဆန်စက်များသို့ စပါးအခြောက် စက်အရောက်ဈေး တင်း(၁၀၀)လျှင် ၁၆၅၀၀၀၀/-ကျပ်ဖြင့် အရောင်းအဝယ်ဖြစ်လျှက်ရှိကြောင်း၊ GW-11 စပါးသာလျှင် (၁၅၅၀၀၀၀)ကျပ်ဖြင့် အရောင်းအဝယ်တွင်ကျယ်နေကြောင်း မအူပင်မြို့ ရေလဲလမ်းဘေးရှိ ဆန်စက်များဖြစ်သော ပြည့်ဖြိုးကြွယ်၊ စိုးမိုးအောင်၊ ထွန်းလင်းကျော်၊ စိုးမိသားစု၊ ကျော်ပဒေသာ ဆန်စက်များမှ စက်တာဝန်ခ့နှင့် စက်ပိုင်ရှင်များပြောပြချက်အရသိရသည်။

          စပါးဈေးထိုသို့ အကျဘက်သို့ ရောက်ရှိရခြင်းမှာ ရန်ကုန် ဘုရင့်နောင် ပွဲရုံမှ ဝယ်လိုအားကျဆင်းပြီး ဒေသတွင်းဈေးကွက်မှာ အေးနေသောကြောင့်လည်းကောင်း၊ ၂၀၂၄-၂၀၂၅ခုနှစ်ထွက်မိုးစပါးများ မိုးများခြင်းကြောင့် အထွက်နောက်ကျခြင်း စပါးရေထိ၍ မိုးစပါးအထွက်နည်းခြင်း၊ နွေစပါးရိတ်သိမ်းချိန် အထွက်နှုန်းကောင်းသော်လည်း ဖြုတ်ပိုး ကျဆင်းခြင်းများ ရှိသဖြင့် ယနေ့ စပါးဈေး အကျဘက်သို့ ရောက်ရှိနေကြောင်း စပါးစိုက်တောင်သူ ဦးထွန်ဝေထံမှ သိရှိရပါသည်။

DOCA (ဧရာဝတီ)

         သင်ဖြူးဖျာသည် မြန်မာ့ရိုးရာယဉ်ကျေးမှုအသုံးအဆောင်ပစ္စည်းတစ်မျိုး ဖြစ်သကဲ့သို့ ဧရာဝတီတိုင်း အတွင်းရှိ ဒေသခံများအား အလုပ်အကိုင်အခွင့်အလမ်းများ အများဆုံး ဖန်တီးပေးနိုင်သော မိရိုးဖလာ လုပ်ငန်း တစ်ခုလည်းဖြစ်ပါသည်။ ကောက်ပဲသီးနှံများစိုက်ပျိုးပြီးစီး၍ အားလပ်သော အချိန်တွင် အပို အလုပ်အဖြစ် သင်ပင်များကိုစိုက်ပျိုး၍ သင်ဖြူးဖျာရက်လုပ်ခြင်း လုပ်ငန်းများကို  လုပ်ကိုင်နိုင်ပါသည်။ သို့သော် သင်ပင်သည် အခြားသော ကောက်ပဲသီးနှံတို့ကဲ့သို့ တစ်နှစ်တစ် သီးစား၊ နှစ်သီးစား စားရပြီးလျှင် သက်တမ်းတိုသောအပင်မျိုးမဟုတ်ဘဲ သုံးလေးနှစ်ကြာမှ စိုက်ပျိုးပြုစု ပျိုးထောင်မှုအကျိုးကို စတင်ခံစားခွင့် ရရှိဿာ အပင်မျိုး ဖြစ်ပါသည်။ စီးပွားရေးအမြင်နှင့်ကြည့်လျှင်အကျိုးခံစားခွင့်ရ ရှိရန် စောင့်ဆိုင်းရသည်မှာ အချိန်ကြာမြင့်သည်ဟု ထင်မှတ်ဖွယ်ရာရှိသော်လည်း နောင်နှစ်စဉ်နှစ်တိုင်း အလျဉ်မပြတ် သုံးစားသွား နိုင်သော စောင့်ဆိုင်းရကျိုးနပ်သည့် အပင်မျိုး ဖြစ်ပါသည်။ သင်ဖြူးဖျာရက်လုပ်သည့် လုပ်ငန်းများသည် ကိုဗစ် ကာလအတွင်း၌ လဲပျိုခဲံသော်လည်း ယင်းနောက်ပိုင်းတွင် ပြန်လည်ခေါင်းမော့လာခဲ့ရာ ယခုလို ပူအိုက်လှသည့် နွေရာသီကာလရောက်ခါနီးလေ သင်ဖြူးဖျာများမှာ အရောင်းသွက် လာလေ ဖြစ်ပါသည်။

           မြန်မာနိုင်ငံ၏ ဒြပ်မဲ့ယဉ်ကျေးမှုအမွေအနှစ်တစ်ခုလည်း ဖြစ်သကဲ့သို့ မြန်မာ့ လက်မှုထုတ်ကုန် တစ်ခုလည်း ဖြစ်သည့် သင်းဖြူးဖျာ လုပ်ငန်းများကို ဧရာဝတီတိုင်းဒေသကြီးအတွင်းရှိ မော်လမြိုင် ကျွန်းမြို့နယ်၊ လေးမျက်နှာမြို့နယ် နှင့် ပန်းတနော်မြို့နယ် တို့တွင် အဓိကထား လုပ်ကိုင် ဆောင်ရွက် လျက်ရှိပါသည်။  သင်ဖြူးဖျာ တစ်ချပ်ရရှိရန်အတွက် သုံးနှစ်ခန့်စိုက်ပျိုးထားသော သင်ပင်မှ သင်ချောင်းများကို အခြမ်းများခွဲကာနေလှန်းရပါသည်။ နေလှမ်းခြင်းလုပ်ဆောင်ပြီးမှသာ ဖျာအဖြစ် ရက်လုပ်ရန်အတွက် နှီးအဆင့်သို့ ရောက်ရှိပါသည်။ အခြောက်လှမ်းပြီး ရရှိလာသည့် နှီးများအား ကုန်ချောအနေအထားသို့ ရောက်ရှိရန်အတွက် အနည်းဆုံး အချိန် (၁၂ ရက်မှ ၁၄ ရက်အထိ) ကြာမြင့်ပါသည်။ ကုန်ချောနှီးအဖြစ်သို့ ရောက်ရှိလာပါက လုပ်သား(၁)ဦးသည် တစ်နေ့လျှင် ဖျာကြမ်း(၁၀)ချပ်ကို ရက်လုပ် နိုင်ကြပါသည်။ ကတ္တီပါစဖြင့် အနားကွပ်ထားသော ဈေးကွက်ဝင် နှစ်ယောက်အိပ်(၂)ဖက်ချော (၆’ ၆’’ x ၅’  ၃”) တစ်ချပ်လျှင် (၁၁၅၀၀၀) ကျပ်၊ နှစ်ယောက်အိပ်(၁)ဖက်ချော (၆’ ၆’’ x ၅’  ၃”) တစ်ချပ်လျှင် (၇၅၀၀၀) ကျပ်၊ တစ်ယောက်အိပ်(၂)ဖက်ချော (၆’ x ၃’  ၂”) တစ်ချပ်လျှင် (၅၅၀၀၀) ကျပ်၊ ဖျာချော လေးထောင့်တစ်ထွာ တစ်ချပ်လျှင် (၄၀၀၀၀) ကျပ်၊ ဖျာချော ငါးတောင် တစ်ချပ်လျှင် (၄၅၀၀၀) ကျပ် နှင့် ဖျာချော ခြောက်တောင် တစ်ချပ်လျှင် (၆၅၀၀၀) ကျပ် အထိ ဈေးကွက် ပေါက်ဈေး ရှိကြောင်း သိရှိရပါသည်။ ထို့အပြင် သင်ဖြူးများမှာ မြန်မာနိုင်ငံရာသီဥတု နှင့် ကိုက်ညီသည့်အတွက် အခြားသော တီထွင် ဆန်းသစ်မှုများ ပြုလုပ်၍ သင်ဖြူးပိုက်ဆံအိတ်၊ သင်ဖြူးဦးထုပ်၊ သင်ဖြူးဖိနပ်၊ သင်ဖြူးထိုင်ဖျာနှင့် တရားထိုင်သင်ဖြူးဖျာ များကိုလည်း ထုတ်လုပ်လျှက်ရှိပြီး လူကြိုက်များလှကြောင်းလည်း လေ့လာသိရှိရပါသည်။

DOCA(ဧရာဝတီ)