ပြည်တွင်းကုန်သွယ်မှုသတင်း

                 ကောက်ရိုးမှိုသည် မြန်မာလူမျိူးတို့နှစ်သက်သော အစားအစာတစ်မျိူးဖြစ်သည်။ ကန်စွန်းရွက် နှင့်ကြော်စား၍လည်းရသလို အသားနှင့်လဲ ချက်ပြုတ်စားသောက်ကြသည်။ ကောက်ရိုးမှိုသည် သဘာဝအလျှောက် ကောက်ရိုးပုံများ၊ ရိုးပြတ်ပုံများမှ အလိုအလျှောက်ကောက်ရိုးမှိုများ ပွင့်ထွက်လာသည်ကိုလည်း တွေ့ရှိရသည်။ ကျေးလက်ဒေသများတွင် ကောက်ရိုးများကို မှိုဆေးများ သုံးပြီး ရေလောင်း၍ တစ်နိူင်တစ်ပိုင်စီးပွားဖြစ် စိုက်ပျိူး ကြသည်။ ဇီးကုန်းမြို့တွင်တစ်နိူင်တစ်ပိုင် ကောက်ရိုးမှိုစိုက်ပျိူးသူပြောပြချက်အရ မှိုစိုက်ပျိူးရာတွင် အခြေခံ ကုန်ကြမ်းများဖြစ်သည့် ရိုးပြတ်များ ကောက်ရိုးများဂျပ်စက္ကူများကို နွားချေး၊ မြေဆွေး၊ မှိုမျိူးဆေးနှင့် ရောစပ်ပြီး ရိုးပြတ်များကိုရေစွတ်၍ အလျား(၁၀)ပေ၊ အနံ(၃)ပေ၊  မှိုပုံများပြုလုပ် စိုက်ပျိူးကြသည်။ မှိုတစ်ပုံလျှင်သွင်းအားစု အနေဖြင့်(၅၀၀၀၀)ခန့်ကုန်ကြပြီး    စိုက်ပျိူးပြီး(၂၀)ရက်ခန့်တွင် ခူးဆွတ်ရကြောင်း ကောက်ရိုးမှိုတစ်ပုံလျှင် (၁၀) ပိဿာခန့်ထိ ခူဆွတ်ရကြောင်း ဈေးကွက်တွင် ကောက်ရိုးမှို တစ်ပိဿာလျှင် (၇၀၀၀) ခန့် ရောင်းချရသောကြောင့် စိုက်ပျိူးသူတောင်သူများ အနေဖြင့် ထိုက်သင့်သည့် အကျိူးအမြတ်ရရှိကြောင်း စုံစမ်းမေးမြန်းသိရှိခဲ့ရပါသည်။

DOCA( ပဲခူး)

           ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့တွင် လယ်ယာစိုက်ပျိုးရေးလုပ်ငန်းများကို      အဓိကထားလုပ်ကိုင်ကြပြီး စပါး၊ ပဲ၊ ပြောင်း၊ နှမ်း စသည့်သီးနှံများ စိုက်ပျိုးသည့်အပြင် စားဖိုဆောင် သီးနှံများကိုလည်း ရာသီအလိုက် စိုက်ပျိုးလျက်ရှိရာ ရုံးပတီသီး သီးနှံကို လည်း စီးပွားဖြစ်စိုက်ပျိုးကြကြောင်း သိရသည်။

          ရုံးပတီသီးမျိုးအနေဖြင့် ပင်ပုမျိုး၊ ပင်လတ်မျိုး၊ ပင်မြင့်မျိုးများဖြစ်ပြီး ပင်မြင့်မျိုး (Finger One) ရုံးပတီမျိုးကို အများဆုံး စိုက်ပျိုးကြကြောင်း၊ တစ်ဧကလျှင် မျိုးစေ့ ၁၂ ထုပ် စိုက်ပျိုးရပြီး စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း ငွေကျပ် ၁၂၀၀၀၀၀ ခန့် ကုန်ကျကြောင်း၊ ရုံးပတီသီးနှံကို စိုက်ပျိုးပြီး ၄၅ ရက်အကြာတွင် စတင်ခူးဆွတ်ရ၍ တစ်ရက်ခြား တစ်ကြိမ် ခူးဆွတ်လျက်ရှိရာ သက်တမ်းအနေဖြင့် ၂ လထိ ခူးဆွတ်ရကြောင်း၊ အထွက်နှုန်းအနေဖြင့် တစ်ဧကလျှင် ရုံးပတီသီးပိဿာချိန် ၁၈၀၀ ခန့် ထွက်ရှိပြီး ဈေးနှုန်းအနေဖြင့် လက်ကားဈေး တစ်ပိဿာလျှင် ငွေကျပ် ၂၃၀၀-၂၅၀၀၊ လက်လီဈေး တစ်ပိဿာလျှင် ငွေကျပ် ၂၈၀၀ ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း၊ အကျိုးအမြတ်အနေဖြင့် တစ်ဧကလျှင် ငွေကျပ် ပျမ်းမျှ ၃၀ သိန်းခန့် ရရှိပြီး ဈေးကွက်အနေဖြင့် ရန်ကုန် ကုန်စိမ်းပွဲရုံသို့ ချိတ်ဆက်တင်ပို့ကြောင်း၊ ရုံးပတီပင်သည် ရာသီမရွေးစိုက်ပျိုးနိုင်ပြီး ဈေးကောင်းရရှိသည့်အတွက် တောင်သူများအနေဖြင့် အကျိုးအမြတ်များ ပိုမိုရရှိကြောင်း တောင်သူတစ်ဦးထံမှ သိရှိရပါသည်။

DOCA(ဧရာဝတီ)

        ညောင်တုန်းမြို့သို့ ကျိုတ်လတ်မြို့စိုက်ပျိုးသော ကွမ်းသီးများ ဝင်ရောက်လျက်ရှိပြီး တစ်ပါတ်လျှင်  ၆ဘီးကား (၂)စီး၊ ၁၂ဘီကား (၃)စီး ညောင်တုန်းမြို့သို့ ဝင်ရောက်နေကြောင်း သိရသည်။

      ၂၀၂၆ခုနှစ်၊ မတ်လအတွင်း၌ ညောင်တုန်းဈေးကွက်တွင် ရောင်းချသောကွမ်းသီး ဈေးနှုန်းများမှာ ကွမ်းသီးအကြီးအလုံးလှ ၁လုံးလျှင် ၁၅၀-၂၀၀ကျပ်၊ လုံးကောက်ရောင်းချ နေကြောင်းတွေ့ရှိရသည်။ ကွမ်းသီးတစ်အိတ်လျှင် အလုံး၁၀၀၀ပါဝင်ပြီး ၁အိတ်ဈေး  ငွေကျပ် လက်ကားဈေး၁၅၀၀၀၀ကျပ်၊ လက်လီဈေး ၂၀၀၀၀၀ကျပ် ဖြင့် မှာယူရောင်းချရပြီး တစ်ပါတ်လျှင် ကွမ်းသီးအိတ် ၇၀အိတ် ၁၂၀ ထိရောင်းချရကြောင်း ညောင်တုန်းဈေးကွက်အတွင်းရောင်းချသူထံမှ သိရသည်။ အကျိုးအမြတ်အနေဖြင့် ကွမ်းသီးတစ်အိတ်လျှင် ၂၀၀၀၀ကျပ်ထိ အကျိုးအမြတ် ကျန်ရှိကြောင်း ကွမ်းသီးရောင်းချသူထံမှ သိရသည်။ တစ်ချို ကွမ်းနှင့် ဆေးရွက်အမျိုးမျိုး ရောင်းချသည့်ဆိုင်များမှလည်း တစ်လအတွင်း ကွမ်းသီး အိတ် ၆၀၀-၉၀၀ အထိ ရောင်းချရကြောင်း သိရသည်။ တစ်ချို့ ကွမ်းသီးများကို အခွံချွတ်၍ ရောင်းချကြပြီး ဈေးပိုရကြောင်း ကွမ်းသီးအခွံချွတ် အလုံးသန့် ၃လုံးလျှင် ၁၀၀၀ ကျပ်ဖြင့် လက်လီ အရောင်းအဝယ်ဖြစ်လျက်ရှိကြောင်း သိရသည်။  ယူခုလို နွေရာသီတွင် ကွမ်းသီးများ ညောင်တုန်းမြို့သို့ အဝင်များလျက်ရှိပြီး ဈေးကောင်းလျက်ရှိကြောင်း သိရသည်။ ယခင် ၂၀၂၅ခုနှစ် နိုဝင်ဘာလဈေးနှင့်နှိုင်းယှဉ်ပါက ကွမ်းသီးဈေးကျဆင်းပြီး ၁ပိဿာလျှင် ၁၀၀၀၀ ကျပ် ကျဆင်းလာကြောင်း ဈေးကွက်အတွင်းမှ သိရှိရပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ ပန်းတနော်မြို့နယ်၊ ဘဝိုင်းကျေးရွာအုပ်စု၊ ဆယ်နှစ် ကျေးရွာ၌ ပဲ၊ နေကြာ၊ ပြောင်းနှင့် အခြားသီးပင်စားပင်များကို ရာသီအလိုက် စိုက်ပျိုးကြပြီး ခရမ်းချဉ်သီးနှံကိုလည်း စိုက်ဧက ၁၀ ဧကခန့် စိုက်ပျိုးထားရှိကြောင်း သိရသည်။

          ခရမ်းချဉ်သီးနှံကို ၂၀၂၅ခုနှစ် စက်တင်ဘာလတွင် စတင်စိုက်ပျိုး၍ စိုက်ပျိုးပြီး ၃ လခန့် အကြာ ၂၀၂၆ခုနှစ် ဇန်နဝါရီလတွင် စတင်ခူးဆွတ်ရကြောင်း၊ မျိုးအနေဖြင့် ကိုင်းခရမ်းချဉ် သီးမျိုးများကို စိုက်ပျိုးကြပြီး တစ်ဧကလျှင် မျိုးစေ့ထုတ် ၂၀ ထုပ်ခန့် စိုက်ပျိုးရကြောင်း၊ စိုက်ပျိုးရာတွင် မျိုးစေ့ကိုပျိုးထောင်ပြီး အပင်သက်တမ်း ၁လ အရွယ်တွင် မြေချ၍ ဘောင်ခတ်စနစ်ဖြင့် စိုက်ပျိုးရကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ မြေပြုပြင်ခ၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ် ၂၈-၃၀ သိန်းခန့် ကုန်ကျကြောင်း၊ ယခင်နှစ် အထွက်နှုန်းအနေဖြင့် တစ်ဧကလျှင် ပိဿာချိန် ၅၀၀၀-၆၀၀၀ ထွက်ရှိပြီး မြေအနေအထားနှင့် သီးနှံဖြစ်ထွန်း အောင်မြင်မှုအပေါ်မူတည်၍ အထွက်နှုန်းကွာခြားမှုများရှိကြောင်း၊ ဈေးနှုန်းအနေဖြင့် သီးနှံပေါ်စအချိန်တွင် ခရမ်းချဉ်သီး လက်ကားဈေး တစ်ပိဿာလျှင် ငွေကျပ် ၈၀၀၀ ဖြင့် ရောင်းချရပြီး ဖေဖော်ဝါရီလက ၁ပိဿာ ၅၀၀၀ကျပ်ကျဆင်းလာကြောင်း ယခု မတ်လ ကိုင်းခရမ်းချဉ်းသီးပေါ်ချိန်တွင် ၁ပိဿာလျှင် ၄၀၀၀ ကျပ်သာရှိတောကြောင်း၊ အကျိုးအမြတ်အနေဖြင့် တစ်ဧကလျှင် အရင်းအနှီးနှုတ်ပြီး ငွေကျပ် သိန်း ၂၀-၂၅ ခန့် ရရှိကြောင်း သိရှိရပါသည်။

       ဈေးကွက်အနေဖြင့် ရန်ကုန်တင်ပို့ခြင်း မြို့နှင့်နီစပ်ရာဒေသများသို့တင်ပို့ပြီး ကုန်စိမ်းဒိုင်များသို့ တင်ပို့ရောင်းချကြောင်း၊  ကိုင်း ခရမ်းချဉ်သီးနှံပေါ်ချိန်တွင် အထွက်နှုန်းကောင်းမွန်ပြီး ဈေးကောင်းရရှိပါက အကျိုးအမြတ်များ ပိုမိုရရှိနိုင်ကြောင်း တောင်သူတစ်ဦးထံမှ သိရှိရပါသည်။

DOCA(ဧရာဝတီ)

           ကျုံပျော်ခရိုင်၊ ကျုံပျော်မြို့နယ်သည် ပီလောပီနံသီးနှံအား ကျေးလက်ဒေသရှိ ဥယျာဉ်မြေ၊ ခြံ မြေများတွင် လွန်ခဲ့သော နှစ်များစွာကပင် အစဉ်အဆက်စိုက်ပျိုးခဲ့ကြပြီး ကျုံပျော်ခရိုင်၏ အဓိကစိုက်ပျိုးသည့် သီးနှံ (၁၃) မျိုးတွင်လည်း အပါအဝင်ဖြစ်ပါသည်။ ကျုံပျော်ခရိုင်၏ ယခုနှစ် ပီလောပီနံ စိုက်ပျိုးဧက စုစုပေါင်း (၁၉၀၁၉) ဧက၏ ၉၁.၀၃% မှာ ကျုံပျော်မြို့နယ်၏ ပီလောပီနံ စိုက်ဧကဖြစ်ပြီး ဧက (၁၇၅၀၄) စိုက်ပျိုး ထားပါသည်။ တစ်ဧက ပျမ်းမျှ ပီလောပီနံဥ ပိဿာ (၃၀၀၀) အထက်ထွက်ရှိကြပါသည်။

         ပီလောပီနံဥ ပိဿာ (၁၀၀) ကြိတ်ခွဲပါက ပီလောပီနံကော်မှုန့် (၂၇) ပိဿာခန့်နှင့်ပီလောပီနံ (အလုံး) တစ်တင်းခွဲခန့် ထွက်ရှိပါသည်။ ယခင်နှစ် ပီလောပီနံထွက်ကုန်ပစ္စည်းများ၏ ဈေးနှုန်းများမှာ ပီလော ပီနံဥ တစ်ပိဿာ (၃၅၀) ကျပ် ဝန်းကျင်၊ ပီလောပီနံကော်မှုန့် တစ်ပိဿာလျှင် (၁၄၀၀-၁၅၀၀) ကျပ် နှင့် ပီလောပီနံ အလုံးတစ်တင်းဈေးမှာ (၁၅၀၀) ကျပ်ဝန်းကျင်သာရှိခဲ့ပါသည်။

         ယခုနှစ် ပီလောပီနံသီးနှံ စတင်ပေါ်ထွက်ချိန်တွင် ပီလောပီနံဥဈေးမှာ တစ်ပိဿာ (၆၅၀- ၈၅၀) ကျပ်ထိ အမြင့်ဆုံးရရှိခဲ့ကြပါသည်။ ကော်မှုန့်ဈေးမှာ ဒေသဈေး တစ်ပိဿာ (၃၇၀၀-၃၈၀၀) ကျပ်မှ အမြင့်ဆုံး (၄၀၀၀) ကျပ် အထိ ရှိခဲ့ပြီး ပီလောပီနံ အလုံးတစ်တင်းဈေးမှာ (၅၀၀၀-၅၅၀၀-၆၀၀၀) ကျပ်ထိ ဝယ်ယူခဲ့ကြပါသည်။

            စိုက်ပျိုးသူတောင်သူများမှ ကိုယ်တိုင်တူးဖော်၍ ဒေသတွင်းစက်များသို့ ထော်လာဂျီများဖြင့်တင်၍ သွားရောက်ရောင်းချခြင်းနှင့် အချို့တောင်သူများမှ ပီလောပီနံကြိတ်ခွဲသည့် စက်ပိုင်များသို့ အခင်းပြတ်ရောင်းချထားပြီး စက်ပိုင်မှ တူးယူကြိတ်ခွဲခြင်းများလည်း ရှိကြပါသည်။ ထွက်ရှိ ပီလောပီနံကော်မှုန့်များနှင့် ပီလောပီနံကြိတ်ဖတ် အလုံးများအား စက်ပိုင်နှင့် ကုန်သည်များမှဒေသပေါက်ဈေးဖြင့် ဝယ်ယူကြပါသည်။

          ပီလောပီနံကော်မှုန့်များအား ထွက်ရှိမှုအတိုင်းလည်းကောင်း၊ အချို့ကုန်သည်များမှ ကုန်ချောမှုန့်အဖြစ် ထပ်မံကြိတ်ခွဲပြီးလည်းကောင်း ရန်ကုန်၊ မန္တလေးနှင့် စစ်ကိုင်းဒေသရှိ မုန့်လုပ်ငန်းများနှင့် ချိတ်ဆက်တင်ပို့ရောင်းချလျက်ရှိကြပါသည်။

          ပီလောပီနံ ကြိတ်ဖတ်များကို အလုံးပြုလုပ်၍ အခြောက်လှမ်းထားသော ပီလောပီနံအလုံး (သို့မဟုတ်) ကလောလုံးများအား အမှုန့်အဖြစ်ကြိတ်ခွဲ၍လည်းကောင်း၊ အလုံးအတိုင်းလည်းကောင်း တွံ့တေးနှင့် ဆားမလောက်ဒေသရှိ ငါးကန်းများမှ ငါးစာအဖြစ် အများစုမှာယူကြပါသည်။ ၎င်းအပြင် ပဲခူးတိုင်းရှိ တိရစ္ဆာန် အစာတောင့်စက်ရုံများသို့လည်း ပေးပို့ရောင်းချကြပါကြောင်း သိရှိရပါသည်။

             ဒေသထွက် ပီလောပီနံကော်မှုန့်နှင့် ပီလောပီနံ အလုံးဈေးကွက်မှာ ပြည်တွင်းလုပ်ငန်းများ၏ ဝယ်လိုအားပေါ် တည်မှီနေသော်လည်း ယခုနှစ်ရရှိသော ပီလောပီနံထွက်ကုန် ပစ္စည်းများ၏ ဈေးနှုန်းဈေးကွက် အနေအထားအရ ပီလောပီနံစိုက်ပျိုးသူ တောင်သူများအတွက် သင့်တင့်သည်ထက် အကျိုးအမြတ်ရရှိစေပါကြောင်း လေ့လာသိရှိရပါသည်။

DOCA (ဧရာဝတီ)