ပြည်တွင်းကုန်သွယ်မှုသတင်း

        စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေးရှိ ဟင်းသီးဟင်းရွက်ဈေးတန်း၌ အရောင်းအဝယ်ဖြစ်လျက်ရှိသော ဂေါ်ဖီထုပ်နှင့် ပန်းဂေါ်ဖီများကို မန္တလေးမြို့မှ ဝယ်ယူရောင်းချလျက်ရှိရာ အိမ်ရှင်မများက အိမ်သုံးအတွက်ဝယ်ယူကြသလို ထမင်းဆိုင်နှင့် စားသောက်ဆိုင်များမှ အဓိကဝယ်ယူကြောင်း သိရှိရသည်။

        ၂၀၂၅ ခုနှစ်၊ စက်တင်ဘာလ တတိယပတ်အတွင်း ဂေါ်ဖီထုပ်အကြီး(၁)ထုပ်လျှင် (၄၅၀၀) ကျပ်၊ အသေး(၁)ထုပ်လျှင် (၃၀၀၀)ကျပ်ဖြင့်ရောင်းချကြောင်း၊ ပန်းဂေါ်ဖီတစ်ပွင့်လျှင် (၄၀၀၀)ကျပ် ဖြင့်ရောင်းချလျက်ရှိရာ ယခင်အပတ် ဈေးနှုန်းများနှင့်နှိုင်းယှဉ်ပါက စက်တင်ဘာလ ယခုပတ်အတွင်း ဂေါ်ဖီထုပ်(၁)ထုပ်လျှင် (၁၀၀၀)ကျပ်နှင့် ပန်းဂေါ်ဖီ(၁)ပွင့်လျှင် (၅၀၀)ကျပ်ဈေးနှုန်းမြင့်တက်လာကြောင်း ကုန်စိမ်းရောင်းချသည့် လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

       စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်အနေဖြင့် ဒေသတွင်းစိုက်ပျိုးထွက်ရှိသည့် သီးနှံဈေးနှုန်းများ၊ ရာသီပေါ်အစားအစာများ၏ ဈေးနှုန်း၊ဈေးကွက်အခြေအနေတို့အား ရေးသားတင်ပြလျက်ရှိရာ ယခုအခါ ကန့်ဘလူမြို့ပေါ်ရှိ ကုန်စုံဆိုင်များတွင်ရောင်းချလျက်ရှိသည့် မြေပဲယိုများကို ကန့်ဘလူမြို့နယ်မှထွက်ရှိသလို ရွှေဘိုမြို့ရှိလက္ကားဆိုင်များမှ ဝယ်ယူရောင်းချကြောင်း သိရသည်။

         ၂၀၂၅ ခုနှစ်၊ စက်တင်ဘာလ တတိယပတ်အတွင်း ကန့်ဘလူမြို့မဈေးတွင် ရောင်းချနေသော မြေပဲယိုဈေးနှုန်းမှာ အသင့်ထုပ်ပြီး အထုပ်သေးတစ်ထုပ်လျှင်(၅၀၀)ကျပ်၊ (၃)ထုပ်လျှင်(၁၃၀၀) ကျပ်၊ အထုပ်ကြီးတစ်ထုပ်လျှင် (၁၇၀၀)ကျပ်နှင့် (၂)ထုပ်လျှင် (၃၂၀၀)ကျပ်ဈေးနှုန်းတို့ဖြင့် ရောင်းချကြောင်း၊ မြေပဲယိုသည် ရှေးယခင်ကတည်းကပင် ယနေ့ချိန်အထိ မြန်မာလူမျိုးများ ကြိုက်နှစ်သက်စွာစားသုံးခဲ့သည့် ဒေသထွက်အစားအစာတစ်ခုဖြစ်ကြောင်း သိရှိရပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး ကန့်ဘလူခရိုင်၊ ကန့်ဘလူမြို့ပေါ်ရပ်ကွက်များမှ ပြည်သူများသည် မိသားစုစားဝတ်နေရေး အဆင်ပြေစေရန်နှင့် အပိုဝင်ငွေရရှိရန်အတွက် စိုက်ပျိုးရေးလုပ်ငန်းများအပြင် စွန်တာနီ(ခေါ်)ပဲနီနှင့် စားတော်ပဲတို့ကိုပြုတ်၍ ကန့်ဘလူမြို့မဈေးတွင် ရောင်းချလျက်ရှိရာ စားတော်ပဲပြုတ်ကို လဖက်ရည်ဆိုင်များနှင့် စားသုံးသူများက ဝယ်ယူကြောင်း၊ ပဲနီရေပွနှင့် စားတော် ပဲပြုတ်တို့ကို ရပ်ကွက်နှင့်ကျေးရွာများတွင် စက်ဘီး၊ ဆိုင်ကယ်တို့ဖြင့် လှည့်လည်ရောင်းချသူများကို ဖောက်သည်ပေးရသည့်အတွက် နေ့စဉ်အရောင်းအဝယ်ဖြစ်လျက်ရှိကြောင်း သိရသည်။

          မြန်မာလူမျိုးတို့သည် နံနက်စာ ထမင်းဆီဆမ်းပူပူလေးနှင့် စားတော်ပဲပြုတ်ကို တွဲဖက်စားသုံးကြသလို ကောက်ညှင်းပေါင်းနှင့်လည်း တွဲဖက်စားသုံးကြကြောင်း၊ ၂၀၂၅ ခုနှစ်၊ စက်တင်ဘာလ တတိယပတ်အတွင်း ပဲနီရေပွ(၁)ပြည်လျှင် (၄၅၀၀)ကျပ်၊ နို့ဆီဗူး(၁)ဘူးလျှင် (၆၀၀)ကျပ်နှင့် စားတော်ပဲပြုတ် (၁)ပန်းကန်လျှင်(၃၀၀)ကျပ်၊ (၂)ပန်းကန်လျှင် (၅၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း ပဲပြုတ်ရောင်းချသူထံမှ သတင်းရရှိပါသည်။

DOCA(စစ်ကိုင်း)

          ကျွန်းလှမြို့နယ်အတွင်းရှိ ကျေးရွာများနှင့် ကျွန်းလှမြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို လုပ်ကိုင်လျက်ရှိရာ နှစ်ရှည်သီးနှံပင်ဖြစ်သည့် သရက်သီးပင်၊ သီးသီးပင်၊ နဂါးမောက်သီးပင်၊ ပိန္နဲသီးပင်၊ ဂွေးသီးပင်၊ စောင်းလျှားသီးပင်၊ မန်ကျည်းသီးပင်၊ အုန်းသီးပင်နှင့် မာလကာသီးပင်များကိုလည်း စိုက်ပျိုးကြသည့်အနက် သီးသီးပင်များကိုလည်း စိုက်ပျိုးလျက်ရှိကြောင်း သိရသည်။

          ၂၀၂၅ ခုနှစ်၊ စက်တင်ဘာလ ပထမပတ်အတွင်း ဖြစ်ပေါ်နေသော ကျွန်းလှမြို့၏ သီးသီးဈေးနှုန်းအနေဖြင့် သီးသီး အကြီး တစ်လုံးလျှင်(၁၀၀)ကျပ်၊ အသေး(၅၀)ကျပ်၊ (၂၀၀)ဖိုး (၅)လုံးဈေးနှုန်းတို့ဖြင့် ရောင်းချလက်ရှိပြီး စက်တင်ဘာလ ဒုတိယပတ်အတွင်း ဖြစ်ပေါ်နေသော သီးသီးဈေးနှုန်းအနေဖြင့် သီးသီး အကြီး တစ်လုံးလျှင်(၁၀၀)ကျပ်၊ (၂၀၀)ဖိုး(၃)လုံး၊ အသေး (၅၀)ကျပ်၊ (၁၀၀)ဖိုးလျှင် (၃)လုံးဈေးနှုန်းတို့ဖြင့် ရောင်းချသောကြောင့် ယခင်အပတ်ထက် သီးသီးဈေးနှုန်း အနည်းငယ်ကျဆင်းလျက်ရှိကြောင်း၊ ဩဇာသီး  ဈေးနှုန်းအနေဖြင့် စက်တင်ဘာလ ဒုတိယပတ်အတွင်း ဖြစ်ပေါ်နေသော ကျွန်းလှမြို့၏ ဩဇာသီး အကြီးတစ်လုံးလျှင်(၃၅၀)ကျပ်၊ ငွေကျပ် (၁၀၀၀)ဖိုး(၃)လုံး၊ အသေး တစ်လုံးလျှင်(၂၅၀/၂၀၀)ကျပ်၊ ငွေကျပ်(၁၀၀၀)ဖိုးလျှင် (၄/၅)လုံး ဈေးနှုန်းတို့ဖြင့် ရောင်းချလက်ရှိပြီး ဩဇာသီးကို လူကြီး/ လူငယ်မရွေး ကြိုက်နှစ်သက်သည့်အတွက် ရောင်းအားကောင်းလျက်ရှိကြောင်း သိရှိရပါသည်။

DOCA(စစ်ကိုင်း)

      ရွှေဘိုခရိုင်အတွင်း စက်တင်ဘာလ ဒုတိယပတ်တွင် ရွှေဘိုပေါ်ဆန်း စပါး/ဆန် ဈေးနှုန်းများ တည်ငြိမ်နေပါသည်။ရွှေဘိုခရိုင်မှ အခြားတိုင်းဒေသကြီးများသို့ စက်တင်ဘာလ ဒုတိယပတ်အတွင်း ရွှေဘိုပေါ်ဆန်းဆန်စီးထွက်မှုမှာ ရန်ကုန်သို့ (၄၈၉၅၆)အိတ်၊ မန္တလေးသို့ (၇၅၅၈)အိတ်၊ မိတ္ထီလာမြို့သို့ (၆၅၀)အိတ်၊ကျောက်ပန်းတောင်းမြို့သို့ (၁၈၅)အိတ်၊ ရှမ်းပြည်နယ် တောင်ပိုင်းသို့ (၅၃၁၀)အိတ်၊မူဆယ်သို့(၃၆၀)အိတ်၊ နေပြည်တော်သို့ (၁၀၅၀)အိတ်၊ပဲခူးသို့ (၄၂၈၀)အိတ်၊ ပြည်မြို့သို့ (၁၀၈၀)အိတ်၊ တောင်ငူသို့ (၃၇၀)အိတ်၊ ကရင်ပြည်နယ် ဘားအံသို့(၁၁၁၅)အိတ်၊ ကချင် ပြည်နယ်သို့ (၄၃၅၀)အိတ်၊ မွန်ပြည်နယ်သို့ (၇၉၀၅)အိတ်၊ မကွေးတိုင်းသို့ (၁၃၁၀)အိတ်၊ ကယားပြည်နယ်သို့ (၃၁၅)အိတ်၊ စုစုပေါင်းအိတ်ရေ(၈၄၇၉၄)၊တန်အားဖြင့် (၄၂၄၀)တန် စီးထွက်ခဲ့ပါသည်။

    ရွှေဘိုမြို့၏ စက်တင်ဘာလ ဒုတိယပတ်တွင် ဖြစ်ပေါ်ခဲ့သော ဈေးနှုန်းများမှာ ရွှေဘို ပေါ်ဆန်းစပါး တင်း၁၀၀လျင် ကျပ် ၄၈၀၀၀၀၀၊ ရွှေဘိုပေါ်ဆန်း ဆန် ၂၄ပြည်ပါ တစ်အိတ်လျင် ကျပ်၁65၀၀၀ဖြင့် အရောင်းအဝယ် ဖြစ်နေကြောင်း သိရှိရပါသည်။

DOCA(စစ်ကိုင်း)