ပြည်တွင်းကုန်သွယ်မှုသတင်း

           မန္တလေးပန်းစျေးကွက်သို့  မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့် ရှမ်းပြည်နယ် တို့မှထွက်သည့် ရောင်စုံနှင်းဆီပန်းမျိုးစုံ ဝင်ရောက်မှုများပြားလျက်ရှိပြီး၊ စျေးအနည်းငယ်ကျဆင်းကာ အရောင်းသွက်လျက်ရှိကြောင်း သိရှိရပါသည်။  ဈေးကွက်အတွင်း ဆူးပါသောနှင်းဆီနှင့် ဆူးမဲ့နှင်းဆီ ခွဲခြား၍ စျေးအနည်းငယ်ကွာခြားမှုရှိကြောင်း သိရှိရပါသည်။ ရိုးရိုးနှင်းဆီနှင့် ရေမွှေးနှင်းဆီဟူ၍ နှစ်မျိုးတွေ့ရှိရပြီး၊ နှင်းဆီပန်းများမှာ အဖြူရောင်၊ အဝါရောင်၊ ပန်းရောင်၊ မိတ်ကပ်ရောင်၊ လိမ္မော်ရောင်၊ ကြက်သွေးရောင်နှင့် အနီရင့်ရောင်တို့ကို အများအပြားတွေ့ရှိရပါသည်။ ကြက်သွေးရောင်နှင်းဆီပန်းမှာ ဝယ်ယူသူများ ပိုမိုနှစ်သက်ကြောင်း  သိရှိရပါသည်။  ၂၀၂၅ ခုနှစ် ဒီဇင်ဘာလနောက်ဆုံးပတ်အတွင်း ဖြစ်ပေါ်သည့် လက်လီစျေးနှုန်းများမှာ နှင်းဆီပန်းရိုးရိုး (၁၀ပွင့်ပါ) ၁ စီးလျှင်  ပန်းအဖူး(ကြီး) ၂၅၀၀ ကျပ်နှင့် ၃၀၀၀ကျပ်၊   ပန်းအဖူး (သေး) ၁၅၀၀ ကျပ်နှင့် ၂၀၀၀ ကျပ်၊ ရေမွှေးနှင်းဆီ ၃၅၀၀ ကျပ်နှင့် ၄၅၀၀ ကျပ်၊ နှင်းဆီပန်း(ဆူးမဲ့နှင်းဆီ) (၁၀ပွင့်ပါ)၁ စီးလျှင် ၃၀၀၀ကျပ်နှင့် ၄၅၀၀ကျပ်တို့ဖြင့် ရောင်းချလျက်ရှိကြောင်း သိရှိရပါသည်။ ဘုရားပွဲနှင့် အလှူပွဲတော်များကျင်းပသည့်အချိန်ဖြစ်၍ ပန်းမျိူးစုံစျေးကွက်တွင် နှင်းဆီပန်းအရောင်မျိုးစုံ အရောင်းသွက်လျက်ရှိကြောင်း သိရှိရပါသည်။

DOCA(မန္တလေး)

         မန္တလေးစျေးကွက်တွင်ဘုရားပွဲနှင့် အလှူပွဲများကျင်းပသည့်အချိန်ဖြစ်၍ ငှက်‌ပျောသီးအမျိုးမျိုး အရောင်းသွက်လျက်ရှိကြောင်း စျေးချိုတော်ရှိ ငှက်ပျောသီးရောင်းချသည့် ဆိုင်ရှင်တစ်ဦး၏ပြောပြချက်အရ သိရှိရပါသည်။ မန္တလေးတိုင်းဒေသကြီးအတွင်း ၂၀၂၄-၂၀၂၅ ခုနှစ် ငှက်ပျော သီးစိုက်ပျိုးမှု ၁၃၂၃၀ ဧက၊ ရိတ်သိမ်းမှု ၁၂၈၃၅ ဧက၊အထွက်နှုန်း ခိုင်အရေအတွက် ၁၀၅၅.၈၂ နှင့် အထွက်ခိုင် အရေအတွက် ၁၃၅၅၁၄၄၀ ဖြစ်ကြောင်း သိရှိရပါသည်။ ဖီးကြမ်း၊ သီးမွှေး၊ ရခိုင်၊ ငှက်ပျောချဉ်နှင့် ရွှေနီငှက်ပျောသီးတို့မှာ စျေးကွက်အတွင်း အများဆုံးတွေ့ရှိရပါသည်။ ဖီးကြမ်း၊ သီးမွှေးနှင့် ရခိုင်ငှက်ပျောသီးများအား ဘုရားပွဲနှင့် မိရိုးဖလာပွဲများတွင် သုံးစွဲမှုများပြီး၊ ကန်တော့ပွဲတစ်ပွဲတွင် အုန်းသီးတစ်လုံးနှင့်သုံးစွဲသည့်ငှက်ပျောခိုင် အရေအတွက်အလိုက်၊ အလုံးအရွယ်အစားအလိုက် စျေးနှုန်းအမျိုးမျိုးရောင်းချကြောင်း သိရှိရပါသည်။ ၂၀၂၅ ခုနှစ် ဒီဇင်ဘာလနောက်ဆုံးပတ်အတွင်း ငှက်ပျောဖီးစျေးနှုန်းများအနေဖြင့် တစ်ဖီးလျှင် ဖီးကြမ်း (အစိမ်း) ၂၀၀ဝိ/- နှင့် ၃၅၀ဝိ/- ၊ ဖီးကြမ်း (အမှည့်) ၂၀၀ဝိ/- နှင့် ၃၀၀ဝိ/-၊ သီးမွှေးငှက်ပျောသီးမှာ ၂၀၀ဝိ/-နှင့် ၂၅၀ဝိ/-၊ (တောင်ငူသီး) ၄၀၀ဝိ/- နှင့် ၅၅၀ဝိ/-၊ ရခိုင်ငှက်ပျောသီးနှင့် ငှက်ပျောချဉ်သီးမှာ ၁၅၀ဝ/- နှင့်၂၀၀ဝိ/-၊ ရွှေနီငှက်ပျောသီး (တောင်ငူသီး)မှာ ၅၀၀ဝိ/- နှင့် ၈၀၀ဝိ/- စျေးတို့ဖြင့် ရောင်းချလျက်ရှိကြောင်း သိရှိရပါသည်။

DOCA(မန္တလေး)

                             ဧရာဝတီတိုင်းဒေသကြီး၊ မအူပင်မြို့နယ်တွင် ခရမ်းချဉ်သီးတစ်ပိဿာ ၁၀၀၀ ကျပ် ရောင်းချရခြင်းကြောင့် ခရမ်းချဉ်စိုက်ပျိုးတောင်သူများ မိသားစုဝင်ငွေ တွက်ခြေကိုက်နေကြကြောင်း နှင့် ကိုင်းခရမ်းချဉ်သီးကို ဧက ဝက်စိုက်ပျိုးထားကြောင်း မင်းဘောအုပ်စု၊ ရွှေတောင်မှော် ကျေးရွာ ခရမ်းချဉ်စိုက်တောင်သူထံမှ သိရသည်။

             ခရမ်းချဉ်စိုက်ပျိုးရာတွင် စပ်မျိုးခရမ်းချဉ်များဖြစ်သည့် တိုင်ထောင်ခရမ်းချဉ်၊ ငုတ်တုတ် ခရမ်းချဉ်နှင့် နွယ်ခရမ်းချဉ်မျိုးများအား ရွေးချယ်စိုက်ပျိုးကြကြောင်း၊ စတင်ပျိုးထောင်ချိန် ခရမ်းချဉ် စေ့တစ်စေ့ ပျိုးအိတ် တစ်အိတ်နှုန်းဖြင့်ထည့်ကာ ပျိုးထောင်ကြပြီး ရက်ပေါင်း (၂၀)ခန့်ရှိလျှင် ခရမ်းချဉ်စိုက်မည့် စိုက်ခင်းသို့ ရွှေ့ပြောင်းစိုက်ပျိုးကြောင်းသိရသည်။ ဧကဝက် တွင်  မျိုးစေ့ထုတ် ၆ ထုပ်ခန့် စိုက်ပျိုးရကြောင်း ခရမ်းချဉ်စိုက်ပျိုးပြီး တစ်လခန့်ကြာလျှင် ခွ(ဂွ)ပွင့်လိုက်လာပြီး စတင်အပွင့်ပွင့် အသီးသီးကြောင်း၊ နောက်ထပ်အပွင့်များ ပွင့်လာပြီး ခရမ်းချဉ်သီးများရင့်မှည့်ကာ ၃လခန့်အကြာတွင် စတင်ခူးဆွတ်ရောင်းချကြ ကြောင်းလည်းသိရသည်။ စိုက်ပျိုးမှု ကုန်ကျစရိတ် အနေဖြင့် မျိုး၊ သွင်းအားစု၊ မြေပြုပြင်ခ၊ လုပ်သားခအပါအဝင် တစ်ဧက ဝက် လျှင် စုစုပေါင်း ငွေကျပ် ၈  သိန်းခန့် ကုန်ကျကြောင်း၊ ၁ဧက စိုက်မည်ဆိုပါက ၁၅သိန်း ကျော်ကုန်ကျနိုင်ကြောင်း ရှင်းပြသည်။ ထွက်ရှိမှု အနေဖြင့် ခရမ်းချဉ်သီး ပိဿာချိန် စိုက်ဧက ဝက်တွင် ပိဿာ ၃၀၀၀ခန့်ထွက်ရှိကြောင်း အကျိုးအမြတ် ၇သိန်းချန် ကျန်ရှိကြောင်း စိုက်ပျိုးသူထံမှ သိရသည်။

             ခရမ်းချဉ်သီးခူးဆွတ်ရောင်းချရာတွင် နှစ်ရက်တစ်ခါခူးဆွတ်ရကြောင်း၊ ထွက်ရှိလာသည့် ခရမ်းချဉ်သီး များအား မအူပင်မြို့ ဈေးကွက်သို့လည်းကောင်း၊ ယခုအခါ ခရမ်းချဉ်သီးတစ်ပိဿာ လက်လီ ၁၀၀၀ ကျပ်၊ လက်ကားဈေး အနေဖြင့် ၁ပိဿာလျှင် ၅၀၀ကျပ်ဖြင့် ရောင်းချရခြင်းကြောင့် မြေအောက်ရေနှစ် မြစ်ရေကို အသုံးပြု၍ ခရမ်းချဉ်စိုက်တောင်သူများ မိသားစုဝင်ငွေ တွက်ခြေကိုက်နေကြကြောင်း ခရမ်းချဉ်စိုက်တောင်သူပြောကြား၍ သိရသည်။

DOCA(ဧရာဝတီ)

        မန္တလေးစျေးကွက်တွင် စားဖိုဆောင်ဟင်းလျာတစ်မယ်ဖြစ်သည့် ဆောင်းရာသီစာ ချဉ်ပေါင်ဖူးများ ဝင်ရောက်မှုများပြားလျက်ရှိပြီး၊ စျေးအနည်းငယ်ကျဆင်းကာ အရောင်းသွက်လျက်ရှိကြောင်း သိရှိရပါသည်။ ချဉ်ပေါင်ဖူးကို ဟင်းအဖြစ်ကြော်စားခြင်း၊ ချက်စားခြင်း၊ ထောင်းစားခြင်း၊ အခြောက်ခံ၍ ချဉ်ပေါင်ဖူးရေနွေးကြမ်းအဖြစ်သောက်သုံးခြင်း၊ ယိုထိုးခြင်း၊ ချဉ်ပေါင်ဖျော်ရည်၊ ချဉ်ပေါင်ဖူး ဂျယ်လီ၊ ဖျော်ရည်မှုန့်၊ ရှာလကာရည်၊ဖျော်ရည်မှုန့်၊ သောက်‌ဆေးများ၊ ချဉ်ပေါင်ဖူးဝိုင်၊ ချိုချဉ်၊ တော်ဖီ၊ သရေစာမုန့်၊ မျက်နှာပေါင်းတင်မှုန့်တို့ ပြုလုပ်စားသုံးကြကြောင်း သိရှိရပါသည်။ ချဉ်ပေါင်ဖူးများအား စျေးကွက်အတွင်း ပြည်ချိန်ဖြင့်လည်းကောင်း၊ ပိဿာချိန်ဖြင့်လည်းကောင်း ရောင်းချလျက်ရှိပြီး၊ ၂၀၂၅ ခုနှစ်ဒီဇင်ဘာလနောက်ဆုံးပတ်အတွင်း ချဉ်ပေါင်ဖူးစျေးနှုန်းမှာ တစ်ပိဿာလျှင် လက္ကားစျေး ၆၀၀ဝိ/-နှင့် ၆၅၀ဝိ/-၊ လက်လီစျေး ၇၀၀ဝိ/-နှင့် ၇၅၀ဝိ/-စျေးတို့ဖြင့် အရောင်းသွက်လျက်ရှိကြောင်း သိရှိရပါသည်။

DOCA(မန္တလေး)

         ကုန်စိမ်းစျေးကွက်သို့ မန္တလေးတိုင်းဒေသကြီးအတွင်း အမရပူရခရိုင်၊ ပြင်ဦးလွင်ခရိုင်၊ ကျောက်ဆည်ခရိုင်နှင့် မိတ္တီလာခရိုင်တို့မှ ထွက်သည့်ကုန်စိမ်းများ၊ စစ်ကိုင်းတိုင်းဒေသကြီးနှင့် ရှမ်းပြည်နယ်တို့မှ ထွက်သည့်ပဲမြစ်များ ဝင်ရောက်မှုများပြားလျက်ရှိပြီး၊ စျေးကျဆင်းကာ အရောင်းသွက်လျက်ရှိကြောင်း သိရှိရပါသည်။ မန္တလေးစျေးကွက်အတွင်း ဝင်ရောက်သည့်ပဲမြစ်များအနက် တံတားဦးမြို့နယ်၊ မကျီးတောဒေသမှ ထွက်ရှိသည့်ပဲမြစ်မှာ အတွင်းသားအလယ်အမြစ် ပါဝင်မှုနည်းသည့်အတွက် အခြားဒေသထွက်ပဲမြစ်နှင့် မတူဘဲစျေးအနည်းငယ်ပိုပြီး၊ ဝယ်ယူသူများ ပိုမိုကြိုက်နှစ်သက်‌ကြောင်း သိရှိရပါသည်။ ၂၀၂၅ခုနှစ် ဒီဇင်ဘာလနောက်ဆုံးပတ်အတွင်း ဖြစ်ပေါ်နေသည့် ပဲမြစ်စျေးနှုန်းများမှာ ၁ပိဿာလျှင် လက္ကားစျေး ၆၅၀၀ ကျပ်နှင့် ၇၀၀၀ ကျပ်၊ လက်လီစျေး ၈၀၀၀ ကျပ်နှင့် ၉၀၀၀ ကျပ်စျေးတို့ဖြင့် လက်ရွေးစျေးနှင့် ဂျွန်စျေး(မရွေးဘဲချိန်တွယ်သည့်စျေး)တို့ စျေးအနည်းငယ်ခွဲခြား‌ကာ ရောင်းချလျက်ရှိကြောင်း သီရိမာလာစျေးရှိ ပဲမြစ်ပွဲရုံပိုင်ရှင်တစ်ဦး၏ ပြောပြချက်အရ  သိရှိရပါသည်။

DOCA(မန္တလေး)