ပြည်တွင်းကုန်သွယ်မှုသတင်း

         သီဟိုဠ်ပင်သည် ဈေးကောင်းရရှိသော နှစ်ရှည်ပင်အမျိုးအစားဖြစ်ပြီး သီဟိုဠ်စေ့မှာ ဈေးကွက် ဝင်ပြီး ဝင်ငွေရရှိ၍ ဈေးကောင်းရရှိကြောင်း၊ ၎င်းအစေ့ကို ဒန်ပေါက်၊ ရေခဲမုန့်နှင့် အခြားမုန်များတွင် ထည့်သွင်း၍ တန်ဖိုးထားစားသုံးကြကြောင်း၊ တနင်္သာရီတိုင်း၊ ရခိုင်ပြည်နယ်၊ မွန်ပြည်နယ်၊ ကရင် ပြည်နယ်၊ ရန်ကုန်တိုင်း၊ ပဲခူးတိုင်နှင့် ဧရာဝတီတိုင်းဒေသများတွင် စီးပွားဖြစ်စိုက်ပျိုးကြောင်း သိရှိရ သည်။ သီဟိုဠ်စေ့၌ပါဝင်သော အာဟာရဓာတ်သည် အရေးကြီးသော ဗီတာမင်နှင့်သတ္တုဓာတ်များ ပါဝင်ပြီး မဂ္ဂနီဆီစီယမ်ဓာတ်နှင့် ပရိုတင်းဓာတ်ကြွယ်ဝသောကြောင့် ကြွက်သားများအတွက်ခွန်အား ကောင်းကြောင်း၊ သံဓာတ်နှင့်အမိုင်နိုအက်ဆစ်ပါဝင်သောကြောင့် အဆုပ်အားကောင်းစေပြီး အသက် ရှူနိုင်စွမ်းကို အထောက်အကူပြုကြောင်း၊ ခန္ဓာကိုယ်အတွက် သွေးအားနည်းခြင်းကို ကာကွယ်ပေးသော  ကိုယ်ခံအားတိုးတက်စေပြီး သံဓာတ်ကြွယ်ဝကြောင်း၊ အကျိုးပြုသော အဆီဓာတ်များပါဝင်သောကြောင့် သွေးတွင်းအဆီဓာတ်ကိုထိန်းညှိပေး၍ နှလုံးကျန်းမာရေးကို ကောင်းစေကြောင်း၊ ဗီတာမင်‌အေ ကြွယ်ဝ သောကြောင့် မျက်လုံးအတွက် အားကောင်းစေကြောင်း၊ ဗီတာမင်စီ၊ သံဓာတ်၊ အင်တီအောက်ဆီဒင့် ဓာတ်များနှင့် အခြားဓာတ်များ ပါဝင်သောကြောင့် မျက်နှာပြင်အရေပြားနှင့် အသားရေတင်းရင်းပြီး ကြည်လင်တောက်ပြောင်၍ ကင်ဆာတားဆီးမှုကိုလည်း အထောက်အကူပြုကြောင်း၊ စားသုံးရာတွင် ပမာဏကိုထိန်းညှိပြီး စားသုံးသင့်ကြောင်း စာပေများမှဖတ်ရှု့သိရှိရသည်။ ၂၀၂၅ခုနှစ်၊ အောက်တိုဘာလ တတိယပတ်၌ မြင်ခြံမြို့ရှိ ဈေးကွက်တွင် ရောင်းချနေသော သီဟိုဠ်စေ့လှော် (၁၀) ကျပ်သားလျှင် (၈၀၀၀) ကျပ်ခန့်ပေါက်ဈေးများဖြင့် ရောင်းချကြောင်းသိရှိရသည်။

DOCA (မန္တလေး)

           မြင်းခြံခရိုင်အတွင်းရှိ ကျေးရွာများဖြစ်သော တလုပ်ရွာ၊ တောပု၊ နနွင်းတော်ဘိုး၊ကံဆွယ်၊ ကံဆင့်၊လက်ဝဲနှင့် မြင်းနီကျေးရွာတို့သည် ဆောင်းကြက်သွန်နီများကို စီးပွားဖြစ်      စိုက်ပျိုးကြကြောင်း၊  ၎င်းကျေးရွာမှ ထွက်ရှိသော ဆောင်းကြက်သွန်နီများသည် အရည်အသွေးကောင်ပြီး၊ သိုလှောင်ခံ၍ ပထမတန်းစား ကြက်သွန်နီဖြစ်ပြီး ဈေးကွက်တွင် ဈေးကောင်းလည်းရရှိကြောင်း၊ ဆောင်းကြက်သွန်နီ များကို ဧပြီလမှ စက်တင်ဘာလ အထိသိုလှောင်ကြပြီး၊ သိုလှောင်ကာလ (၆)လ ကြာသိုလှောင်နိုင်၍ ဒီဇင်ဘာလတွင်ဆောင်းကြက်သွန်နီများ ရာသီချိန်ကုန်ဆုံးမည်ဖြစ်ကြောင်း သိရှိရသည်။

            မြင်းခြံမြို့ရှိ ပွဲရုံများတွင်  ၂၀၂၅ခုနှစ်၊ အောက်တိုဘာလ တတိယပတ်၌ ရောင်းချလျှက်ရှိသော ကြက်သွန်နီ ကြီးစတစ်ပိဿာလျှင်(၉၀၀-၁၀၀၀)ကျပ်၊ အလတ်စတစ်ပိဿာလျှင် (၇၀၀-၈၀၀)ကျပ်ခန့် ၊အသေးစတစ်ပိဿာလျှင် (၅၀၀-၆၀၀)ကျပ် ပေါက်ဈေးများဖြင့် အရောင်းအဝယ် ဖြစ်လျက်ရှိကြောင်း၊ ယခင်လနှင့် နှိုင်းယှဉ်ပါကယခုလတွင်ဆောင်းကြက်သွန်နီ ဈေးနှုန်းများအနည်းငယ်ကျဆင်းခဲ့ကြောင်း၊ ရာသီချိန်ကုန်ဆုံးခါနီးပြီဖြစ်သောကြောင့် အရည်အသွေးကျဆင်းပြီး ဈေးနှုန်းများကျဆင်းခြင်းဖြစ် ကြောင်းသိရှိရသည်။ စိုက်ပျိုးထွက်ရှိရာကျေးရွာများမှ မြို့ပေါ်ရှိပွဲရုံများသို့  နေ့စဉ်ကုန်ချိန် (၅၀၀၀၀-၇၀၀၀၀)ပိဿာခန့် တောင်သူများကိုယ်တိုင်လာရောက် ရောင်းချကြောင်း၊ ထိုပွဲရုံများမှတဆင့် မန္တလေး၊ ရန်ကုန်၊ နေပြည်တော်၊ မော်လမြိုင်မြို့နှင့် တောင်ကြီးမြို့များသို့တင်ပို့ကြောင်း၊ ယခုအောက်တိုဘာလ၊ တတိယပတ်တွင်ကုန်ချိန်ပေါင်း (၁၈၇၃၉၁) ပိဿာခန့်၊ တန်ချိန် (၃၀၆)တန် တင်ပို့နိုင်ခဲ့ကြောင်း ကြက်သွန်အရောင်း အဝယ်လုပ်ကိုင်သူ ကုန်သည်တစ်ဦး၏ ပြောပြချက် အရသိရှိရသည်။

DOCA (မန္တလေး)

            စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ မှော်ဘီခရိုင်၊ မှော်ဘီမြို့နယ်ခွဲရုံး ဒေါ်ဖြူဖြူမြင့်၊ ဒုကြီးကြပ်ရေးမှူးသည် ၂၀၂၅ ခုနှစ်၊ အောက်တိုဘာလ ၂၈ ရက် နေ့လည် (၁၁:၃၀) အချိန်တွင် ဇမ္ဗူကံထွန်းကုမ္ပဏီမှ ခွဲတမ်းရစားသုံးဆီရောက်ရှိမှုအား ကွင်းဆင်းစစ်ဆေးခဲ့ကြောင်း သိရှိရပါသည်။

          ထိုသို့ကွင်းဆင်းစစ်ဆေးခဲ့ရာတွင် မှော်ဘီမြို့နယ် ဆီကိုယ်စားလှယ်က ခွဲတမ်း ရရှိလာသော စားအုန်းဆီများကို ရည်ညွှန်းဈေး၊ သယ်ယူပို့ဆောင်ခကုန်ကျစရိတ်နှင့် ၂% အမြတ်တို့ဖြင့် လက်လီ/ လက်ကားဆိုင်များသို့ ခွဲဝေရောင်းချပေးသွားမည်ဖြစ်ကြောင်း၊ ၎င်းတို့မှတစ်ဆင့် ပြည်သူများသို့ ပြန်လည်ရောင်းချမည်ဖြစ်ကြောင်း သိရှိရပါသည်။

DOCA (ရန်ကုန်)

       မန္တလေးတိုင်းဒေသကြီး၊ ညောင်ဦးခရိုင်သည် လယ်ယာစိုက်ပျိုးရေးနှင့်မွေးမြူရေးလုပ်ငန်းများ ကိုလုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာ ဆောင်းနှမ်းကိုလည်း စီးပွားဖြစ်စိုက်ပျိုးလျက်ရှိကြောင်း သိရသည်။ ၂၀၂၄-၂၀၂၅ ခုနှစ်၊ ဆောင်းနှမ်းစိုက်ပျိုးမှုအနေဖြင့် (၂၅၂၃)ဧက လျာထားခဲ့ပြီး (၁၃၇၄)ဧက စိုက်ပျိုးနိုင်ခဲ့ကြောင်း၊ တစ်ဧကပျမ်းမျှအထွက်နှုန်းအနေဖြင့်(၇)တင်းခန့်ထွက်ရှိကြောင်း သက်ဆိုင်ရာ ဌာန စာရင်းများအရသိရသည်။

       ၂၀၂၅-၂၀၂၆ ခုနှစ်၊ စိုက်ပျိုးရာသီတွင် ဆောင်းနှမ်းစိုက်ပျိုးမှုအနေဖြင့် (၂၈၄၂)ဧက လျာထားမှု ရှိကြောင်း၊ ယခုအောက်တိုဘာလ ဒုတိယအပတ်တွင် ဖြစ်ပေါ်နေသောနှမ်းဈေးနှုန်းများအနေဖြင့် နှမ်းညိုတစ်တင်းလျှင်(၉၀၀၀၀)ကျပ်၊ ဂျပန်နှမ်းဖြူတစ်တင်းလျှင်(၁၀၀၀၀၀)ကျပ်၊ စမုံနှမ်းနက်တစ် တင်းလျှင်(၂၄၀၀၀၀)ကျပ်များဖြင့် အရောင်းအဝယ်ဖြစ်လျက်ရှိကြောင်း ညောင်ဦးမြို့ရှိ ပွဲရုံများမှ သိရှိ ရသည်။

DOCA (မန္တလေး)

           မန္တလေးတိုင်းဒေသကြီး၊ ညောင်ဦးခရိုင်သည် လယ်ယာစိုက်ပျိုးရေးနှင့်မွေးမြူရေးလုပ်ငန်းများကို လုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာ နွားစာအတွက် နှံစားပြောင်းကိုလည်း စီးပွားဖြစ်စိုက်ပျိုး လျက်ရှိကြောင်း သိရသည်။ နှံစားပြောင်းကို ညောင်ဦးမြို့နယ်တွင် ၂၀၂၅-၂၀၂၆ ခုနှစ် စိုက်ပျိုးရာသီတွင် ဩဂုတ်လကုန်အထိ(၇၁၅၃)ဧက၊ ငါးသရောက်မြို့နယ်တွင်(၃၂၃၃)ဧက စိုက်ပျိုးပြီးဖြစ်ကြောင်း သက် ဆိုင်ရာဌာ၏ စာရင်းများအရသိရသည်။

          နှံစားပြောင်းသီးနှံကို ဇူလိုင်လတွင် စတင်စိုက်ပျိုးကြပြီး နိုဝင်ဘာလတွင် စတင်ရိတ်သိမ်းကြ ကြောင်း၊ စိုက်ပျိုးသောမျိုးများမှာ ရွှေဝါ၊ အထွက်တိုး(နီ)၊ အထွက်တိုး(ဖြူ)မျိုးများစိုက်ပျိုးကြကြောင်း၊ စိုက်ပျိုးရာတွင် ထွန်ကြောင်းဆွဲ အစေ့ချစနစ်ဖြင့် စိုက်ပျိုးပြီး တစ်ဧကပျမ်းမျှကုန်ကျမှုအနေဖြင့် မျိုး၊ သွင်းအားစု၊ လုပ်သားခအပါအဝင် ငွေကျပ်(၃၀၀၀၀၀)ကျပ်ခန့် ကုန်ကျကြောင်း၊ ယခင်နှစ်အထွက် နှုန်းအနေဖြင့် တစ်ဧကလျှင်ပျမ်းမျှ (၂၅၊ ၃၀)တင်းခန့်ထွက်ရှိကြောင်း၊ ဈေးနှုန်းအနေဖြင့် နှံစားပြောင်း ပေါ်စအချိန်တွင် တစ်တင်းလျှင်ငွေကျပ်(၄၀၀၀၀)ကျပ်မှ(၄၅၀၀၀)ကျပ်နှုန်းများ ဖြစ်ပေါ်ခဲ့ရာ အကျိုး အမြတ်အားဖြင့် တစ်ဧကလျှင် (၈၀၀၀၀၀)ကျပ် ဝန်းကျင်အမြတ်ရရှိခဲ့ကြောင်း၊ ဈေးကွက်အနေဖြင့် ထွက်ရှိသောနှံစားပြောင်းများကို တောင်သူများသည် ညောင်ဦးမြို့ရှိ ပွဲရုံများသို့ရောင်းချပြီး ထိုမှတစ် ဆင့် မန္တလေးနှင့်ရန်ကုန်မြို့များသို့ တင်ပို့ရောင်းချကြောင်း သိရသည်။ နှံစားပြောင်းစိုက်ပျိုးခြင်းဖြင့် တိရစ္ဆာန်အစားအစာများ ဖူလုံသည့်အပြင် ပြောင်းရိုးများကိုလည်း နွားစာအတွက် အခင်းပြတ်ရောင်း ချရသဖြင့် အပိုဝင်ငွေများရရှိသောကြောင့် နှံစားပြောင်းသီးနှံကို နှစ်စဉ်တိုးချဲ့စိုက်ပျိုးလျက်ရှိကြောင်း မြေနှဲလေးကျေးရွာမှ တောင်သူများထံမှ သိရသည်။

DOCA (မန္တလေး)