ပြည်တွင်းကုန်သွယ်မှုသတင်း

   ဧရာဝတီတိုင်းဒေသကြီး၊ ပုသိမ်မြို့ရှိ မြို့မဈေးအတွင်း ရောင်းချနေသော ရေထွက် ကုန်ပစ္စည်းများမှာ ဒေသထွက်ပစ္စည်းများနှင့် အခြားဒေသများမှ တင်ပို့လာသော ကုန်ပစ္စည်းများ ရောနှောရောင်းချလျက်ရှိရာ ဈေးကွက်အတွင်း ရောင်းဝယ်မှုသွက်လျက်ရှိကြောင်း သိရှိရ ပါသည်။

          ကုလားကုန်းဈေးသည် ပုသိမ်မြို့၏ အဓိကဈေးကြီးတစ်ခုဖြစ်ကာ ရေထွက်ကုန်ပစ္စည်း အမျိုး အစား စုံလင်စွာ ရောင်းချလျက်ရှိပါသည်။ ၂၀၂၅ ခုနှစ်၊ စက်တင်ဘာလ တိယပတ်အတွင်း ပုသိမ်မြို့၊ ကုလားကုန်းဈေးတွင် ရောင်းချနေသော ရေထွက်ကုန်ပစ္စည်းများ၏ ဈေးနှုန်းများမှာ ပုဇွန်ခြောက်(အချို) (၁)ပိဿာ - ကျပ် ၁၁၅,၀၀၀ မှ ၁၂၀,၀၀၀ ၊ ငါးရံ့ခြောက်(လုံး) (၁)ပိဿာ - ကျပ် ၂၈,၀၀၀ မှ ၃၀,၀၀၀ ၊ ငါးကြီးသားခြောက် (၁)ပိဿာ - ကျပ် ၁၁၀,၀၀၀ မှ ၁၁၅,၀၀၀ ၊ ငါးနီတူခြောက် (၁)ပိဿာ - ကျပ် ၂၈,၀၀၀ မှ ၃၀,၀၀၀၊ ငါးရောင်ခြောက် (၁)ပိဿာ - ကျပ် ၃၈,၀၀၀ မှ ၄၀,၀၀၀ ၊ အာပြဲခြောက် (၁)ပိဿာ - ကျပ် ၂၈,၀၀၀ မှ ၃၀,၀၀၀ ၊ အသားမျှင်ခြောက် (၁)ပိဿာ - ကျပ် ၄၂,၀၀၀ မှ ၄၄,၀၀၀ ၊ ငါးတံခွန်ခြောက် (၁)ပိဿာ - ကျပ် ၂၃,၀၀၀ မှ ၂၅,၀၀၀ ဈေးနှုန်းများမှာ ကုန်ပစ္စည်း၏အရည်အသွေး၊ အရွယ်အစားနှင့် ရောင်းချသည့်နေရာဒေသ အလိုက် အနည်းငယ်ကွဲပြားမှုရှိနိုင်ကြောင်း သိရပါသည်။

          ယခုအခါ အလှူအတန်းများနှင့် ပွဲလမ်းသဘင်များ ပြုလုပ်ရာတွင် ရေထွက်ကုန် ပစ္စည်းများကို အသုံးပြုမှုများလာသဖြင့် အရောင်းအဝယ်သွက်လျက်ရှိကြောင်း ကုလားကုန်းဈေးအတွင်း ရေထွက်ကုန်ပစ္စည်း ရောင်းချသည့် လုပ်ငန်းရှင်များထံမှ သိရှိရပါသည်။ ဒေသခံများ သာမက အနီးအနားရှိ မြို့နယ်များမှ ကုန်သည်များပါ ဝယ်ယူမှုပြုလုပ်လျက်ရှိကြောင်း သိရ ပါသည်။

DOCA(ဧရာဝတီ)

ရေကြည်မြို့နယ်အတွင်းရှိ သီဟိုဠ်စေ့ဈေးကွက်သည် စက်တင်ဘာလအတွင်း အရောင်း အဝယ်စည်ကားလျက်ရှိပြီး ဒေသထွက်သီဟိုဠ်စေ့များကို ရန်ကုန်ဈေးကွက်သို့ အဓိကတင်ပို့ ရောင်းချလျက်ရှိကြောင်း သိရှိရပါသည်။ရေကြည်မြို့နယ်သည် ဧရာဝတီတိုင်းဒေသကြီးအတွင်း သီဟိုဠ်စေ့ထုတ်လုပ်မှုအချက်အချာဒေသအဖြစ် ရပ်တည်နေပြီး မိုးရာသီတွင် စိုက်ပျိုးထုတ်လုပ် သည့် သီဟိုဠ်စေ့များကို စက်တင်ဘာလမှ စတင်၍ ဈေးကွက်သို့ စတင်တင်ပို့နိုင်ခဲ့ကြောင်း သိရပါသည်။

          ဒေသထွက်သီဟိုဠ်စေ့ (ကုန်ချော) တစ်ပိဿာ - ကျပ် ၆,၅၀၀ မှ ၆,၈၀၀၊ အရည်အသွေး မြင့် သီဟိုဠ်စေ့ တစ်ပိဿာ - ကျပ် ၇,၀၀၀ မှ ၇,၅၀၀ ပြည်တွင်းသုံး သီဟိုဠ်စေ့ တစ်ပိဿာကျပ် ၆,၀၀၀ မှ ၆,၃၀၀ ဈေးနှုန်းများမှာ သီဟိုဠ်စေ့၏အရည်အသွေး၊ အဆင့်အတန်းနှင့် ရောင်းချသည့် နေရာဒေသအလိုက် ကွဲပြားမှုရှိနိုင်ကြောင်း သိရပါသည်။ ရေကြည်မြို့နယ်တွင် သီဟိုဠ်စေ့ကို ဝယ်ယူသည့်ပွဲရုံပိုင်ရှင်များက ဒေသခံတောင်သူများထံမှ ဝယ်ယူပြီး ကုန်ချောအဖြစ်ပြုလုပ်ကာ ရန်ကုန်ဈေးကွက်သို့ အဓိကတင်ပို့ရောင်းချကြကြောင်း သိရပါသည်။ မြို့နယ်အတွင်းရှိ ကုန်သည် များနှင့် စားသုံးသူများကလည်း ဒေသထွက်သီဟိုဠ်စေ့များကို ဝယ်ယူသုံးစွဲလျက်ရှိကြောင်း သိရပါသည်။

          ယခုလက်ရှိတွင် ဈေးကွက်အတွင်း သီဟိုဠ်စေ့များ ဝင်ရောက်မှုနှုန်းမှာ ကောင်းမွန်နေပြီး ဝယ်လိုအားလည်း မြင့်မားနေသောကြောင့် ဈေးနှုန်းများ တည်ငြိမ်လျက်ရှိကြောင်း သိရပါသည်။ ဒေသခံတောင်သူများအနေဖြင့် မိမိတို့၏ထွက်ကုန်များကို ပွဲရုံပိုင်ရှင်များထံသို့ တိုက်ရိုက် ရောင်းချခြင်း၊ မြို့နယ်အတွင်းရှိဈေးများတွင် ရောင်းချခြင်းများ ပြုလုပ်လျက်ရှိကြောင်း သိရှိ ရပါသည်။ သီဟိုဠ်စေ့ဈေးကွက်ကောင်းမွန်မှုကြောင့် ကုန်တင်ကုန်ချလုပ်သားများ၊ ကုန်တင်ယာဉ် အငှားလိုက်သူများ အလုပ်အကိုင်ရရှိမှု အဆင်ပြေလျက်ရှိပြီး ဒေသစီးပွားရေးအတွက် အထောက် အကူပြုလျက်ရှိကြောင်း သိရှိရပါသည်။

DOCA(ဧရာဝတီ)

         စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့မဈေးရှိ သစ်သီးဈေးကွက်တွင် စပျစ်သီး၊ လိမ္မော်သီး၊ ပန်းသီး၊ ဖရဲသီး၊ ပန်းသစ်တော်သီးများနှင့် သခွားမွှေးသီးများ ရောင်းချလျက်ရှိပြီး ရွှေသခွားမွှေးသီးနှင့် ကျောက်သခွားမွှေးသီးများကို မန္တလေးမြို့သစ်သီးပွဲရုံများမှ ဝယ်ယူရောင်းချလျက်ရှိကြောင်း သိရသည်။

        ၂၀၂၅ ခုနှစ်၊ စက်တင်ဘာလ တတိယပတ်အတွင်း ကန့်ဘလူမြို့ သစ်သီးဈေးကွက်တွင် ရွှေသခွားမွှေးသီးအကြီးတစ်လုံးလျှင် (၁၀၀၀၀)ကျပ်၊ အလတ်တစ်လုံးလျှင်(၇၀၀၀)ကျပ်နှင့် အသေးတစ်လုံးလျှင်(၅၀၀၀)ကျပ်နှင့် ကျောက်သခွားမွှေးသီး အကြီးတစ်လုံးလျှင် (၅၀၀၀)ကျပ်နှင့် အသေးတစ်လုံးလျှင် (၃၀၀၀)ကျပ်ဈေးနှုန်းတို့ဖြင့် ရောင်းချလျက်ရှိကြောင်း သစ်သီးရောင်းချသူများထံမှ သိရှိရပါသည်။

DOCA(စစ်ကိုင်း)

  ဧရာဝတီတိုင်းဒေသကြီး၊ မြောင်းမြခရိုင် ၊ မြောင်းမြမြို့နယ်သည် မြစ်ဝကျွန်းပေါ် ဒေသဖြစ်ပြီး ရေမြေ သဘာဝအရ ဆန်စပါးအပြင် ဆီထွက်သီးနှံများကိုလည်း စိုက်ပျိုးလျက်ရှိရာ မြေပဲသီးနှံမှာ အဓိကစိုက်ပျိုးသော သီးနှံတစ်မျိုးဖြစ်ပါသည်။ ၂၀၂၅-၂၀၂၆ ဘဏ္ဍာနှစ်အတွက် မြောင်းမြ မြို့နယ်တွင် သြဂုတ်လကုန်အထိ မိုးမြေပဲ စိုက်ဧက (၄၅၀)ဧကခန့် စိုက်ပျိုးပြီးစီးပြီ ဖြစ်ကြောင်း မြို့နယ်စိုက်ပျိုးရေးဦးစီးဌာနမှ သိရှိရပါသည်။ မြေပဲစိုက်ခင်းများကို မိုးကောင်းချိန် ဖြစ်သည့် ဇွန်လလယ်မှ ဇူလိုင်လဆန်းအတွင်း အဓိကစိုက်ပျိုးကြပြီး ဘောင်ကြောင်း ပေးစနစ်ဖြင့် အတန်းလိုက်အစေ့ချစနစ်ဖြင့် စိုက်ပျိုးကြကြောင်း သိရပါသည်။

          မျိုးအနေဖြင့် ဒေသအလိုက် ကွဲပြားမှုရှိသော်လည်း ပင်ပြန့်မျိုးများကို အများဆုံးစိုက်ပျိုး လေ့ရှိပြီး (၁)ဧက စိုက်ပျိုးရန် မြေပဲအဆံ (၂၂)ပြည်မှ (၂၅)ပြည်ခန့် လိုအပ်ကြောင်း သိရ ပါသည်။ စိုက်ပျိုးစရိတ်အနေဖြင့် မျိုး၊ မြေဩဇာ၊ ပိုးသတ်ဆေး၊ လုပ်သားခ စုစုပေါင်း တစ်ဧက ကျပ် (၅၀၀,၀၀၀) မှ (၆၀၀,၀၀၀) ခန့် ကုန်ကျနိုင်ကြောင်း တောင်သူများထံမှ သိရှိရပါသည်။

          ယခုရာသီတွင် မိုးရွာသွန်းမှု ကောင်းမွန်သဖြင့် မြေပဲခင်းများ သန်စွမ်းကာ အောင်မြင် ဖြစ်ထွန်းလျက်ရှိကြောင်း သိရပါသည်။ ယခင်နှစ်များက အထွက်နှုန်းမှာ တစ်ဧက မြေပဲတောင့် (၃၅)တင်းမှ (၄၅)တင်းခန့် ထွက်ရှိခဲ့ကြောင်း သိရပါသည်။ လက်ရှိဈေးကွက်အခြေအနေအရ မြေပဲတောင့် (၁)ပိဿာလျှင် ကျပ် (၆,၅၀၀) မှ (၇,၂၀၀) အထိ၊ မြေပဲဆံ (၁)ပိဿာလျှင် ကျပ် (၉,၅၀၀) မှ (၁၀,၅၀၀) အထိ၊ မြေပဲဆီ (၁)ပိဿာလျှင် ကျပ် (၁၄,၅၀၀) မှ (၁၅,၅၀၀) အထိ ရောင်းဝယ်လျက်ရှိကြောင်း မြောင်းမြဈေးနှုန်းများအရ သိရှိရပါသည်။

          မြေပဲသီးနှံပေါ်ချိန်တွင် တောင်သူများသည် မိမိတို့ ထွက်ကုန်များကို ဒေသအတွင်းရှိ ပွဲရုံများသို့ တင်ပို့ရောင်းချကြပြီး ထိုမှတစ်ဆင့် ပြည်တွင်းဈေးကွက်ဖြစ်သော ရန်ကုန်၊ မန္တလေး စသည့်မြို့ကြီးများသို့ ဖြန့်ဖြူးရောင်းချကြောင်း သိရှိရပါသည်။ မြေပဲသီးနှံသည် ဒေသအတွက် အဓိကဝင်ငွေရရှိသော ကုန်ထုတ်လုပ်မှုတစ်ရပ်အဖြစ် ရပ်တည်လျက်ရှိပါသည်။

DOCA(ဧရာဝတီ)

ဧရာဝတီတိုင်းဒေသကြီး၊ ပုသိမ်မြို့နယ်၊ ပုသိမ်မြို့မဈေး၌ ဒေသထွက်ကုန်များနှင့်အတူ ရာသီပေါ် ဟင်းသီးဟင်းရွက်များဖြစ်သည့် မုန်လာဥ၊ ဂေါ်ဖီထုပ်၊ ခရမ်းသီး၊ ဘူးသီး၊ ရုံးပတီသီးနှင့် ငရုတ်သီးစိမ်းများ အဓိကရောင်းချလျက်ရှိပြီး မြို့သူမြို့သားများ၊ ဈေးသည်များ၊ စားသောက်ဆိုင်နှင့် ဟင်းလျာပြင်ဆင်သည့်ဆိုင်များမှ နေ့စဉ်ဝယ်ယူလျက်ရှိကြောင်း သိရသည်။

          စက်တင်ဘာလ တတိယပတ်အတွင်း ငရုတ်သီးစိမ်း၏ ဈေးနှုန်းမှာ လက်ကား(၁) ပိဿာလျှင် (၃,၀၀၀)ကျပ်မှ (၃,၅၀၀)ကျပ်အထိ၊ လက်လီ(၁)ပိဿာလျှင် (၃,၅၀၀)ကျပ်မှ (၄,၀၀၀)ကျပ်အထိ ရှိကြောင်း၊ အရည်အသွေးကောင်းမွန်ပြီး အသီးကြီးသော ငရုတ်သီးများကို ပုသိမ်မြို့နယ်အတွင်းရှိ ကျေးရွာများမှ လာရောက်ရောင်းချကြောင်း ဈေးသည်တစ်ဦးထံမှ သိရှိရသည်။ အလုံးသေးငယ်ပြီး အရည်အသွေးအနည်းငယ်နိမ့်သည့် ငရုတ်သီးများကိုမူ (၂,၅၀၀)ကျပ်မှ (၃,၀၀၀)ကျပ်အတွင်း ရောင်းချနေကြောင်း သိရသည်။

DOCA(ဧရာဝတီ)