ပြည်တွင်းကုန်သွယ်မှုသတင်း

          တောင်ငူမြို့နယ်အတွင်းရှိ ညောင်ပင်လေးဈေးသို့ တောင်ငူမြို့နယ် အနီးတစ်ဝိုက်မှ ကျေးရွာများဖြစ်သော  ဆိတ်ဖူးတောင်၊ ရှမ်းဝတီးတို့မှ ဒေသခံတောင်သူများက ကန်စွန်းဥနှင့် ပိန်းဥများ ကိုယ်တိုင် လာရောက်ရောင်းချလျက်ရှိပါသည်။ ကန်စွန်းဥကိုပြုတ်စား၍ သော်လည်းကောင်း၊ မီးဖုတ်၍သော်လည်းကောင်း၊ ကန်စွန်းဥဆနွင်းမကင်းပြုလုပ်ရာတွင် လည်းကောင်း၊ ကန်စွန်းဥသာကူကြိုချက်စားရာ တွင်လည်းကောင်း အမျိုးမျိုးပြုလုပ် စားသုံးကြ ပါသည်။ ကန်စွန်းဥသည် အရွယ်အစားအလိုက်ဈေးနှုန်း ကွာခြားမှုရှိပြီး ကန်စွန်းဥရွှေဝါအသေး (၁) ပိဿာလျှင် ၂၀၀၀ ကျပ်၊ အလတ်(၁) ပိဿာလျှင် ၂၅၀၀ ကျပ်၊ အကြီး (၁) ပိဿာလျှင် ၃၅၀၀ ကျပ်ရှိပြီး ရှမ်းပြည်ဒေသမှလာသော ကန်စွန်းဥငချိတ်သည် အလုံး သေး (၁) ပိဿာလျှင် ၃၀၀၀ ကျပ်၊ အလတ်(၁) ပိဿာလျှင် ၃၅၀၀ ကျပ်၊ အကြီး (၁) ပိဿာလျှင် ၄၀၀၀ ကျပ်ရှိပြီး ပိန်းဥ (၁) ပိဿာလျှင် ၂၅၀၀ ကျပ်မှ ၃၀၀၀ ကျပ်အထိဈေးနှုန်းရှိပြီး ချက်စားသည့် ပိန်းဥ (၁) ပိဿာလျှင် ၃၅၀၀ ကျပ် မှ ၄၀၀၀ ကျပ်အထိရောင်းချလျက်ရှိကြောင်း သိရသည်။

DOCA(ပဲခူး)

          တောင်ငူမြို့နယ်အတွင်းရှိ ညောင်ပင်လေးဈေးသို့ တောင်ပေါ်ဒေသဖြစ်သော ရှမ်းပြည်နယ် နှင့်တောင်ငူမြို့နယ်အနီးတစ်ဝိုက်မြို့များမှ ဒေသထွက်သီးနှံများ တင်ပို့ရောင်းချလျက် ရှိရာ ယခုအခါ ရှမ်းပြည်နယ်မှတင်ပို့သောဒညင်းသီးများ ဈေးကွက်အတွင်း အရောင်းအဝယ်ဖြစ်လျက်ရှိပါသည်။ ဒညင်းသီးကို ပြုတ်စားခြင်း၊ ချက်စားခြင်း၊ မီးကင်စားခြင်း၊ ဆားရည်စိမ်ခြင်း စသည်ဖြင့် နှစ်သက်ရာ စားသုံးကြပါသည်။

         ဒညင်းသီးကို အဆိပ်သီးဟုခေါ်ဆိုသော်လည်း စားသုံးမှုများသောကြောင့် အရောင်းအဝယ် သွက်လျက်ရှိကြောင်း ရောင်းချသည့်ဈေးသည်များထံမှ သိရှိရပြီး ဒညင်းသီးကို အလုံးအရွယ် အစားပေါ်မူတည်၍ အသေး ၊ အလတ်၊ အကြီးဟူ၍ သုံးမျိုးခွဲထားပြီး ဈေးနှုန်းမှာ အနည်းငယ်ကွာခြားလျက် ရှိပါသည်။ အသေး (၁၀) လုံးလျှင် ၁၀၀၀ ကျပ်၊ အလတ် (၁၀) လုံးလျှင် ၁၂၀၀ ကျပ်၊ အကြီး (၁၀) လုံးလျှင် ၁၅၀၀ ကျပ်ရှိပြီး အလုံး (၁၀၀) နှင့်အထက်ဝယ်ယူပါက ဈေးနှုန်းအပြောင်းအလဲရှိပြီး ရှမ်းပြည်ဒေသထွက်ဒညင်းသီးမှာ သံတောင်ဒညင်းသီးထက် ပိုစည်းပြီးပြုတ်၍ချက်စားရာတွင် ပိုမိုကောင်းမွန်ပြီး ဆားရည်စိမ်ရာတွင်လည်း အသီးမှာ ပိုမာပြီးကျွတ်သဖြင့် ထမင်းဆိုင်များမှအများဆုံး ဝယ်ယူပြီး ဆားရည်စိမ်ခြင်းအတွက် အသုံးပြု ကြောင်းသိရှိရပါသည်။

DOCA(ပဲခူး)

  ကန့်ဘလူခရိုင်၊ ကျွန်းလှမြို့ ၊ ပိတောက်မြိုင်ဈေးကွက်အတွင်း အာလူးသီး နှင့် ဂျင်း(ချင်း)တို့ကို ရှမ်းပြည်နယ် အောင်ပန်းမြို့နှင် မန္တလေးတိုင်းဒေသကြီးမှ အများဆုံး မှာယူရောင်းချလျက်ရှိကြောင်း သိရသည်။

   ယခု အောက်တိုဘာလ နောက်ဆုံးပတ်တွင် ပိတောက်မြိုင်ဈေး၌ ဖြစ်ပေါ်နေသော အာလူးသီး ဈေးနှုန်းများမှာ အားလူးသီးအလုံးကြီး(၁)ပိဿာလျှင်(၄၅၀၀)ကျပ်၊ (၅၀) ကျပ်သားလျှင် (၂၃၀၀)ကျပ်၊ (အောင်ပန်း)အာလူးသီး အလုံးသေး (၁)ပိဿာလျှင်(၆၀၀၀)ကျပ် (၅၀)ကျပ်သားလျှင်(၄၀၀၀)ကျပ်၊ (၂၅)ကျပ်သားလျှင်(၁၅၀၀)ကျပ် ဈေးနှုန်း တို့ဖြင့် လည်းကောင်း၊  ဂျင်း(ချင်း)တက်ဈေးနှုန်းများမှာဂျင်း(ချင်း)တက် (၁)ပိဿာလျှင် (၇၀၀၀)ကျပ်၊ (၅၀)ကျပ်သားလျှင် (၃၅၀၀)ကျပ် နှင့် (၂၅)ကျပ်သားလျှင်(၁၈၀၀)ကျပ် ဈေးနှုန်းတို့ဖြင့်  အရောင်းအဝယ် ဖြစ်လျက်ရှိကြောင်း ယခင်အပတ်ထက် ဂျင်းတက်ဈေး တစ်ပိဿာလျှင် (၁၀၀၀)ကျပ် ဈေးနှုန်းမြင့်တက်လာကြောင်း ကျွန်းလှမြို့ပေါ်ရပ်ကွက်ဈေးများတွင်  ကြက်သွန်ဖြူ/ နီ /အာလူး /ဂျင်း(ချင်း) အရောင်းအဝယ် လုပ်နေသူထံမှသိရှိရပါသည်။

DOCA(စစ်ကိုင်း)

  စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့ပေါ်ရပ်ကွက်များတွင် မိသားစုစားဝတ်နေရေးအတွက် မုန့်တီစိမ်း လုပ်ငန်းကိုလုပ်ကိုင် ရောင်းချလျက်ရှိရာ ကျွန်းလှမြို့ပေါ်ရပ်ကွက်များနှင့် ကျေးရွာများသို့   ရောင်းချလျက်ရှိကြောင်းသိရသည်။

           ၂၀၂၅ ခုနှစ်၊ အောက်တိုဘာလ နောက်ဆုံးပတ်အတွင်း ကျွန်းလှမြို့ဈေးကွက်၌ ဖြစ်ပေါ်နေသော မုန့်တီစိမ်း ဈေးနှုန်းမှာ မုန့်တီစိမ်း လက်လီ တစ်ပိဿာလျှင်(၂၅၀၀)ကျပ်၊ မုန့်တီစိမ်း(၅၀)ကျပ်သားလျှင် (၁၃၀၀)ကျပ် နှင့် မုန့်တီစိမ်း(၂၅)ကျပ်သားလျှင်(၇၀၀)ကျပ် ရောင်းချသောကြောင့် ယခင်အပတ်ထက် မုန့်တီစိမ်း တစ်ပိဿာလျှင်(၅၀၀)ကျပ် ဈေးနှုန်းကျဆင်းလျက်ရှိကြောင်း သိရသည်။

DOCA(စစ်ကိုင်း)

   ကျွန်းလှမြို့နယ်အတွင်းရှိ ကျေးရွာများ နှင့် ကျွန်းလှမြို့ပေါ်ရပ်ကွက်များတွင် စိုက်ပျိုးရေး လုပ်ငန်းများကို လုပ်ကိုင်စားသောက်ကြရာမှာ နှစ်ရှည်သီးနှံဖြစ်သည့် သရက်သီးပင်၊ နဂါးမောက်သီးပင်၊ ပိန္နဲသီးပင်၊ မန်ကျည်းသီးပင်၊ ကျွဲကောသီးပင် နှင့် မာလကာသီးပင်များကိုလည်း စိုက်ပျိုးကြသလို  မိမိတို့ တောင်ယာများထဲတွင် တစ်ပိုင်တစ်နိုင် အနေဖြင့် ရာသီပေါ်သီးနှံဖြစ်သည့် ဖရဲသီးများကို မန်ကျည်းအင်း ကျေးရွာ၊ သံဘိုကျေးရွာ၊ ရှမ်းစုကျေးရွာနှင့် မြို့ပေါ်ရပ်ကွက်များမှ ကျွန်းလှမြို့၊ သစ်ရာမြိုင်ဈေးသို့ လာရောက် ပို့ဆောင်ကာ အရောင်းအဝယ်ဖြစ်လျက်ရှိကြောင်းသိရသည်။

    ၂၀၂၅ ခုနှစ်၊ အောက်တိုဘာလ နောက်ဆုံးပတ်အတွင်း ရောင်းချနေသော ဖရဲသီး ဈေးနှုန်းများမှာ ဖရဲသီးအကြီး တစ်လုံးလျှင်(၃၀၀၀)ကျပ်၊  အသေး တစ်လုံးလျှင်(၂၅၀၀)ကျပ် နှင့် ဖရဲသီးစိတ် တစ်စိတ် လျှင်(၂၅၀)ကျပ်၊  ကျွဲကောသီး ဈေးနှုန်းများမှာ ကျွဲကောသီး အကြီး တစ်လုံးလျှင်(၃၅၀၀)ကျပ်၊ အသေး တစ်လုံးလျှင် (၂၅၀၀)ကျပ်တို့ဖြင့်  အရောင်းအဝယ်ဖြစ်လျက်ရှိပြီး  ယခင် အပတ်နှင့် နှိုင်းယှဉ်ပါက ဈေးအနည်းငယ်ကျဆင်းလျက်ရှိကြောင်း သိရသည်။

DOCA(စစ်ကိုင်း)