ပြည်တွင်းကုန်သွယ်မှုသတင်း

     ကျွန်းလှမြို့နယ်အတွင်း ကုန်ဈေးနှုန်းများ အနည်းငယ်မြင့်တက်လျက်ရှိရာမှ အသား/ငါး ဈေးနှုန်း များသည်လည်း မြင့်တက်လျက်ရှိကြောင်း၊ ပင်လယ်အစားအစာများဖြစ်သည့် ပန်းဂဏန်း၊ ပုဇွန်ထုတ်၊ ရေဘဝဲ နှင့် ပြည်ကြီးငါးများကို  ဧရာဝတီတိုင်းဒေသကြီး၊ မွန်ပြည်နယ် မော်လမြိုင်မြို့ နှင့် ရန်ကုန်တိုင်း ဒေသကြီးတို့မှ  တစ်ဆင့် ဝယ်ယူရောင်းချကာ ထမင်းဆိုင်များ၊ စားသောက်ဆိုင်များ နှင့် စားဖွယ်စုံ ရောင်းချသည့် ဆိုင်မျာမှ ဝယ်ယူအသုံးပြုနေသည့်အတွက် ဈေးကောင်းသော်လည်း ရောင်းအားကောင်း လျက်ရှိကြောင်းသိရသည်။

      ယခု အောက်တိုဘာလ နောက်ဆုံးပတ်တွင် ကျွန်းလှမြို့၏ ပန်းဂဏန်း ဈေးနှုန်းများ အနေဖြင့် ပန်းဂဏန်း လက်လီဈေး(၁)ပိဿာလျှင်(၅၀၀၀၀)ကျပ်၊ (၅၀)ကျပ်သားလျှင်(၂၅၀၀၀)ကျပ်၊ (၂၅)ကျပ် သားလျှင်(၁၂၅၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း ငါး၊ ပုဇွန်၊ ပန်းဂဏန်း၊ ရေဘဝဲ နှင့် ပြည်ကြီးငါး အရောင်းအဝယ် လုပ်ကိုင်သူထံမှ သိရ ပါသည်။

DOCA(စစ်ကိုင်း)

      မြန်မာနိုင်ငံစက်သုံးဆီ တင်သွင်း/သိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီအနေ ဖြင့် တိုင်းဒေသကြီး/ပြည်နယ်အလိုက် မြို့ကြီးများ၏ ရည်ညွှန်းလက်ကားဈေးနှုန်းများအား နေ့စဉ် သတ် မှတ်ထုတ်ပြန် ပေးလျက်ရှိပါသည်။

          စစ်ကိုင်းတိုင်းဒသကြီး၊ ကန့်ဘလူခရိုင်၊ ကျွန်းလှမြို့နယ်တွင် စက်သုံးဆီဆိုင်(၃)ဆိုင် ပုံမှန်ဖွင့်လှစ် ရောင်းချလျက်ရှိကာ စက်သုံးဆီ ပြတ်လတ်မှုမရှိဘဲ (PPRD) စက်သုံးဆီ တင်သွင်း သိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ  နေ့စဉ် သတ်မှတ်ထုတ်ပြန်ထားသော စက်သုံးဆီ ရည်ညွှန်းဈေးနှုန်း အတိုင်း ရောင်းချပြီး အချိန်အတွယ်နှင့် အလေးချိန်မှန်ကန်စွာရောင်းချလျက်ရှိကြောင်း အောက်တို ဘာလ စတုတ္ထပတ်တွင် စက်သုံးဆီဈေးနှုန်းများမှာ ဓါတ်ဆီ Octane(92) တစ်လီတာလျှင် (၂၈၅၈) ကျပ်၊ ဓါတ်ဆီ Octane(95)တစ်လီတာလျှင်(၂၉၅၀)ကျပ်၊ ဒီဇယ်(ရိုးရိုး)HSD တစ်လီတာလျှင် (၂၅၆၆) ကျပ် နှင့် ဒီဇယ်(ပရီမီယမ်)PHSDတစ်လီတာလျှင်(၃၀၈၈)ကျပ် ဈေးနှုန်းတို့ဖြင့် ရောင်းချလျက်ရှိခဲ့ပြီး ယခု အောက်တိုဘာလ နောက်ဆုံးပတ်တွင် စက်သုံးဆီဈေးနှုန်းများမှာ ဓါတ်ဆီ Octane(92) တစ်လီတာလျှင် (၂၈၉၃)ကျပ်၊ ဓါတ်ဆီ Octane(95)တစ်လီတာလျှင်(၂၉၈၉)ကျပ်၊ ဒီဇယ်(ရိုးရိုး)HSD တစ်လီတာလျှင် (၂၆၄၁)ကျပ် နှင့် ဒီဇယ်(ပရီမီယမ်)PHSDတစ်လီတာလျှင်(၃၁၇၆)ကျပ် ဈေးနှုန်းတို့ဖြင့် ရောင်းချလျက် ရှိသောကြောင့် ယခင် အပတ်နှင့် နှိုင်းယှဉ်ကြည့်မည်ဆိုပါက စက်သုံးဆီဈေး 92တစ် လီတာလျှင် (၃၄)ကျပ်၊ 95 တစ်လီတာလျှင်(၃၉)ကျပ်၊ ဒီဇယ်(ရိုးရိုး)HSD တစ်လီတာလျှင်(၇၅)ကျပ် နှင့် ဒီဇယ် (ပရီမီယမ်)PHSD တစ်လီတာလျှင်(၈၈)ကျပ် ဈေးနှုန်းမြင့်တက်ပြီး အရောင်းအဝယ် ဖြစ်လျက်ရှိကြောင်း သိရပါသည်။

DOCA(စစ်ကိုင်း)

     ကျွန်းလှမြို့နယ်အတွင်း စားသောက်ကုန်၊ လူသုံးကုန်ဈေးနှုန်းများ အနည်းငယ်မြင့် တက်လျက် ရှိရာမှ အသားငါး ဈေးနှုန်းသည်လည်း မြင့်တက်လျက်ရှိပြီး သဖန်းဆိပ်ဆည်အတွင်းမှ ထွက်ရှိသည့် ဒေသထွက်ရေချိုငါးများကို   ဝယ်ယူရောင်းချကြောင်း နှင့် ဒေသထွက်ရေချိုငါးများကို  ငါးချဉ်များပြုလုပ်၍ ရောင်းချလျက်ရှိကြောင်းသိရသည်။ ငါးကြီးသားချဉ်ပြုလုပ်သည့် ငါးများကို သဖန်းဆိပ်ဆည်အတွင်းမှ ရရှိသည့် ငါးကြင်း၊ ငါးတို တို့ဖြင့် လည်းကောင်း ငါးသေးချဉ်ပြုလုပ်သည့် ငါးမှာ ငါးဗျက် နှင့် ငါးရှည်(ခေါ်)ခိုင်သင်းကြည်ငါးများဖြင့် သာပြုလုပ်ရောင်းချကြောင်းသိရသည်။

          ၂၀၂၅ခုနှစ်၊ အောက်တိုဘာလ နောက်ဆုံးပတ်အတွင်း ရောင်းချလျက်ရှိသော ငါးကြီးချဉ် (၁)ပိဿာလျှင်(၃၈၀၀၀)ကျပ်၊ (၅၀)ကျပ်သားလျှင်(၁၉၀၀၀)ကျပ်၊ (၁၀)ကျပ်သားလျှင်(၄၀၀၀)ကျပ် ဈေးနှုန်း တို့ဖြင့်လည်းကောင်း ငါးသေးချဉ်(၁)ပိဿာလျှင်(၃၅၀၀၀)ကျပ်၊ (၅၀)ကျပ်သားလျှင် (၁၇၀၀၀)ကျပ်၊ (၁၀)ကျပ်သားလျှင်(၃၅၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း ငါးချဉ်များကို ခရမ်းချဉ်သီး၊ ငရုပ်သီးစိမ်း၊ နံနံပင် တို့ဖြင့် ကြော်စား၍လည်းကောင်း ၊ အစိမ်းအတိုင်း နံနံပင် ငရုပ်သီးစိမ်း ကြက်သွန်နီတို့ဖြင့်  သုပ်စား၍လည်းကောင်း စားသောက်အသုံးပြုကြသဖြင့် အရောင်း အဝယ်ဖြစ်လျက်ရှိကြောင်း  ငါးချဉ် ရောင်းဝယ်ရေးလုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)

         ကျွန်းလှမြို့နယ်အတွင်းရှိ ကျေးရွာများ နှင့် မြို့ပေါ်ရပ်ကွက်များမှ ရာသီစာ ကိုက်လန်ဖူး(ခေါ်) ကန့်လန့်ဖူးများကို စိုက်ပျိုးကာ ဈေးကွက်အတွင်းသို့ စတင်ဝင်ရောက်လာပြီး အရောင်းအဝယ်ဖြစ်လျက်ရှိ ကြောင်း သိရ သည်။

          ကိုက်လန်ဖူး(ခေါ်)ကန့်လန့်ဖူးသည် အရမ်းချိူသော အရွက်တစ်မျိုးဖဖြစ်ကာ လူအများကြိုက်နှစ် သက်သော ဆောင်ရာသီစာသီးနှံတစ်မျိုး ဖြစ်ပါသည်။ ကိုက်လန်ဖူး(ခေါ်)ကန့်လန့်ဖူးကို ပန်းဂေါ်ဖီ နှင့်ကြော်စားခြင်း၊ ကိုက်လန်ဖူး(ခေါ်)ကန့်လန့်ဖူးကို သူ့ချည်းသတ်သတ်လွတ်ကြော်စားခြင်း၊ မုံညှင်းဖူး၊ မုံလာသီး(ခေါ်)မုံညှင်းသီးတို့နှင့်ပေါင်းစားခြင်း၊ ကိုက်လန်ဖူး(ခေါ်)ကန့်လန့်ဖူးကိုပြုတ်၍ မြေပဲဆံထောင်း နှင့် သုပ်စားခြင်း၊ ကိုက်လန်ဖူး(ခေါ်)ကန့်လန့်ဖူး ပြုတ်၍ ငပိချက်နှင့်တို့စားခြင်းများနှင့် မိမိတို့ ကြိုက်နှစ် သက်သည့် ပုံစံမျိုးဖြင့် စားသုံးနိုင်သော အရန်ဟင်း တစ်မျိုးဖြစ်ပါသည်။

          ယခု ၂၀၂၅ ခုနှစ်၊ အောက်တိုဘာလ နောက်ဆုံးပတ်အတွင်း ဖြစ်ပေါ်နေသော ကျွန်းလှမြို့၏ ကိုက်လန်ဖူး(ခေါ်)ကန့်လန့်ဖူးဈေးနှုန်းများမှာ ကိုက်လန်ဖူး(ခေါ်)ကန့်လန့်ဖူး(၁၀)စီးပါ တစ်ထုံးလျှင် (၁၂၀၀၀)ကျပ်၊ ကိုက်လန်ဖူး(ခေါ်)ကန့်လန့်ဖူး(၁)စီးလျှင်(၁၅၀၀)ကျပ်ဈေးဖြင့် ‌အရောင်းအဝယ် ဖြစ်လျက် ရှိကြောင်း ကျွန်းလှမြို့၊ သစ်ရာမြိုင်ဈေးတွင် ကုန်စိမ်းသီးနှံမျိုးစုံ  ရောင်းချနေသော ဈေးသည်ထံမှ သိရသည်။

DOCA(စစ်ကိုင်း)

           ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့နယ်တွင် သီးနှံမျိုးစုံ စိုက်ပျိုးလျက်ရှိရာ စားဖိုဆောင်သီးနှံတစ်မျိုးဖြစ်သော ဗုံလုံသီးကို သီးနှံထွက်ချိန် ရာသီမှီ တစ်နိုင်တစ်ပိုင် စိုက်ပျိုးကြပါ သည်။ ဗုံလုံသီးကို မိုးဦးကာလဖြစ်သည့် မေလနှင့်ဇွန်လများတွင်လည်းကောင်း၊ အောက်တိုဘာ လနှင့် နိုဝင်ဘာလများတွင်လည်းကောင်း  စိုက်ပျိုးကြကြောင်း၊ စိုက်ပျိုးရာတွင် ရေသွင်း ရေတင် စနစ် ဖြင့် ဘောင်ခတ်စိုက်ပျိုးခြင်းအပြင် စိုက်ကျင်းတူး၍လည်း စိုက်ပျိုးကြပါသည်။ စိုက်ပျိုးပြီး တစ်လခန့် အကြာတွင် စင်ထိုး၍ ဗုံလုံသီးအနွယ်(အညွန့်)များကို စင်ပေါ်တင်ပေးရပြီး နှစ်လခန့်အကြာတွင် အသီး များ ခူးဆွတ်ရပါသည်။ ဧကဝက် စိုက်ပျိုးမှုကုန်ကျစရိတ်အနေဖြင့်  မျိုး၊သွင်းအားစု၊လုပ်သားခ အပါ အဝင် ၅ သိန်းခန့် ကုန်ကျကြောင်း၊ အထွက်နှုန်းအနေဖြင့် မြေအနေအထားနှင့် အပင်ဖြစ်ထွန်း အောင် မြင်ဖြစ်ထွန်းမှုအပေါ်မူတည်၍ အတောင့်ရေ ၂၀၀၀ နီပါးထွက်ရှိကြောင်း သိရသည်။ ဈေးနှုန်းအနေဖြင့် အောက်တိုဘာလတတိပတ်တွင် လက်ကားဈေးတစ်တောင့်လျှင် ၆၅၀ကျပ်နှုန်းဖြင့်ရောင်းချရကြောင်း၊ အကျိုးအမြတ်အနေဖြင့် ရာသီကုန်ချိန်တွင် ၈ သိန်းခန့် ရရှိကြောင်း၊ ဈေးကွက်အနေဖြင့် မြို့နယ်အတွင်း ရောင်းချမှုအပြင်  ရန်ကုန်တိုင်းဒေသကြီးနှင့် ဧရာဝတီတိုင်းဒေသကြီးအတွင်းရှိ မြို့နယ်များသို့ တင်ပို့ရောင်းချလျက်ရှိရာ တောင်သူများ အနေဖြင့် အကျိုးအမြတ်များရရှိကာ ဗုံလုံသီး များကို တွင်တွင်ကျယ်ကျယ် စိုက်ပျိုး လာကြကြောင်း သိရသည်။

DOCA (ဧရာဝတီ)