ပြည်တွင်းကုန်သွယ်မှုသတင်း

           မြင်းခြံမြို့နယ်အတွင်းရှိ ကုန်စည်ဒိုင်တွင် နေ့စဉ်ပဲမျိုးစုံအရောင်းအဝယ်ဖြစ်ပေါ်လျက်ရှိရာ ပဲဇီးကွက်  ပဲများကိုလည်း အရောင်းအဝယ်ဖြစ်လျက်ရှိကြောင်းသိရှိရသည်။ ယခု ၂၀၂၅ ခုနှစ်၊ အောက်တိုဘာလ တတိယပတ်တွင် ပဲဇီးကွက် တစ်တင်းလျှင် (၁၀၄၅၀၀)ကျပ်ခန့် ပေါက်ဈေးဖြင့် အရောင်းအဝယ်ဖြစ်လျက်ရှိကြောင်း၊  ယခင်လ စက်တင်ဘာလ တတိယပတ်တွင် ပဲဇီးကွက် တစ်တင်းလျှင် (၉၁၂၀၀)ကျပ်ဝန်းကျင်ပေါက်ဈေးဖြင့် အရောင်းအဝယ်ဖြစ်ခဲ့ကြောင်း၊ ကာလတူ နှိုင်းယှဉ်ပါက ယခင်လထက် ယခုလတွင် ပဲဇီးကွက်တစ်တင်းလျှင် (၁၃၃၀၀)ကျပ် ခန့်ဈေးနှုန်းမြင့်တက်ခဲ့ကြောင်း၊ ထိုသို့မြင့်တက်ခဲ့ခြင်းမှာ ဈေးကွက်တွင် ပဲဇီးကွက်လက်ကျန် အိတ်များ နည်းလာပြီဖြစ်၍ ရောင်းလိုအားနည်းပြီး ဝယ်လိုအားများသောကြောင့် ဈေးနှုန်း မြင့်တက်လာခြင်းဖြစ်ကြောင်း၊ ပွဲရုံများတွင် နေ့စဉ် အရောင်းအဝယ်ဖြစ်မှုအနေဖြင့် (၁၀၀-၁၅၀) အိတ်ခန့် အရောင်းအဝယ်ဖြစ်လျက်ရှိကြောင်း၊ တင်ပို့မှုအနေဖြင့် ရန်ကုန်တိုင်းဒေသကြီး လှိုင်သာယာမြို့နှင့် ရွှေပြည်သာမြို့ရှိပွဲရုံများသို့ တင်ပို့ရောင်းချကြောင်း ပွဲရုံလုပ်ငန်း လုပ်ကိုင်သူ၏ ပြောပြချက်အရသိရှိရသည်။

DOCA (မန္တလေး)

             ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြိုနယ်အတွင်းရှိ ကျေးရွာများတွင် လယ်ယာ စိုက်ပျိုခြင်း လုပ်ငန်းအပြင် သီးနှံမျိုးစုံကို စိုက်ပျိုးလျက်ရှိရာ စားဖိုဆောင်သီးနှံ အဖြစ်ဗူးသီးကို လက်ပံပင်လေးရွာ၊ ကံနှစ်ဆင့်ရွာနှင့် သပြေလှရွာများတွင် တစ်ပိုင်တစ်နိုင်စိုက်ပျိုးကြပါသည်။ ဗူးသီးကို နွေ၊မိုး၊ ဆောင်း ရာသီးသုံးမျိုးစလုံး စိုက်ပျိုးကြပါသည်။

             ဗူးစိုက်တောင်သူ အများစုမှာ ထိုင်ဝမ်မျိူးများကို အများဆုံးစိုက်ပျိုးကြပြီး စိုက်ပျိုးပြီး (၄၅) ရက်ကြာပါ စတင်ခူးဆွတ်နိုင်ပါကြောင်း ရေမြေအနေထားနှင့် ပြုပြင်ဂရုစိုက်နိုင်မှု အပေါ်မှုတည်၍ အထွက်နှုန်းများလည်းကွာခြားပါကြောင်း ဗူးပင်သည် အသီးသာမက အညွန့်ကိုရောင်းချနိုင်သဖြင့် ဝင်ငွေများရရှိနိုင်သည့် သီးနှံလည်းဖြစ်ပါကြောင်း ၂၀၂၅ခု အောက်တိုဘာလ တတိယပတ်တွင် သဲကုန်းမြို့နယ် ဈေးကွက်အတွင်း ဗူးသီးတစ်လုံးလျှင် အရွယ်အစားကိုလိုက်၍ (၅၀၀ကျပ်မှ၁၅၀၀)ကျပ်၊ ဗူးညွှန်၁၀ညွှန်ပါတစ်စီး (၅၀၀)ကျပ်နှုန်းဖြင့် ရောင်းချလျှက်ရှိပြီး ပြည်မြို့နှင့် ရန်ကုန်မြို့များကိုပါ တင်ပို့ ရောင်းချကြောင်းသိရသည်။

DOCA (ပဲခူး)

            ပဲခူးတိုင်းဒေသကြီး ၊ နတ်တလင်းခရိုင်၊ ပေါင်းတည်မြို့နယ်၊ ပေါင်းတည်မြို့နယ်နှင့် နတ်တလင်း မြို့နယ်ကြား ရန်ကုန်-ပြည် အဝေးပြေး ကားလမ်းဘေးတွင် ယာယီဆိုင်ခန်းများ ဆောက်လုပ်ကာ ဒေသထွက်ပြောင်းဖူးများနှင့် အခြားသီးနှံများ၊ ပဲလှော်၊ ပဲကြော်၊ မုန့်ပဲသရေစာများ ကို ၁၂ ရာသီ ရောင်းချလျက်ရှိရာနေ့စဉ်ဈေးဝယ်သူများဖြင့် စည်ကားလျက်ရှိပါသည်။

         ပေါင်းတည်မြို့နယ်တွင် ဖူးစားပြောင်းကို သုံးသီးစား စိုက်ပျိုးကြောင်း ယခု မိုးပြောင်းကို ဧကသုံးထောင်းကျော်စိုက်ပျိုးကြောင်း၊  သန့်ရှင်းလက်ဆက်၍ ဈေးနှုန်းချိုသာသော ဒေသထွက်ပြောင်းဖူးများနှင့်အခြားရာသီပေါ်သီးနှံများနှင့်မုန့်ပဲသရေစာများကိုခရီးသွားပြည်သူများကခရီးတစ်ထောက် နားရင်း ဝယ်ယူစားသုံးကြဖြင့် ရောင်းသူဝယ်သူ အဆင်ပြေလျက်ရှိရာ ဒေသခံပြည်သူများမှာလည်း အလုပ်အကိုင် အခွင့် အလမ်းများရရှိစေပါသည်။

        အဆိုပါဈေးတန်းတွင် ၂၀၂၅ခု အောက်တိုဘာလ တတိပတ်တွင် ပြောင်းဖူးစိမ်း တစ်ဖူးလျှင် (၅၀၀-၄၀၀)ကျပ်နှုန်း၊ ပြောင်းဖူးမီးဖုတ် တစ်ဖူး(၇၀၀-၈၀၀)ကျပ်၊ ပြောင်ဖူးစေ့ကြော် နို့ဆီဗူးတစ်ဗူး  (၈၀၀)ကျပ် (၁၀)ပြည် တစ်ပြည် (၇၀၀၀)ကျပ်၊ ပြောင်းဖူးစေ့လှော် နို့ဆီဗူးတစ်လုံး(၇၀၀)ကျပ်ဖြင့် ရောင်းချလျက်ရှိရာ ခရီးသွားပြည်သူများက ကိုယ်တိုင်စားသုံးရန်နှင့် လက်ဆောင်ပေးရန်အတွက် ဝယ်ယူကြကြောင်းသိရသည်။

DOCA (ပဲခူး)

           ပဲခူးတိုင်းဒေသကြီး ၊ နတ်တလင်းခရိုင်၊ နတ်တလင်းမြို့အတွင်း ကျေးရွာများတွင် ကလားဝါးဥ (ခေါ်)ဝါးဥကို တစ်ပိုင်တစ်နိုင်စိုက်ပျိုးကြပါသည်။ ယခုအချိန် အောက်တိုဘာလတွင် ဝါးဥရာသီချိန် ဖြစ်၍ ဝါးဥများစတင်ထွက်ရှိနေပြီး မြို့နယ်ဈေးကွက်အတွင်း ဝါးဥ တစ်ပိဿာလျှင် ငွေကျပ် (၅၀၀၀) ကျပ် ၊(၅၀)ကျပ်သား(၂၅၀၀)ကျပ်၊(၂၅)ကျပ်သား (၁၂၅၀) ကျပ်ဖြင့် ဈေးတွင် ရောင်းချလျှက် ရှိရာ စားသုံးသူများ ကြိုက်နှစ်သက်၍ အရောင်းသွက်လျက်ရှိကြောင်း သိရပါသည်။

          ဝါးဥသည် ပရိုတင်းဓာတ်နှင့် သန်ဓာတ်ကိုလည်း  အားဖြည့်ပေးပါသည်။ ဝါးဥကိုစားသုံး ပေးခြင်းဖြင့် ကျန်းမာရေးအတွက် ကောင်းကျိုးများကို ရရှိစေပါသည်။ ဝါးဥပင်ကို စိုက်ပျိုးရာတွင် တကူးတက စိုက်ပျိုးစရာ မလိုဘဲ ဝါးဥကို တူးဖော်စဉ်က အပင်တက်ထွက်ရာ ဝါးဥ၏ အမြီးပိုင်းကို လက်တစ်ဆစ်ခန့်ချိုး၍ တူးယူသောကျင်း၌ ပြန်လည်မြေဖို့၍ စိုက်ပျိုးခဲ့ပါသည်။ မိုးဦးကျမှသာ အပင်တက်များ ပြန်လည်ထွက် ပေါ်ခြင်းဖြင့် ဖြစ်ပါသည်။ အပင်အမြင့်မှာ (၃ - ၄) ပေခန့် အမြင့်ရှိပြီး မိုးအကုန်တူးဖော်ရာတွင် တစ်ပင်ကို ဥပွားများ (၃ - ၄) ဥပြန်လည်ထွက်ရှိပါသည်။

         ဝါးဥသည် အထိအခိုက် အထားခံ၍ သယ်ရလွယ်ကူသောကြောင့် ဒေသမရွေးမှာပင်ဝယ်ယူ ရရှိနိုင်ပါသည်။ဓာတုဆေးဝါးလည်း ကင်းလွတ်သော အော်ဂဲနစ် သီးနှံလည်းဖြစ်၍ ရာသီပေါ် ကလားဝါးဥ (ခေါ်) ဝါးဥကို စားသုံးသင့်ပါကြောင်း ရေးသားလိုက်ရပါသည်။

DOCA (ပဲခူး)

          ပိန်းဥသည်ကစီဓါတ်ပြည့်ဝတဲ့ သီးနှံတစ်ခုဖြစ်ပါသည်။ ပိန်းဥသည် မြေကြီးအတွင်းမှ တူးယူရရှိ သည့် ဥတစ်မျိုးဖြစ်ပါသည်။ ပိန်းပင်အား စိုက်ပျိုးရာတွင် အဓိကမှာ ရေရရှိသည့် မည်သည့်ဒေသတွင်း မဆို စိုက်ပျိုး၍ရပါသည်။ စတင်စိုက်ပျိုးပြီး အပင်သက်တမ်း (၅) လခွဲမှ (၆) လထိ သက်တမ်းရှိပါသည်။ မျိုးတစ်ဧကလျှင် အတက် (၂၀၀) တက် စိုက်ပျိုးလျှင် ပိန်းဥအချိန်  (၅၀၀၀) ထွက်ရှိပါသည်။ ပိန်းဥ စိုက်ပျိုးရာတွင် အသက်တက်၊ ဥမွှာ၊ ပိန်းရိုး၏အရင်းပိုင်းတို့မှ မျိုးယူ၍ စိုက်ပျိုးရနိုင်ပါသည်။ တစ်နှစ် စိုက်ပျိုးပြီး မျိုးဥများအားချန်ထားပြီး နောက်တစ်နှစ်အတွက် ပြန်လည်စိုက်ပျိုး၍ ရနိုင်သဖြင့် နောက်နှစ်အတွက် မျိုးဥများ မဝယ်ရခြင်းကြောင့် ငွေကြေးကုန်ကျသက်သာစေပါသည်။ ပိန်းဥဈေးမှာ နှစ်စဉ် ဈေးကောင်းသည့်အတွက် ပိန်းစိုက်ရာတွင် ဝင်ငွေတိုးစေကြောင်း သိရှိရပါသည်။ ပိန်းဥအမျိုးအစား များစွာရှိပြီး ပိန်းဥတစ်ပိဿာလျှင် (၅၀) ကျပ်သား ထွက်ရှိသည့် ပိန်းဥမျိုးရှိသလို ပိန်းဥအသေးမျိုးများလည်းရှိကြောင်း သိရပါသည်။ ပိန်းဥရဲ့အပြင်ဘက်အလွှာဟာ အညိုရောင် ရှိပြီးအတွင်း အသားမှာ အဖြူရောင်ရှိပါသည်။ ပိန်းဥသည် အမျှင်ဓါတ်များစွာ ပါဝင်သည့်အတွက် ပိန်းဥကိုစားပေးခြင်းဖြင့် လေပွခြင်း၊ ဗိုက်အောင့်ခြင်း၊ ဝမ်းပျက်၊ ဝမ်းလျောခြင်းတို့မှ ကာကွယ်ပေးနိုင်ပါသည်။ ပိန်းဥ၏ အရသာမှာ ချိုမြိန်ပြီး အာလူးနှင့် အရသာဆင်တူပါသည်။ ပိန်းဥကို သရေစာအဖြစ်ပြုတ်စားခြင်း၊ အရံဟင်းအဖြစ် ချက်ပြုတ်စားသောက်၍ ရနိုင်သလို ပိန်းဥအခြောက်ပြား၊ ပိန်းဥကွက်သီး၊ ပိန်းဥခြောက်ကြော်၊ ပိန်းဥ ရေခဲမုန့်၊ ပိန်းဥသကြားလုံး၊ ပိန်းဥဂျယ်လီ၊ ပိန်းဥဝေဖာစသည့် သရေစာမျိုးစုံ ပြုလုပ်၍ရနိုင်ပါသည်။ ဈေးကွက်အတွင်း ရောင်းချနေသည့် ပိန်းဥများမှာ ပိန်းဥအလုံးကြီး (၁)ပိဿာလျှင် (၈၀၀၀) ကျပ်၊ အလုံးသေးတစ်ပိဿာလျှင် (၅၀၀၀) ကျပ်နှုန်းဖြင့် ပြည်မြို့ ဈေးကွက်အတွင်း အရောင်း အဝယ်ဖြစ်နေကြောင်း သိရှိရပါသည်။

DOCA (ပဲခူး)