ပြည်တွင်းကုန်သွယ်မှုသတင်း

               ဗုဒ္ဓဘာသာမြန်မာလူမျိုးတို့သည် မိမိတို့ ကိုးကွယ်ယုံကြည်ရာလိုက်၍ ဘုရားပွဲ ၊ တရားပွဲ ၊ နတ်ပွဲ ၊ အလှူနှင့် မင်္ဂလာပွဲများတွင် အစဉ်အလာအရ မဖြစ်မနေသုံးစွဲနေသော ငှက်ပျောသီး ၊ အုန်းသီးဈေးကွက်သည်လည်း အနယ်နယ်အရပ်ရပ်တွင် ဈေးကွက်တစ်ခုပင် ဖြစ်တည်ရောင်း ဝယ်နေကြသည်မှာ ယနေ့ချိန်ထိပင်ဖြစ်ပါသည်။ မြင်းခြံမြို့နယ်သည် ငှက်ပျောအများစု စိုက်ပျိုးသော ဒေသတစ်ခုမဟုတ်သည့်အတွက် ငှက်ပျောအများစု စိုက်ပျိုးရာဒေသများဖြစ်သော ဟန်မြင့်မိုရ် ၊ မြစ်သား ၊ ကျောက်ဆည် ၊‌ ရွှေဘို ၊ ပုပ္ပါး ၊တောင်ငူတို့မှထွက်ရှိသော ငှက်ပျောသီးများကို မှာယူရောင်းချနေကြောင်းလေ့လာသိရှိရပါသည်။လက်တလော ကျောက်ဆည် ၊ ရွှေဘို ဖီးဂျမ်းတစ်ဖီးလျှင် ၄၀၀၀-၄၅၀၀- ကျပ် ဈေးရှိပြီး ပုပ္ပါး၊တောင်ငူ ဖီးဂျမ်း တစ်ဖီးလျှင် ၂၅၀၀-၃၀၀၀ ကျပ်ဈေးရှိပါကြောင်းနှင့် ရခိုင်ငှက်ပျော တစ်ဖီးလျှင် ၂၀၀၀-၂၅၀၀ကျပ်ဈေးတို့ဖြင့် အရောင်းအဝယ်ရှိပါကြောင်း ရခိုင်ငှက်ပျောအနေဖြင့် ပုပ္ပါးသီးသည် အစေ့မပါ၍ လူကြိုက်များ တောင်ငူသီးသည် အစေ့ပါ၍ လူကြိုက်နည်းကြောင်း ဈေးနှုန်းအနေဖြင့်လည်း တစ်ဖီးလျှင် ၂၀၀-၃၀၀ ကွာခြားမှုရှိကြောင်းသိရသည်။ဈေးနှုန်းအနေဖြင့်တော့ပုံမှန်ဈေးတန်းတွင်သာရှိပါကြောင်း၊စားဖီးအနေဖြင့်ကျောက်ဆည်ရွှေသိမ်တော်သာသနာပွဲကျဖီးကျမ်း ၁ ဖီးလျှင် ၁၀၀၀ -၁၃၀၀- ၁၈၀၀ ဈေးတို့ဖြင့် ရောင်းချရပါကြောင်း၊အုန်းသီးကိုတော့ တောင်ငူ၊ ရန်ကုန်တို့မှ မှာယူရောင်းချရာ တောင်ငူ ဆွဲပွဲအုန်းသီး (၁) လုံးလျှင် ၄၇၀၀-၅၀၀၀ ကျပ်နှင့် ရန်ကုန်ဆွဲပွဲအုန်းသီး (၁)လုံးလျှင်၅၈၀၀-၆၀၀၀ကျပ်တို့ဖြင့်ရောင်းချပြီးအခွံခွာပြီးအုန်းသီးကိုတော့း ၄၀၀၀-၄၅၀၀ကျပ်ရောင်းချကြောင်းအုန်း၊ ငှက်ပျောရောင်းချသူလုပ်ငန်းရှင်တစ်ဦး၏ပြောကြားမှု အရသိရပါသည်။

DOCA (မန္တလေး)

မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ဇေယျာသီရိဈေး၌ ပန်းသီး၊ ထောပတ်သီး၊ ဖရဲသီးနှင့် စပျစ်သီးတို့ကို မကွေးမြို့၊ မန္တလေးမြို့နှင့် ရှမ်းပြည်နယ်၊ တောင်ကြီး၊ အောင်ပန်းမြို့တို့မှ မှာယူရောင်းချကြောင်း သိရသည်။

          ၂၀၂၅ခုနှစ်၊ နိုဝင်ဘာလ(ဒုတိယပတ်)တွင် ဇေယျာသီရိဈေးအတွင်းဖြစ်ပေါ်နေသော သစ်သီး ဈေးနှုန်းများမှာ ပန်းသီး(၁)လုံးလျှင် (အလုံး၊ အကြီး၊ အသေး)အလိုက် ကျပ်(၂၅၀၀-၅၅၀၀)၊ ထောပတ်သီး(၁)လုံးလျှင် ကျပ်(၁၅၀၀-၂၀၀၀)၊ ဖရဲသီး(၁)လုံးလျှင် ကျပ်(၇၀၀၀)၊ စပျစ်သီး (အလုံးကြီး မျိုး) (၁)ပိဿာလျှင် ကျပ်(၄၅၀၀၀)ဈေးဖြင့် ရောင်းချလျက်ရှိကြောင်းသိရသည်။ ယခင်တစ်ပတ်နှင့် ဈေးနှုန်းနှိုင်းယှဉ်ပါက ယခုတစ်ပတ်တွင် ပန်းသီး ကျပ်(၅၀၀)နှင့် စပျစ်သီး ကျပ်(၂၀၀၀)ဈေးနှုန်း မြှင့်တက်လာကြောင်း၊ ဖရဲသီးဈေးနှုန်းမှာ ပြောင်းလဲမှုမရှိကြောင်း၊ ထောပတ်သီး မှာ ယခုတစ်ပတ်မှ စတင်၍ ဇေယျာသီရိဈေးအတွင်းသို့ ဝင်ရောက်လာခြင်းဖြစ်ကြောင်း၊ ပန်းသီးနှင့် စပျစ်သီးကို မန္တလေး မြို့မှ အဓိကမှာယူရောင်းချသည့်အတွက် ယခုအချိန်တွင် သယ်ယူစရိတ် အနည်းငယ်မြင့်မားလာသည့် အတွက် ဈေးနှုန်းမြင့်တက်လာခြင်းဖြစ်ကြောင်း၊ မင်းလှမြို့နယ်အတွင်း၌ အလှူပွဲကာလဖြစ်သည့် အတွက် သစ်သီးဈေးကောင်းသော်လည်း အရောင်းအဝယ်မှာ သွက်လျက်ရှိကြောင်း သိရှိရသည်။

DOCA(မကွေး)

     တနင်္သာရီတိုင်းဒေသကြီး၊ ထားဝယ်မြို့၊ ပတ်ဝန်းကျင်ရှိကျေးရွာများမှ ပြည်သူများသည် မိမိတို့ နေအိမ်ခြံဝင်းနှင့်လယ်ယာများတွင်ဟင်သီးဟင်းရွက်များ၊ သစ်သီးများစိုက်ပျိုးထားလျက်ရှိရာ ကျောက်ဖရုံပင်များကိုလည်းစိုက်ပျိုးထားကျပါသည်။ ကျောက်ဖရုံပင်များကို မြေအမျိုးမျိုးတွင် စိုက်ပျိုးနိုင်ပြီး နုန်းမြေ များတွင်ပိုမိုဖြစ်ထွန်းသည်။ ပူနွေးသောရာသီဥတုကို ကြိုက်နှစ်သက်ပြီး အအေးဒဏ်ကိုလည်းခံနိုင် ရည်ရှိပါသည်။

              ကျောက်ဖရုံပင်အသီးဆွတ်ခူးချိန်တွင် ကျောက်ဖရုံညွှန်များကိုလည်ဆွတ်ခူးနိုင်သည်။ ဆွတ်ခူးပြီးသော ကျောက်ဖရုံညွှန်များကို ထားဝယ်မြို့၊ စည်ပင်သာယာဈေးကြီးနှင့် ရက်ကွက် ဈေးငယ်များတွင်လာရောက် ရောင်းချကြပါသည်။ ကျောက်ဖရုံညွှန့်(၁)စည်းလျှင် (၅၀၀)ကျပ် နှုန်းဖြင့် ရောင်းချကြရာ ပြည်သူများတွက် ချေကိုက်လျက်ရှိကြောင်းသိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ မြိတ်မြို့ပေါ်တွင် အနယ်နယ်အရပ်ရပ်မှ တင်သွင်းလာသော စားဖို ဆောင်သီးနှံများနှင့် ဒေသတွင်းထွက်ရှိသောစိုက်ပျိုးသီးနှံများကို ရောင်းချလျက်ရှိပါသည်။ ကျန်းမာ ရေးအရသော်လည်းကောင်း၊ စီးပွားရေးအရသော်လည်းကောင်း အကျိုးဖြစ်ထွန်းစေသောကြောင့် စားဖိုဆောင်သီးနှံများလည်း တစ်နိုင်တစ်ပိုင်စိုက်ပျိုး ရောင်းချလာကြပါသည်။ ရေလုပ်ငန်းများ သာမက ဥယျာဉ်ခြံလုပ်ငန်းများလည်း လုပ်ကိုင်ကြသော ဒေသတစ်ခုပင် ဖြစ်ပါသည်။

      ကုန်စုံများရောင်းချလျက်ရှိသော မြိတ်မြို့ပေါ်ရှိ အောင်မင်္ဂလာဈေးပေါ်တွင် နိုဝင်ဘာလ ပထမပတ်တွင် ကန်စွန်းရွက်(၁)စည်း(၇၀၀)ကျပ်၊ ပဲတောင့်ရှည်(၁)စည်း(၆၀၀)ကျပ်၊ ခရမ်းချဉ်သီး (၁၀)သား (၆၀၀)ကျပ်၊ အာလူး(၁၀)သား(၁၀၀၀)ကျပ်၊ ချဉ်ပေါင်ရွက်(၁)စည်း(၅၀၀)ကျပ်၊ ကင်းပွန်း ချဉ်ရွက်(၁)စည်း(၅၀၀)ကျပ်၊ မန်ကျည်းရွက်(၁)စည်း(၅၀၀)ကျပ်၊ ခရမ်းသီး(၁၀)သား (၈၀၀) ကျပ်တို့ ဖြင့်ရောင်းချလျက်ရှိကြောင်း ကုန်စိမ်းရောင်းချသူထံမှသိရှိရပါသည်။

DOCA(တနင်္သာရီ)

     မြိတ်ခရိုင်မှ ထွက်ရှိသောရေထွက်ကုန်များနှင့် ရာဘာ၊ ကွမ်းသီး၊ သီဟိုဠ်များကို တင်ပို့လျက်ရှိပြီး ‌ဒေသထွက်ကုန်များထဲမှ အရေးပါသောပို့ကုန်ဖြစ်သော ကွမ်းသီးကို ပြည်တွင်းသာမက ပြည်ပသို့ တင်ပို့ ရောင်းချလျက်ရှိကြပါသည်။ ကွမ်းသီးကို မြိတ်မြို့နယ်အတွင်း  ကျေးရွာများနှင့် မြို့နယ်များတွင် စိုက်ပျိုးကြပြီး မြိတ်မြို့ရှိ ကုန်သည်များတွင် ရောင်းချကြသည်။ ကွမ်းသီးကို ကွမ်းယာများတွင် အဓိကအသုံးများကြသလို ကွမ်းသီးနုကို ကွမ်းသီးပေါင်းအဖြစ် သုံးစွဲကြသည်။

   မြိတ်မြို့တွင် နိုဝင်ဘာလ၌ ကွမ်းသီးအလုံးစျေးနှုန်းများ တစ်ပိဿာလျှင် ၁၇၀၀၀ကျပ်နှင့် ကွမ်းသီးအခြမ်းစျေးနှုန်းမှာ ၁၄၀၀၀ကျပ်ရှိပြီး ကွမ်းသီးအလုံးမှည့် တစ်လုံးလျှင် ၆၀ကျပ် စျေးရရှိကြောင်း သိရှိရပါသည်။

DOCA(တနင်္သာရီ)