ငှက်ပျောပင်သည် မြေအမျိုးမျိုးအပေါ်တွင်စိုက်ပျိုးနိုင်ပြီး သဲဆန်သောမြေ၊ မြေချဉ်ငံနှင့် ထုံးပေါက်မြေများတွင် မစိုက်ပျိုးသင့်ပဲ အစိုဓါတ်ရှိပြီး မြေဆီ၊ မြေနှစ်နှင့် ရေသွင်း၊ ရေထုတ် ကောင်းမွန်သော မြေနေရာများတွင် စိုက်ပျိုးသင့်ပါသည်။ ငှက်ပျောစိုက်ခင်းသည် နှစ်ပေါင်းများစွာ ထားရှိပြီး အသီးခူးဆွတ်ရိတ်သိမ်းနိုင်သော အပင်မျိုးဖြစ်ပါသည်။ ငှက်ပျောပင်ကို တစ်ဧကလျှင် အပင် (၁၇၉၉)ပင် စိုက်ပျိုးနိုင်ကြောင်းသိရသည်။ ငှက်ပျောပင်ကို အအေးလွန်ကဲသည့် ဆောင်းရာသီနှင့် မိုးများစွာရွာသည့် အချိန်မှလွဲ၍ ကျန်အချိန်များတွင် စိုက်ပျိုးနိုင်ကြောင်း သိရသည်။
မြန်မာ့ဓလေ့အစဉ်အလာအရ ငှက်ပျောသည် အရေးပါသော အခန်းကဏ္ဍတွင်ပါဝင်သည်။ ငှက်ပျောသည် မြန်မာတို့၏ ယဉ်ကျေးမှုနှင့် တိုင်းရင်းသားတို့ ယဉ်ကျေးမှုဆက်စပ်လျက်ရှိသည်။ ငှက်ပျောသီးသည် လူမျိုးဘာသာမရွေး စားသုံးသော အသီးတစ်မျိုးဖြစ်သည်။ ငှက်ပျောသီးသည် မြန်မာနိုင်ငံတွင် နေရာတော်တော်များများတွင် ပါဝင်သည်။ ငှက်ပျောသီးသည် အလှူပွဲ၊ မင်္ဂလာပွဲ၊ ဗုဒ္ဓပူဇနိယပွဲများ၊ နတ်ပွဲများနှင့် နတ်ပူဇော်ပွဲများတွင် မပါမဖြစ်ပါဝင်သည်။ ထို့ကြောင့် ငှက်ပျောပင်ကို “မြန်မာအမျိုးသားရေး ပဒေသာပင်”ဟု တင်စားခေါ်ဝေါ်ကြသည်။
မြန်မာနိုင်ငံတွင် ထင်ရှားသော ငှက်ပျောမျိုးများရှိသည်။ ဖီးကြမ်းငှက်ပျော၊ ရခိုင်ငှက်ပျော၊ ဝက်မလွတ်၊ သီးမွှေးငှက်ပျော၊ ရွှေနီငှက်ပျော၊ ငှက်ပျောချဉ်၊ သုံးလုံး တစ်ပိဿာ၊ နံ့သာဖု ဟူ၍ ငှက်ပျောမျိုးများရှိကြသည်။ မြန်မာနိုင်ငံတွင် ငှက်ပျောကို အလေးချိန်နှင့် မပြောပဲ အခိုင် (သို့) အဖီး အလိုက်သာ ရောင်းဝယ်ကြသည်။ တစ်ဧကတွင် အခိုင်ရေ (၆၇၀)ခန့်ထွက်ရှိနိုင်ကြောင်းသိရသည်။ ငှက်ပျောရောင်းဝယ်သူများက ငှက်ပျောကို ခြံပြတ်ဝယ်ယူကြကြောင်း သိရသည်။ ငှက်ပျော ရောင်းချသူများက ငှက်ပျောဖီးအရွယ်အစားအလိုက် ဈေးနှုန်းအသီးသီးဖြင့် ရောင်းချကြောင်းသိရ သည်။
မြန်မာနိုင်ငံတွင် ငှက်ပျောသီး ထုတ်ကုန်တစ်ခုမှာ ငှက်ပျောကြော်လုပ်ငန်းဖြစ်သည်။ ငှက်ပျောကြော်လုပ်ငန်းသည် မိသားစုစီးပွားရေးအတွက် တစ်ဖက်တစ်လမ်းမှ ဝင်ငွေရရှိသော လုပ်ငန်းတစ်ခုဖြစ်သည်။ ငှက်ပျောကြော်ပြုလုပ်ရန် ငှက်ပျောသီးကို လိုသလောက်ရှာထားရသည်။ ပြီးလျင် အစိမ်း၊ အမှည့်ခွဲထားရသည်။ ငှက်ပျောသီး အစိမ်း/အမှည့်များကို ဓါးဖြင့် ခပ်ပါးပါးလှီးကာ ကြော်ရကြောင်းသိရသည်။ ငှက်ပျောကြော်ကို ထင်း/မီးသွေးအပြင် ဖွဲမီးဖြင့်ကြော်လျှင် ပိုကောင်း ကြောင်းသိရသည်။ ငှက်ပျောကြော်ကို စနစ်တကျထုတ်ပိုးပြီး မြန်မာနိုင်ငံတွင်သာမက နိုင်ငံရပ်ခြား ထိပါ တင်ပို့ရောင်းချနိုင်ကြောင်းသိရသည်။
မြန်မာနိုင်ငံတွင် ငှက်ပျောပင်နှင့်ပတ်သက်ပြီး ထုတ်ကုန်အဖြစ် ထုတ်လုပ်ရောင်းချလျှက်ရှိရာ ပြည်ခရိုင်၊ ပခုက္ကူခရိုင်၊ ဟင်္သာတခရိုင်တို့တွင် ငှက်ပျောကြော်ကို စီးပွားဖြစ်ထုတ်လုပ်ရောင်းချကြ သည်။ငှက်ပျောပင်မှ အမျှင်ထုတ်ယူပြီး အဝတ်အထည်များပြုလုပ်နိုင်ကြောင်း သိရသည်။ ငှက်ပျောဖတ်ဖြင့် ခေါင်းအုံး၊ ပုဝါ၊ လက်ကိုင်အိတ်၊ ပိုက်ဆံအိတ်အစရှိသည့် လူသုံးကုန်ပစ္စည်း အမျိုးမျိုးကို ထုတ်လုပ်နိုင်ကြောင်း အမှိုက်ထဲက ရွှေဟုပင် တင်စားခေါ်ကြသည်။ မြန်မာလူမျိုးများ သည် ငှက်ပျောသီးကို အခြေခံ၍ မြန်မာမုန့်များပြုလုပ်ရောင်းချခြင်းဖြင့် မိသားစု စားဝတ်နေရေးကို ဖြေရှင်းကြသည်များလည်းရှိသည်။ ငှက်ပျောသီးဖြင့်ပြုလုပ်သော မုန့်များမှာ ငှက်ပျောသီးမုန့်၊ ငှက်ပျောသီးရွှေချီ၊ ငှက်ပျောအုန်းနို့ပေါင်း၊ ငှက်ပျောကြော်၊ ငှက်ပျောကော်ပြန့်ကြော်၊ ငှက်ပျောပေါင်း၊ ငှက်ပျောဆနွင်းမကင်းများစသည့် ငှက်ပျောသီးဖြင့် ပြုလုပ်သော မုန့်များရှိသည်။ ငှက်ပျောသီးကို အခြေခံ၍ ပြလုပ်သော မိသားစုစီးပွားရေးလုပ်ငန်းလည်းဖြစ်သည်။ အခြား စားသောက်လို့ရသော ငှက်ပျောဖျော်ရည်လည်းရှိသည်။ ကမ္ဘာ့ဈေးကွက်တွင် ငှက်ပျောသီး ခြောက်မုန့်၊ စည်သွပ်ငှက်ပျောသီးထုတ်ကုန်များကို အမေရိကန်နိုင်ငံတွင် အပူချိန်နည်းနည်းဖြင့် အခြောက်ခံ၍ ပြုလုပ်ရောင်းချကြောင်းသိရသည်။ အမေရိကန်နိုင်ငံတွင် ငှက်ပျောသီးကို အနှစ်ထုတ် များအပြင် ဘီယာချက်ခြင်း၊ ဝိုင်အရက်ပြုလုပ်ခြင်း၊ ငှက်ပျောသီးထုတ်လုပ်ခြင်းတို့ရှိကြောင်း သိရသည်။
အချို့ဒေသများတွင် ငှက်ပျောပင်မှ ထွက်ရှိသော ငှက်ပျောဖူး၊ ငှက်ပျောအူနှင့် ငှက်ပျောပွင့် များကိုချက်ပြုတ်စားသောက်ကြသည်။ မြန်မာလူမျိုးတို့ အနှစ်ခြိုက်ဆုံး အစားအစာဖြစ်သည့် မုန့်ဟင်းခါးတွင် ငှက်ပျောအူကို ပဲဟင်းရည်ထဲတွင်ထည့်၍ ချက်ပြုတ်စားသောက်ကြသည်။ ရခိုင် မုန့်တီဟုခေါ်သော ရခိုင်ဒေသချက် အာပူ၊ လျှာပူ ဟင်းရည်ထဲတွင် ငှက်ပျောအူကို ထည့်၍ ချက်ကြ သည်။ ငှက်ပျောပင်၏ အရွက်များသည်လည်း အလွန်အသုံးဝင်ပါသည်။ ငှက်ပျောရွက်များကို မုန့်ဖက်ထုတ်ပြုလုပ်ရောင်းချရာတွင် အသုံးပြုသလို၊ အရွက်ကို အမျှင်များပြုလုပ်၍ ဖျာနှင့် ဖျင်ကြမ်းယက်လုပ်ကြောင်းလည်း သိရသည်။ အသီးညံ့ဖျင်းသော မျိုးမကောင်းသည့် ငှက်ပျောပင် တို့ကို ငှက်ပျောလျှော်အဖြစ်ယူပြီး စက္ကူများပြုလုပ်နိုင်ကြောင်းလည်း သိရသည်။ငှက်ပျောသီးသည် ဈေးကွက်ရှိပြီး ဈေးကောင်းသော အသီးတစ်မျိုးဖြစ်သည်။ မြန်မာနိုင်ငံအနေဖြင့် ငှက်ပျောပင် ထွက်ကုန်များကို အရှိန်အဟုန်ဖြင့် စီးပွားရေးလုပ်ငန်းအနေနှင့် အောင်မြင်ဖြစ်ထွန်းအောင် ပြည်တွင်း သာမက ပြည်ပပို့ကုန်အဖြစ် တင်ပို့နိုင်ဖို့လိုအပ်ပါသည်။
ယခုအခါ နိုင်ငံတော်က အသေးစား၊ အငယ်စားနှင့် အလတ်စား MSMEs လုပ်ငန်းများကို မြှင့်တင်ဆောင်ရွက်ပေးလျက်ရှိပြီး MSMEs လုပ်ငန်းရှင်များအနေဖြင့် မိမိတို့၏ ထုတ်ကုန်များကို ပြည်တွင်းဈေးကွက်သာမက ပြည်ပပို့ကုန်အဖြစ် ထုတ်လုပ်လာနိုင်အောင် ကြိုးစားအားထုတ်ရမှာ ဖြစ်ပါတယ်။ ငှက်ပျောစိုက်ပျိုးထုတ်လုပ်မှုဆိုသည်ထက် စွန့်ပစ်ပစ္စည်းမှ ပြည်သူလူထုအတွက် အလုပ်အကိုင်အခွင့်အလမ်းများ ဈေးနှုန်းဈေးကွက်အနေဖြင့် လက်မှုပညာများမှာ ဈေးနှုန်းဈေးကွက် ရရှိအောင် ကြိုးစားဆောင်ရွက်ဖို့လိုအပ်ပါတယ်။ မြန်မာနိုင်ငံတွင် ငှက်ပျောပင်များ နေရာအနှံ့ ပေါက်ရောက်သောကြောင့် အရွက်မှ အပင်၊ နောက်ဆုံးစွန့်ပစ်ပစ္စည်းအထိ အသုံးဝင်သဖြင့် တောင်သူများ စိုက်ပျိုးသင့်သလို ငှက်ပျောထုတ်လုပ်မှုဖြင့် ပြည်သူကို အကျိုးပြုပြီး နိုင်ငံအတွက်လည်း စီးပွားရေးဖွံ့ဖြိုးတိုးတက်လာမည်ဖြစ်ပြီး ပြည်ပပို့ကုန် အမယ်တစ်မျိုး ဖြစ်သောကြောင့် ငှက်ပျော စိုက်ကြ ပါစို့လို့ တိုက်တွန်းရေးသားလိုက်ရတယ်။
DOCA(ပဲခူး)
