ပြည်တွင်းကုန်သွယ်မှုသတင်း

     တောင်ငူမြို့ ညောင်ပင်လေးဈေးသို့ အခြားဒေသများမှ ရာသီပေါ်သီးနှံများ လာရောက် ရောင်းချပေး လျက်ရှိရာ ယခုအခါ   မော်လမြိုင်ဘက်မှ ဒညင်းသီးများ စတင် ရောင်းချလျက် ရှိပါသည်။

     ဒညင်းသီး (အကြီး) (၁၀)လုံးလျှင် ၅၀၀၀ ကျပ်၊ အလုံး ၁၀၀ ယူလျှင် ၄၅၀၀၀ကျပ်၊ အလတ် ၁၀ လုံးလျှင်       ၃၀၀၀ ကျပ်၊ အလုံး ၁၀၀ ယူလျှင်     ၂၅၀၀၀   ကျပ်၊ အသေး ၁၀ လုံး လျှင် ၁၅၀၀ ကျပ်၊ အလုံး ၁၀၀ ယူလျှင် ၁၀၀၀၀ ကျပ် အထိ ဈေးနှုန်းအသီးသီး ရှိပါသည်။

     ယခုအခါ ဒညင်းသီးပေါ်စ ဖြစ်သဖြင့် ဈေးကောင်းပါသည်။ သံတောင်ဘက်မှ ဒညင်းသီး များ ဖြိုင်ဖြိုင်ပေါ်လာပါက ဈေးနှုန်းများ တဖြည့်ဖြည်းကျဆင်းလာနိုင်ပြီဟု ဒညင်းသီး အရောင်းဆိုင်များမှ သိရပါသည်။

DOCA(ပဲခူး)

        မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်တွင် ငရုတ်သီးများကို ကျွန်းဦး၊ ကျွန်းညို၊ ပခုက္ကူကျွန်းများနှင့် မြစ်ခြေမြို့နယ်အတွင်းရှိ နန်းတော်ရပ်ကျေးရွာအုပ်စုကျေးရွာများတွင် ငရုတ်သီး များကို စိုက်ဧက(၂၅၀၀၀)ကျော်  တစ်ကွင်းတစ်စပ် စိုက်ပျိုးလျက်ရှိပါသည်။ စိုက်ပျိုးသောမျိုးများမှာ  ပန်းရဲ၊မျှားနီနှင့် အစပ်သီး အမျိုးမျိုးတို့ကို စိုက်ပျိုးကြပါသည်။

     ပခုက္ကူမြို့မဈေးနှင့် အမှတ်(၂) ဈေးတို့တွင် ငရုတ်သီးအစို၊ အခြောက်များ ရောင်းချလျက်ရှိပြီး ၂၀၂၅ခုနှစ်၊ မေလ(ပထမပတ်)တွင် ငရုတ်သီးအစိုဈေးနှုန်းများ ဈေးတက်ပြီး အရောင်းအဝယ်ဖြစ်လျက်ရှိပါသည်။ မေလတွင် ရောင်းချနေသော ငရုတ်သီးအစိုဈေးမှာ ငရုတ်သီးအမျိုးအစားကို လိုက်၍ တစ်ပိဿာလျှင် ကျပ်(၅၀၀၀-၆၀၀၀)ဖြစ်ပြီး ယခင်ဧပြီလ(စတုတ္ထပတ်)တွင် တစ်ပိဿာလျှင် ကျပ်(၇၀၀၀-၈၀၀၀)ဖြင့်ရောင်းချ၍ ဈေးနှုန်းနှိုင်းယှဉ်ပါက တစ်ပိဿာလျှင် ကျပ်(၂၀၀၀)ခန့် ကျဆင်းနေပြီး အရောင်းအဝယ်ဖြစ်လျက်ရှိပါသည်။ ငရုတ်သီးခြောက်ဈေးမှာ အမျိုးအစားကိုလိုက် ၍ ကျွန်းငရုတ်သီးခြောက် တစ်ပိဿာလျှင် ကျပ်(၉၅၀၀-၁၀၀၀၀)၊ ပန်းရဲငရုတ်သီးခြောက် တစ်ပိဿာလျှင် ကျပ်(၁၂၀၀၀-၁၃၀၀၀)၊ ကျောက်ပန်းတောင်းပုပ္ပါးမှ ထွက်ရှိသော ငရုတ်သီးခြောက် တစ်ပိဿာလျှင် ကျပ်(၁၃၀၀၀)၊ ငရုတ်သီးခွဲခြမ်း တစ်ပိဿာလျှင် ကျပ်(၁၅၀၀၀)၊ ငရုတ်သီး အရောင် တင်မှုန့် တစ်ပိဿာလျှင် ကျပ်(၁၂၀၀၀)ဖြင့်ရောင်းချနေပြီး တင်ပို့မှုအနေဖြင့် ရန်ကုန်၊ မန္တလေးမြို့၊ မိတ္ထီလာနယ်များသို့ တင်ပို့လျက်ရှိကြောင်း ကုန်သည်များထံမှ သိရှိရပါသည်။

DOCA(မကွေး)

    မကွေးတိုင်းဒေသကြီး၊ ပခုက္ကူမြို့ပေါ်ရှိ ခရမ်းချဉ်သီးဈေးကွက်သို့ ရှမ်းပြည်နယ်၊ အောင်ပန်းမြို့နှင့် ပုပ္ပါးဒေသထွက်ခရမ်းချဉ်သီးများအပြင် ဒေသထွက်ခရမ်းချဉ်သီးများလည်း ဝင်ရောက် အရောင်းအဝယ်ဖြစ်လျက်ရှိပြီး ထိုင်ဝမ်ခရမ်းချဉ်သီးမျိုးများ အများဆုံးဝင်ရောက်ကြောင်း သိရှိ ရသည်။ ဗမာခရမ်းချဉ်သီးမှာ အခွံပါးပြီး အနှစ်များသော်လည်း တာရှည်အထားခံမှုမရှိ၍ ဈေးကွက် အတွင်း၌ ဝယ်ယူစားသုံးမှုနည်းခြင်းကြောင့် တောင်သူစိုက်ပျိုးမှုနည်း၍ ဈေးကွက်သို့ ဝင်ရောက်မှုနည်းကြောင်း၊ ထိုင်ဝမ်ခရမ်းချဉ်သီးမျိုးမှာ အခွံထူပြီးအထားခံ၍ အလုံးလှသည့်အပြင် အချဉ်ဓါတ် ပါဝင်မှု နည်းခြင်းကြောင့် ဝယ်ယူစားသုံးမှုများကြောင်း သိရှိရသည်။

   ခရမ်းချဉ်သီးဈေးကွက်အနေဖြင့် ၂၀၂၅ ခုနှစ်၊ မေလ(ပထမပတ်)တွင် ခရမ်းချဉ်သီး ဈေး တက်ပြီး အရောင်းအဝယ်ဖြစ်လျက်ရှိသည်။ ထိုင်ဝမ်ခရမ်းချဉ်သီးတစ်ပိဿာလျှင် ကျပ်(၂၀၀၀-၁၈၀၀-၁၅၀၀)ဈေးဖြင့် အရောင်းအဝယ်ဖြစ်ပြီး ယခင်ဧပြီလ(ပထမပတ်)တွင် ခရမ်းချဉ်သီး တစ်ပိဿာလျှင်(၁၃၀၀-၁၂၀၀-၁၀၀၀)ဈေးဖြင့် အရောင်းအဝယ်ဖြစ်၍ တစ်လအတွင်း ခရမ်းချဉ်သီး တစ်ပိဿာလျှင် ကျပ်(၇၀၀)ခန့် ဈေးတက်ကြောင်း၊ ယခုရာသီတွင် ဒေသတွင်းစိုက်ခင်းများမှ ခရမ်း ချဉ်သီးထွက်ရှိမှုနည်းခြင်းကြောင့်  ဈေးတက်ခြင်းဖြစ်ကြောင်း ပခုက္ကူမြို့ ကုန်စိမ်းသီးနှံရောင်းဝယ်ရေး ဈေးကွက်မှ သိရှိရပါသည်။

DOCA(မကွေး)

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်တွင် မန်ကျည်းသီးမှည့်များ ဝင်ရောက် အရောင်းအဝယ်ဖြစ်လျက်ရှိပြီး အဓိကအားဖြင့် ယောနယ်ဒေသများနှင့် ကျောက်ပန်းတောင်းမြို့၊ ဆိပ်ဖြူမြို့၊ မြိုင်၊ ကမ္မနှင့် မြစ်ခြေမြို့များမှ ထွက်ရှိ၍ နေ့စဉ်ဝင်ရောက်အရောင်းအဝယ် ဖြစ်လျက် ရှိပါသည်။

    ၂၀၂၅ခုနှစ်၊ မေလ(ပထမပတ်)တွင် မန်ကျည်းသီးများ ဈေးတက်ပြီး အရောင်းအဝယ်ဖြစ် လျက်ရှိသည်။ မန်ကျည်းသီးမှည့် အစေ့ပါ လက်ကားတစ်ပိဿာလျှင် ကျပ်(၃၈၀၀-၃၇၀၀)၊ အစေ့ လွတ် တစ်ပိဿာလျှင် လက်ကားဈေး ကျပ်(၉၀၀၀-၉၅၀၀)၊ လက်လီဈေး ကျပ်(၁၂၀၀၀)ဖြင့် အရောင်းအဝယ်ဖြစ်ပြီး ယခင်ဧပြီလ(ပထမပတ်)နှင့်ဈေးနှုန်းနှိုင်းယှဉ်ပါက တစ်လအတွင်း မန်ကျည်း မှည့်တစ်ပိဿာလျှင် ကျပ်(၂၀၀၀)ခန့် ဈေးတက်ပြီး အရောင်းအဝယ်ဖြစ်ကြောင်း ဈေးကွက်မှ သိရှိရသည်။

   မန်ကျည်းသားများကို ပခုက္ကူမြို့ပေါ်ရှိ စားသောက်ကုန်လုပ်ငန်းရှင် လှောင်လက်သမားများမှ ကုန်ဝင်မှုရှိသော်လည်း ဝယ်ယူထားရှိပြီး ပြန်လည်ရောင်းချကြကြောင်း၊ အကြော်ဆိုင်၊ အကင်ဆိုင်များမှ မန်ကျည်းသီး အချဉ်ရည်များ ပြုလုပ်ရန်အတွက် ဝယ်ယူခြင်း၊ မန်ကျည်းဖျော်ရည် လုပ်ငန်းများနှင့် မန်ကျည်းတော်ဖီ လုပ်ငန်းရှင်များမှလည်း အများအပြား ဝယ်ယူသည့်အပြင် ရန်ကုန်မြို့နှင့်မန္တလေး မြို့များသို့လည်း တင်ပို့လျက်ရှိကြောင်း သိရှိရပါသည်။

DOCA(မကွေး)

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူဈေးကွက်သို့ ဆီထွက်သီးနှံ မြေပဲ၊ နှမ်းနှင့်ပဲမျိုးစုံ နေ့စဉ်ဝင်ရောက်အရောင်းအဝယ်ဖြစ်လျက်ရှိပြီး ပဲလွန်းပြာသီးနှံများလည်း ၂၀၂၅ ခုနှစ်၊ ဇန်နဝါရီလ (တတိယပတ်)မှစ၍ ဈေးကွက်သို့ ပဲလွန်း(ပြာ)သီးနှံများ ဝင်ရောက်အရောင်းအဝယ်ဖြစ်လျက် ရှိသည်။ ဧပြီလ(စတုတ္ထပတ်)တွင်  ပဲလွန်းသီးနှံကို အဓိကစိုက်ပျိုးသော ပခုက္ကူခရိုင်အတွင်းရှိ ပခုက္ကူကျွန်းဒေသများ ဖြစ်သည့် မြစ်ခြေ၊ ကမ္မ၊ ကျွန်းရွာများနှင့် နီးစပ်ရာကျေးရွာများအပြင် မြိုင်၊ ရေစကြို၊ ပေါက်၊ ဆိပ်ဖြူမြို့နယ်နှင့် ယောနယ်ဒေသများမှ ပခုက္ကူဈေးကွက်သို့ အများဆုံးဝင်ရောက် အရောင်းအဝယ်ဖြစ်ကြောင်း သိရှိရသည်။

      ဈေးနှုန်းအနေဖြင့် ၂၀၂၅ခုနှစ်၊ ဧပြီလ(စတုတ္ထပတ်)တွင် ပဲလွန်းပြာ တစ်တင်းလျှင် ကျပ် (၆၂၀၀၀)ဈေးဖြင့် အရောင်းအဝယ်ဖြစ်ကြောင်း၊ မေလ(ပထမပတ်)တွင် ပဲလွန်းပြာတစ်တင်းလျှင် ကျပ်(၇၂၀၀၀)ဈေးဖြင့်အရောင်းအဝယ်ဖြစ်ကြောင်း၊ တစ်ပတ်အတွင်းပဲလွန်းပြာ တစ်တင်းလျှင် ကျပ်(၁၀၀၀၀)ခန့် ဈေးတက်ပြီး အရောင်းအဝယ်ဖြစ်ကြောင်း၊ ဈေးကွက်သို့ တစ်ရက်လျှင် ပဲလွန်းပြာ ပိဿာ(၃၀) ဝင်အိတ် (၃၀၀ မှ ၅၀၀)ထိ ဝင်ရောက်ကြောင်း၊ ပဲလွန်းပြာသီးနှံသည် ကျန်းမာရေးနှင့် ညီညွတ်ပြီး စားသုံးမှုအနေဖြင့် မြန်မာ့ရိုးရာမုန့်မျိုးစုံတွင် ထည့်သွင်းအသုံးပြုမှုများ၍ ပြည်တွင်း စားသုံးမှုများသော သီးနှံတစ်မျိုး ဖြစ်၍ ဈေးကွက်သို့ ကုန်ဝင်သလောက် အရောင်း အဝယ်ဖြစ် ကြောင်း သိရှိရသည်။

     ဈေးကွက်အနေဖြင့် ပခုက္ကူဈေးကွက်သို့ ဝင်ရောက်လာသည့် ပဲလွန်းပြာသီးနှံများကို ပခုက္ကူပွဲရုံများမှတစ်ဆင့် ဒေသတွင်းဖြန့်ဖြူးမှုအပြင် ရန်ကုန်၊ မန္တလေးဈေးကွက်သို့ တင်ပို့လျက်ရှိကြောင်း သီးနှံဈေးကွက်မှ သိရှိရသည်။

DOCA(မကွေး)