သတင်းနှင့် လှုပ်ရှားမှုများ

     မွန်ပြည်နယ်၊ မုဒုံမြို့နယ်တွင် ၂၀၂၅-၂၀၂၆ ပညာသင်နှစ် ကျောင်းကျန်းမာရေး သီတင်းပတ် လှုပ်ရှားမှု အခမ်းအနားကို (၁၁.၈.၂၀၂၅) ရက်နေ့ နံနက်ပိုင်းက အ.လ.က (သင်္ဘောဦး) စာသင်ကျောင်း၌ ပြုလုပ်ခဲ့သည်။

    ရှေးဦးစွာ အခမ်းအနားကို ကျောင်းသား/သူများက တေးသီချင်းသီဆို၍ ဖွင့်လှစ်ခဲ့ပြီး မြို့နယ်ပြည်သူ့ကျန်းမာရေးဦးစီးဌာန၊ ကုသရေးဦးစီးဌာနမှသွားဆရာဝန် ဒေါက်တာလမင်းထက် က ကျောင်းအခြေပြု ကျန်းမာမှုအသိပညာမြှင့်တင်ရေးလုပ်ငန်းများ၊ ကျောင်းပတ်ဝန်းကျင် သန့်ရှင်းရေးလုပ်ငန်း (အမှိုက်ကင်းစင်ကျောင်း၊ သန့်ရှင်းသော ယင်လုံအိမ်သာသုံးစွဲရေး)၊ ကျောင်းအခြေပြု ရောဂါကာကွယ်ရေးလုပ်ငန်းများ၊ ကျောင်းတွင်းအာဟာရဖွံ့ဖြိုးရေး၊ အစားအစာများ အန္တရာယ်ကင်းဝေးရေးနှင့် ကျောင်းကျန်းမာရေးစောင့်ရှောက်မှု လုပ်ငန်းများကို နှစ်စဥ် ဆောင်ရွက်ပေးလျက်ရှိကြောင်းနှင့် သွားနှင့်ခံတွင်း ကျန်းမာရေးအကြောင်းအရာများကို ရှင်းလင်းပြောကြားခဲ့ကြောင်း သိရသည်။

    ထို့နောက် လက်ဆေးနည်းအဆင့်ဆင့်၊ နည်းစနစ်မှန် သွားတိုက်ခြင်း သရုပ်ပြခြင်း၊ အာဟာရအုပ်စု (၃) စုပါဝင်သော အစားအစာများအကြောင်းကို မေးခွန်းအမေး/ အဖြေများဖြင့် ကျန်းမာရေး ဝန်ထမ်းများက ပြုလုပ်ပေးခဲ့ပြီး ဆုရ ကျောင်းသား/သူ များအား တာဝန်ရှိသူများက ဆုချီးမြှင့်ပေးအပ်ခဲ့သည်။ ယင်းနောက် ကျောင်းသား/သူများကို ကျန်းမာရေးစစ်ဆေး၍ လိုအပ်သည့် ဆေးဝါးများ အခမဲ့ပေးအပ်ခဲ့ပြီး အာဟာရများကျွေးမွေးကြောင်း သိရသည်။

DOCA (မွန်)

     ၁၃.၈.၂၀၂၅ ရက်နေ့ မွန်ပြည်နယ်၊ စားသုံးသူရေးရာဦးစီးဌာန၊ မုဒုံမြို့နယ်တာဝန်ခံ ဦးညီလွင်အေးသည် မုဒုံမြို့နယ်၊ ကမာဝက်မြို့ အမှတ် (၆)၊ ဗိုလ်ချုပ်လမ်း၊ တရုတ်တန်းရပ်ရှိ ဟင်းမွှေးမဆလာ ထုတ်လုပ်သည့် လုပ်ငန်းရှင်နှင့် တွေ့ဆုံဆွေးနွေးခဲ့သည်။

     ထိုသို့ တွေ့ဆုံဆွေးနွေးရာတွင် မုဒုံမြို့နယ်တာဝန်ခံက လုပ်ငန်းရှင်အား စားသုံးသူကာကွယ်ရေးဥပဒေပါစီးပွားရေးလုပ်ငန်းရှင်၏ တာဝန်များကို လိုက်နာရန်၊ ထုတ်ကုန် ပစ္စည်းများပေါ်တွင် စားသုံးသူကာကွယ်ရေးဥပဒေ အခန်း(၁၈) တွင် ပြဌာန်းထားသည့် ကုန်အညွှန်းအမှတ်အသားဖော်ပြခြင်းဆိုင်ရာ အချက်များနှင့် ကိုက်ညီအောင်ဖော်ပြရန်၊ သက်ဆိုင်ရာဌာနများ၏ ထောက်ခံချက်များကိုဖော်ပြရန်ဆွေးနွေးခဲ့ကြောင်း သိရှိရပါသည်။

DOCA (မွန်)

          (၁၃.၈.၂၀၂၅)ရက်နေ့ နံနက်(၁၁:၀၀)နာရီအချိန်တွင် စားသုံးသူရေးရာဦးစီးဌာန၊ မှော်ဘီခရိုင်၊ မှော်ဘီမြို့နယ်ရုံးမှ ဒေါ်ဖြူဖြူမြင့်၊ ဒုကြီးကြပ်ရေးမှူးသည် မြို့မဈေးအတွင်းရှိ ကုန်မျိုးစုံဆိုင်များနှင့် ပြည်လမ်းမပေါ်ရှိ တပ်ကြီးကုန်းရပ်ကွက်အတွင်းရှိ ကုန်တိုက်သို့ ငရုတ်ဆီနှင့်အချဉ်ရည်အမျိုးမျိုးတို့အား ဈေးကွက်စောင့်ကြည့်စစ်ဆေးခဲ့ပါသည်။

          ထိုသို့ဈေးကွက်စောင့်ကြည့်စစ်ဆေးခဲ့ရာတွင် မြို့မဈေးတာဝန်ခံ ဦးဝေလင်းအောင် ပူးပေါင်းပါဝင်လျက် ဈေးအတွင်းရှိသော ကုန်မျိုးစုံဆိုင်များတွင် ရောင်းချနေသော ငရုပ်ဆီနှင့် အချဉ်ရည် အမျိုးမျိုးစုစုပေါင်း(၇)မျိုးတွင် ဥပဒေပါ၊ ကုန်အညွှန်းအမှတ်အသား ဖော်ပြခြင်းများဖြစ်သော ငရုပ်ဆီအချဉ်ရည်၊ ကြက်သွန်ဖြူအချဉ်ရည်၊ ငရုပ်ဆီအစပ်၊ ကြက်သွန်ဖြူအချဉ်ရည်အစပ်၊ အချဉ်ရည်၊ ခရမ်းချဉ်သီး ကချင်ချက်အချဉ်ရည်၊ ထူးကဲသော အချဉ်ရည်တို့ကို မြန်မာဘာသာဖြင့်ဖော်ပြထားပြီး ဂရမ်ကိုလည်း မြန်မာဘာသာဖြင့် ဖော်ပြထားကြောင်း စစ်ဆေးတွေ့ရှိရပြီး မိမိတို့ဌာနမှလည်း အာမခံချက်မရှိသော ထောက်ခံချက် မပြည့်စုံသော ကုန်ပစ္စည်းများကို ရောင်းချခြင်းမပြုရန်တို့ ပြောကြားခဲ့ကြောင်း သိရှိရပါသည်။

DOCA (ရန်ကုန်)

          စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်နီလာဝင်း၊ ဦးစီးမှူးပါ(၄)ဦးတို့ သည် (၁၃.၈.၂၀၂၅)ရက်နေ့ နံနက်(၁၀:၀၀)နာရီအချိန်တွင် အမှတ်(၁၃)၊ (၁-ခ)၊ ၃၉၉(က)၊ အောက် မင်္ဂလာဒုံလမ်း၊ အင်းစိန်မြို့နယ်ရှိ City Mart (ဖော့ကန်)၌ စားသုံးဆီများတွင် ကုန်အညွှန်းအမှတ်အသားပြည့်စုံစွာပါဝင်ခြင်းရှိ/ မရှိကို ကွင်းဆင်းစစ်ဆေးမှုများ ပြုလုပ်ခဲ့ပါသည်။

          ထိုသို့စစ်ဆေးရာတွင် စားသုံးဆီအမှတ်တံဆိပ်မျိုးစုံ၊ မြေပဲဆီအမျိုးမျိုးတို့တွင် ကုန်အညွှန်းအမှတ်အသားများ ဖော်ပြထားခြင်းရှိ/ မရှိတို့ကို စစ်ဆေးရာ ကုန်အညွှန်းအမှတ်အသားများ ပါရှိသည်ကို စစ်ဆေးတွေ့ရှိရပြီး သက်ဆိုင်ရာဌာနများက ညွှန်ကြားချက်များကိုလည်း လိုက်နာစေရန် အသိပညာပေးပြောကြားခဲ့ကြောင်း သိရှိရပါသည်။

DOCA (ရန်ကုန်)

       ၄.၈.၂၀၂၅ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၏ လပိတ်လုပ်ငန်း ညှိနှိုင်းအစည်းအဝေးနှင့် ဝန်ထမ်းထုဆန္ဒဖော်ထုတ်ပွဲကို မွန်ပြည်နယ်ဦးစီးမှူးရုံး အစည်းအဝေး ခန်းမ၌ ကျင်းပပြုလုပ်ခဲ့ရာ ပြည်နယ်ဦးစီးမှူးရုံး၊ မော်လမြိုင်ခရိုင်ရုံးမှ ဝန်ထမ်းများတက်ရောက် ခဲ့ပြီး သထုံခရိုင်ရုံးမှ ဝန်ထမ်းများမှ Zoom ဖြင့်တက်ရောက်ခဲ့ကြောင်း သိရှိရပါသည်။

     ပထမဦးစွာ ပြည်နယ်ဦးစီးမှူးမှ အဖွင့်အမှာစကားပြောကြားရာတွင် မြေကိစ္စများကို ဂရုစိုက်ဆောင်ရွက်ရန်၊ ပြည်ပပို့ကုန်ဆိုင်ရာအချက်အလက်များကို ပြုစုထားရှိရန်၊ ဒေသ ထွက်ကုန်ဆိုင်ရာ အချက်အလက်များကို ပြုစုထားရှိရန်၊ သီးနှံ (၁၀) မျိုးတို့၏ စိုက်အောင်ထွက်နှင့် ဝယ်ယူ၊ သိုလှောင်၊ ဖြန့်ဖြူးသည့်အချက်အလက်များ ပြုစုထားရှိရန်၊ ပြည်ထောင်စုဝန်ကြီး၏ လမ်းညွှန်မှာကြားချက်များနှင့်စပ်လျဉ်း၍  ပြောကြားခဲ့ကြောင်း သိရ သည်။

    ဆက်လက်၍ ဒုတိယပြည်နယ်ဦးစီးမှူးက ယခုဝန်ထမ်းထုဆန္ဒဖော်ထုတ်ပွဲတွင် ဝန်ထမ်းများအနေဖြင့် မိမိတို့၏ အခက်အခဲများကို ပွင့်ပွင့်လင်းလင်းတင်ပြကြရန် ပြောကြား ခဲ့ပြီး စီမံရေးရာဌာနခွဲတာဝန်ခံက (၇/၂၀၂၅) ဝန်ထမ်းထုဆန္ဒဖော်ထုတ်ပွဲ ဆုံးဖြတ်ချက်နှင့် ပတ်သက်၍ ဆောင်ရွက်ပြီးစီးမှုအခြေအနေများကို ဆွေးနွေးခြင်း၊ တက်ရောက်လာသော ဝန်ထမ်းတစ်ဦးချင်းမှ ဆန္ဒဖော်ထုတ်ခဲ့ကြပြီး ဝန်ထမ်းထုဆန္ဒဖော်ထုတ်ပွဲ(ဒါဘာ) (၈/၂၀၂၅) ကို နေ့လယ်(၁၆:၀၀) ချိန်တွင် ရုတ်သိမ်းခဲ့ကြောင်း သိရှိရပါသည်။

DOCA (မွန်)