သတင်းနှင့် လှုပ်ရှားမှုများ

  ၆.၆.၂၀၂၅ ရက်နေ့ နံနက် (၁၀:၃၀) နာရီအချိန်တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ မုဒုံမြို့နယ်တာဝန်ခံ ဦးညီလွင်အေးသည် မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေး အဖွဲ့တို့နှင့် ပူးပေါင်း၍ မုဒုံမြို့နယ်၊ ရွှေဟင်္သာဈေးနှင့်မြို့ပေါ်ရပ်ကွက်ရှိ ကုန်စုံဆိုင်များတွင် ရောင်းချနေသော ထိုင်းဘာသာဖြင့် ကုန်အညွှန်းအမှတ်အသား ဖော်ပြထားသည့် Sprite အမှတ်တံဆိပ် အချိုရည်များ ရောင်းချခြင်း ရှိ/မရှိ စျေးကွက်စောင့်ကြည့်စစ်ဆေးခဲ့ကြောင်း သိရသည်။

   အဆိုပါ စျေးကွက်စောင့်ကြည့်စစ်ဆေးရာတွင် စျေးကွက်အတွင်း ထိုင်းဘာသာဖြင့် ကုန်အညွှန်းအမှတ်အသား ဖော်ပြထားသည့် Sprite အမှတ်တံဆိပ် အချိုရည်များ ရောင်းချခြင်း ရှိ/မရှိ ကို ကွင်းဆင်းစစ်ဆေးကြရာ အဆိုပါ Sprite အချိုရည်များ ရောင်းချခြင်း မတွေ့ရှိရဘဲ ကုန်ညွှန်းအမှတ်အသား ပြည့်စုံစွာဖော်ပြထားပြီး သက်ဆိုင်ရာ ဌာနများ၏ ထောက်ခံချက်ပါရှိသော Sprite အချိုရည်များသာ ရောင်းချနေကြောင်း သိရှိရပါသည်။

DOCA (မွန်)

     စားသုံးသူရေးရာဦးစီးဌာန၊ မွန်ပြည်နယ်၊ ပြည်နယ်ဦးစီးမှူးရုံးမှ၊ ထုတ်ကုန်လုံခြုံ စိတ်ချရမှုဌာနခွဲတာဝန်ခံ ဦးစီးမှူး ဒေါ်စောကြည်သည် ၆.၆.၂၀၂၅ ရက်နေ့တွင် KS အမှတ်တံဆိပ်ဖြင့် Cake & Bakery ထုတ်လုပ်သည့် လုပ်ငန်းရှင်နှင့်တွေ့ဆုံ၍ ကုန်အညွှန်းအမှတ်အသားဆိုင်ရာများနှင့် ပတ်သက်၍ ဆွေးနွေးခဲ့ပါသည်။

    အဆိုပါ ကုန်အညွှန်းအမှတ်အသားပြုလုပ်ရာတွင် လိုအပ်သည်များကို ထုတ်ကုန်လုံခြုံ စိတ်ချရမှုဌာနခွဲတာဝန်ခံက လုပ်ငန်းရှင်အား ၎င်းတို့၏ ထုတ်ကုန်ပစ္စည်းများပေါ်တွင် စားသုံးသူကာကွယ်ရေးဥပဒေ ၂၀၁၉ အခန်း (၁၈)တွင် ဖော်ပြထားသောပြဌာန်းချက်အတိုင်း ကုန်အညွှန်းအမှတ်အသားကို ပြည့်စုံစွာဖော်ပြရန်၊ ကုန်စည်အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းတို့ကို မြန်မာဘာသာဖြင့် ဖြစ်စေ၊ မြန်မာဘာသာ (သို့မဟုတ်) အခြားဘာသာတစ်ခုဖြင့်ဖြစ်စေ ဖော်ပြရန် အသိပညာ ပေး ဆွေးနွေးခဲ့ပြီး ကုန်အညွှန်းအမှတ်အသား ဖော်ပြချက်၊ မူပိုင်ခွင့်လျှောက်ထားခြင်းနှင့် ပတ်သက်၍ အသိပညာပေး ဆွေးနွေးခဲ့ကြောင်း သိရှိရပါသည်။

DOCA (မွန်)

     စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင် ဦးစီးမှူးရုံးမှ ဒု-ခရိုင်ဦးစီးမှူး ဦးဆောင်၍ မိတ္ထီလာ ခရိုင်စိုက်ပျိုးရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေး ပူးပေါင်းအဖွဲ့တို့ဖြင့် (၃၀.၅.၂၀၂၅)ရက်နေ့တွင် မိတ္ထီလာမြို့၊ မြို့မဈေးအတွင်းရှိ စိုက်ပျိုးရေးလုပ်ငန်းသုံး ဓာတ်မြေဩဇာအရောင်းဆိုင်များသို့ သွားရောက်၍ ဒေသအလိုက်အရောင်းဈေးနှုန်းများဖြင့် ရောင်းချခြင်းရှိ/မရှိ၊ အရည်အသွေးမှန်ကန်မှု ရှိ/မရှိ၊ ကွင်းဆင်းဆောင်ရွက်ခဲ့ရာ ဓာတ်မြေဩဇာဆိုင်များ၌ တက်တိုး 15.7.8 တစ်အိတ်လျှင် (၉၈၀၀၀) ကျပ်၊ ဖြိုးမောက် G 46%လုံးကြီး တစ်အိတ်လျှင် ၁၀၀၀၀၀ကျပ်၊ အာမို 16.16.16 တစ်အိတ်လျှင် (၁၇၅၀၀၀) ကျပ်၊ ဇာမဏီ 13.5.7 တစ်အိတ်လျှင် (၈၈၀၀၀)ကျပ်၊ သားပိုက် 16.16.8 တစ်အိတ်လျှင်(၁၂၇၀၀၀)ကျပ်၊ ပုလဲ 46% တစ်အိတ်လျှင် (၁၀၆၀၀၀)ကျပ်၊ ရွှေခြင်္သေ့ 15.7.8 တစ်အိတ်လျှင် (၉၈၀၀၀)ကျပ်တို့ဖြင့် အရောင်းအဝယ် ဖြစ်လျက်ရှိကြောင်းသိရပြီး စိုက်ပျိုးရာသီချိန်ဖြစ်၍ ဈေးကွက်တွင် အရောင်းအဝယ်သွက်လျက်ရှိကြောင်း စိုက်ပျိုးရေးအရောင်းဆိုင်များမှ သိရှိရပါသည်။

DOCA(မန္တလေး)

      စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် ခရိုင်ဦးစီးမှူးနှင့် ဝန်ထမ်းများသည် (မိတ္ထီလာ/ရမည်းသင်း) ခရိုင်အတွင်းရှိ မြို့မစျေးများနှင့် ရပ်ကွက်များအတွင်းသို့ မြို့နယ်စည်ပင်သာယာရေးအဖွဲ့နှင့်ပူးပေါင်း၍ ၂၀၂၅ ခုနှစ်၊ ဇွန်လ (၄) ရက်နေ့တွင် Sprite အမှတ်တံဆိပ် အချိုရည်အား ကွင်းဆင်းစစ်ဆေးခဲ့ကြောင်း သိရသည်။

      အဆိုပါ Sprite အချိုရည်ကို Coca-Colar Pinya Beverages Myanmar (CCOBM) ကုမ္ပဏီမှ ၂၀၁၃ ခုနှစ်မှစတင်၍ အစားအသောက်နှင့်ဆေးဝါးကွပ်ကဲရေးဦးစီးဌာန၏ ခွင့်ပြုချက်နှင့်အညီ ကာဗွန်နိတ်အချိုရည်၊ နို့ထွက်ပစ္စည်းအချိုရည်များ၊ အားဖြည့်အချိုရည်များနှင့် သောက်ရေသန့်များကို အမှတ်တံဆိပ် (၈) မျိုးဖြင့် ထုတ်လုပ်ရောင်းချလျက်ရှိနေပြီး၊ Sprite PET ပလတ်စတစ်ဘူးများကို ၂၀၂၂ ခုနှစ်၊ ဩဂုတ်လတွင် အစိမ်းရောင်မှ အကြည်ရောင်ဘူးများသို့ ပြောင်းလဲခဲ့ခြင်းဖြစ်ရာ ယခုအခါ ရန်ကုန်ဈေးကွက်အတွင်း အစိမ်းရောင်ပလတ်စတစ်ဘူးများကို ထိုင်းဘာသာစကားဖြင့် ဖော်ပြထား၍ Sprite အချိုရည်အတုများ ထွက်ရှိနေသဖြင့် ကွင်းဆင်းစစ်ဆေးခဲ့ကြောင်း သိရှိရပါသည်။

      ကွင်းဆင်းစစ်ဆေးချက်အရ မြိတ်ခရိုင်အတွင်း အစိမ်းရောင်ပလတ်စတစ်ဘူးဖြင့် ထုတ်လုပ်ထားသော Sprite အချိုရည်အတုများမရှိကြောင်း သိရှိရသဖြင့် စားသုံးသူရေးရာဦးစီးဌာနအနေဖြင့် ကုန်အညွှန်းအမှတ်အသားဖော်ပြပါရှိသော ထုတ်ကုန်များ ရောင်းချရန်နှင့် ဘေးအန္တရာယ်ကင်းရှင်းရေးအတွက် ဆောင်ရွက်ရန် ပြောကြားခဲ့ကြောင်း သိရှိရသည်။

DOCA(မန္တလေး)

       စားသုံးသူရေးရာဦးစီးဌာန၊မန္တလေးတိုင်းဒေသကြီး၊မိတ္ထီလာခရိုင်ဦးစီးမှူးရုံး၊ခရိုင်ဦးစီးမှူးဦးစီးမှူး၏ လမ်းညွှန်မှုဖြင့်  မလှိုင်မြို့နယ်တာဝန်ခံနှင့် ဝန်ထမ်းများသည် ၂၀၂၅ ခုနှစ်၊ ဇွန်လ ၆  ရက်နေ့တွင်  ပြည်တွင်းဆန်ဈေးနှုန်းတည်ငြိမ်စေရေး၊ ဆန်ဈေးနှုန်းမြှင့်တက်စေမှုမရှိစေရေးအတွက် မလှိုင်မြို့ရှိ နီနီဆန်ဆိုင်၊ ဟန်ဆန်ဆိုင်နှင့် ပါရမီဆန်ဆိုင်များသို့ သက်ဆိုင်ရာမြို့နယ်ကုန်ဈေးနှုန်းတည်ငြိမ်ရေးအဖွဲ့ဖြင့် ကွင်းဆင်းစစ်ဆေးခဲ့ပါသည်။

    ထိုသို့ကွင်းဆင်းစစ်ဆေးရာတွင် ဆန်ဆိုင်များ၌ ဒေသတွင်းမှထွက်ရှိသော မနောသုခ၊ ဧရာပဒေသာဆန်များအပြင် ရွှေဘိုပေါ်ဆန်း၊ ဧရာဝတီပေါ်ဆန်း ဆန်များအား ရောင်းချလျက်ရှိကြောင်း ဆန်အမျိုးအစားအလိုက် သတ်မှတ်ရည်ညွှန်းဈေးဖြင့် ရောင်းချလျက်ရှိပြီး လုပ်ငန်းရှင်များအား ဈေးကွက်အတွင်း ဖြစ်သင့်ဖြစ်ထိုက်သည့်ဈေးနှုန်းထက် ဈေးနှုန်းမြှင့်တင်ရောင်းချခြင်းမပြုရန် အသိပေးဆောင်ရွက်ခဲ့ကြောင်း သိရှိရပါသည်။

DOCA(မန္တလေး)