သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ စစ်ဆေးရေးမှူး ဦးဘောမ်ဇုံး (ရုံးအုပ်) ဦးဆောင်သည့် ခရိုင်စားသုံးသူရေးရာဦးစီးဌာနမှဝန်ထမ်းတို့သည် ၉-၇-၂၀၂၆ ရက်နေ့တွင် မြစ်ကြီးနားမြို့၊ ကဝါးခရပ်ကွက်ရှိ လက်လီရောင်းချလျက်ရှိသော Sunn(ကုန်စုံဆိုင်)သို့သွားရောက်၍ စားသုံးသူများ ဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့်ပတ်သက်၍ ကိုက်ညီမှု ရှိ၊ မရှိ ဈေးကွက်စောင့်ကြည့်စစ်ဆေးခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးခဲ့ရာ “PREMIER” အမှတ်တံဆိပ်ပါ သဘာဝကော်ဖီမှုန့်စစ်စစ် (အသင့်ဖျော်ကော်ဖီနှင့်လက်ဖက်ရည်ထုပ်အမျိုးမျိုး) တွင် မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသော ညွှန်ကြားချက်အမှတ်(၂/၂၀၁၉)အရ ကုန်စည်အမျိုးအစားအလိုက် မြန်မာဘာသာဖြင့် ဖော်ပြရမည့်အချက်(၇)ချက်အနက် အစားအသောက်များ ကုန်စည်အုပ်စုရှိ အသင့်ဖျော်ကော်ဖီနှင့် လက်ဖက်ရည်ထုပ် အမျိုးမျိုးတွင် အမျိုးအမည်၊ အရွယ်အစား၊ အရေအတွက်၊ အသားတင် ပမာဏနှင့် သုံးစွဲပုံနည်းလမ်းတို့ကို မြန်မာဘာသာဖြင့် ကိုက်ညီပြည့်စုံစွာဖော်ပြပါရှိကြောင်း၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲတို့ ဖော်ပြထားကြောင်း၊ ပြည်တွင်း၌ထုတ်လုပ်သော ကုန်စည်ဖြစ်၍ ထုတ်လုပ်သည့်လုပ်ငန်းအမည်နှင့်လိပ်စာ ပြည်စုံစွာပါရှိကြောင်းနှင့် သက်ဆိုင်ရာအစိုးရဌာနများကဖော်ပြရန် သတ်မှတ်ထားသော အချက်အလက်များ ဖော်ပြထားကြောင်း စစ်ဆေးတွေ့ရှိရပြီး လုပ်ငန်းရှင်အား သက်တမ်းကုန်ဆုံးသည့်ကုန်စည်များ၊ ကုန်အညွှန်းအမှတ်အသား ပြည့်စုံမှုမရှိသည့် ကုန်စည်များ ဈေးကွက်အတွင်း ရောင်းချခြင်းမပြုလုပ်ရန်နှင့် ဆင်တူရိုးမှား အတုအပ အမှတ်တံဆိပ်များ ဝယ်ယူရောင်းချခြင်း မပြုကြရန် တို့ကို အသိပညာပေးဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(ကချင်)

               စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ဒေါ်သစ္စာဖူး( ဦးစီးအရာရှိ ) ဦးဆောင်၍ ၂၀၂၆ ခုနှစ်၊ ဇူလိုင်လ( ၉ ) ရက်နေ့၊ နေ့လယ် ( ၁၄:၀၀ ) နာရီအချိန်တွင် လွိုင်ကော်မြို့ ပေါ်ရှိ အရန်သင့်အစားအစာအမျိုးမျိုးရောင်းချနေသော လက်လီ/လက္ကားကုန်စုံဆိုင်များသို့ မြန်မာနိုင်ငံ စားသုံးသူကာကွယ်ရေးကော်မရှင်၏( ၂/၂၀၁၉ )ပါ ကုန်အညွှန်းအမှတ်အသားသတ်မှတ်ချက်များနှင့် ကိုက်ညီမှုရှိ/မရှိ သက်ဆိုင်ရာမိတ်ဖက်ဌာနများနှင့် ပူးပေါင်း၍ ဈေးကွက်စောင့်ကြည့်စစ်ဆေးဆောင် ရွက်ခဲ့ပြီး ထိုသို့ ဈေးကွက်စောင့်ကြည့်စစ်ဆေးရာတွင် လွိုင်ကော်မြို့ပေါ်ရှိ အရန်သင့်အစားအစာအမျိုး မျိုးရောင်းချနေသော လက်လီ/လက္ကားကုန်စုံဆိုင်များ၌ ရောင်းချနေသော အရန်သင့်အစားအစာ အများစုမှာ မြန်မာနိုင်ငံစားသုံးသူကာကွယ်ရေးကော်မရှင်၏( ၂/၂၀၁၉ )ပါ ကုန်အညွှန်းအမှတ် အသားသတ်မှတ်ချက်များနှင့် ကိုက်ညီမှုရှိကြောင်း စစ်ဆေးတွေ့ရှိရပြီး ကုန်စုံဆိုင်ပိုင်ရှင်များအနေ ဖြင့် ကုန်အညွှန်းအမှတ်အသားသတ်မှတ်ချက်များနှင့် ကိုက်ညီမှုရှိသည့်အရန်သင့်အစားအစာများကို သာ တင်သွင်းရောင်းချကြရန်၊ စီးပွားရေးလုပ်ကိုင်ရာတွင် စီးပွားရေးကျင့်ဝတ်၊ စည်းကမ်းများနှင့်အညီ ဖြောင့်မတ်မှန်ကန်စွာဆောင်ရွက်ကြရန်နှင့် တရားမဝင်ကုန်စည်များ ရောင်းချခြင်း၏ ဆိုးကျိုးများအား  အသိပညာပေး ဈေးကွက်စောင့်ကြည့်စစ်ဆေးဆောင်ရွက်ခဲ့ကြောင်း သတင်း ရရှိပါသည်။

DOCA(ကယား)

        ပြည်သူများ ဘေးကင်းလုံခြုံပြီး အရည်အသွေးပြည့်မီသော လူသုံးကုန်ပစ္စည်းများ ဝယ်ယူအသုံးပြုနိုင်စေရေးအတွက် တာဝန်ရှိသူများသည် ၂၀၂၆ ခုနှစ်၊ ဇူလိုင်လ (၁၀) ရက်နေ့တွင် ပန်းတနော်မြို့နယ် ဈေးကွက်အတွင်း ရောင်းချလျက်ရှိသော ဟင်းခတ်မှုန့်၊ အရသာမှုန့်နှင့် ဆပ်ပြာအမျိုးမျိုးအား ကုန်အညွှန်းအမှတ်အသားများ ပြည့်စုံမှုနှင့် အလေးချိန် မှန်ကန်ပြည့်မီမှု ရှိ/ မရှိတို့ကို ကွင်းဆင်းစစ်ဆေးခဲ့ကြောင်း သိရသည်။

     ကွင်းဆင်းစစ်ဆေးရာတွင် မြို့နယ်တာဝန်ခံ ဦးအောင်ကျော်သက်မှ ကုန်ပစ္စည်းများပေါ်တွင် ထုတ်လုပ်သူအမည်၊ ထုတ်လုပ်သည့်ရက်စွဲ၊ သက်တမ်းကုန်ဆုံးရက်၊ ပါဝင်ပစ္စည်းများနှင့် အသုံးပြုရန်အညွှန်းများကို မြန်မာဘာသာဖြင့် ပြည့်စုံစွာဖော်ပြထားမှုရှိ/ မရှိ စိစစ်ခဲ့သည်။ ထို့ပြင် ထုပ်ပိုးဖော်ပြထားသည့် အလေးချိန်နှင့် အမှန်တကယ်ပါရှိသော အလေးချိန်ကို တိုင်းတာစစ်ဆေးခဲ့ပြီး သတ်မှတ်အလေးချိန် ပြည့်မီစေရေး ဆောင်ရွက်ခဲ့ကြောင်း သိရသည်။

          စစ်ဆေးမှုအတွင်း ရောင်းချသူများအား စားသုံးသူကာကွယ်ရေးဥပဒေနှင့်အညီ အလေးချိန်မပြည့်မီသော ကုန်ပစ္စည်းများ မရောင်းချရန်၊ ကုန်အညွှန်းအမှတ်အသား ပြည့်စုံသော ကုန်ပစ္စည်းများကိုသာ ရောင်းချရန်နှင့် စားသုံးသူအခွင့်အရေးကို အလေးထားဆောင်ရွက်ကြရန် အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

        ဧရာဝတီတိုင်းဒေသကြီး၊ မအူပင်မြို့ပေါ်ရှိ ဆေးရောင်းချသောဆိုင်များကို စံမမှီဆေးဝါးများ မှတ်ပုံတင်မထားသောဆေးဝါးများ သက်တမ်းလွန်ဆေးဝါးများရောင်းချမှုရှိ/ မရှိကို ခရိုင်ပြည်သူ့ ကျန်းမာရေးဦးစီးဌာန၊ ခရိုင် စားသုံးသူရေးရာဦးစီးဌာန၊  FDA၊ ခရိုင်စည်ပင်သာယာရေးအဖွဲ့ တို့ပူးပေါင်း၍ ၂၀၂၆ခုနှစ် ဇူလိုင်လ ၉ရက်နေ့ နံနက် ၁၀နာရီအချိန်က ကွင်းဆင်းစစ်ဆေးမှု ကိုဆောင်ရွက်ခဲ့ကြောင်း သိရသည်။

         ကွင်းဆင်းစစ်ဆေးရာတွင် မအူပင်ခရိုင်စားသုံးသူရေးရာဦးစီးဌာနမှ စစ်ဆေးရေးအရာရှိ ဦးအောင်ဇော်ဦးက စစ်ဆေးဆောင်ရွက်ခဲ့ရာ ပြည်သူများ ဘေးကင်းလုံခြုံပြီး အရည်အသွေးပြည့်မီသော ဆေးဝါးများ ဝယ်ယူအသုံးပြုနိုင်ရေးအတွက် ဆေးဆိုင်လိုင်စင် ရှိ/ မရှိ၊ သက်တမ်းတိုးထားမှုအခြေအနေ၊ ဆေးဝါးများ၏ သက်တမ်းကုန်ဆုံးရက်၊ မှတ်ပုံတင်အမှတ်နှင့် ကုန်အညွှန်းအမှတ်အသားများ ပြည့်စုံစွာဖော်ပြထားမှု၊ သိုလှောင်သိမ်း ဆည်းမှုအခြေအနေနှင့် သက်တမ်းလွန်ဆေးဝါးများ ရောင်းချခြင်းမရှိစေရေးတို့ကို စစ်ဆေးခဲ့သည်။ ထို့အပြင် ဆေးဆိုင်ပိုင်ရှင်များအား သက်ဆိုင်ရာဥပဒေ၊ နည်းဥပဒေများကို လိုက်နာဆောင်ရွက်ရန်၊ အရည်အသွေးပြည့်မီသော ဆေးဝါးများကိုသာရောင်းချရန်နှင့် စားသုံးသူအခွင့်အရေးကို အလေးထားဆောင်ရွက်ကြရန် အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

     မြန်မာနိုင်ငံစားသုံးသူကာကွယ်ရေးကော်မရှင်၏ (၂/၂၀၂၆)လုပ်ငန်း ညှိနှိုင်းအစည်းအဝေးကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ရုံးအမှတ် (၅၂) တွင် (၃၀-၆-၂၀၂၆) ရက်နေ့ နံနက် (၉:၃၀) နာရီ၌ ကျင်းပပြုလုပ်ခဲ့ရာ ဥက္ကဋ္ဌ စီးပွားရေးနှင့်ကူးသန်းရောင်းဝယ်ရေး ပြည်ထောင် စုဝန်ကြီး ဦးထွန်းအုံ နှင့် အဖွဲ့ဝင် ဝန်ကြီးဌာနမှတာဝန်ရှိသူများ တက်ရောက်ခဲ့ကြပါသည်။ အခမ်းအနားသို့ တိုင်း ဒေသကြီး / ပြည်နယ် စားသုံးသူရေးရာကော်မတီ ဥက္ကဋ္ဌ နှင့် အဖွဲ့ဝင်များ ခရိုင်စားသုံးသူရေးရာ ကော်မတီ ဥက္ကဋ္ဌနှင့် အဖွဲ့ဝင်များ Online ဖြင့် တက်ရောက်ခဲ့ကြပါသည်။

          အခမ်းအနားတွင် မန္တလေးတိုင်းဒေသကြီး စားသုံးသူရေးရာကော်မတီ ဥက္ကဋ္ဌ၊ စီမံကိန်း၊ စီးပွားရေးနှင့် ဘဏ္ဍာရေးဝန်ကြီး ဦးသိန်းဌေးက မန္တလေးတိုင်းဒေသကြီးအတွင်း စားသုံးသူ ကာကွယ်ရေး အသိပညာပေး ဟောပြောပွဲဆောင်ရွက်ခဲ့သည့် အခြေအနေများ၊ လုပ်ငန်းရှင်များနှင့် တွေ့ဆုံဆွေးနွေးခဲ့သည့် အခြေအနေများ၊ ပြခန်းခင်းကျင်းပြသသည့် အခြေအနေများ၊ သင်တန်း ဖွင့်လှစ်ပို့ချသည့် အခြေအနေများ၊ တိုင်း/ခရိုင် စားသုံးသူရေးရာ ကော်မတီကျင်းပဆောင်ရွက်နိုင်မှု အခြေအနေများ၊ ဝန်ထမ်းစွမ်းဆောင်ရည် မြှင့်တင်ရေးသင်တန်း ဖွင့်လှစ်ပို့ချခဲ့မှု အခြေအနေများနှင့် စားသုံးသူကာကွယ်ရေး ဥပဒေအပြင် ဌာနမှ လုပ်ငန်းဆောင်ရွက်ချက်များကို အများပြည်သူ သိရှိနိုင်စေရေး Talk Show ကျင်းပဆောင်ရွက်ခဲ့မှု အခြေအနေများကို တင်ပြဆွေးနွေးခဲ့ပါသည်။

          ဆက်လက်၍ ၂၀၂၆-၂၀၂၇ ဘဏ္ဍာနှစ် အတွင်း ဦးစားပေးဈေးကွက် စောင့်ကြည့် စစ်ဆေး မည့် ကုန်စည်(၁၀)မျိုး၏အခြေအနေများ၊ ပို့ဆောင်ရေး ဝန်ဆောင်မှုကဏ္ဍအပေါ်ဈေးကွက်စောင့် ကြည့်စစ်ဆေးခဲ့သည့် အခြေအနေများ၊ စားသောက်ဆိုင် ဝန်ဆောင်မှုအပေါ် ဈေးကွက်စောင့်ကြည့် စစ်ဆေးခဲ့သည့် အခြေအနေများ၊ ကုန်အညွှန်းအမှတ်အသား စိစစ်ခွင့်ပြုပေးမှု အခြေအနေများ၊ Online မှတ်ပုံတင် ကွင်းဆင်းစစ်ဆေးခြင်း အခြေအနေများနှင့် စားသုံးသူနစ်နာဆုံးရှုံးမှု အပေါ်ဖြေရှင်းဆောင်ရွက်ပြီးစီးမှု၊ ဖြေရှင်းရန်ကျန်အခြေအနေများအား တင်ပြဆွေးနွေးခဲ့ကြောင်း သတင်းရရှိပါသည်။

DOCA(မန္တလေး)