သတင်းနှင့် လှုပ်ရှားမှုများ

     ဒေသတွင်းထုတ်လုပ်သော စားသောက်ကုန်များအား ကုန်အညွှန်းအမှတ်အသား ပြည့်စုံမှုရှိ/မရှိ စစ်ဆေးခြင်းကို စားသုံးသူရေးရာဦးစီးဌာန မှ မြို့နယ်ဦးစီးမှူးရုံးမှ တာဝန်ရှိသူများ၊ မြို့နယ်အထွေထွေ အုပ်ချုပ်ရေး ဦးစီးဌာန၊ ကျန်းမာရေးဌာနတို့ ပူးပေါင်း၍ ဈေးကွက်အတွင်းရှိ စားသောက်ကုန်များနှင့် ဒေသထွက် MSME ထုတ်ကုန်များကို ကွင်းဆင်းစစ်ဆေးလျက်ရှိပါသည်။

      ကွင်းဆင်းစစ်ဆေးဆောင်ရွက်ရာတွင် ဓနုဖြူမြို့နယ်မှ ပြည်စုံအောင်ပဲမုန့်လုပ်ငန်းနှင့် ဆန်းမင်းသစ် ပဲကြက်ခေါက်လုပ်ငန်း ၂ခုတွင် ထုတ်လုပ်သောမုန့်များကို ဈေးကွက်ဖြန့်ဖြူး ရောင်းချရတွင် စားသုံးသူဘေးအန္တရာယ် ကင်းရှင်းစွားအသုံးနိုင်စေရန်  ကုန်အညွှန်းအမှတ် အသားပြည့်စုံမှု ရှိ/မရှိ၊ ကုန်စည်တွင် ထုတ်လုပ်သည့်ရက်စွဲနှင့် သက်တမ်းကုန်ဆုံးရက်စွဲ ဖော်ပြထားခြင်း ရှိ/မရှိ၊ ပါဝင်ပစ္စည်းများနှင့် အသားတင်ပမာဏ ဖော်ပြထားမှုအခြေအနေ၊ မြန်မာဘာသာဖြင့်ဖော်ပြရမည့်ညွှန်ကြားချက်များ ကိုလည်းကောင်း၊ စားသုံးသူ ဘေးကင်းလုံခြုံရေးအတွက် လိုအပ်သောပြုပြင်မှုများ လုပ်ဆောင်ရန် ညွှန်ကြားခြင်းများကို ရှင်းလင်းအသိပညာပေးခဲ့ပြီး ကုန်ထုတ်လုပ်ငန်း၏ ထုတ်လုပ်မှုအဆင့်ဆင့်ကို လေ့လာကြည်စစ်ဆေးခဲ့ပြီး စီးပွားရေးလုပ်ငန်းရှင် လိုက်နာရမည့်တာဝန်များအကြောင်းကို ပြောကြားခဲ့ကြောင်း သိရှိရပါသည်။

DOCA(ဧရာဝတီ)

     စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ မွေးမြူရေးနှင့်ကုသရေးဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ပျားမွေးမြူရေးဌာနခွဲ၊ ခရိုင်တာဝန်ခံရုံးမှ ဦးစီး၍ အစိုးရသစ် ရက်(၁၀၀)အတွင်း ဆောင်ရွက်မှုအဖြစ် ပျားမွေးမြူရေး ပြည်သူအသိပညာပေးသင်တန်းနှင့် ပျားအိမ် အမျိုးအစားအလိုက် ကုန်ကျစရိတ်နှင့် အားနည်းချက်/အားသာချက်များ ချပြရှင်းလင်းခြင်းကို၊ ဇွန်လ ၂၀ ရက်နေ့ နံနက် ၁၀ နာရီခွဲက ခရိုင်မွေးမြူရေးနှင့်ကုသရေးဦးစီးဌာနတွင် ကျင်ပပြုလုပ်ခဲ့ကြောင်း သိရသည်။

         အခမ်းအနားတွင် မွေးမြူရေးနှင့်ကုသုရေးဦးစီးဌာန မအူပင်မြို့နယ်တာဝန်ခံ (လက်ထောက်ညွှန်ကြားရေးမှူး) က အဖွင့်အမှာစကားပြောကြားပြီး၊ စိုက်ပျိုးရေးဦးစီးဌာန မြို့နယ်ဦးစီးမှူးက စိုက်ပျိုးရေးနှင့် ပျားမွေးမြူရေးလုပ်ငန်း ဆက်စပ်ဆောင်ရွက်မှု အခြေအနေများကို ရှင်းလင်းပြောကြားသည်။ ဆက်လက်၍ ပျားမွေးမြူမှုဖွံ့ဖြိုးရေးဌာနခွဲ မအူပင်မြို့နယ်တာဝန်ခံက သင်တန်းဖွင့်လှစ်ရခြင်း ရည်ရွယ်ချက်များကို ရှင်းလင်းပြောကြားပြီး၊ မအူပင်ခရိုင်တာဝန်ခံက ပျားရည်ထုတ်လုပ်ရေး၊ ပျားဖယောင်းထုတ်လုပ်ရေး၊ ပျားဝတ်မှုံထုတ်လုပ်ရေး၊ ပျားအုံတိုးပွားရေးနှင့် ပျားဘုရင်မမွေးမြူရေး ပျားရောဂါ ကာကွယ်/ကုသရေး လုပ်ငန်းဆိုင်ရာများကို ရှင်းလင်းဟောပြောပြီး၊ ဖော့ပျားအိမ်၊ ကျွန်းပျားအိမ်၊ အထပ်သားပျားအိမ် အမျိုးအစားအလိုက် ကုန်ကျစရိတ်နှင့် အားသာချက်/ အားနည်းချက်များကို ချပြရှင်းလင်း၍ တက်ရောက်လာသည့် လုပ်ငန်းရှင်များ၏ မေးမြန်းမှုများကို ပြန်လည်ရှင်းလင်း ဖြေကြားသည်။ ယင်းနောက် ခင်းကျင်းပြသထားသည့် ပျားရည်အမျိုးမျိုးနှင့် ပျားမွေးမြူရေးလုပ်ငန်း သုံးပစ္စည်းများကို တိုင်းတာဝန်ခံက လိုက်လံရှင်းလင်းပြသပြီး ဖွင့်ပွဲအခမ်းအနားကို ရုပ်သိမ်းကြောင်း သိရသည်။

      အဆိုပါ သင်တန်းကို သင်တန်းနည်းပြအဖြစ် မြို့နယ်တာဝန်ခံ (ဦးစီးအရာရှိ)နှင့် (ဒုတိယဦးစီးမှူး) တို့က ဆောင်ရွက်ကြမည်ဖြစ်ပြီး၊ သင်တန်းကာလမှာ ၃ ရက်ဖြစ်ကြောင်းနှင့် သင်တန်းသို့ စီးပွာဖြစ် ပျားမွေးမြူရေးလုပ်ငန်း ဆောင်ရွက်နေသူများနှင့် စီးပွားဖြစ် ပျားရည်ထုတ်လုပ်သူ  ၁၀ ဦး၊ နေကြာစိုက်တောင်သူ ၁၅ ဦး စုစုပေါင်း ၂၅ ဦးတို့အား ချပြရှင်းလင်းသွားမည်ဖြစ်ကြောင်း သိရပြီး၊ သင်တန်းဖွင့်ပွဲသို့ ပျားလုပ်ငန်းဦးစီးဌာန ခရိုင်ဒေသကြီးတာဝန်ခံ၊ မွေးမြူရေးနှင့်ကုသရေးဦးစီးဌာန မြို့နယ်ဦးစီးမှူးစိုက်ပျိုးရေးဦးစီးဌာန မြို့နယ်ဦးစီးမှူးနှင့် ဝန်ထမ်းများ၊  ပျားမွေးမြူမှု ဖွံ့ဖြိုးရေးဌာနခွဲ မြို့နယ်တာဝန်ခံ နှင့်ဝန်ထမ်းများ၊ စီးပွားဖြစ် ပျားမွေးမြူ/ ထုတ်လုပ်သူများ၊ နေကြာစိုက်တောင်သူများ၊ မအူပင်ခရိုင် စားသုံးသူရေးရာဦးစီးဌာနမှ ခရိုင်ဦးစီးမှူးမှ ပျားမွေးမြူရေးလုပ်ငန်းအား သိရှိနိုင်ရန် ဖိတ်ကြားချက်အရ တက်ရောက်ခဲ့ကြကြောင်း သိရှိရပါသည်။

DOCA(ဧရာဝတီ)

         ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်တွင် စားသောက်ဆိုင်များ၊ အစားအသောက် ဝန်ဆောင်မှုပေးသည့် လုပ်ငန်းများအား ၂၀၂၆ခုနှစ် ဇွန်လ ၂၂ရက်နေ့ နံနက်ပိုင်းက တာဝန်ရှိသူများ ကွင်းဆင်းစစ်ဆေးခဲ့ကြကြောင်း သိရသည်။

       ထိုသို့ ကွင်းဆင်းစစ်ဆေးရာတွင် စားသုံးသူရေးရာဦးစီးဌာန၊ မြို့နယ်ဦးစီးမှူး ဦးဝင်းမင်းစိုး၊ မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ်မီးသတ် ဦးစီးဌာနတို့​ပူးပေါင်း၍ ဓနုဖြူမြို့နယ်အတွင်းရှိ စားသောက်ဆိုင်များ၊ အစားသောက်ဝန်ဆောင်မှု ပေးသည့်လုပ်ငန်းများသို့ ကွင်းဆင်း၍ စားသုံးသူပြည်သူများ သန့်ရှင်းလက်ဆက်သော အစားအသောက်များဖြစ်စေရေး၊ စားသောက်ဆိုင်သုံးပစ္စည်းများ သန့်ရှင်းမှုရှိစေရေးနှင့် သက်တမ်းလွန်ပစ္စည်းများ အသုံးမပြုစေရေး၊ ဝန်ဆောင်မှုကဏ္ဍကောင်းမွန်စွာ ပေးဆောင်နိုင်ရေး၊ အခွန်တံဆိပ်ခေါင်းပါဝင်မှုနှင့် စားသောက်ကုန်စည်ဈေးနှုန်းများ ကြိုတင်အသိပေး ကြော်ငြာထားခြင်းရှိ/ မရှိကို စစ်ဆေးခဲ့ပြီး ဝန်ဆောင်မှုနှင့် စပ်လျဉ်း၍ အသိပညာပေးပြောကြားကာ စစ်ဆေးကြည့်ရှုခဲ့ကြကြောင်း သိရှိရပါသည်။

DOCA(ဧရာဝတီ)

          ၂.၇.၂၀၂၆ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ မုဒုံမြို့နယ်တာဝန်ခံသည် မုဒုံမြို့၊ ရက်ကန်းနှင့်အသက်မွေးပညာသင်တန်းကျောင်း၌ သင်တန်းသား/သင်တန်းသူ (၁၂) ဦးအား စားသုံးသူကာကွယ်ရေးဆိုင်ရာ အသိပညာပေး ဟောပြောပွဲကျင်းပပြုလုပ်ခဲ့ကြောင်း သိရသည်။

          ဟောပြောပွဲတွင် စားသုံးသူရေးရာဦးစီးဌာနမှ မြို့နယ်တာဝန်ခံ ဦးညီလွင်အေးက ဌာန၏ မျှော်မှန်းချက်၊ ရည်မှန်းချက်၊ လုပ်ငန်းတာဝန်များ၊ စားသုံးသူအခွင့်အရေးနှင့် တာဝန်များ၊ ကုန်ပစ္စည်းများ ဝယ်ယူသုံးစွဲရာတွင် မဝယ်မီ ကုန်အညွှန်းအမှတ်အသားများကို ဖတ်ရှုစစ်ဆေး၍ ဝယ်ယူသုံးစွဲရန် အရေးကြီးကြောင်း၊ သက်တမ်းကုန်ဆုံးရက်၊ ထုတ်လုပ်သည့်ရက်နှင့် ကုန်ပစ္စည်းတွင် ပါဝင်သည့် အချက်အလက်များကို စစ်ဆေး၍ ဝယ်ယူရန် လိုအပ်ကြောင်း၊ ကုန်စည်/ဝန်ဆောင်မှုနှင့်စပ်လျဉ်း၍ စားသုံးသူထိခိုက်နစ်နာမှု ရှိပါက တိုင်ကြားနိုင်သည့်အကြောင်းအရာများ စသည်တို့ကို ရှင်းလင်းဟောပြော ဆွေးနွေး ခဲ့ကြောင်း သိရှိရပါသည်။

DOCA (မွန်)

          ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ်စားသုံးသူ‌ရေးရာဦးစီးဌာနမှ မြို့နယ်တာ၀န်ခံနှင့် ၀န်ထမ်းတို့သည် အထွေ‌‌‌ထွေအုပ်ချုပ်‌ရေးဦးစီးဌာနနှင့် ပူးပေါင်း၍ ဆန်စက်များ သတ်မှတ် ချက်များနှင့်အညီ ဆန်စပါးထုတ်လုပ်ဖြန့်ဖြူးနိုင်ရေး ထုတ်ကုန်လုံခြုံစိတ်ချရမှုရှိစေရေး MSME လုပ်ငန်းဖွံ့ဖြိုး‌ေရးအတွက် (၃၀-၆-၂၀၂၆) ရက်နေ့၊ နေ့လယ် (၁၂:၀၀) နာရီအချိန်တွင်‌ အောင်ချမ်းသာ ဆန်စက်သို့ကွင်းဆင်းကြည့်ရှုစိစစ်ခြင်းကို‌ ဆောင်ရွက်ခဲ့ကြောင်း သိရသည်။    
       အဆိုပါကွင်းဆင်းစိစစ်ရာတွင် စားသုံးသူရေးရာဦးစီးဌာနမှ မြို့နယ်တာ၀န်က ‌အောင်ချမ်းသာ ဆန်စက်ပိုင်ရှင်နှင့်‌ တွေ့ဆုံ၍ ဆန်စပါးများသတ်မှတ်ချက်များနှင့်အညီ ကြိတ်ခွဲထုတ်လုပ်ရောင်းချနိုင်ရေး၊ စွန့်ပစ်ပစ္စည်းများအား သဘာဝပတ်ဝန်းကျင် ထိခိုက်ပျက်စီးမှုမရှိစေရေး စနစ်တကျ စွန့်ပစ်နိုင်ရန်၊ ဆန်စက်မှကြိတ်ခွဲထွက်ရှိသော ဆန်များအလေးချိန်ပြည့်ဝစေရေး၊ စပါး/ဆန် သိုလှောင်ရုံမှတ်ပုံတင်ထားရှိမှုကိုစစ်ဆေးခြင်း၊ သက်တမ်းတိုးရန်ရှိပါက သက်တမ်းတိုးဆောင်ရွက်ရန်ကိုလည်းကောင်း၊ ဆန်စက်တွင် ဆန်လက်ကျန်၊ ဆန်သိုလှောင်ထားရှိမှုအခြေအနေ၊ ဆန်တင်ပိုမှုအခြေအနေများ၊ ရန်ကုန်ဆန်တင်ပို့မှုအခြေအ‌နေများ၊ Gasifier အသုံးပြု၍လည်ပတ်နေသည့် ဆန်စက်များအနေဖြင့် သဘာဝပတ်ဝန်းကျင် ထိခိုက်မှုမရှိစေရေး အထူးအလေးထားဆောင်ရွက်ရန်၊ သတ်မှတ်ထားသည့် စည်းမျဉ်းစည်းကမ်းများနှင့်အညီ လည်ပတ်မောင်းနှင်ရန်၊ Gasifier စနစ်မှ ထွက်ရှိသည့် ရေဆိုးများကို ရေစစ်ကန်စနစ်ဖြင့် ဆောင်ရွက်ထားရှိမှုအခြေအနေများ၊ ပိုမိုကောင်းမွန်သည့် ရေသန့်စင်စနစ်များ အသုံးပြုစေရေးစိစစ်၍ လိုအပ်သည်များမှာကြားခဲ့ကြောင်း သိရှိရပါသည်။

DOCA(ဧရာဝတီ)