သတင်းနှင့် လှုပ်ရှားမှုများ

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးခင်မောင်လှိုင် သည် ၈-၄-၂၀၂၅ ရက်နေ့ နံနက်(၁၀:၀၀)နာရီအချိန်တွင် မန္တလေးတိုင်းဒေသကြီး၊ စားသုံးသူရေးရာဦးစီးဌာန၊အစည်းအဝေးခန်းမ၌ အရာထမ်း၊အမှုထမ်းများနှင့်တွေ့ဆုံ၍(၂၈-၃-၂၀၂၅) ရက်နေ့တွင်ဖြစ်ပွားခဲ့သည့် အင်အားပြင်း ငလျင်လှုပ်ခတ်မှုကြောင့် ပျက်စီးဆုံးရှုံးမှုအခြေအနေများနှင့် ပတ်သက်၍ ဝန်ထမ်းများအား ရင်းရင်းနှီးနှီး နွေးထွေးစွာနှုတ်ဆက် အားပေးစကား ပြောကြားခဲ့ပြီး ထောက်ပံ့မှုများ ပေးအပ်ခဲ့ကြောင်း သတင်းရရှိပါသည်။

DOCA(မန္တလေး)

    ၂၀၂၅ ခုနှစ် ဧပြီလ (၃) ရက်နေ့၊ နံနက် (၁၁:၃၀)နာရီအချိန်တွင် ကျောက်ပန်းတောင်းမြို့နယ် စားသုံးသူရေးရာဦးစီးဌာန မြို့နယ်တာဝန်ခံရုံး၌ မြို့နယ်အတွင်းရှိ MSME လုပ်ငန်းရှင်များကို မိမိတို့၏ ကုန်စည်များတွင် ကုန်အညွှန်းအမှတ်အသားပြည့်စုံစွာပါရှိစေရေးနှင့် စက်မှုလုပ်ငန်းသုံး စားသုံးဆီများ    အမှန်တကယ်အသုံးပြုစေရေးအတွက် စားသုံးသူရေးရာဦးစီးဌာန၊ မြင်းခြံခရိုင် ဦးစီးမှူး ဦးသန်းစိုး (လက်ထောက်ညွှန်ကြားရေးမှူး)နှင့် ကျောက်ပန်းတောင်းမြို့နယ် အတွင်းရှိ MSME လုပ်ငန်းရှင်များ တွေ့ဆုံဆွေးနွေးပွဲ အခမ်း အနား ကျင်းပခဲ့သည်။

      အဆိုပါ  တွေ့ဆုံဆွေးနွေးမှုတွင်  စားသုံးသူရေးရာဦးစီးဌာန ၊  မြင်းခြံခရိုင်ဦးစီးမှူး ဦးသန်းစိုး  ( လက်ထောက်ညွှန်ကြားရေးမှူး) က MSME လုပ်ငန်းများတွင် အသုံးပြုရန်အတွက် စက်မှုလုပ်ငန်းသုံးစားအုန်းဆီများကို နိုင်ငံတော်မှ ရောင်းချထုတ်ပေးခဲ့ပါကြောင်း၊ ယခုလည်း ဆက်လက်ထုတ်ပေးသွားမည်ဖြစ်ပြီး MSME လုပ်ငန်းများတွင် အသုံးပြုရမည့်စားအုန်းဆီများအား လုပ်ငန်းရှင်များ လျှောက်ထားခဲ့သည့် စက်မှုလုပ်ငန်များတွင် အမှန်တကယ်အသုံးပြုရမည်ဖြစ်ပါကြောင်း၊ စားအုန်း ဆီသည် အရေးကြီးကုန်စည်အမျိုးအစားတွင် ပါဝင်သဖြင့်သတ်မှတ်လုပ်ငန်းများမှလွှဲ၍ အခြား နည်းဖြင့် ပြန်လည်သယ်ယူရောင်းချခွင့်မရှိပါကြောင်း လုပ်ငန်းရှင်များ၏လစဉ်စားအုန်းဆီ လိုအပ် ချက်များကို ကွင်းဆင်းစိစစ်၍ လုပ်ငန်းပမာဏအလိုက် ခွင့်ပြုပေးလျှက်ရှိပါကြောင်း၊ စားသုံးသူ ရေးရာဦးစီးဌာနအနေဖြင့် MSME လုပ်ငန်းများ ဖွံဖြိုးတိုးတက်စေရေး ကုန်စည်နှင့် ဝန်ဆောင်မှုများ နှင့်ပတ်သက်၍စားသုံးသူများ ထိခိုက်နစ်နာမှုမဖြစ်ပေါ်စေရေး ကာကွယ်ပေးခြင်း၊ စီးပွားရေးလုပ်ငန်း ရှင်များအား ဥပဒေနှင့်အညီ ဆောင်ရွက်နိုင်ရေးနှင့် ဖွံဖြိုးတိုးတက်စေရေး ကူညီပေးခြင်း၊ MSME လုပ်ငန်းများမှထွက်ရှိလာသည့် ကုန်စည်များတွင် စားသုံးသူကာကွယ်ရေးဥပဒေပါ ကုန်အညွှန်း အမှတ်အသားများ ပြည့်စုံမှန်ကန်စွာ ဖော်ပြနိုင်စေရေးတို့ကို ဆောင်ရွက်လျှက်ရှိပါကြောင်း ဆွေးနွေး ပြောကြားခဲ့သည်။

          ဆွေးနွေးပွဲသို့ တက်ရောက်လာသည့် MSME လုပ်ငန်းရှင်များမှ သိရှိလိုသည်များ ဆွေးနွေး မေးမြန်းရာ ခရိုင်ဦးစီးမှူးမှ ပြန်လည်ပြောကြားဆွေးနွေးခဲ့ပြီး လုပ်ငန်းရှင် ( ၆၆ ) ဦး တက်ရောက်ခဲ့ပြီး စားသုံးသူရေးရာဦးစီးဌာန ခရိုင်ဦးစီးမှူးနှင့် MSME လုပ်ငန်းရှင်များ တွေ့ဆုံဆွေးနွေးပွဲ အခမ်းအနားကို နေ့လယ်(၁၂:၃၀) နာရီတွင် အောင်မြင်စွာ ရုပ်သိမ်းခဲ့ကြောင်းသိရသည်။

DOCA(မန္တလေး)

     စားသုံးသူကာကွယ်ရေး ဥပဒေနှင့်အညီ ထုတ်ကုန်ပစ္စည်းများတွင် ကုန်အညွှန်းအမှတ်အသားများ ပြည့်စုံစွာဖော်ပြပါရှိစေရေးအတွက် စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးနှင့် မြင်းခြံ မြို့နယ်ရှိ MSME လုပ်ငန်းရှင်များ တွေ့ဆုံဆွေးနွေးမှုကို မြင်းခြံခရိုင်ဦးစီးမှူးရုံး အစည်းအဝေးခန်းမ ၌ (၂.၄.၂၀၂၅) ရက်နေ့၊ နံနက် ၁၀:၀၀ နာရီအချိန်တွင် ကျင်းပပြုလုပ်ခဲ့ပါသည်။

          အဆိုပါတွေ့ဆုံဆွေးနွေးမှုတွင် စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူး ဦးသန်းစိုး (လက်ထောက်ညွှန်ကြားရေးမှူး)က MSME လုပ်ငန်းများတွင် အသုံးပြုရန်အတွက် စက်မှုလုပ်ငန်း သုံးစားအုန်းဆီများကို နိုင်ငံတော်မှ ရောင်းချထုတ်ပေးခဲ့ပါကြောင်း ၊ ယခုလည်း ဆက်လက်ထုတ်ပေးသွားမည်ဖြစ်ပြီး၊ MSME လုပ်ငန်းများတွင် အသုံးပြုရမည့် စားအုန်းဆီများအား လုပ်ငန်းရှင်များလျှောက်ထားခဲ့သည့် စက်မှုလုပ်ငန်းများတွင် အမှန်တကယ်အသုံးပြုရမည်ဖြစ်ပါကြောင်း၊ လုပ်ငန်းရှင်များ၏ လစဉ် စားအုန်းဆီလိုအပ်ချက်များကို ကွင်းဆင်းစိစစ်၍ လုပ်ငန်းပမာဏအလိုက် ခွင့်ပြုပေးလျက်ရှိပါကြောင်း၊ စားသုံးသူရေးရာဦးစီးဌာနအနေဖြင့် MSME လုပ်ငန်းများဖွံ့ဖြိုး တိုးတက်ရေး၊ ကုန်စည်နှင့်ဝန်ဆောင်မှုများနှင့်ပတ်သက်၍ စားသုံးသူများထိခိုက်နစ်နာမှု မဖြစ်ပေါ် စေရေး ဈေးကွက်မရောက်မီ ဈေးကွက်စောင့်ကြည့်စစ်ဆေးခြင်းများ ဆောင်ရွက်နေပါကြောင်း၊ စီးပွားရေးလုပ်ငန်းရှင်များအနေဖြင့် လုပ်ငန်းကဏ္ဍအလိုက် ထုတ်လုပ်ဖြန့်ဖြူးရောင်းချလျက်ရှိသော ထုတ်ကုန်ပစ္စည်းများတွင် ဥပဒေနှင့်အညီ ကုန်အညွှန်းအမှတ်အသားများပြည့်စုံစွာဖော်ပြပါရှိစေရေး၊ လုပ်ငန်းများဖွံ့ဖြိုးတိုးတက်စေရေး ကူညီဆောင်ရွက်ပေးလျက်ရှိကြောင်း လုပ်ငန်းရှင်များ သိရှိ နားလည်စေရန် ဟောပြောဆွေးနွေးခဲ့ကြောင်းနှင့်ဟောပြောပွဲသို့ လုပ်ငန်းရှင်(၃၀)ဦး တက်ရောက် ခဲ့ကြောင်း သိရှိရသည်။

DOCA(မန္တလေး)

နေပြည်တော်၊ ဧပြီလ ၂၇

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်း ဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံ တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျ စရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက်ရှိပါ သည်။

              ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက် နှင့် ဈေးနှုန်းဖြစ်ပေါ်မှုများအရ ၂၀၂၅ ခုနှစ်၊ ဧပြီလ ၂၈ ရက်နေ့မှ မေလ ၄  ရက်နေ့အထိ ရန်ကုန်အထိုင်ဈေးအခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင်၆,၇၃၅ ကျပ် ဖြစ်ကြောင်း ထုတ်ပြန်ကြေညာထားပါသည်။

              ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်း အပါအဝင် မသမာသည့် လုပ်ဆောင်မှုများ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည် ဖြစ်ကြောင်း အသိပေးထုတ်ပြန်ထားသည်။

              အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန ၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

    ၂၆.၃.၂၀၂၅ ရက်နေ့ နံနက်(၁၁:၀၀) အချိန်တွင် အနောက်ပိုင်းခရိုင်ဦးစီးမှူးရုံးမှ ဝန်ထမ်းများသည် လှိုင်မြို့နယ် ၊ (၇) ရပ်ကွက်၊ သံလမ်း၊ အမှတ်(၂၅)၊ ရှိ ပင်ဂွင်းမုန့်တိုက်သို့ ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

   ကွင်းဆင်းစစ်ဆေးရာတွင် မြို့နယ်စည်ပင်သာယာရေးမှ ဒုတိယအုပ်ချုပ်ရေးမှူး ဦးကျော်လင်း ပူးပေါင်းပါဝင်၍ အနောက်ပိုင်းခရိုင်ဦးစီးမှူးရုံးမှ စစ်ဆေးရေးမှူး ဒေါ်ခိုင်သဉ္ဇာဦး (ဦးစီးမှူး) နှင့် ဝန်ထမ်း(၂)ဦးတို့ ပူးပေါင်းပါဝင်စစ်ဆေးခဲ့ကြပါသည်။

   ပင်ဂွင်းမုန့်တိုက်မှ ထုတ်လုပ်သော စားသောက်ကုန်များတွင် ကုန်အညွှန်းအမှတ်အသားများ ပြည့်စုံစွာပါဝင်မှု ရှိ/မရှိနှင့် ဈေးကွက်မရောက်မီ ၎င်းတို့၏ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားများအား ပြည့်စုံစွာဖော်ပြရန် လုပ်ငန်းရှင်အား အသိပညာပေးခဲ့ပြီး ၎င်းမုန့်တိုက်မှ စားသောက်ကုန်များတွင် ကုန်အညွှန်းအမှတ်အသားများ ပြည့်စုံစွာပါဝင်ကြောင်း တွေ့ရှိခဲ့ရကြောင်း သိရှိရပါသည်။

DOCA(ရန်ကုန်)