သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် စားသုံးသူရေးရာဌာနခွဲနှင့်ထုတ်ကုန်လုံခြုံစိတ်ချရမှုဌာနခွဲကြီးကြပ်သူအရာရှိ ဒေါ်စုစုထွန်း လက်ထောက် ညွှန်ကြားရေးမှူးနှင့် ဝန်ထမ်းများသည် စားသုံးသူများဘေးကင်းလုံခြုံမှုရှိစေရေးနှင့် ထုတ်ကုန်များ လုံခြုံစိတ်ချရမှု ရှိစေရေးအတွက် (၁၉.၅.၂၀၂၅) ရက်နေ့၊ နေ့လယ်(၁၅:၀၀)နာရီအချိန်တွင် မကွေးမြို့၊ အောင်ရတနာ အုပ်စု၊ ရန်နိုင်ရပ်ကွက်၊ ၂၅ လမ်းပေါ်ရှိ "အေဇက်ဝိုင်" မကွေးဆီစက်မှ မြေပဲဆီ၊ နှမ်းဆီ စားသောက် ကုန်ပစ္စည်းများရောင်းချသည့် လုပ်ငန်းအား Online မှတ်ပုံတင်ရာတွင် အချက်အလက် များနှင့် ကိုက်ညီမှု ရှိ/မရှိ မြေပြင်ကွင်းဆင်းစစ်ဆေး ဆောင်ရွက်ခဲ့ကြောင်းသိရသည်။

          ထိုသို့စစ်ဆေးရာတွင် စားသောက်ကုန်ပစ္စည်းများရောင်းချသည့် လုပ်ငန်းအား Online စနစ်ဖြင့် ရောင်းချခြင်း လုပ်ငန်းနှင့် စပ်လျဉ်း၍ မှတ်ပုံတင်မည့် လုပ်ငန်းအမည် မှန်ကန်မှု ရှိ/မရှိ၊ လုပ်ငန်း လိပ်စာမှန်ကန်မှု ရှိ/မရှိ၊ ဖုန်းနံပါတ်မှန်ကန်မှု ရှိ/မရှိ၊ လျှောက်ထားသူ၏ အကျင့်စာရိတ္တကောင်းမွန် ကြောင်း၊ အမည်ပျက်စာရင်းတွင် ပါဝင်ခြင်း မရှိကြောင်း ထောက်ခံချက်နှင့် ရောင်းချနေသည့် ကုန်စည်/ ဝန်ဆောင်မှု အုပ်စုအတိုင်း ကိုက်ညီမှု ရှိ/မရှိ၊ ရောင်းချနေသည့် ကုန်စည်/ဝန်ဆောင်မှုသည် ဥပဒေ တစ်ရပ်ရပ်အရ တားမြစ်ထားသော (သို့မဟုတ်)ကန့်သတ်ထားသော ကုန်စည်ဟုတ်/မဟုတ် (သို့မဟုတ်) ဥပဒေ တစ်ရပ်ရပ်နှင့် ငြိစွန်းခြင်း ရှိ/မရှိ၊ ကုန်စည်အလိုက် သက်ဆိုင်ရာဌာနများ၏ ထောက်ခံချက်/ ညွှန်ကြားချက်များနှင့် ကိုက်ညီမှု ရှိ/မရှိ စသည့် မြေပြင်စစ်ဆေးရမည့် အချက် (၁၈)ချက်နှင့်အညီ စစ်ဆေးခဲ့ပြီး အွန်လိုင်းစနစ်ဖြင့် ရောင်းချသည့် လုပ်ငန်းဆိုင်ရာ အမိန့်ကြော်ငြာစာများ၊  အွန်လိုင်း မှတ်ပုံတင်လက်မှတ်ရရှိထားသူ၏ တာဝန်များ၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင် ၏ တာဝန်နှင့် အာမခံရမည့်အချက်များ၊ စားသုံးသူအခွင့်အရေးနှင့်တာဝန်များအကြောင်းကို ရှင်းလင်း ဆွေးနွေးခဲ့ကြောင်း သိရှိရပါသည်။

DOCA(မကွေး)

            စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ သာယာဝတီခရိုင်၊ သာယာဝတီမြို့နယ် တာဝန်ခံ ဒေါ်အေးသန္တာထွန်းသည် သာယာဝတီမြို့နယ်တွင် ဆန်စပါးဈေးကွက်နှင့် ဈေးနှုန်း တည်ငြိမ်မှန်ကန်စေရေး၊ သမားရိုးကျ ရောင်းဝယ်ခြင်းမဟုတ်သော ဈေးကစားလိုသည့် ရည်ရွယ်ချက် ဖြင့် သိုလှောင်ခြင်း၊ ဈေးနှုန်းမြှင့်တင်ရောင်းချခြင်းများ မဖြစ်ပေါ်စေရေးအတွက် သာယာဝတီမြို့နယ် အတွင်းရှိ ဆန်လက်လီ/လက်ကား အရောင်းဆိုင်များ ၊သိုလှောင်ရုံများ၊ ဆန်စက်များသို့ အပတ်စဉ် အင်္ဂါနေ့တိုင်း ကွင်းဆင်းစစ်ဆေး ဆောင်ရွက်လျက်ရှိရာ (၁၉.၅.၂၀၂၆) ရက်နေ့တွင် သာယာ ဝတီမြို့နယ်၊ ရန်ကုန်-ပြည်လမ်းရှိ ဆင်ဖြူတော်ဆန်စက်သို့  သွားရောက်ကွင်းဆင်းခဲ့ရာ ဒေသထွက် ဧည့်မထ စပါးများကို ဝယ်ယူကြိတ်ခွဲလျက်ရှိပါကြောင်း၊ ဆန်ဈေးနှုန်းအနေဖြင့် ဧည့်မထ ဆန်တစ်ပြည်လျှင် ၂၅၀၀ ကျပ်၊ ၁၀၈ပေါင် ဆန်တစ်အိတ်လျှင် (၆၀၀၀၀) ကျပ်ဖြင့် အများ ပြည်သူများကို နေ့စဉ် ရောင်းချပေးလျက်ရှိကြောင်း  သိရှိရပါသည်။

DOCA(ပဲခူး)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်မော်ကျွန်းမြို့နယ်တာဝန်ခံ ဦးမင်းဇော်လတ်နှင့် ဝန်ထမ်းများသည် (၁၈.၅.၂၀၂၆)ရက်နေ့ နံနက်(၁၁း၀၀)နာရီအချိန်တွင် စားသုံးသူရေးရာဦးစီးဌာန၊ မော်ကျွန်းမြို့နယ် တာဝန်ခံရုံးတွင် ကုန်မျိုးစုံနှင့်မုန့်မျိုးစုံရောင်းချသောလုပ်ငန်းရှင်များအား စားသုံးသူအသိပညာပေးဟောပြောပွဲ ပြုလုပ်ဆောင်ရွက်ခဲ့ကြောင်း သိရသည်။

          ထိုသို့ဆွေးနွေးရာတွင် စားသုံးသူရေးရာဦးစီးဌာန၊ မော်ကျွန်းမြို့နယ်တာဝန်ခံမှ တက်ရောက်လာသော  ကုန်မျိုးစုံနှင့်မုန့်မျိုးစုံရောင်းချသောလုပ်ငန်းရှင်များအား   မိတ်ဆက်စကားပြောကြားပြီး၊ ဌာန၏လုပ်ငန်းတာဝန်များ၊ ရှေ့ဆက်ဆောင်ရွက်ရမည့် လုပ်ငန်းတာဝန်များအား ရှင်းလင်းပြောကြားခဲ့ပါသည်၊၊ ဆက်လက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ ပါ ပြဌာန်းချက်များမှ စားသုံးသူ၏အခွင့်အရေးနှင့် တာဝန်များစီးပွားရေးလုပ်ငန်းရှင်များ၏ တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြချက်နှင့်စပ်လျဉ်း၍ ကုန်ပစ္စည်းအမျိုးအစားအလိုက် သတ်မှတ်ချက်များနှင့် အညီပုဒ်မ-၄၃ ပါမည်သည့် စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု(သို့)တစ်ခုထက်ပို၍ တွဲလျှက်ဖြစ်စေ ရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင် များအနေဖြင့် အထက်ဌာနများမှထုတ်ပြန်ထားသော ဥပဒေညွှန်ကြားချက်များအား အသေးစိတ်ရှင်းလင်းပြောကြားခဲ့ပြီး၊  ကုန်မျိုးစုံနှင့်မုန့်မျိုးစုံရောင်းချသော လုပ်ငန်းရှင်များအနေဖြင့် သိရှိလိုသည် မေးမြန်းချက်များအား ပြန်လည်ဆွေးနွေးရှင်းလင်းခဲ့ပါသည်။ ဟောပြောပွဲသို့ ကုန်မျိုးစုံနှင့်မုန့်မျိုးစုံရောင်းချသော လုပ်ငန်းရှင် (၁၀)ဦးတက်ရောက်ခဲ့ကြောင်း သိရှိရပါသည်။

DOCA (ဧရာဝတီ)

           ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ အိမ်မဲမြို့နယ်တာဝန်ခံဒေါ်ဇင်မာသန်းသည် (၁၈.၅.၂၀၂၆)ရက် နေ့လယ်(၁၃း၀၀)နာရီအချိန်တွင်၊ မြို့နယ်စည်ပင်သာယာရေးအဖွဲ့နှင့် ပူးပေါင်း၍ အိမ်မဲမြို့ တကောကျေးရွာ ဓနဗလဆန်စက်သို့ သွားရောက်၍ ဆန်/စပါး၊ ဈေးကွက်အခြေအနေ စီးဝင်/စီးထွက် အခြေအနေများအား ကွင်းဆင်းလေ့လာ ဆောင်ရွက်ခဲ့ကြောင်း သိရသည်။

              ထိုသို့ကွင်းဆင်းလေ့လာဆောင်ရွက်ရာတွင် အိမ်မဲမြို့နယ်တာဝန်ခံသည် ကုန်သွယ်မှုဖွံ့ဖြိုးတိုးတက်ရေး ရည်ရွယ်ချက်ဖြင့် ဆန်စက်ပိုင်ရှင်နှင့်တွေ့ဆုံ၍ လက်ရှိဖြစ်ပေါ်နေသောဆန်စပါးဈေးကွက်၊ ဈေးနှုန်းအခြေအနေ၊ စီးဝင်/စီးထွက်အခြေအနေများ မေးမြန်းစုံစမ်းခဲ့ပါသည်။ ထို့နောက်ဆန်စက်လည်ပတ်မှုအခြေအနေနှင့် မီးဘေးလုံခြုံရေးစနစ်တကျထားရှိမှုများ၊ ဆန်/စပါးများ သိုလှောင်ထားရှိမှုစနစ်တကျရှိစေရေး၊ တောင်သူများထံမှ စပါးများဝယ်ယူရာတွင်လည်း ဈေးနှုန်း၊ အလေးတင်း၊ တောင်း၊ အချိန်အတွယ်မှန်ကန်စွာ ဝယ်ယူနိုင်ရေး မလိုလားအပ်သော ပြသနာများမဖြစ်ပေါ်စေရေး အလေးထားဆောင်ရွက်ကြရန်  MSMEsလုပ်ငန်းများဖွံ့ဖြိုးတိုးတက်စေရန်အတွက် စက်ပိုင်၊ ကုန်သည်၊ တောင်သူတို့နှင့် ပူးပေါင်းဆောင်ရွက်မှသာ အောင်မြင်မှာဖြစ်ကြောင်း ရှင်းလင်းဆွေးနွေးတိုက်တွန်းမှာကြားခဲ့ကြောင်း သိရှိရပါသည်။

DOCA(ဧရာဝတီ)

            ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊ မော်ကျွန်းမြို့နယ် တာဝန်ခံ ဦးမင်းဇော်လတ်သည် မြို့နယ်စည်ပင်သာယာရေးအဖွဲ့၊ ပြည်တွင်းအခွန်ဦးစီးဌာန၊ ကျန်းမာရေးဦးစီးဌာန၊ မြို့နယ်ရဲတပ်ဖွဲ့တို့နှင့်ပူးပေါင်း၍(၁၅.၅.၂၀၂၆)ရက်နေ့၊ နံနက်(၁၀:၃၀) နာရီအချိန်တွင် မော်ကျွန်းမြို့နယ်အတွင်းရှိ ကုန်မျိုးစုံဆိုင်များတွင် ရောင်းချလျက်ရှိသော Mevius Original Blue အမှတ်တံဆိပ်ဆေးလိပ်ထုတ်ကုန် အတုအပများရောင်းချခြင်း ရှိ၊ မရှိ ကွင်းဆင်းစစ်ဆေးခဲ့ကြောင်း သိရသည်။

             ထိုသို့ကွင်းဆင်းစစ်ဆေးရာတွင် မြို့နယ်တာဝန်ခံဦးမင်းဇော်လတ်မှ မော်ကျွန်းမြို့နယ်ရှိ ကုန်မျိုးစုံဆိုင်များတွင် ရောင်းချနေသော Mevius Original Blue အမှတ်တံဆိပ်ဆေးလိပ်ဘူးများတွင် ကုန်အညွှန်းအမှတ်အသားပြည့်စုံစွာဖော်ပြထားမှု ရှိ/မရှိ  စစ်ဆေးခဲ့ပြီး ဆိုင်ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ၂၀၁၉ပါပြဌာန်းချက်များမှ ဥပဒေအခန်း(၁၈)ပါကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍မည်သည့် စီးပွားရေး လုပ်ငန်းရှင်မ ဆို ပုဒ်မ-၄၁ ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့)တစ်ခုထက်ပို၍ တွဲလျှက်ဖြစ်စေ၊ ရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် မိမိတို့ရောင်းချနေသောကုန်စည် အမျိုးအစားအလိုက် သတ်မှတ်ထားသည့် ဥပဒေများနှင့် အညီလိုက်နာဆောင်ရွက်ကြရန် ဌာနအနေဖြင့်  ဈေးကွက်စောင့်ကြည့်စစ်ဆေးမှုများ    စဉ်ဆက်မပြတ်ဆောင်ရွက်သွားမည်ဖြစ်ကြောင်း သိရှိရပါသည်။

DOCA (ဧရာဝတီ)