သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် မေလ ၁၉ ရက်နေ့ မွန်းလွဲပိုင်းက ခရိုင်ဦးစီးမှူးရုံး အစည်းအဝေးခန်းမတွင် တောင်ငူမြို့ရှိ ကုန်မျိုးစုံလက်လီလက်ကား ရောင်းချသူများနှင့်တွေ့ဆုံပြီး ဈေးကွက်အတွင်းကုန်စည်များရောင်းချရာတွင် ဥပဒေ၊ စည်းမျဉ်း စည်းကမ်း ချက်များနှင့်အညီ ဆောင်ရွက်ရန် ဆွေးနွေးခဲ့ပါသည်။

    ခရိုင်ဦးစီးမှူးက ပဲခူးတိုင်းဒေသကြီးစားသုံးသူရေးရာကော်မတီမှ ဈေးကွက်အတွင်း ရောင်းချနေသည့် ကုန်စည်များအား လအလိုက်ဦးစားပေးစစ်ဆေးရန် ဦးစားပေးကုန်စည်များကို ချမှတ် ပေးထားပြီးဖြစ်ရာ စစ်ဆေးရေးအရာရှိများက သက်ဆိုင်ရာနယ်မြေများအလိုက် ဈေးကွက် စောင့်ကြည့် စစ်ဆေးခြင်းကို ဆောင်ရွက်လျက်ရှိသည့် အခြေအနေများ၊ ဈေးကွက်အတွင်း ရောင်းချသည့် ကုန်စည်အားလုံး၌ ကုန်အညွှန်းအမှတ်အသားများ ပြည့်စုံစွာဖော်ပြရန်ကို အသိပညာပေး ဆောင်ရွက်လျက်ရှိရာ လုပ်ငန်းရှင်များက လိုက်နာဆောင်ရွက်ခြင်းဖြင့် စားသုံးသူအကျိုးစီးပွားအတွက် ပူးပေါင်းဆောင်ရွက်ကြရန် လိုအပ်ပုံများကို ရှင်းလင်းဆွေးနွေးပါသည်။

     ထို့နောက်တက်ရောက်လာသည့် လုပ်ငန်းရှင်များ၏ ဆွေးနွေးမေးမြန်းချက်များကို ခရိုင်ဦးစီးမှူးက ပြန်လည်ရှင်းလင်းဆွေးနွေးခဲ့ကြောင်းနှင့် တွေ့ဆုံဆွေးနွေးပွဲသို့ တောင်ငူမြို့မှ စားသုံးဆီ လက်လီလက်ကားရောင်းချသူ ၂၅ ဦးတက်ရောက်ကြောင်း သိရပါသည်။

DOCA(ပဲခူး)

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ တောင်ငူမြို့နယ်တာဝန်ခံ ဦးမြင့်သူသည် မေလ ၁၉ ရက်နေ့ မွန်းလွဲပိုင်းက တောင်ငူမြို့ အမှတ်(၁၈)ရပ်ကွက်နေ ပြည်သူများအား ရွှေနှင်းဆီဓမ္မာရုံ၌ စားသုံးသူကာကွယ်ရေးဆိုင်ရာသိကောင်းစရာများကို အသိပညာပေးဟောပြောခဲ့ ပါသည်။

      မြို့နယ်တာဝန်ခံက စားသုံးသူရေးရာဦးစီးဌာနအကြောင်း မိတ်ဆက်ပြောကြားပြီး စားသုံးသူ အခွင့်အရေးနှင့်တာဝန်များ၊ စားသုံးသူနစ်နာဆုံးရှုံမှု မဖြစ်ပေါ်စေရေးအတွက် ဈေးကွက်စောင့်ကြည့် စစ်ဆေးဆောင်ရွက်လျှက်ရှိသည့်အခြေအနေများ၊ စားသုံးသူနစ်နာဆုံးရှုံမှုဖြစ်ပေါ်ပါက တိုင်ကြားနိုင် ခြင်းနှင့် စေ့စပ်ညှိနှိုင်း ဖြေရှင်းဆောင်ရွက်ပေးမှုများ၊ အွန်လိုင်းတွင်ရောင်းဝယ်ခြင်းနှင့် ပတ်သက်၍ သတိပြုဆောင်ရွက်ရမည့် အချက်များကို ဟောပြောဆွေးနွေးပါသည်။

       ထို့နောက် တက်ရောက်လာသည့် ရပ်ကွက်နေပြည်သူများ၏ မေးမြန်းဆွေးနွေးချက်များ ကို မြို့နယ် တာဝန်ခံက ပြန်လည် ရှင်းလင်းဖြေကြားခဲ့ကြောင်းနှင့် စားသုံးသူကာကွယ်ရေးဆိုင်ရာ အသိပညာပေးဟောပြောပွဲသို့ ရပ်ကွက်အုပ်ချုပ်ရေးအဖွဲ့ဝင်များ၊ ရပ်မိရပ်ဖများနှင့် ရပ်ကွက်နေ ပြည်သူ ၈၇ ဦးတက်ရောက်ကြောင်း သိရပါသည်။

DOCA(ပဲခူး)

       ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ အိမ်ဆောက်ပစ္စည်း အရောင်းဆိုင်များသို့ မေလ(၂၀)ရက်နေ့၊ နံနက် (၁၀:၀၀)နာရီအချိန်တွင် ဆောက်လုပ်ရေးလုပ်ငန်းသုံးပစ္စည်းများ အဆမတန် ဈေးနှုန်းမြှင့်တင် ရောင်းချခြင်း မရှိစေရေးအတွက်   ကွင်းဆင်းစစ်ဆေးခဲ့ကြောင်း သိရှိရပါသည်။

           ထိုသို့ ကွင်းဆင်းစစ်ဆေးခဲ့ရာတွင် မြို့နယ်အထွေထွေ အုပ်ချုပ်ရေးဦးစီးဌာနမှ ဒုတိယ မြို့နယ်အုပ်ချုပ်ရေးမှူး ဦးစည်သူနှင့် ဝန်ထမ်းများ၊  မြို့နယ်မြေစာရင်းဦးစီးဌာနမှ မြို့နယ်ဦးစီး မှူး ဦးစိုးတင့်၊ မြို့နယ်စည်ပင်သာယာရေးအဖွဲ့မှ ဦးအေးသွင်နှင့် စားသုံးသူရေးရာဦးစီး ဌာနမှ မြို့နယ်တာဝန်ခံ ဦးတင်မင်းတို့သည် ကော့မှူးမြို့နယ် လက်စိုက်ကျေးရွာ သဲကုန်းပိုင်းနှင့် အိုးဘိုပိုင်းတို့ရှိ အိမ်ဆောက်ပစ္စည်း အရောင်းဆိုင်များမှ ဆိုင်ပိုင်ရှင် စီးပွားရေးလုပ်ငန်းရှင်များနှင့် တွေ့ဆုံပြီး ၂၀၂၅ ခုနှစ် မတ်လ(၂၈)ရက်နေ့တွင် ဖြစ်ပွားခဲ့သော မန္တလေးငလျင်ကြီး လှုတ်ခတ်မှု နှင့် ဆက်စပ်၍ ဈေးကွက်၌ ဆောက်လုပ်ရေး လုပ်ငန်းသုံးပစ္စည်းများ ဝယ်လိုအား မြင့်တက်ခဲ့ သဖြင့် အဆမတန် ဈေးနှုန်းမြှင့်တင် ရောင်းချနေခြင်းများအား ညွှန်ကြားချက်နှင့်အညီ အရေးယူ ဆောင်ရွက်ခြင်းများ ဆောင်ရွက်လျက်ရှိကြောင်း၊ ဆိုင်ပိုင်ရှင်များ အနေဖြင့် မိမိတို့ဖြန့်ဖြူး ရောင်းချလျက်ရှိသော ဆောက်လုပ်ရေး လုပ်ငန်းသုံးပစ္စည်းများအား ဝယ်ယူရရှိသည့် ဈေးနှုန်း အပေါ် အဆမတန် ဈေးနှုန်းမြှင့်တင် ရောင်းချခြင်းများ မပြုလုပ်ကြရန် အသိပညာပေး ဆွေးနွေး ပြောကြားခဲ့ပြီး ဆိုင်ရှိဆောက်လုပ်ရေး လုပ်ငန်းသုံးပစ္စည်း လက်ကျန်စာရင်းနှင့် ဈေးနှုန်းတို့အား စာရင်းကောက်ယူ ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

            ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် ကျိုက်ထော်(တောင်)ကျေးရွာ တွင် မေလ(၁၉)ရက်နေ့၊ နေ့လည် (၁၂:၀၀)နာရီအချိန်တွင် ကျေးရွာဓမ္မာရုံ၌ စားသုံးသူကာကွယ် ရေး အသိပညာပေး ဟောပြောပွဲကျင်းပ ပြုလုပ်ခဲ့ကြောင်း သိရသည်။

          အဆိုပါ ဆွေးနွေးဟောပြောပွဲတွင် ကျိုက်ထော်(တောင်) ကျေးရွာ အုပ်ချုပ်ရေးမှူး ဦးသော်ဇင်ထက်က အဖွင့်အမှာစကား ပြောကြားပေးခဲ့ပြီး စားသုံးသူရေးရာဦးစီးဌာနမှ မြို့နယ်တာဝန်ခံ ဦးတင်မင်းက ကျိုက်ထော်(တောင်)ကျေးရွာအတွင်းရှိ စားသုံးသူ ပြည်သူများအနေဖြင့် စားသုံးသူ ကာကွယ်ရေးဆိုင်ရာ ကုန်စည်(သို့မဟုတ်) ဝန်ဆောင်မှုနှင့် စပ်လျဉ်း၍ စားသုံးသူ၏ အခွင့်အရေးနှင့် အကျိုးစီးပွားကို ကာကွယ်ပေးခြင်းဆိုင်ရာ အချက်များအား သိရှိစေရန်ရည်ရွယ်ပြီး စားသုံးသူကာကွယ်ရေး ဥပဒေတစ်ရပ်ကို ပြည်ထောင်စုလွှတ်တော်သည် ဥပဒေအမှတ် (၉/၂၀၁၉) ခုနှစ် မတ်လ(၁၅)ရက်နေ့တွင် အတည်ပြုပြဌာန်းလိုက်ကြောင်း ၎င်းဥပဒေတွင် စားသုံးသူရေးရာဦးစီးဌာန အနေဖြင့် လုပ်ပိုင်ခွင့်နှင့် လုပ်ငန်းတာဝန်များ၊ စားသုံးသူပြည်သူတို့၏ အခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ စီးပွားရေးလုပ်ငန်းရှင်များ အနေဖြင့် ကုန်စည်(သို့မဟုတ်) ဝန်ဆောင်မှုနှင့် စပ်လျဉ်း၍ အာမခံချက်ပေးခြင်းဆိုင်ရာ အချက် များ၊ စားသုံးသူ ပြည်သူများအနေဖြင့် ကုန်စည်(သို့မဟုတ်) ဝန်ဆောင်မှုနှင့် စပ်လျဉ်း၍ အာမခံ ချက်ပေးထားမှုအပေါ် တောင်းဆိုနိုင်သည့် အခွင့်အရေးများ စီးပွားရေးလုပ်ငန်းရှင်များ အနေဖြင့် ကုန်ပစ္စည်းထုတ်လုပ်၊ တင်သွင်း၊ ဖြန့်ဖြူးရာတွင် ကုန်စည်တွင် ကုန်အညွှန်းအမှတ်အသား ဖော် ပြခြင်းဆိုင်ရာ သတ်မှတ်ထားသော အချက်များအား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့မဟုတ်) တစ်ခုထက်ပို၍ တွဲလျက်ဖြစ်စေ မဖြစ်မနေ ရေးသားဖော်ပြပါရှိရမည်ဖြစ်ကြောင်း စားသုံးသူကာကွယ်ရေးဆိုင်ရာ အချက်များအား အကျယ်တဝင့် ရှင်းလင်း ဆွေးနွေးဟောပြောခဲ့ကြောင်း သိရှိရပါသည်။

DOCA(ရန်ကုန်)

         ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်ရှိ Mobile Phone အရောင်းဆိုင်များသို့ မေလ(၁၈)ရက်နေ့၊ နံနက် (၀၉:၃၀) နာရီအချိန်တွင် စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ ညွှန်ကြားချက်နှင့်အညီ Mobile Phone များရောင်းချနေသော အရောင်းဆိုင်များသို့ ကုန်အညွှန်းအမှတ်အသား စစ်ဆေးခြင်း အသိပညာပေးခြင်း၊ တင်သွင်းဖြန့်ဖြူး ရောင်းချလျက်ရှိသည့် အခြေအနေအား ကွင်းဆင်းစစ်ဆေးခဲ့ကြောင်း သိရသည်။ 

           ထိုသို့ ဈေးကွက်အတွင်း ကွင်းဆင်းစစ်ဆေးခဲ့ရာတွင် မြို့နယ်စည်ပင်သာယာရေးအဖွဲ့မှ ဦးအေးသွင်နှင့် စားသုံးသူရေးရာဦးစီးဌာနမှ မြို့နယ်တာဝန်ခံ ဦးတင်မင်းတို့သည် အမှတ်(၂၆၂) ဗိုလ်ချုပ်လမ်း၊ မြို့သစ်ရပ်ကွက်ရှိ ကိုဇင် Mobile (၂)ဆိုင်သို့ သွားရောက်ပြီး ဆိုင်ပိုင်ရှင် စီးပွားရေး လုပ်ငန်းရှင်နှင့် တွေ့ဆုံကာ Mobile Phone အမျိုးမျိုးတို့အား ဝယ်ယူဖြန့်ဖြူး ရောင်းချရာတွင် ကုန်အညွှန်းအမှတ်အသား ဖော်ပြပါရှိရမည့် အမျိုးအမည်၊ အရွယ်အစား၊ အရေအတွက်၊ အသားတင်ပမာဏ သုံးစွဲပုံနည်းလမ်း၊ ဘေးထွက်ဆိုးကျိုးတို့အား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ မဖြစ်မနေ ကုန်အညွှန်းအမှတ်အသား ပြည့်စုံစွာဖော်ပြပါရှိသော လက်ကိုင်ဖုန်းအမျိုးမျိုးတို့ကိုသာ ဝယ်ယူဖြန့်ဖြူးရောင်းချနေမှု အခြေအနေတို့အား ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)