သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ စားသုံးသူရေးရာဌာနခွဲတာဝန်ခံနှင့်ဝန်ထမ်းများသည် (၇.၈.၂၀၂၅)ရက်နေ့၊ နံနက်(၀၉:၀၀)နာရီအချိန်တွင် စားသုံးသူကာကွယ်ရေးအသိပညာများ ရရှိစေ ရန် ရည်ရွယ်၍ အမှတ်(၃)အခြေခံပညာအထက်တန်းကျောင်း၌  ဆရာ၊ ဆရာမ(၁၀)ဦးနှင့် ကျောင်း သား၊ ကျောင်းသူ(၂၃၂)ဦး၊ စုစုပေါင်း(၂၄၂)ဦးအား စားသုံးသူကာကွယ်ရေး အသိပညာပေး ဟောပြောပွဲ ကျင်းပပြုလုပ်ခဲ့ကြောင်း သိရသည်။

          စားသုံးသူရေးရာဌာနခွဲတာဝန်ခံက ဌာန၏သမိုင်းကြောင်းနှင့် လုပ်ငန်း ဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ၊ စားသုံးသူအခွင့်အရေးနှင့်တာဝန်များ၊ Online ရောင်းဝယ် မှုဆိုင်ရာ အသိပညာများအကြောင်းအားလည်းကောင်း၊ ငွေစာရင်းဌာနခွဲမှ ဝန်ထမ်းတစ်ဦးက စားသုံး သူကာကွယ်ရေးဥပဒေပါ ကုန်အညွှန်းအမှတ်အသားဆိုင်ရာ ဖော်ပြချက်များ၊ နစ်နာဆုံးရှုံးမှုများ ဖြစ် ပေါ်လာပါက မိမိတို့ဌာနမှ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေး စင်တာ(CICC)ဖွင့်လှစ်ထားရှိပြီဖြစ်၍ တိုင်ကြားနိုင်သူများနှင့် တိုင်ကြားနိုင်သည့်နည်းလမ်းများ၊ Consumer Call Center (1535)သို့ စားသုံးသူရေးရာကိစ္စနှင့်ပတ်သက်၍ စုံစမ်းမေးမြန်း တိုင်ကြား နိုင်သည့်အကြောင်းအားလည်းကောင်း  Power Point ဖြင့် အသေးစိတ်ရှင်းလင်း ဆွေးနွေးခဲ့ပြီး စားသုံးသူကာကွယ်ရေးလက်ကမ်းစာစောင်များ ဖြန့်ဝေပေးခဲ့ကြောင်း သိရသည်။

DOCA(မကွေး)

       စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့်  ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်နှင့် ဝန်ထမ်းများအဖွဲ့သည် (၅.၈.၂၀၂၅)ရက်နေ့၊ နေ့လယ်(၁၃:၀၀)နာရီအချိန်တွင် စက်မှုလုပ်ငန်းသုံးဆီ ခွဲတမ်းရရှိသော "ကျော်မြင့်ထွန်း"နှင့် “ခိုင်မွန်” ပဲကြော်ဖိုလုပ်ငန်းများ မြေပြင်တွင် လုပ်ငန်းအမှန်တကယ်လည်ပတ်ခြင်းရှိ/မရှိ ကွင်းဆင်း စစ်ဆေးခဲ့ကြောင်း သိရသည်။

          ပဲကြော်လုပ်ငန်းရှင်များမှ ဈေးနှုန်းချိုသာသော စားအုန်းဆီခွဲတမ်းရရှိမှုကြောင့် လက်ရှိ အချိန်တွင် ပဲကြော်လုပ်ငန်း လုပ်ကိုင်ရသည်မှာ အဆင်ပြေကြောင်း၊ လုပ်ငန်းတွင်ကျယ်စွာ လုပ်ကိုင် ရသောကြောင့် စားအုန်းဆီလုံလောက်မှုနည်းပါးသဖြင့် ဝါစေ့ဆီကို တွဲဖက်၍ သုံးစွဲနေကြောင်း၊ ဝါစေ့ဆီ တစ်ပိဿာလျှင် ကျပ်(၁၁၀၀၀)ဖြင့် ပခုက္ကူစက်မှုဇုန်မှ ဝယ်ယူကြောင်း၊ ကုန်ကြမ်း ပဲကြီးကို ပိဿာချိန်(၃၀)ဝင် တစ်အိတ်လျှင် ကျပ်(၁၁၀၀၀၀-၁၃၀၀၀၀)ဖြင့် မုံရွာ၊ အောင်ပန်းမြို့တို့မှ ဝယ်ယူ ကြောင်း၊ တစ်နေ့လျှင် အိတ်ရေ(၁၂ - ၁၅)အိတ်ခန့် ကြော်ရပြီး ကုန်ချောပိဿာချိန်(၃၁၂)မှ (၃၉၀)ပိဿာချိန်ထွက်ရှိကြောင်း၊ တစ်လလျှင် ပျမ်းမျှ(၂၀-၂၅) ရက်ခန့် လုပ်ကိုင်ရကြောင်း၊ ပဲကြော် သော လုပ်သားဦးရေ(၇)ဦးရှိပြီး လုပ်သားခကို တစ်နေ့လျှင် အမျိုးသားတစ်ဦးလျှင် ကျပ်(၁၅၀၀၀)၊ အမျိုးသမီးတစ်ဦးလျှင် ကျပ်(၇၀၀၀)ပေးကြောင်း၊ ပဲညှစ် သော လုပ်သားဦးရေ အများအပြားရှိပြီး ပဲညှစ်ခကို တစ်ပြည်လျှင် ကျပ်(၃၀၀)ပေးကြောင်း၊ လူတစ်ဦးလျှင် ပဲညှစ်ခ ကျပ်(၄၀၀၀-၆၀၀၀) ခန့်ရရှိကြောင်း၊ ပဲကြော်များကို ပခုက္ကူမြို့ပေါ်တွင် ရောင်းချရမှုနည်းပြီး  ရန်ကုန်၊ တောင်ကြီး၊ မုံရွာ၊ ကလေး၊ ကလေးဝ မြို့နယ်များသို့ ရေလမ်းဖြင့် အများဆုံး တင်ပို့ရောင်းချကြောင်း၊ ဈေးနှုန်း အနေဖြင့် ပဲပူးကြော်၊ နှစ်ပြန်ကြော် တစ်ပိဿာလျှင် လက်လီ ကျပ် (၁၄၀၀၀)၊ လက်ကား ကျပ် (၁၃၀၀၀)ဖြင့် ရောင်းချကြောင်း၊ မြေပြင်တွင် လုပ်ငန်းအမှန်တကယ် လည်ပတ်ပြီး လုပ်ကိုင်နေ ကြောင်း၊ ဆီခွဲတမ်းရရှိမှုများလျှင် ပို၍အဆင်ပြေကြောင်း၊ ဆီဈေးနှုန်း သင့်တင့်စွာဝယ်ယူရလျှင် စားသုံးသူများအပေါ် ပို၍ဈေးနှုန်းချိုသာစွာဖြင့် ရောင်းချပေးနိုင်ကြောင်း  ပဲကြော်လုပ်ငန်းရှင်များမှ ပြန်လည်ရှင်းလင်းဆွေးနွေးခဲ့ကြောင်း သိရှိရသည်။

DOCA(မကွေး)

      မကွေးတိုင်းဒေသကြီး၊  ချောက်ခရိုင်၊ ချောက်မြို့နယ်တွင် ကျောင်းသား၊ ကျောင်းသူများ လောင်းကစားမှု၊ လိမ်လည်မှုနှင့် အင်တာနက်အွန်လိုင်းအသုံးပြု၍ ဆိုက်ဘာလုံခြုံရေးဆိုင်ရာများ အသိပြုဆင်ခြင်နိုင်စေရန် ရည်ရွယ်၍ ဆက်သွယ်ရေးလိမ်လည်မှုတိုက်ဖျက်ရေးဆိုင်ရာ အသိ ပညာပေးဟောပြောပွဲကို (၆.၈.၂၀၂၅)ရက်နေ့၊ နေ့လယ်(၁၃:၀၀)နာရီအချိန်တွင် အခြေခံပညာ အထက်တန်းကျောင်း(စလေ)နှင့် အခြေခံပညာအထက်တန်းကျောင်း(ခွဲ)(ချောင်းတက်)၌ ဆောင် ရွက်ခဲ့ကြောင်း သိရသည်။

          အဆိုပါ အသိပညာပေးဟောပြောပွဲတွင် မြို့နယ်ပညာရေးမှူးရုံးမှ ဒုတိယမြို့နယ်ပညာ ရေးမှူး ဦးထွန်းဆင့်ဝင်းက အဖွင့်အမှာစကားပြောကြားပြီး မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုး၊ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနဦးစီး အရာရှိ ဒေါ်သိမ့်ဝါနှင့် မြို့နယ်ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန လက်ထောက်ညွှန်ကြား ရေးမှူး ဦးစောမြဖောင်းတို့က ဘေးအန္တရာယ်ကင်းရှင်းသော အစားအသောက်များကို ရွေးချယ် စားသောက်နိုင်စေရေး၊ Facebook ၊ Viber ၊ Telegram စသည်တို့ကို အသုံးပြု၍ အွန်လိုင်း လိမ်လည်မှုများမှ သတိပြုရှောင်ရှားနိုင်စေရေးနှင့် ငွေကြေးလိမ်လည်မှုများ ကင်းဝေးနိုင်စေ ရေးတို့အတွက် သတိပြုရမည်အချက် များကိုလည်းကောင်း အသီးသီးဟောပြောခဲ့ကြပြီး မဲခေါင် တရားဥပဒေစိုးမိုးရေးနှင့် လုံခြုံရေးပူးပေါင်း ဆောင်ရွက်မှုဗဟိုဌာနမှ ပေးပို့လာသည့် ဆက်သွယ်ရေး လိမ်လည်မှုတိုက်ဖျက်ရေးဆိုင်ရာ အသိပညာပေး ဗီဒီယိုများကို ပြသခဲ့ကြောင်း သိရသည်။

          ထို့နောက် တက်ရောက်လာသည့် ကျောင်းအုပ်ဆရာမကြီး၊ ဆရာ၊ ဆရာမများနှင့် ကျောင်းသား၊  ကျောင်းသူများအား အပြည်ပြည်ဆိုင်ရာမှုးယစ်ဆေးဝါးအလွဲသုံးမှုနှင့် တရားမဝင် ရောင်းဝယ်မှုတိုက်ဖျက်ရေး အသိပညာပေးလက်ကမ်းစာစောင်များနှင့် သဘာဝဘေးဆိုင်ရာ အသိ ပညာပေး လက်ကမ်းစာစောင်များကို ဖြန့်ဝေပေးခဲ့ကြောင်း သိရသည်။

DOCA(မကွေး)

     စားသုံးသူရေးရာဦးစီးဌာန၊ မကွေးခရိုင်နှင့်ချောက်ခရိုင်အတွင်းရှိ ဝန်ထမ်းများသည် ဌာန၏ မျှော်မှန်းချက်ဖြစ်သော “ပြည်တွင်းကုန်သွယ်မှုကဏ္ဍဖွံ့ဖြိုးတိုးတက်ရေးနှင့် စားသုံးသူကာကွယ်ရေး လုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့် ဆောင်ပုဒ်နှင့်အညီ ပြည်တွင်းကုန် သွယ်မှုဖွံ့ဖြိုးတိုးတက်ရေးလုပ်ငန်းများအပြင် စားသုံးသူကာကွယ်ရေးအသိပညာပေးခြင်းနှင့် လုပ်ငန်း ရှင်များအား တွေ့ဆုံဆွေးနွေးအသိပညာပေးခြင်းများကို လစဉ်လျာထားချက်ချမှတ် ဆောင်ရွက် လျက် ရှိပါသည်။

          မကွေးခရိုင်နှင့် ချောက်ခရိုင်အတွင်း၌ မြို့နယ်(၆)ခုရှိရာ ၂၀၂၅ခုနှစ်၊ ဇူလိုင်လအတွင်း စားသုံးသူကာကွယ်ရေးအသိပညာပေးဆွေး‌နွေးခြင်း (၁၁)ကြိမ်နှင့် လုပ်ငန်းရှင်များအား တွေ့ဆုံဆွေး နွေး အသိပညာပေးခြင်း (၂၇)ကြိမ်ဆောင်ရွက်နိုင်ခဲ့ပြီး  စားသုံးသူကာကွယ်‌ရေး ဥပဒေပါ စားသုံးသူ များရရှိနိုင်မည့် အခွင့်အရေးများ၊ လိုက်နာရမည့်တာဝန်များ၊ စီးပွားရေးလုပ်ငန်းရှင်များ လိုက်နာရ မည့်တာဝန်များ၊ တားမြစ်ချက်များ၊ ပြစ်မှု/ ပြစ်ဒဏ်များနှင့် စားသုံးသူများ နစ်နာဆုံးရှုံးမှုများ ဖြစ်ပေါ်လာပါက တိုင်ကြားနိုင်သူများ၊ တိုင်ကြားပုံနည်းလမ်းများအား အသေးစိတ်ရှင်းလင်း ဆွေးနွေးခဲ့ကြောင်း သိရှိ ရပါသည်။

DOCA(မကွေး)

     စားသုံးသူရေးရာဦးစီးဌာန၊ မကွေးခရိုင်/ ချောက်ခရိုင်အတွင်းရှိ ဝန်ထမ်းများသည် “ထုတ်ကုန် လုံခြုံစိတ်ချရမှုအစ ကုန်အညွှန်းအမှတ်အသားက” ဆိုသည့်အတိုင်း စျေးကွက်အတွင်းရှိ ကုန်စည် များတွင် စားသုံးသူကာကွယ်ရေးဥပဒေ ၂၀၁၉ အခန်း(၁၈)ကုန်အညွှန်းအမှတ် အသားဖော်ပြရာတွင် ပြည့်စုံစွာပါဝင်ရမည့် အချက်အလက်များ၊ ပြည့်စုံမှန်ကန်စွာဖော်ပြထားခြင်းရှိ/မရှိနှင့် အစား အသောက်နှင့် ဆေးဝါးကွပ်ကဲ‌ရေးဦးစီးဌာနက စားသုံးရန်မသင့်တားမြစ်ထားသော ကုန်စည်များ ရောင်းချမှုရှိ/မရှိ တို့ အား မိတ်ဖက်ဌာနများနှင့် ပူးပေါင်းပြီး လစဉ်ဆောင်ရွက်လျက်ရှိပါသည်။

          မကွေးခရိုင်နှင့်ချောက်ခရိုင်အတွင်းရှိ မြို့နယ်များမှ ၂၀၂၅ခုနှစ်၊ ဇူလိုင်လအတွင်း စျေးကွက် စောင့်ကြည့်စစ်ဆေးခြင်းကို မြို့နယ်အလိုက်ဆောင်ရွက်မှုမှာ  မကွေးမြို့နယ်(၅)ကြိမ်၊ နတ်မောက် မြို့နယ်(၂)ကြိမ်၊ တောင်တွင်းကြီးမြို့နယ် (၂)ကြိမ်၊ မြို့သစ်မြို့နယ် (၃)ကြိမ်၊ ချောက်မြို့နယ်(၅) ကြိမ်၊ ရေနံချောင်းမြို့နယ်(၃)ကြိမ်၊ စုစုပေါင်း(၂၀)ကြိမ် ဆောင်ရွက်ခဲ့ကြောင်း သိရှိရသည်။ 

DOCA(မကွေး)