သတင်းနှင့် လှုပ်ရှားမှုများ

           စားသုံးသူရေးရာဦးစီးဌာန၊ ရုံးချုပ်၏ လမ်းညွှန်ချက်အရ ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်ရှိ Mobile Phone အရောင်းဆိုင်များအား စားသုံးသူရေးရာ ဦးစီးဌာန၊ ခရမ်းမြို့နယ်တာဝန်ခံနှင့် ဝန်ထမ်းများသည်  မေလ(၂၀)ရက်နေ့၊ နံနက် (၁၀:၃၀) နာရီအချိန်တွင် ကွင်းဆင်းစစ်ဆေးခဲ့ကြောင်း သိရှိရပါသည်။

              ထိုသို့ ကွင်းဆင်းစစ်ဆေးခဲ့ရာတွင် တယ်လီကွန်၊ လပြည့်ဝန်း၊ ဆွေသဟာ၊ စိမ်းလန်း Mobile Phone ဆိုင်များတွင် ကုန်အညွှန်းအမှတ်အသားများ  မြန်မာဘာသာဖြင့် ဖော်ပြခြင်း ရှိ/မရှိအား စစ်ဆေးခဲ့ပြီး ဆိုင်ပိုင်ရှင်များအား မိမိတို့ဆိုင်တွင် ရောင်းချနေသော လက်ကိုင်ဖုန်းများတွင် ကုန်စည်၏ အမျိုးအမည်၊ အရွယ်အစား၊ သုံးစွဲပုံနည်းလမ်း၊ ဘေးထွက်ဆိုးကျိုးများအား မြန်မာဘာသာဖြင့် မဖြစ်မနေတည့်သွင်း ဖော်ပြထားသောဖုန်းများကို ရောင်းချခြင်းဖြင့် စားသုံးသူများသည် သတင်းအချက်အလက် ပြည့်စုံစွာရရှိစေနိုင်ပြီး ရွေးချယ်ဝယ်ယူနိုင်ခွင့်များရရှိ၍ စားသုံးသူအခွင့်အရေးများ ရရှိနိုင်မည်ဖြစ်ခြင်းကြောင့် ကုန်အညွှန်းအမှတ်အသား ပြည့်စုံသောဖုန်းများကိုသာ ရွေးချယ်ဖြန့်ဖြူး ရောင်းချခြင်းဖြင့် ပူးပေါင်းဆောင်ရွက်သွားကြရန်ကိုသာ မြို့နယ်တာဝန်ခံက အသိပညာပေးခဲ့ကြောင်း သိရှိရပါသည်။

DOCA(ရန်ကုန်)

          မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်တာဝန်ခံနှင့်ပူးပေါင်းအဖွဲ့များသည် (၁၉.၅.၂၀၂၅)ရက်နေ့၊ နံနက်(၁၀:၀၀)နာရီအချိန်တွင် ချောက်မြို့ပေါ်ရှိ စားသောက်ဆိုင်များအား ကွင်းဆင်းစစ်ဆေးခြင်းနှင့် အသိပညာပေးဆွေးနွေးခြင်းများ ဆောင်ရွက်ခဲ့ကြောင်း သိရသည်။

          ထိုသို့ကွင်းဆင်းစစ်ဆေးရာတွင် စားသောက်ဆိုင်များ ခင်းကျင်းပြင်ဆင်မှု၌ သန့်ရှင်းမှုရှိစေရန်၊ ချက်ပြုတ်ကြော်လှော်သည့် မီးဖိုခန်းများသန့်ရှင်းသပ်ရပ်မှုရှိစေရန်၊ သုံးစွဲသည့်အသီးအရွက်များ လတ်ဆတ်မှုရှိစေရန်၊ ဆိုင်ဝန်ထမ်းများ တစ်ကိုယ်ရည်သန့်ရှင်းမှုသပ်ရပ်မှုရှိစေရန်၊ စားကြွင်းစားကျန်များစွန်ပစ်ရာ၌ အမှိုက်ပုံးများဖြင့် စည်းကမ်းရှိရှိ စနစ်တကျစွန့်ပစ်ခြင်းရှိစေရန်၊ ဆိုင်တွင်‌ရောင်းချသည့် ကုန်ပစ္စည်းအမျိုးအစားအလိုက် ဈေးနှုန်းများဖော်ပြထားခြင်းရှိရန်လိုအပ်ကြောင်းနှင့် ကုန်ပစ္စည်းများ ဖြန့်ဖြူးရောင်းချရာတွင် ပြည်သူများ၏လိုအပ်ချက်များ ဖြည့်ဆည်းပေးနိုင်ရေးအတွက် အကျိုးအမြတ်ရရှိရေးထက် ဈေးနှုန်းတည်ငြိမ်ရေးကို အလေးထားဆောင်ရွက်ရေး၊ စီးပွားရေးလုပ်ငန်းရှင်များ လိုက်နာရမည့်တာဝန်များ၊ တားမြစ်ချက်များကို အသိပညာပေးရှင်းလင်း ဆွေးနွေးခဲ့ကြောင်း သိရသည်။

DOCA(မကွေး)

          စီးပွားရေးနှင့်ကူးသန်းရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီးဌာနသည် မြန်မာနိုင်ငံ ဆန်စပါးအသင်းချုပ်နှင့်ပူးပေါင်း၍ လစဉ်သင့်တင့်မျှတသောဆန်စျေးနှုန်းများ ထုတ်ပြန်၍ ထိန်းကျောင်းဆောင်ရွက်လျက်ရှိပါသည်။ (၁၉.၅.၂၀၂၅)ရက်နေ့၊ နံနက်(၁၀:၀၀)နာရီအချိန်တွင် မကွေးခရိုင်၊ မကွေးမြို့ကုန်သည်များနှင်စက်မှုလက်မှုလုပ်ငန်းရှင်များအသင်း (မကွေးကုန်စည်ဒိုင်)၌ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၊ မကွေး/ ချောက်ခရိုင် ဦးစီးမှူးနှင့် ဝန်ထမ်း(၇)ဦးတို့သည် မကွေးတိုင်းဒေသကြီး ကုန်သည်များနှင့်စက်မှုလက်မှု လုပ်ငန်း ရှင်များအသင်းဥက္ကဌအပါအဝင် မကွေးမြို့၊ ဆန်ကုန်သည်နှင့်ဆန်လုပ်ငန်းရှင်များနှင့် ဆီလက်ကား ကုန်သည်ကြီး (၃၄)ဦးတို့အား တွေ့ဆုံ၍ ဆန်များအား ပြည်ပသို့ စနစ်တကျတင်ပို့ရောင်းချနိုင်ရေး၊ စျေးကွက်စျေးနှုန်းမှန်ကန်တည်ငြိမ်စေရေး၊ စျေးနှုန်းမြှင့်တင်ရောင်းချမှုမရှိစေရေးတို့အား အသိပညာ ပေး ဆွေးနွေးခဲ့ကြောင်း သိရသည်။

          ထိုသို့ ဆွေးနွေးရာတွင် တိုင်းဒေသကြီးဦးစီးမှူးမှ ဆန်ဈေးနှုန်းများမြှင့်တင်ရောင်းချမှု မရှိစေရေးနှင့် စားသုံးသူရေးရာဦးစီးဌာနမှ လအလိုက်ထုတ်ပြန်ထားသည့်ရည်ညွှန်းဈေးအတိုင်း ရောင်းချနိုင်ရေး အသိပညာပေးဆောင်ရွက်ခြင်းဖြစ်ကြောင်း၊ ဆန်သတ်မှတ်ရည်ညွှန်းဈေးများကို မကွေးမြို့နယ် ဆန်စပါးကုန်သည်များအသင်း၏ Viber Group တွင် လစဉ်ပေးပို့ထားပြီးဖြစ်ကြောင်း၊ တိုင်းဒေသကြီး ဆန်စပါးလုပ်ငန်းကြီးကြပ်ရေးအဖွဲ့ကို ဖွဲ့စည်းထားရှိပြီးဖြစ်သလို တိုင်း/ခရိုင်/ မြို့နယ် ကုန်ဈေးနှုန်း တည်ငြိမ်ရေးအဖွဲ့များကိုလည်း ဖွဲ့စည်းထားရှိပြီး ဖြစ်ပါကြောင်း၊ ဆန်စပါးပွဲစားများအနေဖြင့် စားသုံးသူရေးရာဦးစီးဌာနမှ စပါးဝယ်ယူခွင့်ကြားပွဲစားစိစစ်ရေးကဒ်များ ထုတ်ထားပေးလျက်ရှိရာ စိစစ်ရေးကဒ်(၄၀၀)ကျော် ထုတ်ပေးပြီးဖြစ်ပါကြောင်းနှင့် ကြားပွဲစားစိစစ်ရေးကဒ်ရှိမှသာ ဆန်စပါး ဝယ်ယူခြင်းနှင့် ရောင်းဝယ်ခြင်းကိစ္စရပ်များ ဆောင်ရွက်နိုင်မည်ဖြစ်ကြောင်း ပြောကြားခဲ့ပါသည်။ ဆက်လက်ပြီး ဆန်စပါးနှင့်ဆီလက်ကား ကုန်သည်များမှဆွေးနွေးခဲ့မှုအပေါ် ပြန်လည်ပြောကြား ရာတွင် ယခုအချိန်တွင် ဆန်သတ်မှတ်ရည်ညွှန်းဈေးများကို မြန်မာနိုင်ငံဆန်စပါးအသင်းချုပ်နှင့် စားသုံးသူရေးရာဦးစီးဌာနတို့ ညှိနှိုင်းတွက်ချက်၍ လအလိုက်ထုတ်ပြန်ပေးလျက်ရှိကြောင်း၊ မကွေးမြို့ပေါ်တွင် ရွှေဘိုပေါ်ဆန်းမွှေးဆန်များ ပြတ်လပ်မှုများရှိပါက မြို့နယ်/တိုင်းဆန်ကုန်သည် နှင့် ဆန်လုပ်ငန်းရှင်များအသင်းအနေဖြင့် စားသုံးမှုအရဆန်လိုအပ်ချက်ကို တွက်ချက်ပြီး တင်ပြရ မည်ဖြစ်ကြောင်းနှင့်  ရုံးချုပ်သို့ဆက်လက်တင်ပြ၍ မြန်မာနိုင်ငံဆန်စပါးအသင်းချုပ်(MRF)နှင့် ချိတ်ဆက်ညှိနှိုင်း ဆောင်ရွက်ပေးသွားမည်ဖြစ်ကြောင်း၊ ဆက်လက်ပြီး ဆန်/ဆီ လက်လီလက်ကား အရောင်းဆိုင်များအနေဖြင့် ရောနှောဆန်များနှင့် ရောနှောဆီများကိုလည်းရောင်းချခွင့်မရှိကြောင်း၊ အသင်းအဖွဲ့များအနေဖြင့် ခိုင်မာသည့်အသင်းအဖွဲ့များဖြစ်ပေါ်လာစေရေးအတွက် ဥက္ကဌ၊ အတွင်းရေးမှူးနှင့် အသင်းအဖွဲ့ဝင်များမှလည်း ပေါင်းစပ်ညှိနှိုင်းဆောင်ရွက်ပေးစေလိုကြောင်းနှင့် တွေ့ကြုံနေရသည့် အခက်အခက်များကို တင်ပြနိုင်ရေးအတွက် လစဉ်တွေ့ဆုံဆွေးနွေးပွဲများကို ဆောင်ရွက်ပေးသွားမည်ဖြစ်ကြောင်း ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မကွေး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူကာကွယ်ပေးရေးဥပဒေအရ ကုန်စည်(သို့)ဝန်ဆောင်မှုလုပ်ငန်းများနှင့်စပ်လျဉ်း၍ စားသုံးသူနစ်နာဆုံးရှုံးမှုများအပေါ် တိုင်ကြားလာ၍သော်လည်းကောင်း၊စားသုံးသူများဘေးအန္တရာယ်ရှိသည်ဟု ထင်မြင်ယူဆရသောကုန်စည်(သို့)ဝန်ဆောင်မှုနှင့် စပ်လျဉ်း၍သော်လည်းကောင်း  စုံစမ်းစစ်ဆေးမှုများ ပြုလုပ်၍ စားသုံးသူကာကွယ်ရေးဥပဒေနှင့်အညီ ဖြေရှင်းဆောင်ရွက်ပေးလျက်ရှိပါသည်။

    စားသုံးသူရေးရာဦးစီးဌာန၊ စစ်ဆေးရေးအရာရှိ ဦးဆောင်သောဈေးကွက်စောင့်ကြည့်စစ်ဆေးရေးအဖွဲ့သည် အထွေထွေအုပ်ချုပ်ရေးဦးစီးဌာန၊ မြို့နယ်ပြည်သူ့ကျန်းမာရေး၊ မြို့နယ်စည်ပင်သာယာရေးအဖွဲ့နှင့် မြန်မာနိုင်ငံရဲတပ်ဖွဲ့တို့ပူးပေါင်း၍ ၂၀၂၅ ခုနှစ် မေလ (၁၆)ရက်နေ့ ၊ နံနက် (၁၀း၀၀) အချိန်တွင် သာစည်မြို့နယ်ရှိ ဆေးဆိုင်မျာအား ဈေးကွက်စောင့်ကြည့်စစ်ဆေးခဲ့ပါသည်။

    အဆိုပါ ဆေးဆိုင်များအား စစ်ဆေးရာတွင် ဆေးဝါးထားသိုမှု၊ ဖြန့်ဖြူးရောင်းချစနစ်များ၊ စံမညီဆေးဝါးများ၊ သက်တမ်းကုန်ဆေးဝါးများ၊ စပ်ဆေးများရောင်းချခြင်းရှိ/မရှိနှင့် သတ်မှတ်ချက်များ ကိုက်ညီမှုရှိ/မရှိအခြေနေများအား စစ်ဆေးခဲ့ကြောင်း သတင်းရရှိပါသည်။

DOCA(မန္တလေး)

          မကွေးတိုင်းဒေသကြီး၊ ချောက်ခရိုင်၊ ချောက်မြို့၌ (၁၇.၅.၂၀၂၅)ရက်နေ့၊ နံနက်(၀၉:၀၀) နာရီအချိန်တွင် မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံနှင့် ပူးပေါင်းအဖွဲ့များက Mobile Phone, Laptop, TV များတွင် ကုန်အညွှန်းအမှတ်အသားပြည့်စုံစွာ ပါဝင်မှုရှိ/မရှိ စစ်ဆေးခြင်း အသိပညာပေးလက်ကမ်းစာစောင်များဖြန့်ဝေခြင်းများဆောင်ရွက်ခဲ့ကြောင်း သိရသည်။

          ထိုသို့စစ်ဆေးရာတွင် မြို့နယ်အထွေထွေအုပ်ချုပ်ရေးဦးစီးဌာန၏ ကြီးကြပ်မှုဖြင့် မြို့နယ်စည်ပင်သာယာရေးအဖွဲ့၊ မြို့နယ်စားသုံးသူရေးရာဦးစီးဌာန၊ မြို့နယ်ပြန်ကြားရေးနှင့် ပြည်သူ့ ဆက်ဆံရေးဦးစီးဌာနတို့ပူးပေါင်း၍ ချောက်မြို့အတွင်းရှိ Mobile Phone, Laptop, TV အရောင်းဆိုင်(၁၆)ဆိုင်သို့ ကုန်အညွှန်းအမှတ်အသားများ ပြည့်စုံစွာပါဝင်မှုရှိ/မရှိ ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရသည်။

DOCA(မကွေး)