ပြည်ပကုန်သွယ်မှုသတင်းများ

     အင်ဒိုနီးရှားရေကြောင်းရေးရာနှင့် ငါးလုပ်ငန်းဝန်ကြီးဌာနက အင်ဒိုနီးရှား-ဥရောပဘက်ပေါင်းစုံ စီးပွားရေးမိတ်ဖက်သဘောတူညီချက် (IEU-CEPA) ကို အင်ဒိုနီးရှား၏ ငါးနှင့် ရေထွက်ကုန်များ ဥရောပ သို့တင်ပို့မှုတိုးမြှင့်ရာတွင် ထိရောက်စွာအသုံးချရမည်ဟု ပြောကြားခဲ့ပါသည်။ ရေကြောင်း နှင့် ငါး လုပ်ငန်း၏ယှဉ်ပြိုင်နိုင်စွမ်းအားကောင်းစေရေးအတွက် ခေတ္တညွှန်ကြားရေးမှူးချုပ် Machmud က ၎င်းတို့သည် အကောက်ခွန်ကောက်ခံခြင်းမခံရမည့် IEU-CEPA ကြောင့် အခွင့်အလမ်းကို ပိုင်ဆိုင်ထားကြောင်း ပြောကြားခဲ့ပါသည်။ ကျောက်ကျောအစရှိသည့် ပင်လယ်ကျောက်ပွင့်မှဆင်းသက်လာ သည့်ထုတ်ကုန်များနှင့် လက်မှုပစ္စည်းများအတွက် အင်ဒိုနီးရှားသည် ဥရောပဈေးကွက်တွင် အမေရိကန်  ဒေါ်လာ ၁၃.၆၅ သန်းတန်ကုန်သွယ်ရေး စာချုပ်ချုပ်ဆိုနိုင်ခဲ့ပြီး ရည်မှန်းချက်ဖြစ်သည့် အမေရိကန် ဒေါ်လာ ၈ သန်းကို ကျော်ဖြတ်နိုင်ခဲ့ကြောင်း သိရပါသည်။ ပုဇွန်နှင့် တူနာပါဝင်သည့် ငါးထုတ်ကုန်များသည် IEU-CEPA မတိုင်မီကတည်းကတင်ပို့မှုမြင်တက်ခဲ့ခြင်းက အင်ဒိုနီးရှား ရေထွက်ကုန်များအတွက် ဥရောပ၏အားကောင်းသောဝယ်လိုအားကို ရောင်ပြန်ဟပ်ကြောင်း သိရပါ သည်။ Machmud က သဘောတူညီချက်စတင်အသက်ဝင်ချိန်မှစ၍ ဥရောပသို့တင်ပို့မှုဆက်လက် ကြီးထွားရန်မျှော်လင့် ကြောင်းပြောကြားခဲ့ပါသည်။ ဝန်ကြီးဌာနသည်လည်း အလားအလာရှိသော ဥရောပဝယ်ယူသူများ ကို အင်ဒိုနီးရှားငါးပြုပြင်ထုတ်လုပ်သည့်စက်ရုံများသို့ လည်ပတ်ရန် တိုက်ရိုက် ဖိတ်ခေါ် ခြင်းအားဖြင့် အရောင်းမြှင့်တင်ရန် အားထုတ်လျက်ရှိကြောင်း သိရပါသည်။ အစီအစဉ်ကို ၂၀၂၆ ခုနှစ် ဧပြီလတွင် စပိန်နိုင်ငံဘာစီလိုနာမြို့တွင်ကျင်းပမည့် ကုန်စည်ပြပွဲပြီးနောက်တွင် မေလ သို့မဟုတ် ဇွန်လ စီစဉ်ထားကြောင်း သိရပါသည်။ ကုန်သွယ်ရေးဝန်ကြီး Budi Santoso က IEU-CEPA ကို ၂၀၂၆ ခုနှစ် ဇန်နဝါရီလတွင် လက်မှတ်ရေးထိုးရန် ရည်မှန်းထားကြောင်းနှင့် သဘောတူညီချက်နှင့်ပတ်သတ်၍ လတ်တလောတွင် ဥပဒေမူကြမ်းရေးဆွဲလျက်ရှိပြီး များစွာ သောဘာသာ စကားများသို့ဘာသာပြန်လျက်ရှိကြောင်း ပြောကြားခဲ့ပါသည်။

Antara News                                                                             

DOCA (ရန်ကုန်)

          မြန်မာနိုင်ငံသည် အဓိကအားဖြင့် ခေါက်ဆွဲအပါအဝင် တန်ဖိုးမြင့်စားသောက်ကုန်များကို ကိုရီးယားနိုင်ငံ၊ ဂျပန်နိုင်ငံနှင့် ASEAN သို့ပို့ဆောင်လျက်ရှိကြောင်း မြန်မာ့စားသောက်ကုန် ထုတ်လုပ်ရေးနှင့် တင်ပို့ရေးအဖွဲ့အစည်းမှ ပြောကြားချက်အရ သိရပါသည်။ ၎င်းအဖွဲ့အစည်းမှ အမှုဆောင်တစ်ဦးက “၎င်းတို့အနေဖြင့် ထုတ်လုပ်မှုစရိတ်ကိုလျော့ချပါက အိမ်နီးချင်းနိုင်ငံများအကြား ဈေးကွက်ပြိုင်ဆိုင်မှုများကို ပိုမိုတိုးမြင့်နိုင်မည်ဖြစ်ကြောင်း၊ တင်ပို့မှုများမြှင့်တင်နိုင်ကြောင်းနှင့် အခွင့်အလမ်းများကိုဖန်တီးပြီး အခက်အခြများကို ဖြေရှင်းနိုင်ကြောင်း၊ ထုတ်လုပ်မှုနှင့် ထုပ်ပိုးခြင်းများ‌ ကောင်းမွန်‌‌‌စေရန်အတွက် ထုပ်ပိုးခြင်းအတွက်လိုအပ်သော ကုန်ကြမ်းပစ္စည်းများကို ပိုမိုတင်သွင်းရန်လိုအပ်ကြောင်း” ပြောကြားခဲ့ပါသည်။ မြန်မာနိုင်ငံသည် ခေါက်ဆွဲများကို ဒေသတွင်းဈေးကွက်များသို့ ပို့ဆောင်လျက်ရှိပြီး ဟင်းသီးဟင်းရွက်ခြောက်များ၊ နှမ်းမှုန့်များ၊ ပျားရည်နှင့် တစ်ခြားသော တန်ဖိုးမြင့်စားသောက်ကုန်များကို ဂျပန်နိုင်ငံနှင့် တောင်ကိုရီးယားနိုင်ငံများသို့ ပို့ဆောင်လျက်ရှိ‌ကြောင်း သိရပါသည်။ ထို့အပြင် သရက်သီး၊ ဒူးရင်းသီး၊ ကော်ဖိ၊ ထောပတ်သီးနှင့် တစ်ခြားသောသစ်သီးများမှပြုလုပ်သော တန်ဖိုးမြင့် တင်ပို့ကုန်များကို Belarus နှင့် တစ်ခြားသောနိုင်ငံများသို့ တင်ပို့နိုင်ရန် ကြိုးပမ်းလျက်ရှိကြောင်း သိရှိရပါသည်။

Source: Gobal New Light of Myanmar                                         

DOCA (ရန်ကုန်)

          ကမ္ဘောဒီးယားနိုင်ငံသည် ၂၀၂၅ ခုနှစ်၊ ပထမ ၁၁ လအတွင်း အမေရိကန်ဒေါ်လာ ၂၇.၃၇ ဘီလီယံတန်ဖိုးရှိ ထုတ်ကုန်များတင်ပို့ခဲ့ပြီး ယခင်နှစ်ထက် ၁၄ ရာခိုင်နှုန်း မြင့်တက်လာခဲ့ကြောင်း ကမ္ဘောဒီးယားနိုင်ငံ၊ အကောက်ခွန်နှင့် ယစ်မျိုးခွန် ဦးစီးဌာန (GDCE) ၏ ၁၀.၁၂.၂၀၂၅ ရက်နေ့တွင် ထုတ်ပြန်ခဲ့သော အစီရင်ခံစာတွင် ဖော်ပြထားသည်။ အစီရင်ခံစာအရ ကမ္ဘောဒီးယားနိုင်ငံအတွက် ထိပ်တန်းပို့ကုန်တင်ပို့သည့်နိုင်ငံ (၅) နိုင်ငံမှာ အမေရိကန်၊ ဗီယက်နမ်၊ တရုတ်၊ ဂျပန်နှင့် ကနေဒါတို့ဖြစ်သည်။ ၂၀၂၅ ခုနှစ် ဇန်နဝါရီလမှ နိုဝင်ဘာလအထိ ကမ္ဘောဒီးယားနိုင်ငံသို့ စုစုပေါင်း အမေရိကန်ဒေါ်လာ ၃၀.၆၅ ဘီလီယံ တင်သွင်းခဲ့ပြီး ယခင်နှစ်ကာလတူထက် ၁၈ ရာခိုင်နှုန်း မြင့်တက်လာခဲ့ကြောင်း အစီရင်ခံစာတွင် ဖော်ပြထားသည်။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ပြောရေးဆိုခွင့်ရှိသူ Penn Sovicheat က ဒေသတွင်း ဘက်စုံစီးပွားရေး မိတ်ဖက်အဖွဲ့(GDCE)၊ ကမ္ဘောဒီးယားနိုင်ငံ၏ တရုတ်၊ တောင်ကိုရီးယားနှင့် အာရပ်စော်ဘွားများပြည်ထောင်စုတို့နှင့် ပူးပေါင်းဆောင်ရွက်သော နှစ်နိုင်ငံလွတ်လပ်သော ကုန်သွယ်ရေးသဘောတူညီချက်များ (FTA) တို့သည် ကမ္ဘောဒီးယား၏ ကုန်သွယ်မှုတိုးတက်မှုကို အရှိန်အဟုန်မြှင့်တင်ပေးခဲ့ကြောင်း ပြောကြားခဲ့ပါသည်။

Source: Khmer Times                                                        

DOCA(ရန်ကုန်)

          ဘရာဇီးနိုင်ငံသည် အိမ်နီးချင်းနိုင်ငံဖြစ်သော အိန္ဒိယနိုင်ငံကို ကျော်လွန်၍ ကမ္ဘာ့ဝါဂွမ်း အများဆုံးတင်သွင်းသည့် နိုင်ငံများထဲမှ တစ်နိုင်ငံဖြစ်သည့် ဘင်္ဂလားဒေ့ရှ်နိုင်ငံ၏ အဓိက ဝါဂွမ်းတင်သွင်းသည့်နိုင်ငံဖြစ်လာကြောင်း အမေရိကန်နိုင်ငံစိုက်ပျိုးရေးဦးစီးဌာန (USDA) ၏ ထုတ်ပြန် ချက်အရ သိရပါသည်။ ဈေးကွက်နှစ် ၂၀၂၄-၂၀၂၅ ခုနှစ်အတွင်း ဩဂုတ်လအစတွင် ဘင်္ဂလားဒေ့ရှ် နိုင်ငံသည် ချည်စိမ်းအထုပ်ရေ ၈.၂၈ သန်းခန့် တင်သွင်းခဲ့ကြောင်း သိရပါသည်။ ဘရာဇီးနိုင်ငံသည် ဘင်္ဂလားဒေ့ရှ်နိုင်ငံသို့ ချည်စိမ်းအထုပ်ရေ ၁.၉ သန်းခန့် တင်ပို့ခဲ့ကြောင်းနှင့် ၎င်းပမာဏသည် တင်သွင်းမှုစုစုပေါင်း၏ ၂၃ ရာခိုင်နှုန်းခန့်ဖြစ်ကြောင်း သိရပါသည်။ အိန္ဒိယနိုင်ငံသည်လည်း ဘင်္ဂလားဒေ့ရှ်နိုင်ငံသို့ ချည်စိမ်းအထုပ်‌ရေ ၁.၄ သန်းခန့် တင်ပို့ခဲ့ပြီး ဒုတိယအများဆုံးတင်ပို့ သည့်နိုင်ငံဖြစ်ကြောင်း သိရပါသည်။ USDA၏ အစီရင်ခံစာအရ ဘရားဇီးနိုင်ငံမှ တင်ပို့သော ဝါဂွမ်းများသည် ဘင်္ဂလားဒေ့ရှ်နိုင်ငံ ဝါဂွမ်းကြိတ်စက်များအကြားတွင် ၎င်း၏ ‌ဈေးနှုန်းသက်သာမှုကြောင့် ရေပန်းစားလျက်ရှိကြောင်း သိရပါသည်။ လက်ရှိဈေးကွက်နှစ် ၂၀၂၆ ခုနှစ်အတွက် USDA က ဘင်္ဂလားဒေ့ရှ်နိုင်ငံသည် ဝါဂွမ်းအထုပ်ရေ ၈.၄ သန်းခန့်တင်သွင်းလိမ့်မည်ဖြစ်ကြောင်း ယခင် ‌ဈေးကွက်နှစ် ၂၀၂၅ ခုနှစ် MY 25 ထက် ၁.၄ ရာခိုင်နှုန်းခန့်မြင့်တက်လာနိုင်ကြောင်း ခန့်မှန်းချက်အားထုတ်ပြန်ကြေညာခဲ့ပါသည်။ ပြည်တွင်းတွင် ဝါဂွမ်းများကို ၄၅၀၀မှ၄၆၀၀ ဟက်တာဧကအတွင်းသာ စိုက်ပျိုးလျက်ရှိသည့်အတွက် တစ်နှစ်ပတ်လုံးဝါဂွမ်းထုတ်လုပ်မှုသည် အထုပ်‌ရ ၁၅၃၀၀၀ ခန့်သာရှိကြောင်း သိရပါသည်။ ဘင်္ဂလား‌ဒေ့ရှ်နိုင်ငံ အထည်အလိပ်လုပ်ငန်း၏ တစ်နှစ်ပတ်လုံး ဝါဂွမ်းသုံးစွဲမှုသည် အထုပ်ရေ ၁၅ သန်းခန့်ရှိသဖြင့် နိုင်ငံခြားမှ တင်ပို့သော ဝါဂွမ်းများကိုသာ မှီခိုနေရကြောင်း သိရပါသည်။ ဝါဂွမ်းကြိတ်ဆက်လုပ်ငန်းသည် ချည်စိမ်းများကို အသုံးပြု၍ ချည်လုံးနှင် ချည်မျှင်များကို ယခင်တန်ချိန် ၁.၇ သန်းခန့် ထုတ်လုပ်ရာမှ ၂၀၂၆ ခုနှစ်တွင် တန်ချိန် ၁.၉ သန်းခန့်ထုတ်လုပ်မှု တိုးမြှင့်မည်ဖြစ်ကြောင်း သိရပါသည်။ ချည်စိမ်းတင်သွင်းမှုများ မြင့်တက်နေသော်လည်း ဘင်္ဂလား‌ဒေ့ရှ်နိုင်ငံ အသင့်ဝတ် အဝတ်အစား ထုတ်လုပ်သည့်လုပ်ငန်းသည် ချည်မျှင်နှင့်အထည်များ ပိုမိုတင်သွင်းရန် မျှော်မှန်းလျက်ရှိကြောင်း သိရပါသည်။ ဘင်္ဂလားနိုင်ငံသို့ ချည်မျှင်အများဆုံးတင်ပို့သည့် နိုင်ငံသည် အိန္ဒိယနိုင်ငံဖြစ်ပြီး အဆို တင်ပို့မှုများပြားခြင်းသည် ၎င်းနိုင်ငံ၏ ကြီးမားသော ဝါကြိတ်ဆက်များရှိနေခြင်းကြောင့်ဖြစ်ပြီး အထည်တင်ပို့မှုအများဆုံး နိုင်ငံသည် တရုတ်နိုင်ငံဖြစ်ကြောင်း သိရှိရပါသည်။

Source: The Daily Star                                                              

DOCA (ရန်ကုန်)

          အစ္စရေးနိုင်ငံဆိုင်ရာဗီယက်နမ်သံရုံ၏ ကုန်သွယ်ရေးအတိုင်ပင်ခံဖြစ်သူ Le Thai Hoa သည် ပူးပေါင်းဆောင်ရွက်မှုအခွင့်အလမ်းများကိုရှာဖွေရန်၊ နည်းပညာသစ်များကိုလေ့လာရန်နှင့် နှစ်နိုင်ငံအကြားစိုက်ပျိုးမွေးမြူရေးကဏ္ဍတွင် ကုန်သွယ်ရေးဆက်နွယ်မှုမြှင့်တင်ရန်အတွက် အစ္စရေးနိုင်ငံတောင်ပိုင်းရှိ Ofakim မြို့တော်တွင် ဒီဇင်ဘာလ ၈ ရက်နေ့နှင့် ၉ ရက်နေ့က ကျင်းပခဲ့သည့် ၂၀၂၅ ခုနှစ် Agro-Mashov ပြပွဲကိုတက်ရောက်ခဲ့ကြောင်း သိရပါသည်။ ယခုနှစ်သည် အစ္စရေး၏ အကြီးမားဆုံးစိုက်ပျိုးမွေးမြူရေးပွဲအခမ်းအနားများထဲမှ တစ်ခုဖြစ်သည့် Agro-Mashov ၏ ၃၄ ကြိမ်မြောက် အခမ်းအနားဖြစ်ကြောင်း သိရပါသည်။ ထိုပြပွဲကို အစ္စရေးနှင့် ကမ္ဘာတစ်ဝှမ်းမှ စိုက်ပျိုး‌ရေးသမားများ၊ စီးပွားရေးသမားများ၊ သုတေသနသမားများနှင့် ကျွမ်းကျင်ပညာရှင်များတက်ရောက်ခဲ့ကြောင်း သိရပါသည်။ ထိုပြပွဲသည် စိုက်ပျိုးရေးတန်ဖိုး ကွင်းဆက်၏ များစွာသောကဏ္ဍများမှ လည်ပတ်သူထောင်ဂဏန်းကျော်ကို ဆွဲဆောင်နိုင်ရန် မျှော်မှန်းရကြောင်း သိရပါသည်။ ၎င်းပြပွဲသည် စီးပွားရေးလုပ်ငန်းများက လုပ်ငန်းနယ်ပယ်၏ နောက်ဆုံးဦးတည်ရာကိုသိရှိရန်၊ မိတ်ဖက်ဖွဲ့မှုများပြုလုပ်ရန်နှင့် ရင်းနှီးမြှုပ်နှံမှုအခွင့်အလမ်း များကိုရှာဖွေရန် ဘက်ပေါင်းဆုံကွန်ယက်ချိတ်ဆက်မှုစင်မြင့်တစ်ခုဖြစ်ခဲ့ကြောင်း သိရပါသည်။ လည်ပတ်သူများသည် စိုက်ပျိုးရေးဒရုန်းများ၊ ဒစ်ဂျစ်တယ်ပရိုဂရမ်များ၊ စက်ပစ္စည်းများ၊ ကောက်ရိတ်သိမ်းသည့်မျိုးကွဲသစ်များ၊ ဖန်လုံအိမ်စနစ်များ၊ ထုတ်ပိုးမှုနည်းပညာများ၊ ထောက်ပံ့ ပို့ဆောင်ရေးဖြေရှင်းချက်များနှင့် မွေးမြူရေးနှင့် ရေလုပ်ငန်းတွင်ဆန်းသစ်တီထွင်မှုများပါဝင်သည့် ကျယ်ပြန့်သောအဆင့်မြင့်နည်းပညာနှင့် စက်ပစ္စည်းများကိုရှာဖွေရန်အခွင့်အလမ်းများကို ပိုင်ဆိုင်ခဲ့ကြောင်း သိရပါသည်။ ထို့ပြင်ပြပွဲတွင် များစွာသောကွန်းဖရန့်များ၊ အလုပ်ရုံဆွေးနွေးပွဲများနှင့် အတွေ့အကြုံဝေမျှသည့် အစည်းအဝေးများကျင်းပခဲ့ကြောင်း သိရပါသည်။ ဆွေးနွေးမှုများတွင် စိုက်ပျိုးမွေးမြူရေးဆိုင်ရာဈေးကွက်တင်ခြင်း၊ ဈေးကွက်ဖွံ့ဖြိုးတိုးတက်ရေး၊ ဒေတာပရိုဂရမ်များ၊ ဘဏ္ဍာရေးစီမံခန့်ခွဲမှုနှင့် အနုစိတ်နည်းပညာများပါဝင်ကြောင်း သိရပါသည်။ နှစ်ရက်တာကျင်းပခဲ့သည့်ပြပွဲအတွင်း တက်ရောက်လည်ပတ်သူများသည် ပြခန်းများတွင် ခင်းကျင်းပြသထားသည့် နောက်ဆုံးပေါ်သစ်သီးနှင့် ဟင်းသီးဟင်းရွက်မျိုးကွဲများကို စမ်းသပ်ရန်အခွင့်အလမ်းရရှိခဲ့ပြီး အဆင့်မြင့်စိုက်ပျိုးမွေးမြူရေးနည်းပညာများနှင့် ဖြေရှင်းချက်များကိုလေ့လာခဲ့ကြကြောင်း သိရှိရပါသည်။

Vietnam Plus                                                                            

DOCA (ရန်ကုန်)