ပြည်ပကုန်သွယ်မှုသတင်းများ

             ဗီယက်နမ်မော်တော်ကားထုတ်လုပ်သူများအသင်း (VAMA) က ၎င်း၏အဖွဲ့ဝင်များသည် မေလတွင် ကားအစီးရေ ၂၉၂၁၀ စီး ရောင်းချခဲ့ရပြီး ဧပြီလနှင့်နှိုင်းယှဉ်ပါက ၁ ရာခိုင်နှုန်းကျဆင်း ခဲ့သော်လည်း ၂၀၂၄ ခုနှစ် မေလနှင့်နှိုင်းယှဉ်ပါက ၁၃ ရာခိုင်နှုန်းမြင့်တက်ခဲ့ကြောင်း ဇွန်လ ၁၁ ရက်နေ့က တင်ပြခဲ့ပါသည်။ ထိုရောင်းချရမှုထဲတွင် Passenger ကားရောင်းချရမှုမှာ အစီးရေ ၂၀၀၁၄ စီး၊ commercial ကားရောင်းချရမှုမှာ အစီးရေ ၈၉၈၃ စီးနှင့် special-purpose ကားများရောင်းချရမှုမှာ အစီးရေ ၂၁၃ စီးရှိကြောင်း သိရပါသည်။ passenger ကားရောင်းချရမှုမှာ ဧပြီလနှင့်နှိုင်းယှဉ်ပါက ၃.၆ ရာခိုင်နှုန်းကျဆင်းခဲ့ပြီး commercial ကားရောင်းချရမှုမှာ ၄ ရာခိုင်နှုန်းမြင့်တက်ခဲ့ကာ Special-purpose ကားရောင်းချရမှုမှာ ၆ ရာခိုင်နှုန်းမြင့်တက်ခဲ့ကြောင်း သိရပါသည်။ ပြည်တွင်း၌တပ်ဆင်သည့်ကားရောင်းချရမှုမှာ အစီးရေ ၁၃၈၀၀ စီးဖြင့် ဧပြီလထက် ၁ ရာခိုင်နှုန်းကျဆင်းခဲ့ပြီး တင်သွင်းလာသည့် Completely build-up ကားများရောင်းချရမှုမှာ အစီးရေ ၁၅၄၁၀ စီးဖြင့် ဧပြီလထက် ၂ ရာခိုင်နှုန်းကျဆင်းခဲ့ကြောင်း သိရပါသည်။ ၂၀၂၅ ခုနှစ် ပထမ ၅ လတာကာလတွင် VAMA အဖွဲ့ဝင်ကုမ္ပဏီများ၏ ကားရောင်းချရမှုမှာ အစီးရေ ၁၀၄၇၈၀ စီးရှိခဲ့ပြီး ၂၀၂၄ ခုနှစ် တူညီသည့်ကာလထက် ၁၂ ရာခိုင်နှုန်းမြင့်တက်ခဲ့ကြောင်း သိရပါသည်။ ၂၀၂၄ ခုနှစ် ပထမ ၅ လတာကာလနှင့်နှိုင်းယှဉ်ပါက ယခုနှစ်ပထမ ၅ လတာကာလတွင် passenger ကားရောင်းချရမှုမှာ ၇ ရာခိုင်နှုန်း၊ commercial ကားရောင်းချရမှုမှာ ၂၀ ရာခိုင်နှုန်း၊ special-purpose ကားရောင်းချရမှုမှာ ၄ ရာခိုင်နှုန်းနှင့် Hybrid ကားများရောင်းချရမှုမှာ ၅၇ ရာခိုင်နှုန်းမြင့်တက်ခဲ့ကြောင်း သိရပါသည်။ ပြည်တွင်း၌တပ်ဆင်သည့်ကားများရောင်းချရမှုမှာ ၁၃ ရာခိုင်နှုန်းမြင့်တက်ခဲ့ပြီး တင်သွင်းလာသည့်ကားများရောင်းချရမှုမှာ ၂၉ ရာခိုင်နှုန်းမြင့်တက် ခဲ့ကြောင်း သိရပါသည်။ ကားလုပ်ငန်းနယ်ပယ်မှကျွမ်းကျင်ပညာရှင်များက ၂၀၂၅ ခုနှစ်တွင် ဗီယက်နမ်၏ ကားရောင်းချရမှုသည် အစီးရေ ၂၅၀၀၀၀ မှ ၂၆၀၀၀၀ ကြားရှိနိုင်ပြီး ၂၀၂၄ ခုနှစ်နှင့်နှိုင်းယှဉ်ပါက ၁၀ မှ ၁၂ ရာခိုင်နှုန်းကြားမြင့်တက်နိုင်ကြောင်း ခန့်မှန်း ခဲ့ကြပါသည်။

VietnamPlus                                                                             DOCA (ရန်ကုန်)

      ကမ္ဘောဒီးယားဆန်စပါးအသင်းချုပ် (Cambodia Rice Federation - CRF) ၏ ၁၀ နှစ်ပြည့် နှစ်ပတ်လည်အခမ်းအနားကို ဇွန် ၁၆ ရက်နေ့၌ ကျင်းပရာတွင် အဖွင့်အမှာစကားပြောကြားရာ၌ စီးပွားရေးနှင့်ကူးသန်းရောင်းဝယ်ရေးဝန်ကြီး Mrs. Cham Nimul က နိုင်ငံ၏ ဆန်စပါးကဏ္ဍကို နိုင်ငံတကာနှင့် ယှဉ်ပြိုင်နိုင်စွမ်း တိုးတက်ကောင်းမွန်စေရန်နှင့် ဆက်လက်၍ အောင်မြင်ကြီးပွားမှု သေချာခိုင်မာစေရန်အတွက် အဓိကအရေးပါသော မဟာဗျူဟာလုပ်ငန်းစဉ် ၅ ရပ်ကို အကြံပြု ဖော်ပြခဲ့ကြောင်း သိရှိရသည်။

   ပထမအချက်မှာ ရင်းနှီးမြှုပ်နှံသူများအား ပိုမိုဆွဲဆောင်နိုင်မည့် အလားအလာများကို ဆန်းစစ်ဖော်ထုတ်မှုနှင့်အတူ ပြည်တွင်းဈေးကွက်လိုအပ်ချက်ကို ဖြည့်ဆည်းရန်နှင့် ကမ္ဘောဒီးယား ဆန်၏ နိုင်ငံတကာ၌ ယှဉ်ပြိုင်နိုင်စွမ်းကို မြှင့်တင်ရန်အတွက် ဆန်စပါးထုတ်လုပ်မှုကွင်းဆက်၌ တန်ဖိုးမြင့်ထုတ်ကုန်များ ထုတ်လုပ်မှုကို ကောင်းမွန်အောင် ဆောင်ရွက်ခြင်းဖြစ်သည်။

   ဒုတိယလုပ်ငန်းစဉ်သည် စီးပွားရေးလုပ်ငန်းများကို ဥပဒေများ၊ ကျင့်ဝတ်များနှင့်အညီ လုပ်ကိုင်လျက် ဆန်စပါးလုပ်ငန်းတွင် ပါဝင်လုပ်ဆောင်နေသူများ၏ အကျိုးစီးပွားကို ကာကွယ်ရန် နှင့် ပြည်တွင်း ပြည်ပဈေးကွက်များ၌ ကမ္ဘောဒီးယားဆန်၏ ယုံကြည်စိတ်ချရမှုကို မြှင့်တင်ရန်ပင် ဖြစ်သည်။

   တတိယအချက်အဖြစ် ဉာဏပစ္စည်းပိုင်ဆိုင်မှုနှင့် အမှတ်တံဆိပ်များအား အကာအကွယ် ပေးခြင်းနှင့် မြှင့်တင်ခြင်းတို့တွင် ပါဝင်ဆောင်ရွက်ရန်ဖြစ်ကြောင်း၊ ထိုသို့ လုပ်ဆောင်ရာ၌ ထုတ် ကုန်၏ အရေအတွက်၊ အရည်အသွေး၊ ဘေးအန္တရာယ်ကင်းရှင်းမှုနှင့် ထုပ်ပိုးမှုအသွင်အပြင်တို့ကို သတ်မှတ်စံချိန်စံညွှန်းများနှင့်ကိုက်ညီစေရမည်ဖြစ်ပြီး သို့မှသာ ကမ္ဘောဒီးယားဆန်၏ဂုဏ်သတင်း ကို ထိန်းသိမ်းလျက် ရေရှည်တည့်တံ့သော ပို့ကုန်အဖြစ် မြှင့်တင်နိုင်မည်ဖြစ်ကြောင်း  Mrs. Nimul က ပြောကြားထားသည်။

   စတုတ္တလုပ်ငန်းစဉ်အဖြစ် ကမ္ဘောဒီးယား စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန ရှိ သက်ဆိုင်ရာဦးစီးဌာနများ၊ အထူးသဖြင့် Green Trade ကုမ္ပဏီ၊ ပို့ကုန်မြှင့်တင်ရေးအဖွဲ့တို့နှင့် ပူးပေါင်းလျက် အရည်အသွေးနှင့် စွမ်းဆောင်ရည် မြှင့်တင်ရေး အစီအမံများကို အကောင်အထည် ဖော်ဆောင်ရွက်ခြင်းဖြင့် တည်ရှိပြီးဈေးကွက်များကို ခိုင်မာစေရန်နှင့် ဈေးကွက်အသစ်များ တိုးချဲ့ ရန် CRF အသင်းချုပ်နှင့် ဆန်စပါးလုပ်ငန်းရှင်များသို့ အကြံပြုထားကြောင်း သိရသည်။

    ပဉ္စမအချက်အဖြစ် CRF အသင်းချုပ်ရှိ ဥက္ကဋ္ဌနှင့် အမှုဆောင်အဖွဲ့ဝင်သစ်များကို မကြာမီ ကာလ၌ ရွေးချယ်တင်မြှောက်ခြင်းနှင့် ဆက်စပ်လျက် အသင်းချုပ်၏ ဖွဲ့စည်းပုံစည်းမျဉ်းစည်းကမ်းများ၊ လုပ်ငန်းဆောင်ရွက်မှုစနစ်နှင့် လုပ်ထုံးလုပ်နည်းများ၊ လုပ်ငန်းစဉ်များကိုလည်း ခေတ်မီ အောင် ဆောင်ရွက်ရမည်ဖြစ်ကြောင်း ဝန်ကြီး Mrs. Cham Nimul က ပြောဆိုခဲ့သည်။

          ကမ္ဘောဒီးယားအစိုးရ၊ CRF အသင်းချုပ်၊ ဖွံ့ဖြိုးရေးမိတ်ဖက်အဖွဲ့အစည်းများနှင့် ဆန်စပါး လုပ်ငန်းနယ်ပယ်ရှိ အခြားသက်ဆိုင်သူများ ပူးပေါင်းကြိုးပမ်းအားထုတ်မှု၏ ရလဒ်အဖြစ် ကမ္ဘော ဒီးယားနိုင်ငံသည် ဆန်စပါးပိုလျှံစွာထုတ်လုပ်လျက် ပြည်ပသို့တင်ပို့သည့် နိုင်ငံဖြစ်လာခဲ့ကြောင်း၊ ဝန်ကြီးဌာန အနေဖြင့် တရုတ်နိုင်ငံသို့ ကြိတ်ခွဲပြီးဆန်တန်ချိန် ၅၀၀၀၀၀ တင်ပို့ရန် နားလည်မှု စာချွန်လွှာကို ၂၀၂၅ ခုနှစ်အတွင်း လက်မှတ်ရေးထိုးနိုင်ခဲ့ကြောင်း၊ နိုင်ငံပိုင် Green Trade ကုမ္ပဏီ သည်လည်း အင်ဒိုနီးရှားသို့ ဆန်တန်ချိန် ၃၇၅၀၀ နှင့် တီမောလက်စ်သို့ ဆန်တန်ချိန် ၄၀၀၀ တင်ပို့ရန် စာချုပ်ချုပ်ဆိုနိုင်ခဲ့ကြောင်း ၎င်းက ပြောကြားခဲ့သည်။

    ကမ္ဘောဒီးယားနိုင်ငံ အနေဖြင့် ၂၀၂၄ ခုနှစ်တွင် ပြည်ပသို့ ဆန်တန်ချိန် ၆၅၁၀၀၀ နှင့် စပါးတန်ချိန် ၅.၁ သန်းခန့် တင်ပို့လျက် ဝင်ငွေ အမေရိကန်ဒေါ်လာ ၁.၉၈ ဘီလီယံကျော် ရရှိခဲ့ ကြောင်း သိရှိရသည်။

Source: Khmer Times, June 18, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     မကြာသေးမီ လများအတွင်း၌ ဆန်များလိမ်လည်ရောင်းချသည့် ၀က်ဘ်ဆိုက်များအပေါ်  ဂျပန်နိုင်ငံရှိ စားသုံးသူများအနေဖြင့် ဆွေးနွေးပြောကြားမှုများ မြင့်တက်လာခဲ့ကြောင်းနှင့် ဆန် ဈေးနှုန်း မြင့်တက်လျက်ရှိချိန်တွင် ထိုကဲ့သို့သော ၀က်ဘ်ဆိုက်လိမ်လည်မှုများ ပိုမိုတိုးလာနိုင်သည်ဟု စားသုံးသူရေးရာအေဂျင်စီက သတိပေးထားကြောင်း သိရှိရပါသည်။

     နိုင်ငံတစ်ဝန်းရှိ စားသုံးသူရေးရာစင်တာများသို့ လိမ်လည်လှည့်ဖြားသည့် အွန်လိုင်းဆန်ဆိုင်များနှင့် ပတ်သက်၍ တိုင်ကြားမှုများသည် ဧပြီလနှင့်မေလအတွင်း ၃၃၅ မှုအထိ မြင့်တက်ခဲ့ ပြီး ၂၀၂၄ ဘဏ္ဍာနှစ် တစ်ခုလုံးတွင် လက်ခံရရှိခဲ့သော တိုင်ကြားမှုပေါင်း ၃၃၇ မှုနှင့် တန်းတူ အခြေအနေသို့ ရောက်ရှိလာကြောင်း သိရပါသည်။

    တိုင်ကြားမှုတစ်ခု၌ စားသုံးသူတစ်ဦးသည် အကြွေးဝယ်ကတ်ဖြင့် ငွေပေးချေမှုအား အသုံး ပြုခဲ့ပြီး ဝယ်ယူမှုအတွက် အတည်ပြုချက်အီးမေးလ်ကို မရရှိသဖြင့် ဆန်အရောင်းဝက်ဘ်ဆိုက်တွင် မှာယူမှုကို ပယ်ဖျက်ရန်ကြိုးပမ်းခဲ့သော်လည်း ပယ်ဖျက်၍ မရခဲ့ကြောင်း အစီရင်ခံတင်ပြလာခဲ့ပြီး အခြားတိုင်ကြားမှု တစ်ခုတွင်လည်း ဆန်ဝယ်ယူမှုပြေစာအစား နေကာမျက်မှန် ဝယ်ယူမှု အတွက် ပြေစာတစ်ခုကိုသာ လက်ခံရရရှိခဲ့သည်ဟု စားသုံးသူတစ်ဦးက တင်ပြထားကြောင်း သိရှိရပါသည်။

   ထိုသို့ လိမ်လည်လှည့်ဖြားသည့် ဝက်ဘ်ဆိုက်များကို ခွဲခြားသိရှိနိုင်ရန်အတွက် ဖော်ပြထား သောစျေးနှုန်းများသည် သံသယဖြစ်ဖွယ်ရာအဆင့်အထိ နိမ့်ကျမှု ရှိမရှိနှင့် ကုမ္ပဏီ၏ ဆက်သွယ် နိုင်မည့် အချက်အလက်များအား မှန်ကန်စွာ ဖော်ပြထားခြင်းရှိမရှိတို့ကို ဂရုတစိုက်စစ်ဆေးရန် အရေးကြီးကြောင်း ဂျပန်နိုင်ငံ အမျိုးသားစားသုံးသူရေးရာစင်တာက ပြောကြားထားပါသည်။

   အွန်လိုင်းမှဝယ်ယူမှုများအတွက် နောက်ဆုံးအဆင့် အတည်ပြုချက်ပေးသည့် စာမျက်နှာ များ၏ ဖန်သားပြင်ဓာတ်ပုံ (Screenshots) များကို သိမ်းဆည်းခြင်းသည် ဖြစ်ပေါ်လာနိုင်သည့် ပြဿနာများအတွက် ပြင်ဆင်ရာတွင် ထိရောက်မှု ရှိနိုင်ကြောင်းနှင့် အစိုးရမှ သိုလှောင်ထားသော ဆန်များကို အများပြည်သူသို့ စတင်ရောင်းချခဲ့ပြီးနောက်ပိုင်း၌ အတုအယောင် အရောင်းဝက်ဘ် ဆိုက်များ တိုးပွားလာဖွယ်ရှိကြောင်း စားသုံးသူရေးရာ အေဂျင်စီက ပြောကြားခဲ့ပါသည်။ ယုံကြည် စိတ်ချရသည့် အရောင်း ဝက်ဘ်ဆိုက်များ ဟုတ်မဟုတ်ကို စားသုံးသူများအနေဖြင့် ဂရုတစိုက် စစ်ဆေးနိုင်လိမ့်မည်ဟု မျှော်လင့်ကြောင်း ပြီးခဲ့သည့်ရက်သတ္တပတ် သတင်းစာရှင်းလင်းပွဲတွင် အဆိုပါအေဂျင်စီ၏ ကော်မရှင်နာ Yutaka Arai က ပြောကြားခဲ့ပါသည်။

Source: The Nation Thailand, 14 June 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     အမေရိကန်နိုင်ငံ၌ ရှေ့လာမည့်နှစ်တွင် ပဲပုပ်ဆီကို ဓာတ်ဆီ၊ ဒီဇယ်တို့နှင့် ရောနှော၍ ဇီဝလောင်စာဆီများအဖြစ် စံချိန်တင်ပမာဏတစ်ခုအထိ အသုံးပြုရေး ဆီသန့်စင်သည့်လုပ်ငန်းရှင် များအား ခွင့်ပြုပေးရန် အစိုးရက အဆိုပြုခဲ့ခြင်းကြောင့် ပဲပုပ်ဆီဈေးနှုန်း မြင့်တက်မှု၏ နောက်သို့ လိုက်ပါလျက် စားအုန်းဆီဈေးနှုန်းများသည်လည်း တစ်တန်လျှင် မလေးရှားရင်းဂစ် ၄၀၀၀ နှုန်း၏ အထက်သို့ ခုန်တက်ခဲ့သည်ဟု The Edge Malaysia သတင်းဌာနက ဖော်ပြထားသည်။

   ဇွန်လ ၁၃ ရက်နေ့တွင် သဘာဝပတ်ဝန်းကျင် ကာကွယ်ရေးအေဂျင်စီက တင်ပြခဲ့သော နှစ်ကြာရှည်စွာစောင့်ဆိုင်းခဲ့ရသည့် အဆိုပါအစီအစဉ်သည် အမေရိကန်၏ ဇီဝလောင်စာဆီ ထုတ် လုပ်မှုကို မြှင့်တင်ရန်နှင့် လောင်စာဆီတင်သွင်းမှုကို လျှော့ချရန် ရည်ရွယ်ကြောင်း၊  ဆီသန့်စင်ရေး လုပ်ငန်းရှင်များအနေဖြင့် သမားရိုးကျ ဒီဇယ်၊ ဓာတ်ဆီတို့နှင့် ရောနှောပြီး ဇီဝလောင်စာဆီ ထုတ် လုပ်ရန်အတွက် ပဲပုပ်ဆီ ဂါလံပေါင်း ၂၄.၀၂ ဘီလီယံ လိုအပ်မည်ဖြစ်ကြောင်းနှင့် ၎င်းပမာဏသည် ၂၀၂၅ ခုနှစ်အတွက် လျာထားသည့်ပမာဏထက် ၈ ရာခိုင်နှုန်းမြင့်မားပြီး လေ့လာသူအများအပြား က မျှော်လင့်ထားသည်ထက် ပိုမိုများပြားနေကြောင်း သိရှိရပါသည်။

   ဇီဝဒီဇယ်ဆီ ထုတ်လုပ်ရန်ခွင့်ပြုချက်သည် အမေရိကန်နိုင်ငံ၏ စားသုံးဆီသုံးစွဲမှု ရေရှည် တည်တံ့ခြင်းကို ကူညီထောက်ပံ့ပေးမည်ဖြစ်ရာ ယင်းအဆိုပြုချက်က  စားသုံးဆီ ဝယ်လိုအားနှင့် စားအုန်းဆီကြမ်းစျေးနှုန်းများကို အထောက်အပံ့ဖြစ်စေကြောင်း CIMB Securities ငွေကြေးနှင့် ရင်းနှီးမြှုပ်နှံမှု အကျိုးဆောင်အဖွဲ့မှ လေ့လာသုံးသပ်သူ Ms. Ivy Ng Lee Fang နှင့် Ms. Lim Yue Jia တို့က မှတ်ချက်ပြုပြောကြားခဲ့သည်။

    ချီကာဂိုပဲပုပ်ဆီသည် ဇွန် ၁၃ ရက်၌ ၆ ရာခိုင်နှုန်းကျော် ဈေးနှုန်းမြင့်တက်ပြီးနောက် ဇွန် ၁၆ ရက်တွင် ထပ်မံမြင့်တက်လာရာ သုံးနှစ်တာ ကာလတစ်လျောက် နှစ်ရက်တာအတွင်း အကြီးမားဆုံး ဈေးနှုန်းခုန်တက်မှု ဖြစ်ပေါ်ခဲ့ပြီး မလေးရှားနိုင်ငံ၊ ကွာလာလမ်ပူတွင်လည်း စားအုန်းဆီ ကြိုတင်အရောင်းဈေးနှုန်းများသည် ၄.၁ ရာခိုင်နှုန်းအထိ မြင့်တက်လာခဲ့သည်။

    အရှေ့အလယ်ပိုင်းဒေသတွင် ပဋိပက္ခဖြစ်ပေါ်ခြင်းကြောင့် ရေနံစိမ်းဈေးနှုန်းမြင့်တက်ခြင်း ကလည်း စားအုန်းဆီဈေးနှုန်းကို အတက်အကျဖြစ်စေသည်။ ကမ္ဘာတစ်ဝန်းဖြစ်ပေါ်သော စံပြု Brent ရေနံစိမ်း ဈေးနှုန်းများသည် ဇွန် ၁၃ ရက်နေ့၌ ၇ ရာခိုင်နှုန်း မြင့်တက်လာပြီးနောက် ဇွန် ၁၆ ရက်တွင် ဆက်လက်မြင့်တက်ခဲ့သည်။ ကမ္ဘာ့ရေနံစိမ်း ထုတ်လုပ်မှု၏ သုံးပုံတစ်ပုံခန့်ကို ထောက်ပံ့ ပေးနေသည့် အဆိုပါဒေသ၌ စွမ်းအင်အခြေခံအဆောက်အအုံနှင့် ပင်လယ်ရေကြောင်းပို့ဆောင်မှုတို့အပေါ် တိုက်ခိုက်မှုများ ဖြစ်ပေါ်လာမည့်အရေးကို ရင်းနှီးမြှုပ်နှံသူများအနေဖြင့် အားတင်း ဆောင်ရွက်နေကြရသည်။

   အရှေ့အလယ်ပိုင်းဒေသ၌ ပဋိပက္ခ အရှိန်မြင့်တက်မှုက ရေနံထောက်ပံ့မှုကို နှောင့်ယှက် နိုင်ပြီး စွမ်းအင်ဆိုင်ရာစျေးနှုန်းများ မြင့်မားလာစေကာ စားအုန်းဆီထုတ်လုပ်မှု ကုန်ကျစရိတ်နှင့် ဇီဝလောင်စာဆီ ၀ယ်လိုအားတို့ကို ပိုမိုလာစေကြောင်းနှင့် ရေနံစိမ်းဈေးနှုန်းများ မြင့်တက်ပြီး ဇီဝလောင်စာဆီ၏ ဈေးနှုန်းအရ ပိုမိုယှဉ်ပြိုင်နိုင်စွမ်း ရှိလာချိန်၌ ရေနံအခြေခံလောင်စာဆီအပေါ် ၀ယ်လိုအားသည် ဇီဝလောင်စာဘက်သို့ မကြာခဏ ပြောင်းရွှေ့လာလေ့ရှိကြောင်းဖြင့် ငွေကြေး ကုမ္ပဏီတစ်ခုဖြစ်သည့် Phillip Nova Pte မှ ကုန်စည်ဆိုင်ရာ မဟာဗျူဟာပညာရှင် Mr. Darren Lim က မှတ်ချက်ပြုပြောကြားခဲ့သည်ဟု သတင်းရရှိပါသည်။

Source: The Edge Malaysia, 16^th Jun 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

              ယခုနှစ်၏ ပထမ ၅ လတာကာလတွင် အာဆီယံအဖွဲ့ဝင်နိုင်ငံများနှင့် ကမ္ဘောဒီးယား၏ ကုန်သွယ်မှုတန်ဖိုးမှာ အမေရိကန်ဒေါ်လာ ၇.၂ ဘီလီယံတန်ဖိုးရှိခဲ့ပြီး ၂၀၂၄ ခုနှစ်တူညီသည့် ကာလနှင့်နှိုင်းယှဉ်ပါက ၅.၅ ရာခိုင်နှုန်းမြင့်တက်ခဲ့ကြောင်း စီးပွားကူးသန်းဝန်ကြီးဌာန၏ ဇွန်လ ၁၆ ရက်နေ့ကထုတ်ပြန်ချက်အရ သိရပါသည်။ ထို ၅ လတာကာလအတွင်းကမ္ဘောဒီးယားသည် အာဆီယံနိုင်ငံများသို့ အမေရိကန်ဒေါ်လာ ၂.၇ ဘီလီယံတန်ဖိုးရှိသောကုန်ပစ္စည်းများတင်ပို့ခဲ့ပြီး ယခင်နှစ်တူညီသည့်ကာလထက် ၁၀ ရာခိုင်နှုန်းမြင့်တက်ခဲ့ကြောင်း သိရပါသည်။ တစ်ချိန်တည်း မှာပင် နိုင်ငံသည် အမေရိကန်ဒေါ်လာ ၄.၅ ဘီလီယံတန်ဖိုးရှိသောကုန်ပစ္စည်းများကို အာဆီယံ ထံမှတင်သွင်းခဲ့ပြီး ယခင်နှစ်တူညီသည့်ကာလထက် ၃ ရာခိုင်နှုန်းမြင့်တက်ခဲ့ကြောင်း သိရပါ သည်။ ထိုကာလအတွင်း ကမ္ဘောဒီးယား၏ အာဆီယံအဖွဲ့ဝင်နိုင်ငံများနှင့် ကုန်သွယ်မှုပမာဏမှာ နိုင်ငံ၏ စုစုပေါင်းကုန်သွယ်မှုပမာဏ၏ ၂၈.၂ ရာခိုင်နှုန်းရှိကြောင်း သိရပါသည်။ အာဆီယံတွင် ကမ္ဘောဒီးယား၏အကြီးမားဆုံးကုန်သွယ်ဖက် ၅ နိုင်ငံမှာ ဗီယက်နမ်၊ ထိုင်း၊ အင်ဒိုနီးရှား၊ စင်ကာပူ နှင့် မလေးရှားတို့ဖြစ်ကြောင်း သိရပါသည်။ ကမ္ဘောဒီးယား-အာဆီယံစီးပွားရေး ညီလာခံ၌ ကမ္ဘောဒီးယားဝန်ကြီးချုပ် Hun Manet က အာဆီယံသည် ကမ္ဘာ့ ၅ ခုမြောက်စီးပွားရေး အကြီးမားဆုံးဆိုသည့် ၎င်း၏ဂုဏ်ပုဒ်နှင့်အတူ တည်ငြိမ်မှုနှင့် ချမ်းသာကြွယ်ဝမှု၏ ပုံရိပ်အဖြစ် တည်ထောင်လျှက်ရှိကြောင်းနှင့် ဒေသတွင်းဘက်ပေါင်းစုံစီးပွားရေးမိတ်ဖက်သဘောတူညီချက်သည် ဒေသတွင်းပေါင်းစပ်ဆောင်ရွက်မှုနက်ရှိုင်းရန်နှင့် အပြန်အလှန်အကျိုးရှိသော စီးပွားရေးနှင့် ကုန်သွယ်ရေးဆက်နွယ်မှု အရှိန်မြှင့်တင်ရန်အတွက် အာဆီယံ၏ ကတိကဝတ်ပြုမှုကို ဆက်လက်ခိုင်မာစေခဲ့ကြောင်း ပြောကြားခဲ့ပါသည်။

Khmer Times                                                                             DOCA (ရန်ကုန်)