ပြည်တွင်းကုန်သွယ်မှုသတင်း

မကွေးတိုင်းဒေသကြီး၊ မကွေးခရိုင်၊ မကွေးမြို့နယ်ရှိ ဘုရားပြို၊ ဝက်သိုက်၊ နွားကူး၊ သန်းတောကုန်း၊ မကြီးကန်၊ ဆားတိုင်ကန်စသည့်ကျေးရွာများသည် စိုက်ပျိုးရေးကိုအဓိကထား လုပ်ကိုင် ပြီး မြေပဲ၊ နှမ်း၊ ပဲစဉ်းငုံနှင့် အခြားစားဖိုဆောင်သုံးသီးနှံများကို ရာသီအလိုက်စိုက်ပျိုးကြကြောင်း၊ ဆားတိုင်ကန်ကျေးရွာ၌ မိုးနှမ်းကို ၂၀၂၅ခုနှစ်၊ မေလဆန်းမှစတင်၍ စိုက်ပျိုးထားကြောင်း သိရှိရသည်။ ဆားတိုင်ကန်ကျေးရွာနေ နှမ်းစိုက်တောင်သူတစ်ဦးက ၎င်းအနေဖြင့် နှမ်းနက်(၃)ဧကခန့်ကို ကြောင်းဆွဲအစေ့ချစနစ်ဖြင့် စိုက်ပျိုးထားကြောင်း၊ စိုက်ပျိုးပြီး ရက်ပေါင်း(၉၀)အကြာတွင် ရိတ်သိမ်း ရကြောင်း၊ မျိုးအနေဖြင့် သိပ္ပံနှမ်းနက်မျိုးကို အများဆုံးစိုက်ပျိုးပြီး (၁)ဧကလျှင် မျိုး(၃)ပြည်ခန့်ကုန် ကျကြောင်း၊ မျိုးကို နှမ်းစိုက်တောင်သူအချင်းချင်းဆီမှဝယ်ယူပြီး (၁)ပြည်လျှင် ကျပ်(၁၉၀၀၀) ပေးရ ကြောင်း၊ ကုန်ကျစရိတ်အနေဖြင့် ယခင်နှစ်က(၁)ဧကလျှင် မျိုးဖိုး၊ မြေပြုပြင်ခ၊ လုပ်အားခနှင့် အခြား သွင်းအားစု စရိတ်အပါအဝင် စုစုပေါင်း ကျပ်(၅၀၀၀၀၀)ခန့် ကုန်ကျသော်လည်း ယခုနှစ်တွင်မှု သွင်းအား စုစရိတ်မြင့်တက်လာ၍ ကျပ်(၆၀၀၀၀၀)ခန့်ကုန်ကျကြောင်း၊ အထွက်နှုန်းအနေဖြင့် ယခင် နှစ်က (၁)ဧကလျှင် တင်းရေ(၆)တင်းထိထွက်ရှိပြီး ဈေးနှုန်းအနေဖြင့် နှမ်းနက်(၁)တင်းလျှင် ကျပ် (၂၃၀၀၀၀) ထိဈေးရရှိ၍ အကျိုးအမြတ်အနေဖြင့် ကျပ်(၈၈၀၀၀၀)ထိရရှိခဲ့ကြောင်း၊ ဈေးကွက်အနေဖြင့် မကွေးမြို့ ရှိပွဲရုံများသို့ တင်ပို့ရောင်းချကြောင်း၊ ယခင်နှစ်က မိုးနှမ်းအနေဖြင့် နှမ်းနက်မှာ ရာသီဥတု သမမျှတ မှုနည်း၍ အထွက်နှုန်းလျော့နည်းခဲ့သော်လည်း ဈေးကောင်းရရှိသောကြောင့် စိုက်တောင်သူများ အနေဖြင့် ထိုက်သင့်သည့်အကျိုးအမြတ်ရရှိ၍ အဆင်ပြေပါကြောင်း၊ ယခုနှစ်တွင်မူ မိုးများ သော်လည်း ရေဝပ်မှုမရှိသည့်အတွက် နှမ်းပင်များအသေအပျောက်နည်း၍ စိုက်ခင်းမှာ အောင်မြင်ဖြစ်ထွန်းလျက် ရှိပြီး အထွက်နှုန်းအနေဖြင့် (၁၀)တင်းမှ (၁၂)တင်းကြားထွက်ရှိနိုင်မည်ဟု ခန့်မှန်းပါကြောင်း၊ ယခု၂၀၂၅ ခုနှစ်၊ ဇူလိုင်လ(ပထမပတ်)တွင် နှမ်းနက်(၁)တင်းလျှင် ကျပ်(၂၆၀၀၀၀-၂၈၀၀၀၀)ဖြင့် အရောင်းအဝယ် ဖြစ်လျက်ရှိရာ ယခုနှစ်နှမ်းပေါ်မည့်အချိန်တွင် ယခုလက်ရှိဈေးအတိုင်းရရှိပါက နှမ်းစိုက်တောင်သူများ အနေဖြင့် အကျိုးအမြတ်များပိုမိုရရှိနိုင်မည်ဖြစ်ကြောင်း သိရှိရသည်။ DOCA (မကွေး)

တောင်ငူမြို့ ညောင်ပင်ဈေးတွင် ဟင်းသီးဟင်းရွက်ဈေးနှုန်းများမှာ ခရမ်းချဉ်သီး တစ်ပိဿာလျှင် ယခင်လက ၂၅၀၀ ကျပ် ရှိရာမှ ယခုအပတ် တွင် ၁၅၀၀ ကျပ်ဖြင့် ရောင်းချရာ စျေးနှုန်း ၁၀၀၀ ကျပ် ကျသွားပါသည်။ သခွားသီးမှာ ယခင်လက တစ်ပိဿာ ၂၀၀၀ ကျပ် ရှိရာမှ ယခုအပတ်တွင် ၁၀၀၀ ကျပ်ဖြင့် ရောင်းချလျက် ရှိသည်။ ဂေါ်ဖီမှာ တစ်ပိဿာလျှင် ယခင်လက ၂၀၀၀ ကျပ် ရှိရာမှ ယခုအပတ် တွင် ၁၅၀၀ ကျပ်ဖြစ်ပြီး ဈေးနှုန်းအနည်းငယ် ကျသွားပါသည်။ ပန်းဂေါ်ဖီပွင့် စျေးနှုန်း အနေဖြင့် အပွင့်ကြီး တစ်ပွင့်လျှင် ၁၂၀၀ ကျပ် ဖြစ်ပြီး၊ အပွင့်အသေး တစ်ပွင့်လျှင် ၁၀၀၀ ကျပ်ဖြင့် ရောင်းချလျက်ရှိရာ ဈေးနှုန်းတည်ငြိမ်လျက်ရှိသည်။ ခရမ်းသီးအညို နှင့် အဖြူသီးများမှာ တစ်ပိဿာလျှင် ၁၈၀၀ ကျပ် မှ ၂၀၀၀ ကျပ်ဖြင့် ရောင်းချလျက်ရှိပြီး ဈေးနှုန်းတည်ငြိမ်နေပါသည်။ ပဲစောင်းလျားသီး တစ်ပိဿာလျှင် ၆၅၀၀ ကျပ်ဖြင့် ရောင်းချလျက်ရှိပြီး အရောင်းအဝယ်ကောင်းကြောင်း ဈေးသည်များထံမှ သိရပါသည်။ DOCA(ပဲခူး)

တောင်ငူမြို့ အနီးတဝိုက်ရှိ နေထိုင်ရာပြည်သူများသည် မိမိတို့အိမ်ခြံဝန်းများ၌ ဟင်းသီး ဟင်းရွက် နှင့် အရိပ်ရသော သီးနှံပင်များ စိုက်ပျိုးကြသည်။ အရိပ်ရသောအပင်များအနက် မန်ကျည်း ပင်သည် အရိပ်လည်း ရသလို သဘာဝအလျောက် အသီးသီးလာခြင်းဖြစ်၍ ဘေးအန္တရာယ် ကင်းရှင်း၍ ဆေးဖက် လည်း ဝင်သည့် အပင်ကြီးတစ်မျိုး ဖြစ်ပါသည်။ ယခုအခါ ရာသီစာ မန်ကျည်းသီးစိမ်းများ ဈေးကွက်အတွင်း၌ စတင်ရောင်းချလျက်ရှိသည်။ မန်ကျည်းသီးစိမ်းများကို ကြော်စား၍လည်းကောင်း၊ ထောင်းစား၍ လည်းကောင်း၊ မန်ကျည်းသီးစိမ်း ငပိချက်၍လည်းကောင်း မိမိတို့ကြိုက်နှစ်သက်သလို ပြုလုပ်၍ စားသုံးနိုင်ပါသည်။ ပေါ်ကာစ အချိန် ဖြစ်သည့်အတွက် မန်ကျည်းသီးစိမ်းဈေးနှုန်းမှာ တစ်ဆယ်ကျပ်သားလျှင် ၂၅၀၀/ကျပ် ဈေးနှုန်းဖြင့် အရောင်းအဝယ် ရှိနေခဲ့ပါသည်။ မန်ကျည်းမှည့်ကို ဝမ်းချုပ် တတ်သူများ အနေဖြင့် မန်ကျည်း ဖျော်ရည်ပြုလုပ်ပြီး သောက်သုံး ပေးပါက ဝမ်းသွားခြင်းပုံမှန်ဖြစ်စေသည်။ မန်ကျည်းသီးမှည့် ဈေးကွက်အနေဖြင့် အစေ့မပါ တစ်ပိဿာ လျှင် ယခင် (၈၀၀၀)မှ ယခုအခါ (၉၀၀၀) ကျပ် ဈေးနှုန်းဖြင့် အရောင်းအဝယ်ရှိသည့်အတွက် ဈေးနှုန်း အနည်းငယ်တက်သွားပါသည်။ DOCA(ပဲခူး)

ဧရာဝတီတိုင်းဒေသကြီး မအူပင်မြို့နယ်တွင် ဒေသထွက်ဗမာကြက်ဟင်းခါးသီးများ အရောင်းအဝယ်ကောင်းမွန်နေကြောင်း မအူပင်မြို့နယ်ရှိ ကုန်စိမ်းရောင်းချသူထံမှ သိရသည်။ မအူပင် မြို့နယ်တွင် ဒေသထွက်ကြက်ဟင်းခါးသီး ဗမာသီးကို မျိုးစေ့ခံ၍ စိုက်ပျိုးကြသည်။ စိုက်ပျိုးရေး ဆိုင်များမှ ရောင်းချသော စိုက်ပျိုးရေးကြက်ဟင်းခါးသီးကိုလည်း နှစ်စဉ် စိုက်ပျိုးကြောင်း သိရသည်။ စိုက်ပျိုးရေး ထိုင်ဝမ်ကြက်ဟင်းခါးသီးနှံသည် အလုံးရှည်၍ အသီးထွားသည်။ ယခု ဗမာကြက်ဟင်းခါးသီးသည် အလုံးသေး၍ နူးညံ့သည်။ ဗမာကြက်ဟင်းခါးတောသီးသည် ရက်၅၀အတွင်း ရောင်းတန်းဝင်ပြီး သီတင်းကျွတ်လတွင် တစ်ကြိမ်ထွက်ရှိသည်။ ဝါဆိုလတွင် တစ်ကြိမ် ထပ်မံ စိုက်ပျိုးထွက်ရှိသည်။ စိုက်ပျိုးမှု ကုန်ကျစရိတ်နည်းပါးပြီး အပိုဝင်ငွေရသော သီးနှံတစ်ခုဖြစ်သည်။ အဆိုပါ ဒေသကထွက်ရှိသည့် ရောင်းတန်းဝင် ကြက်ဟင်းခါးသီးများ တစ်ရက်လျှင် ၄လုံးတစ်တွဲ အစီးရေ ၁၀၀၀ ထိ အရောင်းအဝယ်ဖြစ်နေကြောင်း သိရသည်။ ကြက်ဟင်းခါးသီး ၄လုံးတွဲ ၁စီးလျှင် ၃၀၀ကျပ် ၂တွဲလျှင် ၅၀၀ကျပ်ဖြင့် ရောင်းချရပြီး အတွဲ ၁၀၀ လျှင် ငွေကျပ် ၃၀၀၀၀-၃၅၀၀၀ ထိပေါက်ဈေးရရှိကြောင်း၊ အဆိုပါဒေသထွက် ကြက်ဟင်းခါးသီး များနှင့် အခြားကုန်စိမ်းများကို ကျိုတ်လတ်၊ ပန်းတနော်၊ မအူပင် စသည့် ဒေသများသို့ တင်ပို့ရောင်းချလျက်ရှိကြောင်း သိရသည်။ DOCA(ဧရာဝတီ)

ယခု ၂၀၂၅ခုနှစ် ဇူလိုင်လတွင် သဘာဝသီးပင် သပြုသီး များ မအူပင်မြို့နယ်တွင် လှိုင်လှိုင် ထွက်ပေါ်နေပြီးဖြစ်သည်။ သပြုသီး ပင်သည် သဘာဝနှစ်ရှည်ပင်ဖြစ်ပြီး မိုးရာသီတွင် အသီးများ ပိုမိုထွက်ရှိသည်။ သပြုသီးများကို မအူပင်ဈေးကွက်အတွင်း ရောင်းချနေပြီး ၁လုံးလျှင် ၃၀၀ကျပ်ဖြင့် ရောင်းချလျက်ရှိသည်။ သပြုသီးကို ကျေးရွာများရှိ အပင်များမှ ကုန်စိမ်းရောင်းချသူများက ဈေးကောင်ပြီး မအူပင်ဈေးအတွင်းလာရောက် ရောင်းချခြင်းဖြစ်ကြောင်း၊ တစ်ချို့ ကလည်း သပြုသီးကို ပြုတ်၍ ရောင်းချလျက်ရှိကြောင်း တွေ့ရသည်။ သပြုသီး ပိုမိုထွက်ရှိပါက ရန်ကုန်သို့ အနည်းငယ်သာ ပေးပို့ပြီး စီးပွားဖြစ် တင်ပို့ခြင်းမျိုး မရှိကြောင်း သိရသည်။ သပြုသီးကို အမှတ်တမဲ့ကြည့်လျှင် အရသာရှိသော သီးနှံလို့မထင်ရပါဘူး။ သပြုသီးကို စားလိုက်သည့်အခါ ချဉ်ပြုံပြုံအရသာက အတော်စားကောင်ပါသည်။ ဟင်းချက်တဲ့အခါ အချဉ်အရသာရအောင် ထည့်ချက်ကြတဲ့ မရမ်းသီး၊ မန်ကျည်းသီးတို့နဲ့မတူဘဲ သပြုသီးချဉ်ရဲ့ အရသာလေးက စားရတာခံတွင်းတွေ့ပါသည်။ သပြုသီးကို ငပ်ချက်ချက်စားခြင်း၊ ချဉ်ရည်ဟင်း ပုဇွန်ဖြင့် ချက်စားပါကလည်း ကတွင်းမြိန်စေသည်။ သပြုပင်က ပူနွေးစိုစွတ်သော ရာသီဥတုမှာ ပေါက်ရောက်တတ်ကြပြီး အမြဲစိမ်းအပင်တစ်မျိုးဖြစ်ကြောင်း အပင်ကြီးတစ်မျိုးဖြစ်ပြီး ပေ ၃၀ ကနေ ၈၀ အထိမြင့်တတ်ကြောင်း သပြုသီးရောင်းချသူကပြောပြသည်။ မအူပင် အခွန်လွတ်ဈေးတွင် သဘာဝပေါက်သော အပင်မှ သီးသော သပြုသီး တစ်နေ့လျှင် အလုံးရေ ၁၀၀၀ နီပါး လာရောက်ရောင်းချကြောင်း တွေ့ရှိရပြီး။ မအူပင် ရွှေတော်ပေါ်ကျေးရွာတွင် သပြုပင် ၁၅ပင်ခန့် ရှိပြီး သပြုပင်မှ သီးသော သီနှံမှ ဝင်ငွေ အပိုရရှိလျက်ရှိပြီး ဈေးကောင်းလျက်ရှိကြောင်း သိရသည်။ DOCA(ဧရာဝတီ)