ပြည်တွင်းကုန်သွယ်မှုသတင်း

 မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီကုန်စည်ဒိုင်သို့ ဒေသတွင်းစိုက်ပျိုးထွက်ရှိရာကျေးရွာများမှ ကြက်သွန်နီများ နေ့စဉ် ဝင်ရောက်ရောင်းဝယ်ဖောက်ကားလျက်ရှိသည်။ ၂၀၂၃ခုနှစ်၊ နိုဝင်ဘာလ(ပထမပတ်)တွင် နေ့စဉ် ပျှမ်းမျှပိဿာ(၄)သောင်း၊ တစ်ပတ်အတွင်း ကုန်ချိန်(၃)သိန်းခန့် အရောင်းအဝယ်ဖြစ်လျက်ရှိပြီး ဆိပ်ဖြူမြို့မှ စီးဆင်းမှုအနေဖြင့်  နိုဝင်ဘာလ(၁)ရက်နေ့မှ(၇)ရက်နေ့အထိ (ပထမပတ်)အတွင်း ကြက်သွန်နီပိဿာ(၅)သိန်းခန့်ကို ရန်ကုန်၊ ပြည်၊ မော်လမြိုင်၊ မြဝတီ၊ စစ်တွေမြို့များသို့ တင်ပို့ရောင်းချလျက်ရှိကြောင်းသိရှိရပါသည်။

 ဆိပ်ဖြူကြက်သွန်နီသည် နိုဝင်ဘာလ(ပထမပတ်)တွင် ဈေးနှုန်းမြင့်ပြီး အရောင်းအဝယ်ဖြစ်လျက်ရှိသည်။ ကြက်သွန်နီဈေးကွက်အနေဖြင့် နိုဝင်ဘာလ(ပထမပတ်)အစောပိုင်းတွင်  အမြင့်ဈေးတစ်ပိဿာလျှင် ကျပ်(၂၇၀၀မှ ၃၂၀၀)ဈေးနှုန်းဖြင့် အရောင်းအဝယ်ဖြစ်ခဲ့ပြီး  အလယ်ပိုင်းတွင်  ကျပ်(၂၇၅၀မှ ၃၁၅၀)၊  (ပထမပတ်)နှောင်းပိုင်းတွင် တစ်ပိဿာလျှင် ကျပ်( ၂၇၀၀မှ ၃၁၀၀)ဈေးနှုန်းဖြစ်ခဲ့ပြီး နိုဝင်ဘာလ(ပထမပတ်)အတွင်း ကြက်သွန်နီတစ်ပိဿာလျှင် အမြင့်ဈေး ကျပ်(၃၀၀၀)ခန့်ဖြင့်ဈေးငြိမ်ပြီး အရောင်းအဝယ်ဖြစ်ခဲ့သည်။ ယခင်အောက်တိုဘာလ(စတုတ္ထပတ်)၌ အမြင့်ဈေးတစ်ပိဿာလျှင် ကျပ်(၃၁၅၀)ဖြစ်ခဲ့ပြီး ယခု၂၀၂၃ခုနှစ်၊ နိုဝင်ဘာလ ပထမပတ်တွင် အမြင့်ဈေးမှာ  တစ်ပိဿာလျှင် ကျပ်(၃၂၀၀)ဈေးနှုန်းဖြစ်၍ ထိပ်စတစ်ပိဿာလျှင် ကျပ်(၅၀)၊ အလတ်စနှင့် အသေးစ ကျပ်(၁၀၀)ခန့်စီဈေးတက်ပြီး အရောင်းအဝယ်ဖြစ်နေကြောင်း ဈေးကွက်မှသိရှိရသည်။

     နိုဝင်ဘာလ(ပထမပတ်)အတွင်း ဆိပ်ဖြူကြက်သွန်နီသည် ဒေသတွင်းဖြန့်ဖြူးရုံသာမက ပြည်ပနိုင်ငံများဖြစ်သော ထိုင်း၊ ဗီယမ်နမ်၊ ဘင်္ဂလားဒေရှ့်နိုင်ငံများက အဝယ်လိုက်၍ ဈေးမြင့်တက်နေကြောင်းသိရှိရပါသည်။ ရန်ကုန်၊ ဘုရင့်နောင်ပွဲရုံသို့ ကုန်စည်အများဆုံးစီးဆင်းခဲ့ကြောင်းသိရှိရပြီး ကြက်သွန်နီစုစုပေါင်းပျမ်းမျှပိဿာ (၃)သိန်းခန့်၊ (၁၁၅၃၈)အိတ်၊ တန်ချိန်(၄၉၀)ခန့်ကုန်စည်စီးဆင်းခဲ့ကြောင်း ဈေးကွက်မှသိရှိရပါသည်။

DOCA(မကွေး)

    မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ ဒေသခံပြည်သူများသည် စိုက်ပျိုးရေးနှင့်မွေးမြူရေးလုပ်ငန်းကိုအခြေခံပြီး စီးပွားဖြစ်လုပ်ကိုင်ကြသည်။ စိုက်ပျိုးရေးလုပ်ငန်းအနေဖြင့် ကြက်သွန်နီသီးနှံကိုအဓိကထား၍ စိုက်ဧကအများဆုံးစိုက်ပျိုးပြီး နှစ်စဉ် မိုး၊ ဆောင်း နှစ်ရာသီစိုက်ပျိုးကြသည်။ ယခုမိုးနှောင်းရာသီ အောက်တိုဘာလမှစ၍ နိုဝင်ဘာလလယ်အထိ ကြက်သွန်နီ (ဥ) စိုက်များကို လှိုင်လှိုင်စိုက်ပျိုးကြသည်။  စိုက်ပျိုးမှုအနေဖြင့် ဆိပ်ဖြူမြို့၏ ဧရာဝတီမြစ်နှင့် ယောချောင်း ဆုံရာမြစ်ရိုးတစ်လျှောက်ရှိ မြို့ပေါ်(၄)ရပ်ကွက်နှင့် ကိုးထောင့်အုပ်စု၊ ကမ္ဘာကြီးအုပ်စု၊ ချင်တောင်အုပ်စု၊ အောက်ဆိပ်အုပ်စု၊ မြင်ကဝအုပ်စုရှိကျေးရွာများမှ မြစ်ရေဝင်ကိုင်းကျွန်းမြေများတွင် အများဆုံးစိုက်ပျိုးကြောင်းသိရှိရပါသည်။

  ကြက်သွန်နီ(ဥ)စိုက် စိုက်ပျိုးမှုအခြေအနေများကိုသိရှိနိုင်ရန် မြို့ပေါ်ရှိ ဒေသခံကြက်သွန်နီစိုက်ပျိုးထုတ်လုပ်ရောင်းဝယ်မှုလုပ်ငန်းရှင်တစ်ဦးနှင့်ဆက်သွယ်မေးမြန်းခဲ့ရာ ယခုနွေကြက်သွန်နီ (ပင်စိုက်)များမှာ ရောင်းဝယ်ချိန်ရာသီကုန်ခါနီးတွင် ကြက်သွန်နီဈေးနှုန်းမြင့်တက်လာ၍ ဒေသခံစိုက်တောင်သူများ ယခင်နှစ်ထက် စိုက်ပျိုးမှုများလာ၍ စိုက်ဧကများလာကြောင်း၊ ယခင်နှစ်တွင် ဧက(၇၀၀)ခန့်စိုက်ပျိုးခဲ့ပြီး ယခုနှစ်တွင် ဧက(၁၀၀၀)ခန့်မှန်းကြောင်း၊ မျိုးဥများကို ဒေသထွက် မျိုးစေ့ကျဲပက်မှရရှိပြီး အရည်အသွေးကောင်း၍ အထားခံသည့် အခွံထူရွှေဖလား(ထိပ်မောက်)မျိုးကိုစိုက်ပျိုးကြောင်း၊ မျိုးဥအနေဖြင့် (ကျမ်းကျွံ)နှင့်(ဇော်မွှား)မျိုးကိုစိုက်ပျိုးကြောင်း၊ (ကျမ်းကျွံ)မျိုးဥ တစ်ပိဿာလျှင် ကျပ် (၂၂၀၀/၂၃၀၀)၊ (ဇော်မွှား)တစ်ပိဿာလျှင် ကျပ်(၃၂၀၀/၃၅၀၀)တို့ဖြင့်ဝယ်ယူရကြောင်း၊ တစ်ဧကစိုက်ပျိုးရာတွင် လက်ပေါက်အစိပ်အကြဲနှင့် ဥအကြီး/အသေးမူတည်၍ ကျမ်းကျွံဥပိဿာ(၃၅၀မှ ၄၀၀)ပိဿာ၊ ဇော်မွှားဥပိဿာ(၂၀၀မှ ၂၅၀)ပိဿာခန့်ကုန်ကျကြောင်း၊ ကြက်သွန်နီ(မိုး)ကို ဒီဇင်ဘာလတွင် စတင်တူးဖော်ပြီး ဇန်နဝါရီလတွင် လှိုင်လှိုင်တူးဖော်မည်ဖြစ်ကြောင်း၊ တစ်ဧကလျှင် ယခင်နှစ်တွင် ပျမ်းမျှပိဿာ(၄၀၀၀မှ ၅၅၀၀)ပိဿာခန့်ထွက်ရှိကြောင်းသိရှိရပါသည်။

  စိုက်တောင်သူမှာ ယခုနှစ်တွင် ကြက်သွန်နီ မိုးစိုက်(ဥစိုက်)(၃)ဧကစိုက်ပျိုးကြောင်း၊ ကျမ်းကျွံဥမျိုးစိုက်ပျိုးပြီး တစ်ဧကလျှင် ပိဿာ(၄၀၀)ခန့်နှင့် သုံးဧကလျှင် ပိဿာ(၁၂၀၀)ခန့်ကုန်ကျပြီး တစ်ပိဿာလျှင် ကျပ် (၂၅၀)ဈေးဖြင့်ဝယ်ယူရ၍ မျိုးဥစိုက်ပျိုးစရိတ်မှာ ကျပ်သိန်း(၃၀)ကုန်ကျကြောင်း၊ ယခင်နှစ်တွင် တစ်ဧကလျှင် ကုန်ကျစရိတ် ကျပ်(၂၅)သိန်းခန့်ကုန်ကျကြောင်း၊ တစ်ဧကလျှင် ပိဿာ(၅၀၀၀)ခန့်ထွက်ရှိပြီး တစ်ပိဿာလျှင် ကျပ်(၂၀၀၀)ဖြင့်ရောင်းချရ၍ အကျိုးအမြတ်များစွာရရှိခဲ့ကြောင်း၊ ယခုနှစ်တွင်လည်း ရာသီဥတုကောင်းမွန်၍ အထွက်နှုန်းကောင်းပြီး ကြက်သွန်နီ(ဥ)တစ်ပိဿာလျှင် အနိမ့်ဈေး ကျပ်(၂၀၀၀) ခန့်ဖြင့်ရောင်းချရပါက စိုက်ပျိုးတောင်သူများ အကျိုးအမြတ်များစွာရရှိမည်ဟုမျှော်လင့်ကြောင်း၊ စိုက်ပျိုးသူတောင်သူများအနေဖြင့် (၃)ဧကစိုက်ပျိုး၍ ဒီဇင်ဘာလကုန်တွင်တူးဖော်ပြီး အခင်းကျွတ်များ၌ သီးထပ်သီးနှံအဖြစ် ကြက်သွန်နီ ဆောင်းစိုက်/ပင်စိုက်စိုက်ပျိုးရန်နှင့် မျိုးစေ့ပက်ပျိုးခုံများပြုလုပ်ရန်အတွက် မြေပြုပြင်ဆောင်ရွက်လျက်ရှိကြကြောင်းသိရှိရပါသည်။

DOCA(မကွေး)

     ကရင်ပြည်နယ်၊ ဘားအံမြို့၊ မြို့မဈေးတွင် ရောင်းချနေသော သစ်သီးဝလံများမှာ ရှမ်းပြည်နယ်တောင်ကြီးမြို့၊ မန္တလေးမြို့၊ ရန်ကုန်မြို့နှင့် မြဝတီမြို့ရှိ သစ်သီးဝလံပွဲရုံများမှ အသီးသီးဝင်ရောက်လျက်ရှိကြောင်း သိရှိရပါသည်။

     ၂၀၂၃ ခုနှစ်၊ နိုဝင်ဘာလ ဒုတိယအပတ်တွင် အရောင်းအဝယ်ဖြစ်လျက်ရှိသော သစ်သီး ဝလံဈေးနှုန်းများမှာ နဂါးမောက်သီး(သေး) တစ်လုံးလျှင် (၂၀၀၀) ကျပ် နဂါးမောက်သီး(ကြီး) တစ်လုံးလျှင် (၃၀၀၀) ကျပ်၊ စပျစ်သီး(အလုံးကြီး) တစ်ပိဿာလျှင် ၃၀၀၀၀ ကျပ်၊ စပျစ်သီး(အလုံးသေး) တစ်ပိဿာလျှင် ၂၅၀၀၀ ကျပ်၊ ပန်းသီး(ရိုးရိုး) တစ်လုံးလျှင် (၁၀၀၀ မှ ၁၅၀၀)ကျပ်၊ ပန်းသီး(ယိုးဒယား) တစ်လုံးလျှင် (၂၅၀၀)ကျပ်၊ ပန်းသစ်တော် တစ်လုံးလျှင် (၃၀၀၀ မှ ၃၅၀၀)ကျပ်၊ သရက်သီး တစ်လုံးလျှင် (၁၀၀၀)ကျပ်၊ မာလကာသီး တစ်လုံးလျှင် (၁၀၀၀)ကျပ်၊ ဆန်းကစ်သီး တစ်လုံးလျှင် (၁၅၀၀)ကျပ်၊ ဖီးကြမ်းငှက်ပျော တစ်ဖီးလျှင် (၂၀၀၀ မှ ၂၅၀၀)ကျပ်၊ သီးမွှေးငှက်ပျော တစ်ဖီးလျှင် (၃၀၀၀ မှ ၃၅၀၀)ကျပ်၊ ဩဇာသီး တစ်လုံးလျှင် (၅၀၀) ကျပ်၊ ထောပတ်သီး တစ်လုံးလျှင် (၁၀၀၀ မှ ၁၅၀၀)ကျပ်၊ ကြက်မောက်သီး တစ်ကီလိုလျှင် (၈၀၀၀) ကျပ်၊ ဖရဲသီး တစ်လုံးလျှင် (၃၀၀၀ မှ ၅၀၀၀)ကျပ်၊ နာနတ်သီး(ကြီး) တစ်လုံးလျှင် (၃၅၀၀) ကျပ် နာနတ်သီး (သေး)တစ်လုံးလျှင် (၂၀၀၀)ကျပ်၊ ဒူးရင်းသီး(ကြီး) ယိုးဒယား တစ်လုံးလျှင် (၇၀၀၀၀)ကျပ်၊ ဒူးရင်းသီး(သေး)ယိုးဒယား တစ်လုံးလျှင် (၄၀၀၀၀)ကျပ်၊ ကျွဲကောသီး(သေး) တစ်လုံးလျှင် (၁၅၀၀)ကျပ်၊ ကျွဲကောသီး(ကြီး) တစ်လုံးလျှင် (၂၅၀၀)ကျပ်ဖြင့် အသီးသီး အရောင်းအဝယ်ဖြစ်လျက်ရှိကြောင်း ဘားအံမြို့၊ မြို့မဈေးတွင် ရောင်းချလျက်ရှိသော သစ်သီးဆိုင်များထံမှ သိရှိရပါသည်။

DOCA(ကရင်)

     မန္တလေးတိုင်းဒေသကြီး၊ မြင်းခြံခရိုင်၊ နွားထိုးကြီးမြို့နယ်၏ ၂၀၂၃ ခုနစ်တွင် ဝါသီးနှံစုစုပေါင်း စိုက်ပျိုးမှုအနေဖြင့် (၇၀၆၇) ဧက စိုက်ပျိုးမှုရှိခဲ့ပြီး၊ ဒေသအခေါ်အလိုက် စိုက်ပျိုးမှုမှာ မလှိုင်ဝါ (၁၇၂၀) ဧက၊ မိုးချည်မျှင်ရှည်ဝါ (၇၃၁) ဧကနှင့် မိုးနှောင်းချည်မျှင်ရှည်ဝါ (၄၆၁၆) ဧကတို့ စိုက်ပျိုးခဲ့ကြောင်း သိရှိရပါသည်။ ယခုအခါရိတ်သိမ်းပြီးစီးမှုမှာ မလှိုင်ဝါ (၈၅၀) ဧက ရိတ်သိမ်းပြီးစီးဖြစ်ရာ တစ်ဧကပျမ်းမျှ အထွက်နှုန်းမှာ(၉၂.၃၈)ပိဿာနှုန်းဖြင့် အထွက်ပိဿာပေါင်း(၇၈၅၂၃)ပိဿာ၊ မိုးချည် မျှင်ရှည်ဝါ(၄၃၂) ဧက ရိတ်သိမ်းပြီးဖြစ်ရာ တစ်ဧကပျမ်းမျှအထွက်နှုန်းမှာ(၃၅၅.၅၃)ပိဿာနှုန်းဖြင့် အထွက်ပိဿာပေါင်း (၁၅၃၅၈၉)ပိဿာများ စတင်ခူးဆွတ်ထွက်ရှိပြီးဖြစ်ကြောင်း သက်ဆိုင်ရာဌာန၏ စာရင်းများအရ သိရှိရပါသည်။

    ယခုကာလသည် ဝါသီးနှံများ စတင်ခူးဆွတ်ချိန်ဖြစ်ပြီး နွားထိုးကြီးမြို့နယ်တွင် ဖြစ်ပေါ်လျက်ရှိသော ဝါသီးနှံဈေးနှုန်းများမှာ ချည်မျှင်ရှည်ဝါ တစ်ပိဿာလျှင် (၃၀၀၀)ကျပ်၊ ချည်မျှင်တိုဝါ တစ်ပိဿာလျှင် (၂၈၀၀) ကျပ်ဝန်းကျင်များဖြင့် ရောင်းဝယ်လျက်ရှိပြီး ယခင်နှစ်ဝါဈေးအနေဖြင့် ချည်မျှင်ရှည်ဝါ တစ်ပိဿာ(၃၇၀၀)ကျပ်၊ ချည်မျှင်တိုဝါ တစ်ပိဿာ (၃၅၀၀) ကျပ်များရှိခဲ့ကြောင်း ဝါဝယ်ယူသူတစ်ဦးထံမှ သိရှိရပါသည်။

DOCA(မန္တလေး)

  မကွေးတိုင်းဒေသကြီး၊ မကွေးခရိုင်၊ မကွေးမြို့နယ်အတွင်း ဓာတ်မြေဩဇာနှင့် ပိုးသတ်ဆေးဈေးကွက်မှာ ပုံမှန်အရောင်းအဝယ်ဖြစ်လျက်ရှိပြီး ၂၀၂၃ခုနှစ်၊ နိုဝင်ဘာလ(ပထမပတ်)တွင် အရောင်းအဝယ်ဖြစ်နေသော ဓာတ်မြေဩဇာများမှာ အာမို (၁၀:၁၀:၁၅) တစ်အိတ်လျှင် ကျပ်(၆၉၀၀၀)၊ အာမို(၁၅:၁၅:၁၅) တစ်အိတ်လျှင် ကျပ်(၁၅၅၀၀)၊ ရွှေကောမတ်(၂၀:၁၂:၁၂)တစ်အိတ်လျှင် ကျပ်(၁၀၈၀၀၀)၊ ယူရီးယား (50)kg တစ်အိတ်လျှင် ကျပ်(၇၉၀၀၀)၊ ပန်းဖူး(ပုလဲ)တစ်အိတ်လျှင် ကျပ်(၁၂၀၀၀၀)နှင့် ရွှေပုလဲ(မြင်းကျား)တစ်အိတ်လျှင် ကျပ် (၆၀၀၀၀)ဖြင့် အရောင်းအဝယ်ဖြစ်ခဲ့ကြောင်းသိရှိရပါသည်။

    ပိုးသတ်ဆေးများမှာလည်း  ပရိုမင်တင် (500 CC)တစ်ဘူးလျှင် ကျပ်(၂၅၀၀၀)၊ ဆလက်ပက်စ် (500 CC) တစ်ဘူးလျှင် ကျပ်(၂၁၅၀၀)၊ အီရာပရိုသရင် (500 CC) တစ်ဘူးလျှင် ကျပ်(၂၄၅၀၀)၊ ပိုစ်တင်(500 CC) တစ်ဘူးလျှင် ကျပ်(၁၇၅၀၀)၊ အဆီဖိတ် (250)g တစ်ထုပ်လျှင် ကျပ်(၉၀၀၀)၊ ဇိုင်ကလုံး (250 CC)တစ်ဘူးလျှင် ကျပ်(၉၀၀၀)နှင့် မက်ဆိုက်ပါ (250 CC)တစ်ဘူးလျှင် ကျပ်(၈၀၀၀)တို့ဖြင့် အသီးသီးအရောင်းအဝယ်ဖြစ်ခဲ့ကြောင်း စိုက်ပျိုးရေးဆေးဆိုင်များမှ လေ့လာသိရှိရပါသည်။

DOCA(မကွေး)