ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ မကွေးမြို့နယ်အတွင်းရှိ ကိုးပင်ကွေ့၊ လယ်ယား၊ ထန်းပင်စမ်းစသည့် ကျေးရွာများတွင် နှမ်း၊ ဆီထွက်သီးနှံနှင့် ပဲမျိုးစုံတို့ကို အဓိကစိုက်ပျိုးလျက်ရှိပြီး ကိုးပင်ကွေ့ကျေးရွာတွင် မိုးမြေပဲစိုက်ဧက ၁၅ ဧကခန့် စိုက်ပျိုးထားကြောင်း သိရသည်။

    မိုးမြေပဲကို ဇွန်လလယ်တွင် စတင်စိုက်ပျိုးကြပြီး စက်တင်ဘာလဆန်းတွင် လှိုင်လှိုင် ထွက်ပေါ်လျက်ရှိကြောင်း၊ မျိုးအနေဖြင့် စွန်တာနီ(မြေပဲဆန်နီ)မျိုးများကို စိုက်ပျိုးကြ‌ပြီး စိုက်ပျိုး ထုတ်လုပ်မှုကုန်ကျစရိတ်အနေဖြင့် တစ်ဧကလျှင် ငွေကျပ် ၈၅၀၀၀၀ ခန့် ကုန်ကျကြောင်း၊ အထွက်တင်း ၅၆ တင်း ခန့်ထွက်ရှိ၍ ဈေးနှုန်းအနေဖြင့် စက်တင်ဘာလဒုတိယပတ်တွင် မြေပဲတောင့် တစ်တင်းလျှင် ငွေကျပ် (၂၅၀၀၀-၂၈၀၀၀) ဈေးနှုန်းများဖြင့် အရောင်းအဝယ်ဖြစ်လျက်ရှိပြီး အကျိုးအမြတ်အနေဖြင့် တစ်ဧကလျှင် ငွေကျပ် ၇ သိန်းကျော် ရရှိကြောင်း၊ ဈေးကွက်အနေဖြင့် မိုးမြေပဲများကို မကွေးမြို့ပေါ်ရှိ ပွဲရုံများသို့ တင်ပို့ရောင်းချပြီး ထိုမှတစ်ဆင့် ရန်ကုန်မြို့နှင့် မန္တလေးမြို့များသို့လည်းကောင်း၊ ဒေသတွင်းရှိ ဆီစက်လုပ်ငန်းရှင်များနှင့် မြေပဲကို တန်ဖိုးမြှင့်ထုတ်ကုန်(Value Added) ပြုလုပ်၍ ပြန်လည်ရောင်းချသည့် လုပ်ငန်းရှင်များမှလည်းကောင်း ဝယ်ယူကြကြောင်း၊ ယခုနှစ်တွင် အထွက်နှုန်းကောင်းပြီး ယခင်နှစ်ထက် ဈေး‌ကောင်းရရှိသောကြောင့် တောင်သူများ အကျိုးအမြတ်ရရှိကြောင်း သိရသည်။

DOCA(မကွေး)

   မွန်ပြည်နယ်၊ မုဒုံမြို့နယ်တွင် မြို့အနီးအနားဝန်းကျင်နှင့် ကျေးလက်ဒေသများတွင် ဖူးစားပြောင်းများ စိုက်ပျိုးမှုဖြစ်ထွန်း၍ စျေးကောင်းရရှိကာ တောင်သူများ အကျိုးအမြတ်ရရှိကြောင်း သိရသည်။

   ဖူးစားပြောင်းသီးနှံများကို မိုးရာသီ(မိုးပြောင်း)နှင့် ဆောင်းရာသီ(ဆောင်းပြောင်း) များဖြင့် နှစ်ရာသီ စိုက်ပျိုးကြ၍ စိုက်ဧက ၂၁၇ ဧကကို မြို့နယ်အတွင်း၌ စိုက်ပျိုးထားရှိကြောင်း၊ မျိုးအနေဖြင့် သကြားပြောင်းမျိုးနှင့် ကောင်ညှင်းပြောင်းမျိုးများကို တောင်သူများက အများဆုံး စိုက်ပျိုးကြပြီး သကြားပြောင်းကို အဓိကထားစိုက်ပျိုးကြကြောင်း၊ ဖူးစားပြောင်းသီးနှံ အထွက်နှုန်း တိုးတက်မြင့်မားရေးအတွက် မြို့နယ်စိုက်ပျိုးရေးဦးစီးဌာနမှ တာဝန်ရှိသူများက ကွင်းဆင်းဆောင်ရွက်ပေးလျက်ရှိသည်။

   ဖူးစားပြောင်း စိုက်ပျိုးထုတ်လုပ်မှုအတွက် မျိုး၊ သွင်းအားစု၊ လုပ်အားခ အပါအဝင် တစ်ဧကလျှင် စုစုပေါင်းငွေကျပ် ၁၀ သိန်းခန့်ကုန်ကျ၍ အထွက်နှုန်းအနေဖြင့် တစ်ဧကလျှင် ဖူးစားပြောင်း ၈၀၀၀ ကျော်ထွက်ရှိရာ အမြတ်အနေဖြင့် တစ်ဧကလျှင် ၁၈ သိန်းကျပ်ခန့် ရရှိကြောင်း ဖူးစားပြောင်း စိုက်ပျိုးတောင်သူတစ်ဦးကပြောသည်။ မုဒုံမြို့နယ်ဒေသထွက် ဖူးစားပြောင်းများကို ဒေသပေါက်စျေး တစ်ဖူးလျှင် ၃၀၀ ကျပ် မှ ၆၀၀ ကျပ်အထိ စျေးကောင်းရရှိကာ မြို့ပေါ်စျေးများအပြင် မော်လမြိုင်မြို့ပေါ်ရှိ သီးနှံဒိုင်များသို့ တင်ပို့ရောင်းချရကြောင်း သိရသည်။

DOCA(မွန်)

    မွန်ပြည်နယ် မော်လမြိုင်မြို့သို့ စက်တင်ဘာလ (တတိယပတ်)ထိ ကြက်သွန်နီ စီးဝင်မှုမှာ(မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ ရန်ကုန်တိုင်းဒေသကြီး) တို့မှ စီးဝင်မှု  စုစုပေါင်း ( ၄၉၁၃၇ အိတ်) နှင့် ( ၄၉၁၃၇၀ ပိဿာ)စီးဝင်ခဲ့ခြင်းနှင့် ယင်းမှ မော်လမြိုင်မြို့မှ စီးထွက်မှုမှာ စုစုပေါင်း (၂၄၅၆၈အိတ်)နှင့် (၂၄၅၆၈၀ ပိဿာ) ဘားအံမြို့၊ ကြာအင်းဆိပ်ကြီးမြို့၊ ကျိုက်ခမီ၊ ရေး၊ သံဖြူဇရပ်မြို့များသို့ စီးထွက်ခြင်းဖြစ်ကြောင်း မော်လမြိုင်ကြက်သွန်နီပွဲရုံနှင့် ကုန်စည်ဒိုင်မှ သိရသည်။

    ၂၀၂၄ ခုနှစ်၊ စက်တင်ဘာလ (တတိယပတ်)တွင် ကြက်သွန်နီ ဈေးနှုန်း အခြေအနေမှာ မြစ်သားကြက်သွန်နီ(အကြီး) တစ်ပိဿာလျှင် ကျပ် ၂၆၀၀၊ မြစ်သား ကြက်သွန်နီ(အလတ်)တစ်ပိဿာလျှင် ကျပ်၂၃၀၀၊ မြစ်သားကြက်သွန်နီ(အငယ်) တစ်ပိဿာ လျှင် ကျပ်၁၉၀၀၊ မိုးကြက်သွန်နီ(အကြီး)တစ်ပိဿာလျှင် ကျပ်၂၅၀၀၊ မုံရွာ ကြက်သွန်နီ(အလတ်) တစ်ပိဿာလျှင် ကျပ် ၂၃၀၀၊ မုံရွာကြက်သွန်နီ (အငယ်) တစ်ပိဿာလျှင် ကျပ်၁၈၀၀ ဖြစ်သည်။ အဆိုပါ ကြက်သွန်နီဈေးနှုန်းမှာ စက်တင်ဘာလ ပထမပတ်မှ တတိယပတ်ထိ ဈေးနှုန်းတည်ငြိမ်လျက်ရှိကြောင်း သိရှိရပါသည်။

DOCA(မွန်)

    မော်လမြိုင် ဒေသထွက် ရင်ကွဲသရက်သီး ဈေးကောင်းရရှိနေသည်။ ယခု စက်တင်ဘာလ (တတိယပတ်)တွင် ရင်ကွဲသရက်သီး ဈေးနှုန်းအခြေအနေမှာ ရင်ကွဲသရက်သီး အစိမ်းအချောအကြီးတစ်လုံးလျှင်(၄၅၀)ကျပ်၊ အသေးတစ်လုံးလျှင် (၃၀၀) ကျပ် ဖြစ်သည်။ ရင်ကွဲသရက်သီးအမှည့်အကြီးတစ်လုံးလျှင်(၇၅၀)ကျပ်၊ အသေး တစ်လုံးလျှင်(၅၅၀)ကျပ်ဖြစ်သည်။ ယခင်(ဩဂုတ်လ)တွင် အစိမ်းအချောအကြီး တစ်လုံး လျှင်(၃၅၀)ကျပ်၊ အသေးတစ်လုံးလျှင် (၃၀၀)ကျပ်ဖြစ်သည်။ ရင်ကွဲသရက် သီးအမှည့် အကြီးတစ်လုံးလျှင်(၅၀၀)ကျပ်၊ အသေး တစ်လုံးလျှင် (၄၀၀)ကျပ်ဖြစ်သည်။ ထို့ကြောင့် ဈေးနှုန်းနှိုင်းယှဉ်ပါက ယခုလတွင် ၁၀၀ ကျပ် မှ ၂၅၀ ကျပ်ခန့် ဈေးနှုန်းမြင့်တက်ခဲ့သည်။

     အဆိုပါ ဈေးနှုန်းမြင့်တက်မှုမှာ ရင်ကွဲသရက်သီး အသီးထွက်နှုန်းရာသီချိန် ကုန်ဆုံးတော့မည်ဖြစ်သဖြင့် အသီးထွက်နှုန်းနည်းပါးခြင်း၊ အခြားဒေသမှ သရက်သီးဝင် ရောက်မှုမရှိခြင်းတို့ကြောင့် ဈေးကွက်အတွင်း ရောင်းချမှုလည်းနည်းပါးခြင်းကြောင့် ဒေသထွက် ရင်ကွဲသရက်မျိုးများမှာ ဈေးကောင်း ရရှိနေကြောင်းသိရှိရပါသည်။ ရင်ကွဲသီးသရက်မျိုးသည် မွန်ဒေသထွက် သရက်သီးမျိုးနွယ်(၁၂၅)မျိုးအနက် လူကြိုက် အများဆုံးနှင့်အသီးထွက် အကောင်းဆုံးဖြစ်သော သရက်မျိုးဖြစ်သည်။

DOCA(မွန်)

        ၂၀၂၄ခုနှစ်၊ စက်တင်ဘာလ ၁၆ရက်နေ့၊ နံနက်(၀၉:၀၀)နာရီအချိန်တွင် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနမှ ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ကန့်ဘလူမြို့ပေါ်ရှိ အိမ်ဆောက်ပစ္စည်းရောင်းချသည့်ဆိုင်များသို့သွားရောက်၍ အပတ်စဉ် ကွင်းဆင်းစစ်ဆေးခြင်းဆောင်ရွက်လျက်ရှိကြောင်းသိရသည်။

       ကန့်ဘလူမြို့ပေါ်ရှိ ဘိလပ်မြေရောင်းချသည့် ခွန်အားသစ် အိမ်ဆောက်ပစ္စည်းအရောင်းဆိုင်၊ မိုးကောင်ကင် အိမ်ဆောက်ပစ္စည်းအရောင်းဆိုင်နှင့် ရွှေပြည့်စုံ အိမ်ဆောက်ပစ္စည်းအရောင်းဆိုင် စသည့်ဆိုင်များ၏ ဘိလပ်မြေဝယ်ယူရရှိမှုအခြေအနေ၊ လက်ကျန်အခြေအနေနှင့် ဈေးနှုန်း၊ ဈေးကွက်အခြေအနေတို့အား ကွင်းဆင်းစိစစ်ခဲ့ရာ ဘိလပ်မြေနှင့်ဆောက်လုပ်ရေးလုပ်ငန်းသုံးပစ္စည်းများကို မန္တလေးမြို့မှဝယ်ယူရကြောင်း၊ ဈေးနှုန်းအနေဖြင့် “CROWN” အမှတ်တံဆိပ် ဘိလပ်မြေ‌တစ်အိတ်လျှင် ငွေကျပ်၂၀၀၀၀နှင့် “ကြံ့နှစ်ကောင်” အမှတ်တံဆိပ် ဘိလပ်မြေ ဈေးနှုန်းမှာ တစ်အိတ်လျှင် ငွေကျပ်၁၉၀၀၀ဖြင့်ရောင်းချကြောင်း၊ စက်တင်ဘာလ ဒုတိယပတ်ဈေးနှုန်းများနှင့်နှိုင်းယှဉ်ပါက ယခုပတ်အတွင်း ဈေးနှုန်းများတည်ငြိမ်လျက်ရှိကြောင်း လုပ်ငန်းရှင်များထံမှသိရှိရပါသည်။

DOCA(စစ်ကိုင်း)