ပြည်တွင်းကုန်သွယ်မှုသတင်း

        မန္တလေးတိုင်းဒေသကြီး၊ ငါန်းဇွန်မြို့နယ်၊ သရက္ကန်အုပ်စုရှိ ကျေးရွာများတွင် ယခင်နှစ်မှစ၍  ကြောင်ပန်းစေ့ဈေးနှုန်းများကောင်းလာသဖြင့် ကြောင်ပန်းပင်များကို တစ်နိုင်တစ်ပိုင် စိုက်ပျိုးမှုများလာခဲ့ကြပါသည်။ ဒေသခံများသည် ချောင်းရိုးတစ်လျှောက်တွင် မိမိတို့ယာမြေများ ရေတိုက်စားခြင်းမှကာကွယ်ရန်အတွက် ရေတားသဘောမျိုးဖြင့် စိုက်ပျိုးခဲ့ကြရာမှ ‌ဈေးနှုန်း၊ ဈေးကွက်ကောင်းလာသဖြင့် ဆက်လက်၍ အများအပြားစိုက်ပျိုးလာကြပြီး တချို့မှာလည်း ရေရရှိနိုင်မှု၊ ရေနှင့်နီးသည့်နေရာများနှင့် နေရာလွတ်သည့် မိမိတို့အိမ်ဝိုင်းများအတွင်း၌ တိုးချဲ့စိုက်ပျိုးလာကြကြောင်းသိရပါသည်။ ကြောင်ပန်းပင်များကို ကိုင်းဖြတ်ပျိုးထောင်၍ စိုက်ပျိုးကြပြီး၊ ပျိုးပင်တစ်ပင်လျှင်(၁၀၀၀/ ၁၅၀၀)ကျပ်ခန့်ရှိကြောင်း၊ ကြောင်ပန်းပင်မှာ ကိုင်းများဖြာထွက်သော အပင်မျိုးဖြစ်သည့်အတွက် အနည်းဆုံး (၁၀)ပေခြားစိုက်ပျိုးကြပြီး၊ အိမ်ဝိုင်းများအတွင်း၌ မြေနေရာပေါ်မူတည်ပြီး သင့်လျော်သည့်စိုက်ပျိုးမှုများလည်းရှိပါသည်။ ပျိုးထောင်ပြီး (၂)ပတ်ခန့်အကြာတွင် အညွန့်အတက်များထွက်လာပြီး မြေချစိုက်ပျိုးနိုင်ကြောင်းနှင့် ကိုင်းဖြတ်ပြီး ပျိုးထောင်မှုမပြုဘဲ တိုက်ရိုက်ချစိုက်၍လည်းရကြောင်း၊ တစ်နှစ်သားတွင် စတင်ထွက်ပေါ်ကြောင်းသိရသည်။ ခူးဆွတ်မှုအနေဖြင့် (၁၀၊ ၁၅)ရက်ခြား ခူးဆွတ်ကြရကြောင်းနှင့် မိုးရွာသွန်းမှုနည်းပါက ပြဆေးကို (၁၅) ရက်တစ်ကြိမ်ခန့်ဖြန်းပေးရကြောင်းနှင့် မိုးရွာသွန်းမှုများလျှင် အနည်းငယ်သာဖြန်းပေးရန်လိုအပ်ကြောင်း၊ အသီးအားဆေးကိုလည်း အနည်းငယ်ဖြန်းပေးရပြီး၊ လက်ရှိစိုက်ပျိုးမှုတွင် ဒေသအနေဖြင့် အပင်အတွက် မြေဆီကို သီးသန့်ကျွေးရန်မလိုဘဲ အပင်ဖြစ်ထွန်းမှုကောင်းကြောင်း၊ ကျေးရွာရှိဒေသခံများအနေဖြင့် ယခုအချိန်တွင် ရေရရှိမူအခြေအနေအရ ဧကလိုက်စိုက်ပျိုးနိုင်မှုမရှိသေး၍ တစ်ဧကကုန်ကျမှုအား မသိရှိနိုင်သေးပါကြောင်းနှင့် ၂၀၂၂ခုနှစ်တွင် မိမိတို့အရပ်ဒေသ၌ ကြောင်ပန်းစေ့မှာ ဈေးကွက်တွင်ကျယ်မှုမရှိဘဲ တစ်ပိဿာ(အခြောက်)ဈေးနှုန်းအနေဖြင့် (၁၅၀၀၀) ကျပ်ခန့်သာရရှိခဲ့ကြောင်းနှင့် ၂၀၂၃ခုနှစ်မှစ၍ ဈေးနှုန်း၊ ဈေးကွက်များကောင်းလာကြောင်နှင့် တစ်ပိဿာလျှင် (၃၅၀၀၀)ကျပ်ခန့်ဖြင့် ဈေးနှုန်းစတင်ခဲ့ပြီး၊ အမြင့်ဆုံးအနေဖြင့် (၄၀၀၀၀) ကျပ်ထိရှိခဲ့ကြောင်းသိရသည်။ ကြောင်ပန်းသီးများမှာ နှစ်စဉ် မေလမှစ၍ အောက်တိုဘာလထိ (၅)လ/ (၆)လခန့်ခူးဆွတ်ရရှိကြောင်း၊ ယခုနှစ် အဖွင့်ဈေးမှာ (အခြောက်) တစ်ပိဿာလျှင် (၂၂၀၀၀) ကျပ်ခန့်ဈေးဖြင့်စတင်ခဲ့ပြီး ဇွန်လ ဒုတိယပတ်ခန့်မှစ၍ တစ်ပိဿာလျှင် (၃၀၀၀၀)ကျပ်ခန့်အထိ ဈေးနှုန်းမြင့်တက်ခဲ့ကြောင်း၊ ဩဂုတ်လအတွင်း၌ (၄၁၀၀၀)ကျပ်ထိဈေးနှုန်းမြင့်တက်ခဲ့ပြီး စက်တင်ဘာလ လဝက်ခန့်အတွင်း၌ မိုးရွာသွန်းမှုများပြီး ခြောက်သွေ့မှုအရည်အသွေးနိမ့်၍ ဈေးနှုန်းကျဆင်းခဲ့ပြီး တစ်ပိဿာလျှင်(၃၅၅၀၀)ကျပ်ဖြစ်ပေါ်ခဲ့ကြောင်း၊ စက်တင်ဘာလ နောက်ဆုံးပတ်တွင် ဈေးနှုန်းပြန်လည်မြင့်တက်ခဲ့ပြီး (၄၂၀၀၀)ကျပ်ထိရှိလာကြောင်းသိရသည်။ ယခင်နှစ်တွင် ဒေသခံရွာသူရွာသားများ မိမိတို့အိမ်ဝိုင်းနေရာလွတ်များတွင် တစ်နိုင် တစ်ပိုင်စိုက်ပျိုးခဲ့သော ကြောင်ပန်းပင်များမှာ အသီးများစတင်ထွက်ပေါ်လျက်ရှိိ၍ မီးဖိုချောင်စရိတ်ရရှိလျက်ရှိပါသည်။ နောင်နှစ်များတွင် အထွက်နှုန်းများပိုမိုထွက်ရှိလာမည်ဖြစ်ပြီး မိသားစုအပိုဝင်ငွေများရရှိလာမည်ဖြစ်ပါသည်။ ဈေးကွက်အနေဖြင့် မန္တလေးမြို့သို့တင်ပို့ရောင်းချကြပြီး တစ်တင်းခွဲဝင်တစ်အိတ်လျှင် ကားခ (၂၅၀၀)ကျပ်ခန့်ကျသင့်ကြောင်း၊ ကြောင်ပန်းစေ့များ ဈေးကောင်းရရှိ၍ ဒေသခံများ အဆင်ပြေလျက်ရှိပြီး ပြည်ပဈေးကွက်ရှိသောကြောင့် စီးပွားဖြစ်စိုက်ပျိုးသင့်သော သီးနှံဖြစ်ကြောင်းနှင့် ဆက်လက်၍လည်း တိုးချဲ့စိုက်ပျိုးလျက်ရှိကြောင်းသိရှိရပါသည်။

DOCA(မန္တလေး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန်စာရင်းတို့ကို အပတ်စဉ်၊ လစဉ်တင်ပြလျက်ရှိရာ ၂၀၂၄ ခုနှစ်၊ အောက်တိုဘာလ၊ ပထမအပတ်တွင်အရောင်း အဝယ်ဖြစ်သည့် သီးနှံဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းခဲ့ပါသည်။ ဆက်သွယ်မေးမြန်းမှုအရ မြေပဲလုံးဆန်များမှာ စက်တင်ဘာလ၊ ဒုတိယ အပတ်မှ စတင်၍ ရွှေဘိုဈေးကွက်သို့ ဝင်ရောက်ခဲ့ကြောင်း၊ အောက်တိုဘာလ၊ ပထမအပတ်တွင် အရောင်းအဝယ်ဖြစ်သည့်ဈေးနှုန်းမှာ မြေပဲလုံးဆန်တစ်တင်းလျှင် (၁၁၆၈၀ဝိ/-) ကျပ်ပေါက် ဈေးရှိပြီး တစ်ပတ်အတွင်းအရောင်းအဝယ်ဖြစ်မှုမှာ (၄၅၀၀)တင်း/ (၁၀၃)တန်ဖြစ် ကြောင်း၊   ‌ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်ပတ်၌     မြေပဲလုံးဆန်တစ်တင်းလျှင် (၁၂၁၆၀ဝိ/-)ကျပ် ပေါက်ဈေးရှိခဲ့သဖြင့် ယခုအပတ်တွင် ယခင်အပတ်အောက် မြေပဲလုံးဆန် တစ်တင်းလျှင်(၄၈၀ဝိ/-)ကျပ် ဈေးလျော့နည်းခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့်ဈေးနှုန်း နှိုင်းယှဉ်ပါက ယခင်နှစ်ကာလတူ၌ မြေပဲလုံးဆန်တစ်တင်းလျှင်(၁၀၀၈၀ဝိ/-)ကျပ်ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် မြေပဲလုံးဆန်တစ်တင်းလျှင် (၁၆၀၀ဝိ/-) ကျပ် ဈေးပိုမိုရရှိခဲ့ကြောင်း၊ ယခုအပတ်တွင် ဝင်ရောက်မှုများလာသော်လည်း  ဒေသတွင်းဆီကြိတ်ခွဲ ထုတ်လုပ်သည့် ဆီစက်များနှင့် စားသုံးရန်အတွက် ကြိတ်ခွဲရန်ဝယ်ယူသူများရှိသဖြင့် ဝင်ရောက်သမျှ အရောင်းအဝယ်ဖြစ်လျက်ရှိ‌ကြောင်း သတင်းရရှိပါသည်။

DOCA(စစ်ကိုင်း)

           မန္တလေးတိုင်းဒေသကြီး၊ တံတားဦးခရိုင်၊ ငါန်းဇွန်မြို့နယ်သည် မြန်မာနိုင်ငံအလယ်ပိုင်း ဧရာဝတီမြစ်ဝှမ်းတွင် တည်ရှိသည့်အလျောက် ယေဘူယျအားဖြင့် ပြန့်ပြူးသောမြေမျက်နှာသွင်ပြင်ရှိပြီး ပူးပြင်းခြောက်သွေ့သော ရာသီဥတုရှိ၍ မိုးရွာသွန်းမှုကိုအခြေပြုကာ သီးနှံများအား စိုက်ပျိုးမှုပြုရသောဒေသတစ်ခုဖြစ်ပါသည်။ ဧရာဝတီမြစ်ဖြတ်သန်းစီးဆင်းရာ မြစ်ကမ်းမြို့နယ်တစ်ခုဖြစ်ပြီး မြစ်နှင့်နီးသည့်ဒေသများ၌ ရေကျချိန်တွင် ပဲမျိုးစုံ၊ ပြောင်းနှင့်ဆေးရွက်ကြီးပင်များကိုစိုက်ပျိုးမှုရှိပြီး ကုန်တွင်းပိုင်းတွင် ဆီထွက်သီးနှံဖြစ်သည့် မြေပဲ၊ နှမ်းနှင့် ပဲစင်းငုံ၊ ဝါသီးနှံတို့ကို အများဆုံးစိုက်ပျိုးကြပါသည်။

          ၂၀၂၄ခုနှစ်၌ ငါန်းဇွန်မြို့နယ်တွင် မြေပဲသီးနှံကိုစိုက်ပျိုးရန်အတွက် လျာထားမှုအနေဖြင့် (၁၈၂၇၂) ဧကရှိပြီး၊ အမှန်စိုက်ပျိုးနိုင်မှုအနေဖြင့် (၁၈၉၆၈)ဧကစိုက်ပျိုးနိုင်ခဲ့ပါသည်။ ယခင်နှစ်ဖြစ်သည့် ၂၀၂၃ခုနှစ်တွင် မြို့နယ်အနေဖြင့် မြေပဲစိုက်ပျိုးရန်အတွက် လျာထားမှုမှာ (၁၈၂၆၅)ဧကရှိခဲ့ပြီး၊ အမှန်စိုက်ပျိုးနိုင်မှုမှာ (၁၈၉၆၁)ဧကစိုက်ပျိုးနိုင်ခဲ့ကြောင်းနှင့် တစ်ဧကပျမ်းမျှအထွက်နှုန်းမှာ (၄၅) တင်းခန့်ထွက်ရှိခဲ့ပါသည်။ ဒေသအခေါ် မိုးဦးမြေပဲကို နှစ်စဉ်မေလနှင့် ဇွန်လများတွင် စတင်စိုက်ပျိုးကြပြီး စက်တင်ဘာလနှင့် အောက်တိုဘာလတို့တွင် ရိတ်သိမ်းထွက်ပေါ်ပါသည်။ ဒေသအနေဖြင့် ပင်ထောင်နှင့် ပင်ပြန့်နှစ်မျိုးကိုစိုက်ပျိုးကြပြီး တန်းဆွဲ၍ မြေပဲစိုက် တန်း(၄)တန်းလျှင် ပဲစင်းငုံတစ်တန်းနှုန်းဖြင့် ပဲစင်းငုံသီးနှံကိုလည်း သီးညှပ်အဖြစ် ထည့်သွင်းစိုက်ပျိုးကြပါသည်။ တစ်ဧကလျှင် မြေပဲဆန်(၁၀)ပြည်မှ (၁၆)ပြည်ခန့်ထည့်သွင်းစိုက်ပျိုးကြပြီး၊ တစ်ဧကကုန်ကျစရိတ်အနေဖြင့် ထွန်ယက်ခ၊ မျိုး၊ သွင်းအားစု၊ လုပ်သားခများအပါဝင် (၅၀၀၀၀၀) ကျပ်ခန့်ကုန်ကျကြောင်းသိရပါသည်။ ယခင်နှစ်မိုးမြေပဲစိုက်ပျိုးချိန်တွင် မျိုးဈေးအနေဖြင့် မြေပဲဆန်တစ်ပြည်လျှင် (၇၀၀၀)ကျပ်၊ အတောင့်တစ်တင်းလျှင် (၄၀၀၀၀)ကျပ်ဈေးများဖြစ်ပေါ်ခဲ့ပြီး၊ ယခုနှစ်မြေပဲစိုက်ရာသီတွင် မျိုးမြေပဲဆန်တစ်ပြည်လျှင် (၁၀၀၀၀)ကျပ်၊ အတောင့်တစ်တင်းလျှင် (၄၂၀၀၀)ကျပ်များရှိခဲ့ကြောင်း၊ ယခင်နှစ်မိုးမြေပဲပေါ်ချိန်တွင် အဖွင့်ဈေးအနေဖြင့် မြေပဲအစိုတစ်တင်းလျှင်(၃၀၀၀၀)ကျပ်၊ အခြောက်တစ်တင်းလျှင် (၃၅၀၀၀)ကျပ်ခန့်ဖြစ်ပေါ်ခဲ့ကြောင်း၊ တစ်ဧကအထွက်နှုန်းအနေဖြင့် (၃၀)တင်းမှ (၄၀)တင်းနှုန်းခန့်ထွက်ပေါ်ခဲ့၍ ယခင်နှစ်တွင် တစ်ဧကတောင်သူအကျိုးအမြတ်အနေဖြင့် (၅၀၀၀၀၀)ကျပ်ခန့်ရရှိခဲ့ကြောင်း၊ ရောင်းချမှုဈေးကွက်အနေဖြင့် မန္တလေးမြို့သို့ တင်ပို့ရောင်းချကြပါသည်။ လက်ရှိမြေပဲပေါ်ချိန်တွင် ကျေးရွာများ၌ ဖြစ်ပေါ်နေသောဈေးနှုန်းမှာ တစ်တင်းလျှင် (၄၀၀၀၀)ကျပ်ခန့်ဖြင့် ဈေးစတင်ဖြစ်ပေါ်လျက်ရှိကြောင်းနှင့် ယခုနှစ်မြေပဲများမှာ ရာသီဥတုသင့်တင့်မှုရှိ၍ ဖြစ်ထွန်းမှုကောင်းကြောင်း သရက္ကန်အုပ်စု၊ အောင်ချမ်းသာကျေးရွာရှိ မြေပဲစိုက်တောင်သူများထံမှသိရှိရပါသည်။

DOCA(မန္တလေး)

       ပဲခူးတိုင်းဒေသကြီး၊ သာယာဝတီခရိုင်၊ သာယာဝတီမြို့နယ် ဆန်ကုန်သည်နှင့် ဆန်စက်လုပ်ငန်းရှင်များသည် ဆန်များကို သက်သာသောနှုန်းထားဖြင့် ဗွီနိုင်းချိတ်ဆွဲရောင်းချနေခြင်းကို ဇွန်လ(၂၄)ရက်နေ့မှ စတင်ရောင်းချခဲ့ရာ ယနေ့အောက်တိုဘာလ(၃)ရက်နေ့အထိ နေ့စဉ် အကန့်အသတ်မရှိဘဲ ဝယ်ယူလိုသည့်ပမာဏအတိုင်း ရောင်းချပေးလျက်ရှိပါသည်။ (၃-၁၀-၂၀၂၄)ရက်နေ့တွင် ဆန်စက်နှင့် ဆန်ဆိုင်တို့မှ ဧည့်မထဆန်၊ ရက်(၉၀)ဆန်၊ မနောသုခဆန်တို့အား ဆန်တစ်ပြည်လျှင် (၃၀၀၀)ကျပ်နှုန်းဖြင့် ဆန်အိတ် (၃၆)အိတ်၊ လူဦးရေ (၂၅၃)ဦးအား ရောင်းချပေးပြီးဖြစ်ကြောင်းနှင့် လိုသလောက်ဆန်များကို သက်သာသောဈေးနှုန်းဖြင့် ဆန်ကုန်သည်များအနေဖြင့် ရောင်းချပေးသွားမည်ဖြစ်ကြောင်း၊ သာယာဝတီမြို့နယ်အနေဖြင့် သက်သာသောဈေးနှုန်းဖြင့် ဆန်များရောင်းချနေလျက်ရှိကြောင်းသိရှိရပါသည်။

DOCA(ပဲခူး)

        (၃-၁၀-၂၀၂၄) ရက်နေ့တွင် ပဲခူးတိုင်းဒေသကြီး (အရှေ့) ညောင်လေးပင်ခရိုင်၊ ညောင်လေးပင်မြို့နယ်၊ မြို့မ(၄)ရပ်ကွက်ရှိ အခြေခံလူတန်းစားများအား ညောင်လေးပင်မြို့နယ် ဆီ လက်လီ/ လက်ကားရောင်းချသော လုပ်ငန်းရှင်များမက စားအုန်းဆီများကို သက်သာသောဈေးနှုန်းဖြင့် လှည့်လည်ရောင်းချပေးခဲ့ကြောင်းသိရှိရပါသည်။

         ညောင်လေးပင်မြို့၊ မြို့မ(၄) ရပ်ကွက်သို့ လှည့်လည်ရောင်းချရာတွင်  စားအုန်းဆီ (၁) ပိဿာလျှင် (၇၈၀၀) ကျပ်ဖြင့် လူတစ်ဦးလျှင် (၅၀)ကျပ်သား၊ စားအုန်းဆီပိဿာချိန် (၂၂၀) ပိဿာ၊ လူဦးရေ(၄၄၀)ဦးအား ရောင်းချပေးခဲ့ရာတွင် ညောင်လေးပင်မြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံက ကြီးကြပ်ဆောင်ရွက်ခဲ့ကြောင်းသိရှိရပါသည်။

DOCA(ပဲခူး)