ပြည်တွင်းကုန်သွယ်မှုသတင်း

       ဧရာဝတီတိုင်းမှာ သီဟိုဠ်စေ့တွေကို ဧကသိန်းချီ စိုက်ပျိုးထုတ်လုပ်ကြပြီး မြောင်းမြခရိုင်၊ ဟင်္သာတခရိုင်၊ လပွတ္တာခရိုင်၊ ပုသိမ်ခရိုင်တွေထဲက ပင်လယ်ကမ်းစပ်ဒေသတွေမှာရှိတဲ့ ကျေးရွာတွေ က ဒေသခံတောင်သူတွေ အများဆုံး စိုက်ပျိုးကြပါတယ်။ သီဟိုဠ်ကို နွေကာလမှာ အဓိကထား လုပ်ကိုင်ကြပြီး စိုက်ပျိုးထုတ်လုပ်လို့ ဖြစ်ထွန်းအောင်မြင်တဲ့ သီးနှံဖြစ်ပါတယ်။ သီဟိုဠ်စေ့ကို ကလေး လူကြီးမရွေး ကြိုက်နှစ်သက်ကြပါတယ်။ သီဟိုဠ်စေ့မှာ အာဟာရဓါတ်ပြည့်ဝတဲ့အပြင် ကော့ပါး၊ ကယ်လ်စီယမ်၊ မဂ္ဂနီဆီယမ်၊ သံဓာတ်၊ ပိုတက်စီယမ်နဲ့ ဇင့်အပါအဝင် သတ္တုဓာတ်တွေနဲ့ ပရိုတင်းတွေပါဝင်ပါတယ်။ ဗီလာမင်စီ၊ ဗီတာမင်ကေ၊ ဗီတာမင်အီး ၊ ဗီတာမင်ဘီ6 နှင့် အဟာရ များစွာပါဝင်တဲ့အပြင် သင့်တင်စွာစားသုံးလျှင် အကျိုးပြုကိုလက်စထရောတွေကို ကောင်းမွန်စွာ ထိန်းသိမ်းနိုင်ကြောင်း သိရပါသည်။

      သီဟိုဠ်စေ့ဈေးမှာ တစ်ပိဿာလျှင် (၃၇၀၀၀/-၃၈၀၀၀/-)အထိ ရှိပြီး အစေ့အရွယ်အစားအလိုက် ဈေးနှုန်းကွာခြားမှုရှိကြောင်း သီဟိုဠ်စေ့ စိုက်ပျိုး ရောင်းချသူတစ်ဦးထံမှ သိရပါတယ်။  ဧရာဝတီတိုင်း အပါအဝင် မြန်မာနိုင်ငံကထွက်ရှိတဲ့ သီဟိုဠ်စေ့တွေကို အရင်က တရုတ်၊ စင်ကာပူ၊ ထိုင်း၊ တောင်ကိုရီးယား၊ ဟောင်ကောင်၊ မလေးရှား၊ အာဖရိက၊ ဂျပန်နှင့် အိန္ဒိယစတဲ့ နိုင်ငံတွေကို အဓိက တင်ပို့ရောင်းချကြောင်း သိရှိရပါသည်။

(Doca ဧရာဝတီ)

     ဧရာဝတီတိုင်းဒေသကြီး၊ ပုသိမ်ခရိုင်၊ ပုသိမ်မြို့နယ်အတွင်း ဇူလိုင်လစတုတ္ထပတ်တွင် ဖြစ်ပေါ်နေသော ဘူတာဈေးအတွင်း နေ့စဉ်လက်လီ ရောင်းဝယ်နေသော ကြက်ဥ/ဘဲဥအရောင်းဈေးနှုန်းများမှာ ကြက်ဥ (အကြီး) တစ်လုံးလျှင် (၅၀၀) ကျပ်၊ (အသေး) တစ်လုံးလျှင် (၄၅၀) ကျပ်တို့ဖြင့် အရောင်းအဝယ်ဖြစ်လျက်ရှိပါသည်။

     ဘဲဥဈေးနှုန်းများမှာ (အကြီး) တစ်လုံးလျှင် (၆၀၀) ကျပ်၊ (အသေး) တစ်လုံးလျှင် (၅၅၀) ကျပ်တို့ဖြင့်ရောင်းချလျက်ရှိပါသည်။

(Doca ဧရာဝတီ)

    ကန်စွန်းရွက်သည် လူငယ်လူရွယ်လူကြီးအားလုံးစားသုံးကြပြီး အဆိပ်အတောက်များကိုလည်းပြေပျောက်နိုင်စွမ်းရှိသော ဆေးဖက်ဝင်အပင်တစ်မျိုးလည်း ဖြစ်ပါသည်။ ကန်စွန်းရွက်ပင်သည် ရေကိုကြိုက်ပြီး ရေရရှိသော ကန်ချောင်းများတွင် သဘာဝအလျှောက်ပေါက်ရောက်ကြပြီး တစ်ချို့တွင် အစေ့ချစိုက်ပျိုးခြင်းများလည်းရှိပါသည်။ ယခု မိုးဦးကျကာလများ တွင် ကန်စွန်းရွက်ပင်များသည် ကောင်းစွာဖြစ်ထွန်းပေါက်ရောက်လျက် ရှိတတ်ကြသည်။

     အလေ့ကျပေါက်ပင်များနှင့် စိုက်ပျိုးပင်များအား စွတ်ခူးရောင်းချလျက်ရှိသော ကန်ကြီးထောင့်မြို့ ၊ မြို့မဈေးသစ် ကုန်စိမ်းတန်းတွင် ကန်စွန်းရွက်တစ်စီးလျှင် (၂၀၀) ကျပ်၊ ၃စီးလျှင် (၅၀၀) ကျပ်တို့ဖြင့်ရောင်းချလျက်ရှိကြောင်းသိရပါသည်။

(Doca ဧရာဝတီ)

       ကန့်ဘလူခရိုင်၊ ကျွန်းလှမြို့နယ်အတွင်း ငါးဈေးနှုန်းများ အနည်းငယ်မြင့်တက်လျက်ရှိရာမှ သဖန်းဆိပ်ဆည်မှ ထွက်ရှိသည့် ရေချို ပုဇွန်ဆိတ် ဈေးနှုန်းသည်လည်း ဈေးကောင်းဖြင့် ရောင်းချလျက်ရှိကြောင်း သိရှိရပါသည်။

    ပုဇွန်ဆိတ်သည် ကျွန်းလှမြို့နယ်အတွင်းရှိ သဖန်းဆိပ်ဆည်အတွင်းမှ ရရှိသည့် ရေချိုပုဇွန်ဆိတ်ဖြစ်ပြီး ပုဇွန်ဆိတ်ကို ဆကာဖြင့် အကောင်အကြီး /အသေး ခွဲခြားပြီး အကောင်အကြီး အသေး ပေါ်မူတည်၍ ဈေးများလဲကွာခြားသွားပါသည်။

     ၂၀၂၅ ခုနှစ် ၊  ဇူလိုင်လ နောက်ဆုံးပတ်အတွင်း ကျွန်းလှမြို့၌ ဖြစ်ပေါ်လျက်ရှိသော ပုဇွန်ဆိတ် ဈေးနှုန်းအနေဖြင့်  ပုဇွန်ဆိတ် ဆကာတင် အကောင်ကြီး လက်လီဈေး တစ်ပိဿာ(၂၃၀၀၀)ကျပ်နှင့် အလတ်စ လက်လီဈေး(၁၈၀၀၀)ကျပ်နှင့် အကောင်သေး လက်လီ တစ်ပိဿာလျှင် (၁၅၀၀၀)ကျပ် ဈေးနှုန်း အသီးသီးတို့ဖြင့်လည်းကောင်း၊ ပုဇွန်ခြောက် ဈေးနှုန်းများအနေဖြင့် ပုဇွန်ခြောက် အကြီး တစ်ပြည်လျှင်(၅၅၀၀၀)ကျပ်၊ ပုဇွန်ခြောက် အကြီး နို့ဆီ(၁)ဘူးလျှင်(၇၀၀၀) ကျပ်၊ ပုဇွန်ခြောက် အလတ် တစ်ပြည်လျှင်(၄၀၀၀၀)ကျပ်၊  အလတ် နို့ဆီ(၁)ဘူးလျှင် (၅၀၀၀)ကျပ် နှင့် ပုဇွန်ခြောက်  အသေး တစ်ပြည်လျှင်(၂၈၀၀၀)ကျပ်၊ နို့ဆီ(၁)ဘူးလျှင်(၃၅၀၀)ကျပ် ဈေးနှုန်းအသီးသီးတို့ဖြင့် ရောင်းချလျက်ရှိ ကြောင်းနှင့် ကျွန်းလှမြို့ သဖန်းဆိပ်ဆည်မှ ထွက်ရှိသည့် ရေချိုပုဇွန်ဆိတ်နှင့် ပုဇွန်ခြောက်သည် အကောင်သေးပြီး အရမ်းချိုကာ အသားကျစ်လစ်သည့်အတွက် လူကြိုက်များပြီး  အရောင်းသွက်ကာ ဈေးကောင်းရရှိလျက်ရှိကြောင်း သိရသည်။

DOCA(စစ်ကိုင်း)

    ကျွန်းလှမြို့၊ သစ်ရာမြိုင်ဈေးတွင် အသား/ငါးနှင့် အခြားစား‌သောက်ကုန်ပစ္စည်းများ၊ လူသုံးကုန် ပစ္စည်းများရောင်းချသည့်အနက်မှ အသား/ငါး ဈေးနှုန်းများထဲမှ ဝက်သားဈေးနှုန်းသည်လည်း မြင့်တက်လျက်ရှိပါသည်။

  ကျွန်းလှမြို့ ဇူလိုင်လ နောက်ဆုံးပတ်၏ သားဝက်ဈေးနှုန်းများအနေဖြင့် ဝက်သားရှယ် (အသားသီးသန့်) လက်လီ တစ်ပိဿာလျှင်(၃၂၀၀၀)ကျပ်၊ ဝက်သား(ပေါင်သား) လက်လီ တစ်ပိဿာ လျှင်(၃၀၀၀၀) ကျပ်၊ ဝက်သားရိုးရိုး(နံကိုင်းသား) လက်လီ တစ်ပိဿာလျှင်(၂၉၀၀၀)ကျပ်၊ ဝက်သား ဝမ်းတွင်းကလီစာ လက်လီ တစ်ပိဿာလျှင်(၂၀၀၀၀)ကျပ် နှင့် ဝက်သား(မေးဖျား၊ နားရွက်) တစ်ပိဿာလျှင်(၂၅၀၀၀)ကျပ်၊ ဝက်သွေးခဲ(၁)ပိဿာလျှင်(၄၀၀၀)ကျပ်ဈေးနှုန်းတို့ဖြင့် လည်းကောင်း ဝက်အူချောင်း ဈေးနှုန်း အနေဖြင့် ဝက်အူချောင်း တစ်ပိဿာလျှင်(၄၅၀၀၀)ကျပ်၊ ဝက်အူချောင်း(၅၀) ကျပ်သားလျှင် (၂၃၀၀၀)ကျပ်နှင့်  ဝက်အူချောင်း(၁၀)ကျပ်သားလျှင် (၄၅၀၀)ကျပ်ဈေးနှုန်းတို့ဖြင့် ရောင်းချလျက်ရှိကြောင်း သိရသည်။

DOCA(စစ်ကိုင်း)