ပြည်တွင်းကုန်သွယ်မှုသတင်း

  တောင်ငူမြို့ ဈေးလမ်းနှင့် မြို့မဈေးအတွင်းရှိ ဆန်ပွဲရုံများတွင် ယခင်လက ပိဿာ(၃၀)နှံကောက် ၁ အိတ်လျှင် ၄၅၀၀၀ ကျပ် ရှိပြီး ယခုအောက်တိုဘာလ ဒုတိယအပတ်တွင်လည်း ပိဿာ(၃၀)နှံကောက် ၁ အိတ်မှာ ၄၅၀၀၀ ကျပ်နှင့် ဈေးနှုန်းတည်ငြိမ်လျှက်ရှိပါသည်။ ယခင်လက ဗျော့ထွန်း အဟောင်း ၁ အိတ် ၇၂၀၀၀ ကျပ် ၊ ယခုအောက်တိုဘာလ ဒုတိယအပါတ်တွင် ဗျော့ထွန်းအဟောင်း ၆၅၀၀၀ ကျပ်ထိ ဈေးနှုန်းကျဆင်းလာပြီး ဗျော့ထွန်းအသစ်မှာ ယခင်လက ၆၈၀၀၀ကျပ် ၊ ယခုအောက်တိုဘာလ ဒုတိယအပါတ် ၁ အိတ် ၆၀၀၀၀ ကျပ်ဈေးနှုန်းကျဆင်းလျက်ရှိသည်။

   ဖွဲနု ၁ အိတ်လျှင် ယခင်လက ၃၀၀၀၀ ကျပ် ၊ ယခုအောက်တိုဘာလ ဒုတိယအပါတ် ၁ အိတ် ၂၈၀၀၀ ကျပ်၊ ဆန်ကွဲ (၂၊၃၊၄) ၁ အိတ် ယခင်လက ၄၀၀၀၀ ကျပ်၊ ယခုအောက်တိုဘာလ ဒုတိယအပါတ် ၃၈၀၀၀ ကျပ် ထိဈေးနှုန်းကျဆင်းလာကြောင်း သိရှိရပြီး အခြေခံစားကုန်များအနေနှင့် မြေပံဆံ ၁ ပိဿာ ၈၁၀၀ ကျပ်၊ ကုလားပဲခြမ်း ၁ ပိဿာ ၆၇၀၀ ကျပ်၊ သကြား ၁ ပိဿာ ၅၀၀၀ ကျပ်၊ အိုင်အိုဒင်းဆား (၃၅ကျပ်သား)၁ ထုပ် ၈၀၀ ကျပ် ၊ရိုးရိုးဆားကြမ်း၁ပိဿာလျှင် ၂၀၀၀ကျပ်၊ ကြက်သွန်ဖြူအလတ် ၁ပိဿာလျှင် ၃၅၀၀ ကျပ်၊ ကြက်သွန်နီ အလတ် ၁ပိဿာလျှင် ၁၅၀၀ ကျပ်၊ ငရုပ်သီးခြောက် အပု ၁ပိဿာ ၁၅၀၀၀ ကျပ်၊ ငရုပ်သီးခြောက် အရှည် ၁ပိဿာလျှင် ၁၁၀၀၀ ကျပ် ဈေးနှုန်းအသီးသီးဖြင့် ရောင်းချလျှက်ရှိကြောင်း ကုန်စုံဆိုင်များမှ သတင်းရရှိပါသည်။

DOCA(ပဲခူး)

          စိုက်ပျိုးရေးနိုင်ငံတစ်နိုင်ငံဖြစ်သည်အားလျော်စွာ မြန်မာနိုင်ငံသည် စိုက်ပျိုးရေးကဏ္ဍတွင် သီးနှံအမယ်ပေါင်းများစွာ အောင်မြင်ဖြစ်ထွန်းသည့် ရေခံ၊ မြေခံကောင်းမွန်သော နိုင်ငံတစ်ခုဖြစ်ပြီး စိုက်ပျိုးရေးထွက်ကုန်များမှ ပြည်တွင်းစားသုံးမှုနှင့် . ပြည်ပဝင်ငွေရှာဖွေပေးနေ သလို ဧရာဝတီတိုင်းဒေသကြီးသည်လည်း သဘာဝမှ လက်ဆောင်ပေးထားသည့် မြေဆီ၊ မြေနှစ် သဘာဝအရင်းအမြစ်များကို အသုံးပြုပြီး စိုက်ပျိုးရေးလုပ်ငန်းများတွင် အသားတင်စိုက်ပျိုးနိုင်သော မြေဧက ၄၄၈၈၇၁၉ ရှိသည့်အနက် လယ်စိုက်ဧက ၃၇၂၁၂၇၆ ပဲမျိုးစုံစိုက်ဧက ၁၆၁၂၅၁၂ လယ်ယာကိုင်းကျွန်းသီးနှံစိုက်ဧက ၂၅၁၈၇၁ ဥယျာဉ်ခြံမြေစိုက်ဧက ၄၃၃၆၇ ၊ ဓနိ စိုက်ဧက ၄၁၂၇၇ ၊ နှစ်ရှည်သီးနှံသီဟိုဠ်စိုက်ဧက ၆၅၉၃၃ စိုက်ပျိုးလျက်ရှိသည့်အပြင် နှစ်ရှည် (စက်မှုကုန်ကြမ်းသီးနှံ) ရော်ဘာကိုလည်း စိုက်ပျိုးလျက်နေပါသည်။

          ရော်ဘာကိုမြန်မာနိုင်ငံ၏ အနှံ့အပြားမှာစိုက်ပျိုးလျက်ရှိပြီး ရော်ဘာလုပ်ငန်းသည် တစ်ကမ္ဘာလုံး ဆိုင်ရာစီးပွားရေးလုပ်ငန်းဖြစ်သည်နှင့်အညီ ဈေးကွက်လွန်စွာ ကြီးမားကျယ်ပြန့်လှပြီး ရော်ဘာစိုက်ပျိုးထုတ်လုပ်သော နိုင်ငံတွေအနေနဲ့နိုင်ငံတကာ လိုအပ်ချက်ကြီးမားတဲ့ ရော်ဘာစိုက်ပျိုးထုတ်လုပ်မှုကို အလေးထားဆောင်ရွက်နေသလို မိမိတို့မြန်မာနိုင်ငံသည်လည်း ရော်ဘာစိုက်ပျိုးထုတ်လုပ်တဲ့နိုင်ငံတွေအနက် တစ်ခုအပါအဝင်ဖြစ်ကာ ရော်ဘာကဏ္ဍဖွံ့ဖြိုးတိုးတက်ရေးအတွက် ကြိုးစားဆောင်ရွက်လျက်ရှိပြီး ဧရာဝတီတိုင်းဒေသကြီးအတွင်းမှာလည်း နှစ်ရှည်(စက်မှုကုန်ကြမ်းသီးနှံ) ရော်ဘာကို စိုက်ပျိုးရေးဦးစီးဌာနမှ နိုင်ငံအတွင်းဒေသအလိုက် ရော်ဘာအထွက်နှုန်းတိုးတက်စေရန် သတ်မှတ်ထားသော ရေမြေရာသီဥတုနှင့်ကိုက်ညီသည့် BPM-24/ PRIM-25 ရော်ဘာမျိုးများကို စိုက်ပျိုးလျက်ရှိကြောင်း သိရှိရပါသည်။

DOCA(ဧရာဝတီ)

    ထားဝယ်မြို့၊စည်ပင်သာယာစျေးအတွင်းတွင် ပဲစောင်းလျားသီးများ ရောင်းချလျက်ရှိပါသည်။ အသီးများကို အနီးနာကျေးရွာအတွင်းရှိ ခြံစိုက်ပျိုးသူများက လာရောက်‌ ရောင်းချလျက်ရှိပါသည်။ ယခု အချိန်သည် ဒေသထွက် ပဲစောင်းလျားသီးများလှိုင်လှိုင် ထွက်ချိန်ဖြစ်၍ ပေါများစွာဝယ်ယူရရှိနိုင်ပါသည်။ အကြီးအသေးပေါ်မူတည်၍ စျေး အနည်းငယ်ကွာခြားပါသည် အကြီး(၁၀)တောင့်လျှင် ၁၀၀၀ကျပ်ဖြစ် ပြီးအလတ်(၁၃) တောင့်လျှင် ၁၀၀၀ကျပ်ဖြစ်ဝယ်ယူ နေရကြောင်းအိမ်ရှင်မ တစ်ဦးထံမှ သိရှိရပါသည်။

DOCA (တနင်္သာရီ)

  ငါးသလဲထိုးငါးသည် ရေချိုငါးစိတ်မျိုးများဖြစ်ကြသည်။ အရောင်မှာ ရွှေဝါရောင်ရှိပြီး အမဲရောင် အစက်အပျောက်များပါရှိသည်။ ငါးသလဲထိုးမှာ အသားနုပြီး အာဟာရဓါတ်အလွန်ပြည့်ဝ သော ရေထွက်ကုန်ဖြစ်၍ ရေထဲက ဂျင်စင်းဟု တင်စားခေါ်ဆိုကြသည်။ ကျန်းမာရေးနှင့်ညီညွတ်ပြီး အရိုးပါမကျန် စားသုံးနိုင်သော ငါးဖြစ်ပါသည်။

    ငါးသလဲထိုးငါးကို ငါးလေးအိုးအပ်ဟင်းအဖြစ် ရှေးယခင်က တောသူတောင်သား အစားအစား အဖြစ်လည်းကောင်း၊ ယခုအချိန်တွင် ရိုးရာအစားအစာအဖြစ် ဟိုတယ်ကြီးများ၊ စားသောက်ဆိုင်ကြီး များတွင် တခမ်းတနား ရောင်းချနေသည်ကို တွေ့ရသည်။

          ပြည်ဈေးကွက်တွင် ငါးသလဲထိုးငါးများ ရောင်းချနေသည်ကို တွေ့ရှိရပါသည်။ ပြည်မြို့၊ မှော်ဇာဘက်မှလာရောက်ရောင်းချကြောင်းသိရသည်။ငါးသလဲထိုးငါးဈေးနှုန်းများမှာ (၁၀)ကျပ်သား လျှင် (၄၀၀၀)ကျပ်ဖြင့် ရောင်းချပြီး (၁)ပိဿာဈေးနှုန်းမျာ (၃၈၀၀၀)ကျပ်ဖြစ်ကြောင်း သိရသည်။

DOCA(ပဲခူး)

          ဧရာဝတီတိုင်းဒေသကြီးအတွင်း ပင်လယ်ကမ်းခြေတလျှောက်နှင့် မြစ်ဝကျွန်းပေါ်ဒေသများတွင် လက်ညှိုးထိုးမလွှဲသော အပင်အများစုမှာ အုန်းပင်ဖြစ်ပြီး ရေငံပိုင်းနှင့် ရေချိုရေငံစပ် ဒေသများတွင် အုန်းပင်ဖြစ်ထွန်းမှုအားကောင်းပြီး ရေချိုပိုင်းတွင် ရေငံပိုင်းလောက်အုန်းပင် ဖြစ်ထွန်းမှုနည်းပါးသော်လည်း မြို့နယ်တိုင်းတွင် အုန်းပင်စိုက်ပျိုးလျက်ရာ အုန်းပင်မှအုန်းသီး၊ အုန်းဆီ၊ အုန်းသားခြောက်၊ အုန်းခွံမီးသွေး၊ အုန်းသီးလက်မှုပစ္စည်းများ အုန်းတံမြက်စည်း၊ အုန်းဆံကြိုး၊ ခြေသုတ်ခုံများ ပြုလုပ်သုံးစွဲလျက်ရှိသည့်အတွက် အုန်းတစ်ပင်လုံးအသုံးဝင်ပြီး မြန်မာ့ရိုးရာအစားအစာများတွင် မပါမဖြစ်ပါဝင်နေသော အုန်းပင်များမှာတိုင်းအတွင်းစိုက်ဧက ၁၆၅၀၀၀ ကျော်ကြောင်းသိရသည်။

          တိုင်းဒေသကြီးအတွင်း စိုက်ပျိုးမြေများစွာရှိပြီး ရေခံမြေခံကောင်းမွန်သည့်အတွက် ဓနုဖြူမြို့နယ် ယင်းဒကစ်ကျေးရွာရှိ ရေနက်ကွင်းတွင် လွန်ခဲ့သော၅နှစ်ခန့်မှစတင်၍ ALLOY Co,.Ltd မှအမယ် သစ်ယိုးဒယားမျိုး(အုန်းချိုမွေး)အုန်းသီးအနုအုန်းစိမ်းရည် အရည်သောက် အုန်းပင်များစတင်စမ်းသပ်စိုက်ပျိုးခဲ့ရာ ရေမြေရာသီဥတုနှင့် ကိုက်ညီမှုရှိပြီး အောင်မြင်ဖြစ်ထွန်းမှုရှိသည့်အတွက် ယခင်က အသုံးမပြုသော ရေနက်ကွင်းမြေကိုစနစ်တကျပြုပြင်၍ ရေတစ်ဘောင်ကုန်း တစ်ဘောင်စိုက်ပျိုး နည်းစနစ်ဖြင့် အုန်းချိုမွေးစိုက်ဧက ၁၈၀ စိုက်ပျိုး ခဲ့ပါသည်။ အုန်းချိုမွေး ၁ဧကအတွက် အပင်ရေ ၉၀စိုက်ပျိုး၍ ၁ပင်ကို၁နှစ် ၁၈ခိုင်ထွက်ရှိပြီး ပျှမ်းမျှ အလုံးရေ ၁၂၆လုံးခန့်သီးကြောင်း ၁ ဧကကို ၁နှစ်အုန်းသီး ၁၁၃၄၀ ဝန်းကျင် ရရှိမှာဖြစ်သလို အုန်းစိုက် ဧက၁၈၀ အုန်းပင် ၁၆၀၀၀ အတွက် ၁နှစ် လျှင်ပျမ်းမျှအုန်းသီး အလုံးရေ သိန်း၂၀ ဝန်းကျင်ရရှိမှာဖြစ်ကြောင်း သိရှိရပါသည်။

DOCA(ဧရာဝတီ)