ပြည်တွင်းကုန်သွယ်မှုသတင်း

           စစ်ကိုင်းတိုင်းဒေသကြီး၊ မုံရွာမြို့၊ မကျည်းပင်ဈေးအတွင်းတွင်  မိသားစုစားဝတ်နေရေးအတွက် (မုန့်တီ၊မုန့်ဟင်းခါး) မုန့်ဖက်လုပ်ငန်းများကို စီးပွားဖြစ် တစ်နိုင်တစ်ပိုင်လုပ်ကိုင်ကြပါသည်။ (မုန့်တီ၊ မုန့်ဟင်းခါး) မုန့်ဖက်များကို မုံရွာမြို့ပေါ်နှင့်ကျေးရွာများမှ ဝယ်ယူစားသုံးကြကြောင်း၊ မုန့်တီ၊ မုန့်ဟင်းခါး ရောင်းချသူများ၊  အလှူပွဲ၊ မွေးနေ့ပွဲနှင့် ဘုရားပွဲများတွင် အသုံးပြုရန်အတွက် ဝယ်ယူကြသဖြင့် အရောင်းအဝယ်သွက်လျက်ရှိကြောင်း သိရပါသည်။

       ၂၀၂၅ခုနှစ်၊ စက်တင်ဘာလ ဒုတိယအပတ်အတွင်းတွင် ရောင်းချလျက်ရှိသော (မုန့်တီ၊ မုန့်ဟင်းခါး) မုန့်ဖက်ဈေးနှုန်းများမှာ (၁)ပိဿာ လျှင် (၂၅၀၀)ကျပ်၊ (၅၀)ကျပ်သားလျှင် (၁၃၀၀)ကျပ်၊ (၂၅)ကျပ်သား လျှင် (၇၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း (မုန့်တီ၊မုန့်ဟင်းခါး)မုန့်ဖက် ရောင်းချသူထံမှသိရှိရပါသည်။

DOCA(စစ်ကိုင်း)

    ဧရာဝတီတိုင်းဒေသကြီး ဓနုဖြူမြို့နယ်မှ ဒေသထွက်ပိန်းဥများ ကို ရန်ကုန်ဈေးကွက်သို့  ပြီးခဲ့သည့် ဇူလိုင်လအတွင်းက ပိဿာ ၆၅၀၀၀  အထိ  တင်ပို့ရောင်းချနိုင်ခဲ့ကြောင်း  ဓနုဖြူမြို့နယ်မှ   ကုန်စိမ်းရောင်းဝယ်ရေး လုပ်ငန်းလုပ်ကိုင်သူ ဒေါ်မိုးသူ၏ပြောပြ ချက်အရ သိရသည်။

    ဓနုဖြူမြို့နယ်မှ ဒေသထွက်ပိန်းဥများကို ရန်ကုန်ဈေးကွက် သို့  ဇွန်လအတွင်းက ပိဿာ ၅၀၀၀၀ အထိသာ တင်ပို့ရောင်းချ နိုင်ခဲ့သော်လည်း  ဇူလိုင်လ ၁ ရက်မှ ၃၁ ရက်အထိ  တစ်လတာ ကာလအတွင်း ပိဿာ ၆၅၀၀၀ အထိ တင်ပို့ရောင်းချနိုင်ခဲ့သည်။

    ''ဒေသထွက်ပိန်းဥတွေကို ရန်ကုန်ဈေးကွက်ကို အဓိကတင်ပို့ ရောင်းချခဲ့ရပါ တယ်။   ဒေသထွက်ပိန်းဥ တွေက  အရည်အသွေး ကောင်းမွန်ပါတယ်။ ပိန်းဥတွေကို ရန်ကုန်ဈေးကွက် ဝယ်လက်တွေ က   ဝယ်လိုအားများနေလို့   တင်ပို့အားတက်ခဲ့တာ ဖြစ်ပါ တယ်'' ဟု ဒေါ်မိုးသူကပြောသည်။

    ဓနုဖြူမြို့နယ်မှ   ရန်ကုန်ဈေးကွက်သို့   ပြီးခဲ့သည့်ဇူလိုင်လ အတွင်း  တင်ပို့ရောင်းချခဲ့သည့် ပိန်းဥများ အရောင်း အဝယ် ကောင်းမွန်လာသည့်အတွက်  ဒေသခံတောင်သူများ၊ ကုန်သည်များ၊ ကုန်တင်ကုန်ချလုပ်သား များနှင့်  ကုန်တင်ယာဉ် အငှားလိုက် လုပ်ငန်းလုပ်ကိုင်သူများ  အလုပ်အကိုင် အခွင့်အလမ်းရရှိနေ ကြောင်း သိရသည်။           

(DOCA ဧရာဝတီ)

    ဧရာဝတီတိုင်းဒေသကြီး ဟင်္သာခရိုင် ဟင်္သာတ မြို့နယ်၌   ငှက်ပျောသီးများဝယ်လိုအား ကောင်းပြီး အရောင်းအဝယ်ကောင်းမွန်နေကြောင်း  ဟင်္သာတ မြို့နယ်မှ    ငှက်ပျောသီးမျိုးစုံ    ရောင်းဝယ်ရေးပွဲရုံလုပ်ငန်း လုပ်ကိုင်သူ ဒေါ်ဇာဇာ၏ ပြောကြားချက်အရ သိရသည်။

     ဟင်္သာတမြို့နယ်ဒေသဈေးကွက်၌ ယခုနှစ် သြဂုတ်လ နောက်ဆုံးပတ်မှစ၍ ငှက်ပျောသီးအစုံ ဝယ်လိုအား ကောင်းမွန်လာကာ  အရောင်းအဝယ်ကောင်းမွန် လျက်ရှိပြီး တစ်ရက်လျှင် ငှက်ပျောသီးအဖီးရေ ၄၀၀၀ မှ  ၅၅၀၀  အထိ   အရောင်းအဝယ်ဖြစ်နေကြောင်း၊ အရောင်းအဝယ်ကောင်းမွန်နေသည့်   ငှက်ပျောသီး များမှာ ဖီးကြမ်း၊ ရခိုင်၊ သီးမွှေး၊ ခွံနီ၊ ရွှေငှက်ပျော စသည့်   ငှက်ပျောသီး အမျိုးအစားများဖြစ်ကြောင်း သိရသည်။

     ''ဟင်္သာတမြို့နယ်ကနေထွက်ရှိတဲ့ ငှက်ပျောသီးတွေကို  တခြားမြို့နယ်တွေက ဝယ်လိုအားများနေပါတယ်။ လက်ရှိ ငှက်ပျောသီးအဖီးရေ ၅၅၀၀ အထိ အရောင်းအဝယ်ဖြစ်နေပါတယ်။ အခု အရောင်းအဝယ်ကောင်းနေ တဲ့  ငှက်ပျောသီးတွေက  အရည်အသွေးကောင်းမွန်ပါတယ်။ ဒေသထွက်ကုန်ဖြစ်တော့ ဓာတုကင်းလွတ်ပြီး သန့်ရှင်းလတ်ဆတ်မှုရှိပါတယ်" ဟု ဒေါ်ဇာဇာကပြောသည်။

    ဟင်္သာတမြို့နယ်၌    လက်ရှိငှက်ပျောသီးအပါအဝင်  ဒေသထွက် ကုန်စိမ်းသီးနှံများ   ပေါ်နေသည့် အချိန်ဖြစ်ကြောင်း၊   အဆိုပါဒေသထွက်ငှက်ပျော သီးများ ဝယ်လိုအားကောင်းပြီး အရောင်းသွက်လာကြောင်း၊    ဒေသထွက်ကုန်များကိုသာ  အရောင်းအဝယ် ပြုလုပ်ရခြင်းကြောင့် သယ်ယူစရိတ်သက်သာခြင်း၊ ကုန် ပစ္စည်း လတ်ဆတ်မှုရှိခြင်း   စသည့်အကျိုးကျေးဇူးများ ရရှိကြောင်း သိရသည်။  

(DOCA ဧရာဝတီ)

     ကန့်ဘလူမြို့တွင် ရာသီပေါ်သီးနှံများဖြစ်သော ခဝဲသီး၊ ရွှေဖရုံသီး၊ ကန့်လန့်ဖူး၊ မုံညှင်းရွက်၊ ခရမ်းကဆော့သီး၊ ကြက်ဟင်းခါးသီး၊  ခရမ်းသီးများ ရောင်းချလျက်ရှိရာ ယခုအခါ ကင်းပုံပင်နှင့် ဗုံလုံသီး(ခေါ်)ပဲလင်းမြွေသီးပင်များကို  နေအိမ်ခြံဝင်း များတွင်လည်းကောင်း၊ ယာကွက်ခြံစည်းရိုးများတွင်လည်းကောင်း စိုက်ပျိုး၍ ရောင်းချလျက်ရှီ ကြောင်းသိရသည်။

      ၂၀၂၅ခုနှစ်၊ စက်တင်ဘာလ ပထမပတ်၌ ကန့်ဘလူမြို့မဈေးတွင် ကင်းပုံသီးနှင့် ဗုံလုံသီး (ခေါ်)ပဲလင်းမြွေသီးများကို ကန့်ဘလူမြို့ပေါ်၊နတ်ပေးကျေးရွာနှင့် အခြားသောကျေးရွာ များမှဝယ် ယူ၍ရောင်းချလျက်ရှိကြောင်း၊ ကင်းပုံသီးများကို နို့ဆီဘူး(၁)ဘူးလျှင် (၅၀၀)ကျပ်၊ (၁)ပြည်လျှင် (၃၈၀၀)ကျပ်နှင့် ဗုံလုံသီး(ခေါ်)ပဲလင်းမြွေသီးဈေးနှုန်းမှာ ဗုံလုံသီး(ခေါ်)ပဲလင်းမြွေသီး အကြီး(၁) တောင့်လျှင် (၆၀၀)ကျပ်၊ အလတ်(၁)တောင့်လျှင်(၃၀၀)ကျပ်၊ အသေး(၁)တောင့်လျှင် (၂၀၀)ကျပ် ဖြင့်အရောင်းအဝယ်ဖြစ်လျက်ရှိကြောင်း ကုန်စိမ်းရောင်းချသူထံမှ သတင်းရရှိပါသည်။

DOCA (စစ်ကိုင်း)

  စစ်ကိုင်းတိုင်းဒေသကြီး၊ ကန့်ဘလူမြို့၊ မြို့မဈေးတွင် အသားငါးအမျိုးစုံအပြင် ရေထွက်ကုန်ပစ္စည်းဖြစ်သော ငါးရံ့ခြောက်နှင့် ပုဇွန်ခြောက်များကိုလည်း ရောင်းချလျက်ရှိပါသည်။ ယခုအခါ  ငါးရံ့ခြောက်နှင့် ပုဇွန်ခြောက်များကို  ကန့်ဘလူမြို့နယ်နှင့် ကျွန်းလှမြို့နယ်အတွင်းရှိဆည်များမှ ဝင်ရောက်လျက်ရှိပြီး ငါးရံ့ခြောက်နှင့် ပုဇွန်ခြောက်များကို ဒေသထွက်ကုန်တစ်ခုအနေဖြင့်ထုတ်လုပ် ရောင်းချလျက်ရှိပါသည်။ ငါးရံ့ခြောက်နှင့် ပုဇွန်ခြောက်များကို အသိမိတ်ဆွေများအားလက် ဆောင်ပေးခြင်းအတွက်သော်လည်းကောင်း၊ ကိုယ်တိုင်စားသုံးရန်အတွက်သော်လည်းကောင်းဝယ် ယူကြကြောင်း၊ ၂၀၂၅ခုနှစ်၊ စက်တင်ဘာလ ဒုတိယပတ်အတွင်း ရောင်းချလျက်ရှိသော ငါးရံ့ ခြောက်နှင့် ပုဇွန်ခြောက်ဈေးနှုန်းများမှာ ငါးရံ့ခြောက်(၁)ပိဿာလျှင်(၆၅၀၀၀)ကျပ်၊ ငါးရံ့ခြောက် (၅၀)ကျပ်သားလျှင် (၃၃၀၀၀)ကျပ်၊ ငါးရံ့ခြောက်(၂၅)ကျပ်သားလျှင် (၁၆၅၀၀)ကျပ်နှင့် ပုဇွန် ခြောက်အသေး (၁)ဘူးလျှင်(၃၅၀၀)ကျပ်၊ ပုဇွန်ခြောက်အသေး(၁)ပြည်လျှင်(၂၈၀၀၀)ကျပ်၊ ပုဇွန် ခြောက်အကြီး(၁)ဘူးလျှင်(၅၀၀၀)ကျပ်၊ ပုဇွန်ခြောက်အကြီး(၁)ပြည်လျှင်(၄၀၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း ငါး၊ ပုဇွန်ရောင်းဝယ်ရေးလုပ်ငန်းရှင်ထံမှ သိရပါသည်။

DOCA(စစ်ကိုင်း)