သတင်းနှင့် လှုပ်ရှားမှုများ

       ကျွန်မတို့မြန်မာနိုင်ငံကြီးမှာဆိုလျှင် သဘာဝတရားကြီးက ဖန်တီးပေးထားတဲ့ အဖိုးတန် ရတနာများစွာ ရှိပါသည်။ တန်ဖိုးမဖြတ်နိုင်သော အပင်များစွာလည်း ပေါက်ရောက်လျက် ရှိပါသည်။ ယခုအခါ အနောက် နိုင်ငံများမှ မြန်မာနိုင်ငံရှိ အဖိုးတန်ဆေးဖက်ဝင် အပင်များကို သတိထား မိလာကြပြီး မြန်မာနိုင်ငံနှင့် ချိတ်ဆက်ရောင်းဝယ်မှုများ ပြုလုပ်လာကြပါသည်။ မြန်မာနိုင်ငံမှ လျှော်ဖြူကို တရုတ်(တိုင်ပေ)သို့ တရားဝင်လမ်းကြောင်းဖြင့် တင်ပို့ရောင်းချနေကြောင်း လေ့လာသိရှိရပါသည်။ ဒါကြောင့် ယနေ့ နေရာတော်တော် များများတွင် အသုံးဝင်နေသော တန်ဖိုး မဖြတ်နိုင်သည့် ဈေးကွက်ဝင် လျှော်ဖြူပင် အကြောင်းကို ရွှေဘိုခရိုင် ကျောက်မြောင်းမြို့ မအူ ကျေးရွာ ရှိ လျှော်ဖြူစိုက်ဧက(၂၅)ဧက ပိုင်ရှင် ဦးစိုးမိုးအောင် မေးမြန်း ထားသည်များကို ဖော်ပြလိုက် ပါသည်။

လျှော်ဖြူပင်စိုက်နည်း

လျှော်ဖြူအစေ့များကို ပြန်ပျိုး၍ (၂)လ(၃)လ ကြာသောအပင်များထဲမှ အကိုင်းအခက်များသန်၍ ဖြာနေသော အပင်များကို ရွေးပြီး  (၂)ပေပတ်လည် ကျင်းတူး ပြီးမြေဆွေး ထည့်၍ မြေနပ်၊ နှစ်မိုးကျစောင့်ပြီး မြေနပ်  ထားသော မြေများသည် အပူဓါတ် မရှိလျှင် စိုက်လိုရပါသည်။ အပင်ငယ်လျှင် မြေဆွေး တစ်နှစ်လျှင် နှစ်ကြိမ် ထည့်ရသည်။ (၁၅)ပေ ပတ်လည် (သို့) ပေ(၂၀) ပတ်လည်ခြားအပင်များကိုစိုက်ရပါသည်။ အပင်ကြား၊ တန်ကြားများတွင် တွန်ထယ် ဝင်ရသည်။ အမြစ်ဥခွေနေလျှင် ကြီးထွားမှုနှေးနေပါသည်။

အစေ့ထုတ်နည်း

အပင်ရင်စို့လက်မ (၂၅)လက်မဝန်းကျင်တွင် စ၍ထုတ်လိုရသည်။ ရေမြေကောင်း၊ ပြုစုကောင်းလျှင် (၂)နှစ်ခွဲသား (၃)နှစ်လောက် တွင်အစေးထုတ်ရသည်။ ဆောင်းတွင်းတွင် အထွက် ကောင်းသည်။ တစ်ခါ ခုတ်ထား၍ မိုးမရွာလျှင်(၇)ရက်(၈)ရက်တွင် အစေးထုတ် ယူလိုရသည်။ တစ်လလျှင် အနည်းဆုံး (၃)ကြိမ် ခုတ်ရသည်။ ပူလျှင်အရောင်မပြောင်း။ မိုးရွာ၊စိုစွတ် လျှင်အရောင်းပြောင်းနိုင်သည်။အနံလဲ ထွက်နိုင်သည်။ အပင်ကို ထစ်ရာ တွင် ဓါးဖြင့်ထစ်သည်။ ဓါးဖြင့် ခုတ်နည်းတွင် လခြမ်းထစ်၊ မိုးခိုထစ်၊ စာပါးစပ်ထစ် စသည့် အမျိုးမျိုးရှိသည်။ ကွာခြားမှုတွင် အပင်အသေးအကြီး၊ ကိုင်သောဓါးထက်မထက်၊ လက်စပေါ်မူတည်သည်။ စာပါးစပ် ထုတ်ရာတွင် အကျဉ်းထုတ်၊ အလယ်အလတ်ထုတ်နှင့် အပြည့်ထုတ်တာမျိုးရှိသည်။ လခြမ်းထစ်သည် အောက်က ညီ၍ အပေါ်ကနေလခြမ်းခုံးကျသောနည်းဖြစ်သည်။ မိုးခိုထစ်သည် အပေါ်ကညီ အောက်ကနေ ပင့်ပြီးလခြမ်းပြန်ယူသောနည်းဖြစ်သည်။ အပင်သက်တမ်းကြီးသော အပင်များကို လခြမ်းထစ် ဖြင့်လဲခုတ်၍မရ။ စာပါးစပ်နည်းကတော့စဉ်းတောင်စဉ်းလိုမရပါ။ အဝိုင်းလိုက်ခုတ်ချရသည်။ ပြားပြားလှီး ရသည်။ အပင်ပေါ်တွင် မူတည်၍ ထုတ်ရသည်။ ထစ်ရာတွင် ရေမြေ ရာသီဥတုဒေသ တစ်နေရာနှင့် တစ်နေရာမတူသည့်အတွက် အပင်၏ကျန်းမာရေး၊ အပင်ရွက်နုပြန်နေလျှင် စ၍ထုတ်ရသည်။ အပင်၏ ကြီးထွားမှု ပေါ်မူတည်၍ ထစ်ရသည်။ တောင်စုတ်ခြား တစ်တောင့်အောက် နည်းနည်းလျော့သော အကွာအဝေးတွင် ထုတ်သည်။ အငှား ထုတ်သောသူ များသည် အစေးများများ ရချင်သော ကြောင့် (၁)ပေ ကြားလောက်တွင်ထုတ်ကြသည်။ ဖောက်တာမျိုးလဲရှိသည်။ လော်နှင့်ဖောက်လိုရသည်။ ရေစို့ဂန်း နှင့်လဲဖောက်ကြသည်။ ၄င်းတို့မှ ဖောက်၍ ထွက်လာသော အစေးသည်အပွင့်စေးမထွက်။ အသားစေး သာထွက်သည်။ အစေးမကောင်းတာတော့ မဟုတ်ပါ။ ဈေးကွက်ဝယ်လိုအားရှိလျှင် တွက်ခြေကိုက်သည်။ ယခုအချိန် အခါတွင် အပွင့်စေးသည် ဈေးကွက်ဝင်သောကြောင့် အပွင့်စေးများများရသော စာပါးစပ်နည်းဖြင့် ထုတ်သည်။ စာပါးစပ်နည်းသည် လေသလတ်များများခံရသည်။ စာပါးစပ်နည်းသည် အစေးနှုန်းထား ပိဿာချိန်လျော့သော်လည်းဈေးရ၍ထုတ်ရသည်။ ဈေးကွက်ဝယ်လိုအားကို လိုက်၍ တွက်ခြေ ကိုက်သော နည်းဖြင့် ထုတ်ရသည်။ အသီးသီးလျှင် အပင်အားယုတ်သည်။ ကြားကိုင်း များကို ရှင်းပေးလျှင် မိုးတွင်းတစ်တွင်း လုံးထွက်လာသော အရွက်ပင်စည်များ သည်အများကြီး ဖြစ်လာ သည်။ (၄)နှစ်ခွဲသား၊(၅)နှစ်သား အပင်သည် မိုးကောင်းကောင်းလှိုင်၍ အပင် ကောင်းကောင်း အစေးယိုနေသောအချိန်မာန်ပေါက်ကောင်းကောင်းနှင့် မာန်သာလျှင် (၁)ပင်(၁)ကျပ်သားထွက် သည်။ အပင်တစ်ရာကို တစ်ပိဿာ ထွက်နိုင်သည်။ မာန်သား အနေအထားလတ်နေလျှင် အခုလှီးအခုယူသည်။နေ့တိုင်းမလှီးပါ။ မိုးကောင်း၍မာန်တက်မြန်မှ(၇)ရက် ကြာမှလှီးသည်။ ပုံမှန်ဆိုလျှင် (၉)ရက်(၁၀)ရက်ကြာမှလှီးသည်။ ကြားထဲတွင် မလှီးဘဲကောက်နေရသည်။ တစ်လလျှင် အလွန်ဆုံး (၃)ကြိမ်မှ(၄)ကြိမ် ဓါးပတ်ဝင်ရသည်။

ဈေးနှုန်းအခြေအနေ

(၂၅.၂.၂၀၂၀)နေ့နောက်ဆုံးရောင်းဈေးသည် ကြာဇံသည် (၁၅၀ဝ၀ဝ)ကျပ် ဝန်းကျင်၊ ကြာတိုကြာပြတ်သည် (၅၀ဝ၀ဝ)ကျပ်မှ(၆၀ဝ၀ဝ)ကျပ်၊ ကြာထွေးသည်(၄၀ဝ၀ဝ)ကျပ်မှ (၄၅၀ဝ၀)ကျပ် ဝန်းကျင်၊ A သုံးလုံးသည် (၂၇၀ဝ၀)ကျပ်၊ A နှစ်လုံးသည် (၁၈၀ဝ၀)ကျပ်၊ A တစ်လုံးသည် (၁၅၀ဝ၀)ကျပ်၊ B စ ဝါသည် (၁၀ဝ၀ဝ)ကျပ် C စ ညိုပိတ်သည်(၄၀ဝ၀)ကျပ် မှ (၅၀ဝ၀)ကျပ်၊ အမှိုက်အဆင့်ညှပ်စ တစ်ပိဿာလျှင် (၅၀ဝ)ကျပ် မှ (၆၀ဝ)ကျပ်ထိရသည်။ စုပ်ယူအား သောကြောင့် မြေသြဇာဖြစ်အသုံးပြု၍ရသည်။

အသုံးပြုဝင်ပုံ

စိုက်ပျိုးရေးဆေးများထဲတွင်လည်းပါဝင်သည်။ အလှကုန်သုံး၊အဆောက်အဦသုံးဆေးဝါး၊ လူသုံးဆေးဝါး၊စက်မှု ကုန်ကြမ်း၊ ကားမှန်၊ဖုန်းမှန်များပြုလုပ်သည့် အထဲတွင်လည်းပါသည်။ စားသောက်ကုန်များ၊ အထူးသဖြင့် ဂျယ်လီများတွင်အဓိကထားသုံးသည်။ အမှုန့်ပြုပြီး ကျန်းမာရေး ဓါတ်စာဖြင့်စားသုံးကြသည်။

ဇင်မျိုးမော်

ရွှေဘိုခရိုင်ဦးစီးမှူးရုံး

     မွန်ပြည်နယ်၊ ကျိုက်ထိုမြို့နယ်အဆင့် COVID-19 ရောဂါကာကွယ်ထိန်းချုပ်ရေးလုပ်ငန်း ကော်မတီအား မြို့နယ်အုပ်ချုပ်ရေးမှူး မှ ဥက္ကဌအဖြစ် တာဝန်ယူလျှက် ဌာနဆိုင်ရာအသီးသီးမှ အဖွဲ့ဝင် (၁၅) ဦးဖြင့် မြို့နယ်အဆင့် ကာကွယ်ထိန်းချုပ်ကုသရေးလုပ်ငန်းကော်မတီကို ၂၀၂၀ ခုနှစ်၊ မတ်လ (၂၀) ရက်နေ့တွင် ဖွဲ့စည်းတာဝန်ပေးခဲ့ကြောင်း သိရှိရသည်။

     အဆိုပါကော်မတီတွင် စားသုံးသူရေးရာဦးစီးဌာနမှ အဖွဲ့ဝင်အဖြစ်ပါဝင်ခဲ့ရပြီး ၂၁.၃.၂၀၂၀ ရက်နေ့တွင် သထုံခရိုင်စားသုံးသူရေးရာဦးစီးဌာနမှ ဦးစီးမှူး ဦးအောင်ကျော်မင်း၊ ကျိုက်ထိုမြို့နယ် တာဝန်ခံနှင့် ကော်မတီဝင်များသည်  ကျိုက်ထီးရိုးဘုရားရင်ပြင်ပေါ်တွင် ရောဂါကူးစက်ဖြစ်ပွားရာ ဒေသများမှ လာရောက်သူများမှတစ်ဆင့် လူစုလူဝေးကြောင့် ရောဂါကူးစက်ဖြစ်ပွားမှုမရှိစေရေး အတွက် အသွားအလာပိတ်ပင်တားဆီးခြင်း၊ ကန့်သတ်ခြင်းလုပ်ငန်းများဆောင်ရွက်ရာတွင် ပူးပေါင်းညှိနှိုင်းဆောင်ရွက်ခဲ့ကြောင်း သိရှိရပါသည်။

       ယခုအချိန်တွင် ကျိုက်ထီးရိုးတောင်တက်ကားများ စတင်ပိတ်သိမ်းခြင်း၊ ဘုရားရင်ပြင်တော် ပေါ်ရှိ မော်တော်ယာဉ်များ၊ တည်းခိုခန်းများ၊ ဈေးဆိုင်ခန်းများ၊ စားသောက်ဆိုင်များ စတင်ပိတ်သိမ်း လျှက်ရှိပြီး ဘုရားဖူးပြည်သူများနှင့် ဈေးသူဈေးသားများ မိမိတို့နေရပ်အသီးသီးသို့ ပြန်လည် ထွက်ခွာ လျှက်ရှိကြောင်း သိရှိရသည်။

မွန်ပြည်နယ်

စားသုံးသူရေးရာဦးစီးဌာန

     မြစ်ကြီးနားခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးနှင့် တာဝန်ရှိသူများသည် ၃.၃.၂၀၂၀ ရက်နေ့တွင် ကချင်ပြည်နယ်၊ မြစ်ကြီးနားမြို့ ရွှေအိုက်ရပ်ကွက်၌ စားသုံးသူကာကွယ်ရေးအသိပညာပေးဟောပြောဆွေးနွေးခြင်း၊ ကုန်အညွှန်းအမှတ်အသားများနှင့်ပတ်သက်၍ ရှင်းလင်းခြင်း၊ အသိပညာပေးခြင်းနှင့် လက်လီ/လက်ကားကုန်စုံ အရောင်းဆိုင်များတွင် မှိုတက်မုန့်များ၊ (Exprie date) စားသောက်ကုန်ပစ္စည်းများ ရောင်းချနေခြင်းမရှိစေရန် ကွင်းဆင်းစစ်ဆေးခြင်းနှင့် ၄.၃.၂၀၂၀ ရက်နေ့ တွင် ကချင်ပြည်နယ်၊ ဝိုင်းမော်မြို့နယ် ခတ်ချိုကျေးရွာအုပ်စု၌ စားသောက်ကုန် ထုတ်လုပ်သည့် လုပ်ငန်းရှင်များနှင့် လက်လီ/လက်ကားရောင်းချသည့် လုပ်ငန်းရှင်များအား လက်ကမ်းစာစောင်များ ဖြန့်ဝေခြင်း၊ ကုန်အညွှန်းအမှတ်အသားများနှင့်ပတ်သက်၍ ရှင်းလင်းခြင်း၊ စားသုံးသူများမှမေးမြန်းမှုများကို ပြန်လည်ရှင်းလင်းခြင်းများ ဆောင်ရွက်ခဲ့ပါသည်။

ကချင်ပြည်နယ်

စားသုံးသူရေးရာဦးစီးဌာန

       ၂၀.၃.၂၀၂၀ ရက်နေ့တွင် ဗန်းမော်ခရိုင် DOCAမှ တာဝန်ရှိသူများသည် ဒေါ့ဖုန်းယန်မြို့ အုပ်ချုပ်ရေးမှူးရုံးခန်းတွင် စီးပွားရေးလုပ်ငန်းရှင် (၃၁) ဦးအား လည်းကောင်း၊ သိန်လုံကျေးရွာ ဓမ္မာရုံတွင် ရွာသူ/ရွာသားများနှင့် စီးပွားရေးလုပ်ငန်းရှင် (၇၆) ဦး အား လည်းကောင်း ၂၀၁၉ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဆိုင်ရာနှင့် ထုတ်ကုန်လုံခြုံစိတ်ချရမှုဆိုင်ရာလုပ်ငန်းများ အသိပညာပေးခြင်းကို ရှင်းလင်းဆွေးနွေးခဲ့ပြီး အသိပညာပေးလက်ကမ်းစာစောင်များ ဖြန့်ဝေခြင်းတို့အား  သွားရောက်​ဆောင်ရွက်ခဲ့ကြောင်း သိရပါသည်။

ကချင်ပြည်နယ်

စားသုံးသူရေးရာဦးစီးဌာန

      ၂၀၂၀ ပြည့်နှစ်၊ မတ်လ (၁၅)ရက်နေ့တွင် ကျရောက်သော ကမ္ဘာ့စားသုံးသူအခွင့်အရေး များနေ့ အထိမ်းအမှတ်အဖြစ် စားသုံးသူအရေးစဉ်ဆက်မပြတ် ဆောင်ရွက်ပေး ဆောင်ပုဒ်နှင့်အတူ ကုန်စည်လုံခြုံစိတ်ချရမှုအစ ကုန်အညွှန်းအမှတ်အသားက Media Campaign များ ဆောင်ရွက်ခဲ့ ခြင်း၊ ၂၀၂၀ ပြည့်နှစ်၊ မတ်လ (၁၅) ရက် နံနက် (၀၉:၀၀)နာရီမှ ညနေ (၁၇:၀၀)အထိ မကွေးတိုင်း ဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး ဦးဆောင်၍ ဝန်ထမ်းများသည် ပြည်တော်သာလမ်းနှင့် ဗိုလ်ချုပ်လမ်းထောင့်များတွင် ကမ္ဘာ့စားသုံးသူအခွင့်အရေးများနေ့ ဗီနိုင်း ပိုစတာများ စိုက်ထူခြင်း၊ အထိမ်းအမှတ်သီချင်းများဖွင့်ခြင်း၊ လက်ကမ်းစာစောင်ဝေငှခြင်းများ ပြုလုပ်ခဲ့ကြပါသည်။

            ပြည်သူများသည် စားသုံးသူများဖြစ်သည်၊ စားသုံးသူတိုင်းမှာ စားသုံးသူအခွင့်အရေးများ ရှိကြရာ စားသုံးသူနစ်နာဆုံးရှုံးမှုများအတွက် အရေးဆိုတိုင်ကြားနိုင်ကြောင်း ပြည်သူများသိရှိစေရန် ရည်ရွယ်၍ စားသုံးသူအခွင့်အရေး ဖြစ်ပေါ်လာပုံနှင့် နောက်ခံသမိုင်း၊ စားသုံးသူကာကွယ်ရေး ဥပဒေပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်တို့ လိုက်နာရမည့် တာဝန်နှင့် တားမြစ်ချက်များ၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေပါ အခန်း(၁၈) ကုန်အညွှန်း အမှတ်အသားနှင့် စပ်လျဉ်း၍ ဖော်ပြရမည့်အချက်များ၊ နစ်နာဆုံးရှုံးမှုများရှိပါက တိုင်ကြားနိုင်သည့် နေရာ၊ ဖုန်းနံပါတ်များနှင့် Website များပါဝင်သော လက်ကမ်းစာစောင်များ ဝေငှခဲ့ခြင်း၊ Skynet , DVB, MRTV-4, Channel-K ရုပ်သံလိုင်းများ၊ သတင်းမီဒီယာများနှင့် တွေ့ဆုံ၍ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားများ ဖော်ပြလာရေးနှင့်စပ်လျဉ်း၍ အသိပေးဆွေးနွေး ခြင်းများ ဆောင်ရွက်ခဲ့ကြောင်း သိရှိရပါသည်။

            ကမ္ဘာ့စားသုံးသူအခွင့်အရေးများနေ့ အခမ်းအနားများကို နှစ်စဉ် မတ်လ (၁၅)ရက်နေ့ ရောက်တိုင်း တိုင်းဒေသကြီး/ ပြည်နယ်/ ခရိုင်များတွင် ကျင်းပလျက်ရှိရာ မကွေးတိုင်းဒေသကြီး အနေဖြင့် တိုင်းဒေသကြီးဦးစီးမှူးရုံးရှိဝန်ထမ်းများနှင့် မကွေးခရိုင်ဦးစီးမှူးရုံးဝန်ထမ်းများ ပူးပေါင်း၍ ပြည်တော်သာလမ်းနှင့် ဗိုလ်ချုပ်လမ်းထောင့် လူစည်ကားရာ လမ်းဆုံ၌လည်းကောင်း၊ မင်းဘူးခရိုင် မင်းဘူးမြို့စည်ပင်သာယာဈေးတွင် ခရိုင်ဦးစီးမှူးရုံးနှင့် ပွင့်ဖြူ၊ စလင်း၊ မင်းဘူး၊ ငဖဲမြို့နယ်တာဝန်ခံ များနှင့် ပူးပေါင်း၍ ဈေးသို့လာရောက်ကြသည့် ပြည်သူများကို လက်ကမ်းစာစောင်များ ဝေငှခြင်း၊ သရက်ခရိုင်၊ သရက်မြို့ စည်ပင်သာယာဈေးနှင့် အောင်လံမြို့စည်ပင်ဈေးတို့၌ မွေးကု၊ စည်ပင်၊ ကျန်းမာရေးဌာနတို့ ပူးပေါင်း၍ လက်ကမ်းစာစောင်များ ဝေငှခြင်းများဆောင်ရွက်ခဲ့ကြပါသည်။ အလားတူ မကွေးခရိုင်ရှိ ရေနံချောင်း၊ ချောက်၊ တောင်တွင်းကြီး၊ နတ်မောက်၊ မြို့သစ်မြို့နယ်များ၌ လည်း မြို့နယ်စည်ပင်သာယာဈေးများတွင် မိတ်ဖက်ဌာနများနှင့် ပူးပေါင်း၍ လက်ကမ်းစာစောင် များဝေငှခဲ့ခြင်း၊ ပခုက္ကူခရိုင်၊ ပခုက္ကူ၊ ဆိပ်ဖြူ၊ ရေစကြို၊ မြိုင် မြို့နယ်များရှိ စည်ပင်သာယာဈေးများတွင်လည်း အသိပညာပေးလက်ကမ်းစာစောင် ဝေငှခြင်းများ ဆောင်ရွက်ခဲ့ပြီး ဂန့်ဂေါခရိုင်၊ ဂန့်ဂေါမြို့ မြို့မဈေးတွင် မိတ်ဖက်ဌာနများနှင့် ပူးပေါင်း၍ လက်ကမ်းစာစောင်ဝေငှခြင်းများ ဆောင်ရွက်ခဲ့ကြသည့်အပြင် ဂန့်ဂေါမြို့နယ်၊ စိုက်ပျိုးရေးဦးစီးဌာနရုံးရှိ စိုက်ပျိုးရေးဦးစီးဌာနမှ ဝန်ထမ်း (၃၀) ဦးအား စားသုံးသူကာကွယ်ရေးဥပဒေအား အသိပေးဆွေးနွေးခြင်းများ ဆောင်ရွက်ခဲ့ ကြပါသည်။

            ယခုအချိန်တွင် တရုတ်နိုင်ငံ ဝူဟန်မြို့မှ စတင်သည့် Covid-19 ကူးစက်ရောဂါမှာ ကမ္ဘာ့ နိုင်ငံအနှံ့အပြားတွင် ဖြစ်ပွားနေသည့်အတွက် ကူးစက်ရောဂါမဖြစ်ပွားစေရေး ကြိုတင်ကာကွယ်ရေး အတွက် လူစုလူဝေးဖြင့် ကျင်းပမည့်အခမ်းအနားများ၊ ပွဲလမ်းသဘင်များကို ဆောင်ရွက်ခြင်းမပြုရန်  ညွှန်ကြားမှုပြုထားသည့်အတွက် World Consumer Rights Day အထိမ်းအမှတ်အဖြစ် အသိပညာ ပေးဆွေးနွေးဟောပြောခြင်း၊ အခမ်းအနားများကို စည်ကားသိုက်မြိုက်စွာ ဆောင်ရွက်နိုင်ခြင်းမရှိဘဲ လူသွားလာမှုများသည့် လမ်းဆုံနေရာများ၊ စည်ပင်သာယာဈေးများ၌သာ လက်ကမ်းစာစောင်ဝေငှ ခြင်းများ ဆောင်ရွက်နိုင်ခဲ့ပါကြောင်း သတင်းရရှိပါသည်။

မကွေးတိုင်းဒေသကြီး

စားသုံးသူရေးရာဦးစီးဌာန