သတင်းနှင့် လှုပ်ရှားမှုများ

       ပြည်ထောင်စုနယ်မြေ၊ နေပြည်တော်၊ ဒက္ခိဏသီရိမြို့မစျေး၌ နေပြည်တော်ကောင်စီ၏ လမ်းညွှန်မှုဖြင့် အလုပ်သမားနေ့အထိမ်းအမှတ် နေပြည်တော် MSME ထုတ်ကုန်ပြပွဲနှင့် ဈေးရောင်းပွဲတော် ဖွင့်ပွဲအခမ်းအနားကို ၁-၅-၂၀၂၄ ရက်နေ့က ကျင်းပခဲ့ပါသည်။

     အလုပ်သမားနေ့အထိမ်းအမှတ် နေပြည်တော် MSME ထုတ်ကုန်ပြပွဲနှင့် ဈေးရောင်းပွဲတော်အား နေပြည်တော်ကောင်စီဥက္ကဋ္ဌနှင့် နေပြည်တော်ကောင်စီဝင်တို့က ဖဲကြိုးဖြတ် ဖွင့်လှစ်ပေးပြီး နေပြည်တော်ကောင်စီဥက္ကဋ္ဌနှင့် နေပြည်တော်ကောင်စီဝင်များ၊ နေပြည်တော်အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးအေဂျင်စီအဖွဲ့ဝင်များ၊ ဌာနဆိုင်ရာများ၊ ဧည့်သည်တော်များက နေပြည်တော် MSME ထုတ်ကုန်ပြပွဲနှင့် ဈေးရောင်းပွဲတော်ရှိ ပြခန်းများအား လှည့်လည်ကြည့်ရှု့အားပေးကြပါသည်။

    ပြည်ထောင်စုနယ်မြေအတွင်းရှိ MSME လုပ်ငန်းများ၏ ထုတ်လုပ်မှု၊ ရင်းနှီးမြှုပ်နှံမှုနှင့် စီးပွားရေးအားကောင်းလာစေရန်၊ ပြပွဲတွင်ပါဝင်ပြသသူများအချင်းချင်း ပူးပေါင်း‌ဆောင်ရွက်နိုင်စေရန်၊ ကုန်ထုတ်လုပ်မှုအရည်အသွေးတီထွင်ဆန်းသစ်မှုများကို လေ့လာနိုင်စေရန်၊ ထုတ်လုပ်မှုမှ ကုန်သွယ်မှု အထိ လုပ်ငန်းစဉ်( Supply Chain)တစ်လျှောက် လိုအပ်ချက်များကို ပိုမိုနားလည် သိရှိစေရန်၊ အစိုးရ၊ ပုဂ္ဂလိကကဏ္ဍနှင့် MSME လုပ်ငန်းများကို နီးကပ်စွာပူးပေါင်းဆောင်ရွက်ခြင်းဖြင့် ဒေသတွင်း ကုန်သွယ်မှုမြှင့်တင်ရေးမှ အပြည်ပြည်ဆိုင်ရာဈေးကွက်သို့ ထိုးဖောက်ဝင်ရောက်နိုင်စေရန်နှင့် နည်း ပညာ၊ အရင်းအနှီး၊ ဈေးကွက်၊ ကျွမ်းကျင်လုပ်သားဆိုင်ရာ ကဏ္ဍပေါင်းစုံ ဖွံ့ဖြိုးတိုးတက်လာစေရန် ရည်ရွယ်၍ ကျင်းပကြောင်း သိရှိရပါသည်။

    နေပြည်တော်ကောင်စီအနေဖြင့် နိုင်ငံတော်အစိုးရ၏ စီးပွားရေးဦးတည်ချက်(၃)ရပ်အနက် “တိုးတက်ကောင်းမွန်လာသည့် စီးပွားရေးမောင်းနှင်အားကို မဏ္ဍိုင်ပြု၍ MSME စက်မှုလုပ်ငန်းများ ကို အားပေးဆောင်ရွက်ကာ ပို့ကုန်ကဏ္ဍမြှင့်တင်ရေး” ဆိုသည့် အချက်များ အောင်မြင်နိုင်ရန် MSME လုပ်ငန်းများကို အခွင့်အရေး လက်ဝယ်ရရှိနိုင်ရန်နှင့် စိန်ခေါ်မှုများကို အတူတကွဖြေရှင်းပေးနိုင်ရန်၊ နိုင်ငံတော်၏ စီးပွားရေးဦးတည်ချက်(၃)ရပ်အနက် တတိယဦးတည်ချက်ဖြစ်သည့် “ ပြည်တွင်း စီးပွားရေးလုပ်ငန်းများကို အားပေးကူညီပြီး နိုင်ငံတော်၏ထုတ်ကုန်များစွာ ထုတ်လုပ်နိုင်သည့် အလုပ်အကိုင်အခွင့်အလမ်းများ ဆောင်ရွက်ဖော်ဆောင်ရေး” ဟူသော ဦးတည်ချက်နှင့်အညီ နေပြည်တော်နယ်မြေအတွင်း မြို့နယ်အလိုက် MSME ဈေးရောင်း ပွဲတော်များကို ကျင်းပပြုလုပ်ခဲ့ရာ ၂၀၂၃-၂၀၂၄ ဘဏ္ဍာနှစ်အတွင်း (၁၀)ကြိမ် ကျင်းပပြုလုပ်နိုင်ခဲ့ပြီး၊ ဈေးရောင်းပွဲတော်များ ကျင်းပ ပြုလုပ်ခြင်းဖြင့်  MSME လုပ်ငန်းများကို ပြည်သူများ သိရှိလာနိုင်ခြင်း၊ မိမိတို့ထုတ်ကုန်နှင့်ပတ်သက်၍ Brand Awereness များ ရရှိလာခြင်း၊ ပြပွဲလာပြည်သူများအတွက် တစ်ပိုင်တစ်နိုင် စီးပွားရေးလုပ်ငန်း များထူထောင်ရန်စိတ်ကူးသစ်များပေါ်ပေါက်လာနိုင်ခြင်း၊ပြည်သူအများစိတ်ဝင်စားစေမည့် ထုတ်ကုန် အမယ်သစ်များ ပေါ်ပေါက်လာစေခြင်း၊ ပြည်တွင်း၊ ပြည်ပ ဈေးကွက်ရရှိခြင်း စသည့် အကျိုးကျေးဇူးများ ရရှိလာမည်ဖြစ်ကြောင်း သိရှိရပါသည်။

      အဆိုပါ အလုပ်သမားနေ့အထိမ်းအမှတ် နေပြည်တော် MSME ထုတ်ကုန်ပြပွဲနှင့် ဈေးရောင်းပွဲတော်ကို ၁-၅-၂၀၂၄ ရက်နေ့မှ ၅-၅-၂၀၂၄ ရက်နေ့ထိ ကျင်းပပြုလုပ်သွားမည်ဖြစ်ပြီး ဆိုင်ခန်းပေါင်း (၅၆)ခန်း  ခင်းကျင်းပြသလျက်ရှိကြောင်း သိရှိရပါသည်။

DOCA(ပြည်ထောင်စုနယ်မြေ)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး ၊ အစည်းအဝေး ခန်းမတွင် (၂၆.၄.၂၀၂၄) ရက်နေ့ ၊ နံနက် (၁၁:၀၀) နာရီအချိန်တွင် ပုသိမ်ခရိုင်အတွင်းရှိ  ဆီအရောင်းကိုယ်စားလှယ် စုစုပေါင်း (၁၈) ဦးအား စားအုန်းဆီဈေးနှုန်း မြှင့်တင်ရောင်းချမှုမပြုရေး ခေါ်ယူ တွေ့ဆုံ ဆွေးနွေးခဲ့ပါသည်။

    တိုင်းဒေသကြီးဦးစီးမှူး ဦးဇေယျာဆွေနှင့်အဖွဲ့က အရေးကြီးကုန်စည်နှင့်ဝန်ဆောင်မှုဥပဒေပါအချက်များအား ရှင်းလင်းဆွေးနွေးခြင်းနှင့် စားအုန်းဆီဖြန့်ဖြူးမှုဆိုင်ရာ လုပ်ထုံးလုပ်နည်း စည်းကမ်းချက်များအား ထပ်မံအသိပေးဆွေးနွေးခဲ့ပြီးနောက် ဆီအရောင်းကိုယ်စားလှယ်များကလည်း စားအုန်းဆီဈေးနှုန်း မြှင့်တင်ရောင်းချမှုမပြုရေး ကြေငြာချက်နှင့် အရေးကြီးကုန်စည်နှင့် ဝန်ဆောင်မှု ဥပဒေပါအချက်များကို သိရှိနားလည်လိုက်နာဆောင်ရွက်ပမည်ဖြစ်ကြောင်းနှင့် လိုက်နာ ဆောင်ရွက်မှုပျက်ကွက်ပါက ဥပဒေအရ အပြစ်ပေးအရေးယူခံရမည်ကို သိရှိပါသည်ဟု လက်မှတ်ရေးထိုးခဲ့ကြောင်း သတင်းရရှိပါသည်။

DOCA(ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံးအနေဖြင့် ဌာန၏မျှော်မှန်းချက်ဖြစ်သည့် “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူ ကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့်အတိုင်း ပြည်တွင်းကုန်သွယ်မှုဖွံ့ဖြိုးရေးလုပ်ငန်းများအား လစဉ်ကွင်းဆင်းတွေ့ဆုံဆွေးနွေးခြင်းများ ဆောင်ရွက်လျက်ရှိရာ ကန့်ဘလူခရိုင်ဦးစီးမှူး၏ လမ်းညွှန်မှုနှင့်အညီ ၂၀၂၄ခုနှစ်၊ ဧပြီလအတွင်း စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်း (၃) ကြိမ်ဆောင်ရွက်ခဲ့ကြောင်းသိရှိရပါသည်။

      ၂၀၂၄ခုနှစ်၊ ဧပြီလ ၁ရက်နေ့တွင် ကျွန်းလှမြို့နယ်တာဝန်ခံရုံးအနေဖြင့် ကျွန်းလှမြို့၊ အင်ကြင်းမြိုင်ရပ်ကွက်ရှိ “ပေါ်ဦး” သောက်ရေသန့်လုပ်ငန်းရှင်နှင့်တွေ့ဆုံခြင်း၊ (၂-၄-၂၀၂၄)ရက်နေ့တွင် ကျွန်းလှမြို့၊ ပျဉ်းမမြိုင်ရပ်ကွက်ရှိ “ရှိန်းရှိန်း”မုန့်မျိုးစုံလုပ်ငန်းရှင်နှင့်တွေ့ဆုံခြင်း ၊ (၂၃-၄-၂၀၂၄)ရက်နေ့တွင် ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့် ဒေါ်အိမွန်ကျော် (အငယ်တန်စားရေး)တို့သည် ကန့်ဘလူမြို့၊ အမှတ်(၃)ရပ်ကွက်ရှိ “ယောနသန်” သောက်ရေသန့်လုပ်ငန်းရှင်နှင့်တို့နှင့် ကွင်းဆင်းတွေ့ဆုံဆွေးနွေးခဲ့ရာ သောက်ရေသန့်လုပ်ငန်းများအနေဖြင့် ကုန်အညွှန်းအမှတ်အသားဖော်ပြရာတွင် စားသုံးသူရေးရာဦးစီးဌာနသို့ တင်ပြအတည်ပြုချက်ရယူပြီး ညွှန်ကြားချက်အမှတ်(၂/၂၀၁၉)နှင့်အညီ ထည့်သွင်းဖော်ပြထားကြာင်းစိစစ်တွေ့ရှိရပြီး၊ အခြားသက်ဆိုင်ရာဌာနများ၏ ဥပဒေ၊ အမိန့်နှင့် ညွှန်ကြားချက်များကိုလည်း လိုက်နာဆောင်ရွက်ရန်လိုအပ်ကြောင်း အသိပညာပေးဆွေးနွေးခဲ့ပြီး ကုန်အညွှန်အမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်းသိရှိရပါသည်။

DOCA(စစ်ကိုင်း)

      ၂၀၂၄ခုနှစ်၊ မေလ ၂ ရက်နေ့ ၊ နံနက် (၉း၀၀)အချိန်တွင် ကော့သောင်းခရိုင်၊ စားသုံးသူရေးရာ ဦးစီးဌာနသည် မိတ်ဖက်ဌာနများဖြစ်သည့် ပြည်သူ့ကျန်းမာရေးဦးစီးဌာန၊ မြန်မာနိုင်ငံရဲတပ်ဖွဲ့၊ အထူး စုံစမ်းစစ်ဆေးရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ မီးသတ်ဦးစီးဌာန၊ စည်ပင်သာယာရေးအဖွဲ့တို့နှင့်အတူ ပူးပေါင်း၍ ကော့သောင်းမြို့ပေါ်ရှိ ဆေးနှင့်ဆေးပစ္စည်းအရောင်းဆိုင် (၈) ဆိုင်တို့အား သတ်မှတ်ထုတ်ပြန်ထားသည့် စည်းကမ်းချက်များနှင့်အညီ လိုက်နာဆောင်ရွက်ခြင်း၊ ဆေးဝါးများအပေါ် ဈေးနှုန်းမြှင့်တင်ရောင်းချခြင်း၊ ပြတ်လပ်မှုရှိ/မရှိ၊ သက်တမ်းလွန်ဆေးဝါးများရောင်းချနေခြင်းရှိ/မရှိ၊ ဆေးဝါးများ သိုလှောင်ထားရှိမှုများ ဆောင်ရွက်ထားခြင်းရှိ/မရှိတို့ကို ကွင်းဆင်းစစ်ဆေးဆောင်ရွက်ခဲ့ပါသည်။

          ဆက်လက်၍ ခရိုင်ပြည်သူ့ကျန်းမာရေးဦးစီးဌာန ဆေးရုံအုပ်ကြီးမှ Prescription Only Medicine (POM) ‌‌ဆေးဝါးများအား ဆရာဝန်လက်မှတ်ဖြင့်သာ ရောင်းချခြင်းတို့ကို ဆေးဆိုင်များအား လိုက်နာဆောင်ရွက်ရန် ညွှန်ကြားခဲ့ပြီး ၊ အဆိုပါ သတ်မှတ်ထုတ်ပြန်ထားသော ညွှန်ကြားချက်များနှင့်အညီ ရောင်းချဆောင်ရွက် ခြင်းမရှိပါက အ‌ရေးယူဆောင်ရွက်သွားမည်ဖြစ်ကြောင်း အသိပညာပေးဆွေးနွေးပြောကြားခဲ့ကြောင်း သိရှိရပါသည်။

DOCA(တနင်္သာရီ)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများအတွက် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစေရေး၊ လုံခြုံစိတ်ချရမှုရှိစေရေးအတွက် အစဉ်ဆောင်ရွက်လျက်ရှိပါသည်။ စားသုံးသူများအတွက် လုံခြုံစိတ်ချရမှုမရှိသောကုန်စည်များအား စားသုံးသူကာကွယ်ရေးဥပဒေ (၂၀၁၉)၊ အခန်း(၁၈)၊ ပုဒ်မ ၄၁ ပါ ကုန်အညွှန်းအမှတ်အသားများပြည့်စုံမှုမရှိသော ကုန်စည်များကိုထုတ်လုပ်ဖြန့်ဖြူးခြင်းနှင့် ၎င်းကို  ဈေးကွက်အတွင်း တင်သွင်းရောင်းချခြင်းမရှိစေရန်ရည်ရွယ်၍ မုံရွာခရိုင်ဦးစီးမှူးရုံးမှ မုံရွာမြို့နယ်တာဝန်ခံနှင့် ချောင်းဦးမြို့နယ်တာဝန်ခံတို့ဦးဆောင်၍ ဝန်ထမ်း(၁)ဦးတို့သည် (၂၉-၄-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် မုံရွာမြို့၊ ဆူးလေကုန်းရပ်ကွက်ရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များသို့သွားရောက်ကာ ဈေးကွက်စောင့်ကြည့်စစ်ဆေးခဲ့ကြောင်း သတင်းရရှိပါသည်။

       ထိုသို့ဆောင်ရွက်ရာတွင် မုံရွာမြို့၊ ဆူးလေကုန်းရပ်ကွက်ရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များတွင်  ကုန်အညွှန်းအမှတ်အသားပြည့်စုံမှုမရှိသော ကုန်စည်များရောင်းချနေခြင်းရှိ/ မရှိ စစ်ဆေးခဲ့ကြပြီး ဆိုင်ပိုင်ရှင်များအား  စီးပွားရေးလုပ်ငန်းရှင်၏တာဝန်များနှင့် ကုန်အညွှန်းအမှတ်အသားပြည့်စုံမှုမရှိသော ကုန်စည်များအား တင်သွင်းရောင်းချခြင်းမပြုကြရန်ပြောကြားခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များပေးဝေခဲ့ကြောင်း သတင်းရရှိပါသည်။

DOCA(စစ်ကိုင်း)