သတင်းနှင့် လှုပ်ရှားမှုများ

     စစ်ကိုင်တိုင်းဒေသကြီးဉီးစီးမှူးရုံးအနေဖြင့် စားသုံးသူပြည်သူများ ထုတ်ကုန်လုံခြုံစိတ်ချရမှုရှိစေရန်၊ စီးပွားရေးလုပ်ငန်းရှင်များ စီးပွားရေးကျင့်ဝတ်၊ စည်းကမ်းနှင့်အညီဖြောင့်မတ်မှန်ကန်စွာ ဆောင်ရွက်နိုင်ရန်အတွက် တိုင်း၊ ခရိုင်၊ မြို့နယ်အလိုက် စားသုံးသူကာကွယ်ရေး အသိပညာပေး လုပ်ငန်းများ၊ စားသုံးသူတိုင်ကြားမှု ဖြေရှင်းခြင်းလုပ်ငန်းများအား ဆောင်ရွက်လျက်ရှိရာ စစ်ကိုင်းတိုင်းဒေသကြီးဉီးစီးမှူးရုံးအဖြင့် မုံရွာမြို့၊ နန္ဒဝန်ရပ်ကွက်ရှိ ဝန်ထမ်းမိသားစုများအား စားသုံးသူ အသိပညာပေးခြင်း၊  ကလေးခရိုင်ဉီးစီးမှူးရုံးအနေဖြင့် ကလေးမြို့၊ မြို့သာရပ်ကွက်ရှိ ပြည်သူများ အားလည်ကောင်း၊ ဟုမ္မလင်းမြို့ မှန်ပင်ကျေးရွာရှိ ပြည်သူများအားလည်းကောင်း၊  ကန့်ဘလူခရိုင် ဉီးစီးမှူးရုံးအနေဖြင့် ကန့်ဘလူခရိုင်၊ ကျွန်းလှမြို့၊ စည်ပင်သာယာရေးအဖွဲ့ရုံးတွင် ဝန်ထမ်းများ အားလည်းကောင်း၊ ကန့်ဘလူခရိုင် စိုက်ပျိုးရေးဦးစီးဌာန၊ မျိုးသန့်ခြံတွင်လည်းကောင်း၊ စစ်ကိုင်းခရိုင်ဦးစီးမှူးရုံးအနေဖြင့် စစ်ကိုင်းမြို့၊     သာစည်ရပ်ကွက်ရှိ “ကမ္ဘောဇ” ကျောင်းတွင် လည်းကောင်း၊ စစ်ကိုင်းမြို့၊ စစ်ကိုင်းခရိုင်ဦးစီးမှူးရုံးတွင် ဆီလုပ်ငန်းရှင်အသင်းအားလည်းကောင်း၊ မုံရွာခရိုင် ဦးစီးမှူးရုံးအနေဖြင့် မုံရွာမြို့၊ တိုင်းပညာရေးဦးစီးမှူးရုံး၌ အခြေခံစာတတ်မြောက်ရေးလုပ်ငန်း တိုင်းအဆင့်သင်ပြနည်းသင်တန်းတွင်လည်းကောင်း၊ ရွှေဘိုခရိုင်ဦးစီးမှူးရုံးအနေဖြင့် ရွှေဘိုခရိုင် ဘေးအန္တရာယ်စီမံခန့်ခွဲရေးဦးစီးဌာနတွင်လည်းကောင်း၊ စုစုပေါင်း(၉)ကြိမ် နှင့် ၂၀၂၄ ခုနှစ်၊ ဧပြီလ အတွင်း အသိပညာပေးဟောပြော ဆွေးနွေးခဲ့ရာ ဌာန၏ မျှော်မှန်းချက်များ၊ ရည်မှန်းချက် တာဝန်များ ၊ စားသုံးသူအခွင့်အရေးများ၊ တာဝန်များ၊ ဌာနသို့ ဆက်သွယ်တိုင်ကြားနိုင်သည့် နည်းလမ်းများ၊ ဖြေရှင်းဆောင်ရွက်ပေးခဲ့သည့် စားသုံးသူတိုင်ကြားမှု ဖြစ်စဉ်များကို အသိပညာပေး ဟောပြောခဲ့ ကြပြီး လက်ကမ်းစာစောင်များ ဖြန့်ဝေပေးခဲ့ပါသည်။

    လုပ်ငန်းရှင်များနှင့်  တွေ့ဆုံဆွေနွေးအသိပညာပေးမှုများကိုလည်း တိုင်းဒေသကြီးဦးစီးမှူးရုံးအနေဖြင့်(၁)ကြိမ်၊ ကလေးခရိုင်ဦးစီးမှူးအနေဖြင့်(၄)ကြိမ်၊ ကသာခရိုင်ဦးစီးမှူးရုံးအနေဖြင့်(၃)ကြိမ်၊ ကန့်ဘလူမြို့နယ်တာဝန်ခံရုံးမှ(၃)ကြိမ်၊ စစ်ကိုင်းတိုင်းခရိုင်ဦးစီးမှူးရုံးအနေဖြင့်(၈)ကြိမ်၊မုံရွာ မြို့နယ် တာဝန်ခံရုံးမှ(၂)ကြိမ်၊ ယင်းမာပင်ခရိုင်ဦးစီးမှူးရုံးအနေဖြင့်(၂)ကြိမ်၊ ရွှေဘိုခရိုင်ဦးစီးမှူးရုံး အနေဖြင့် (၄)ကြိမ်၊ စုစုပေါင်း(၂၇)ကြိမ် ဆောင်ရွက်နိုင်ခဲ့ပါသည်။ ထိုသို့တွေ့ဆုံဆွေးနွေး ဆောင်ရွက် ခြင်းများပြုလုပ်ရာတွင် စီးပွားရေးလုပ်ငန်းရှင်တို့၏တာဝန်များ၊ လိုက်နာရမည့်အချက်များ၊ ကုန်စည် နှင့်စပ်လျဉ်း၍ ဖော်ပြရမည့်အာမခံများ၊ ရိုးရှင်းမှန်ကန်သော သတင်းအချက်အလက်များ ပြည့်စုံစွာ ပေးရန် စီးပွားရေးလုပ်ငန်းလုပ်ကိုင်ရာတွင် စီးပွားရေးကျင့်ဝတ်၊  စည်းကမ်းနှင့်အညီ ဖြောင့်မတ် မှန်ကန်စွာ ဆောင်ရွက်ရန်အချက်များကို ရှင်းလင်းဆွေးနွေးအသိပညာပေးခြင်း၊ ရည်ညွှန်းဈေး သတ်မှတ်ထား သောကုန်စည်များအား သတ်မှတ်ရည်ညွှန်းဈေးဖြင့် ရောင်းချစေရေး ဆွေးနွေး ဟောပြောခြင်းများ ဆောင်ရွက်ခဲ့ပြီး စီးပွားရေးလုပ်ငန်းရှင်နှင့် သက်ဆိုင်သော လက်ကမ်း စာစောင်များ၊ စားသုံးသူကာကွယ်ရေးဥပဒေစာအုပ်များ ဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

      ပုဂ္ဂလိကဏ္ဍဖွံ့ဖြိုးတိုးတက်စေရန် ရည်ရွယ်၍ စားသုံးသူရေးရာဦးစီးဌာန၊ မြောင်မြို့နယ် တာဝန်ခံသည် မြောင်မြို့၊ တောင်ရပ်ကွက်ရှိ ဆီစက်(ဆုံဆီ)လုပ်ငန်းရှင် ဒေါ်လီလီမြင့်နှင့် မေလ ၂ ရက်နေ့က တွေ့ဆုံခဲ့ပါသည်။

     မြောင်မြို့နယ်တာဝန်ခံ ဦးအောင်လင်းက ဆီကြိတ်ခွဲထုတ်လုပ်နိုင်မှု အခြေအနေများကို ဆွေးနွေးမေးမြန်းခဲ့ရာ ဆီစက်(ဆုံဆီ)လုပ်ငန်းရှင်က ဆုံဆီဖြင့် ကြိတ်ခွဲရာတွင် မြေပဲ(လုံးဆန်) တစ်တင်းကြိတ်ပါက ပဲဆီ ၆.၅ပိဿာနှင့် ပဲဖတ် ၉.၅ပိဿာထွက်ရှိကြောင်း ၊ တစ်ရက်လျှင် မြေပဲ လုံးဆန်(၃)တင်း ကြိတ်ခွဲနိုင်ကြောင်း သိရှိရပါသည်။

   ဆီစက်လုပ်ငန်းရှင်အနေဖြင့် မြေပဲကို ကိုယ်တိုင်ဝယ်ယူ ကြိတ်ခွဲရောင်းချခြင်းနှင့် နဝလီ ကြိတ်ခွဲခြင်းတို့  ပြုလုပ်ကြောင်း၊  မြေပဲ နဝလီကြိတ်ခွဲခမှာ မြေပဲလုံးဆန်တစ်တင်းလျှင် ၆၀၀၀ ကျပ် ဖြစ်ပြီး၊ ရောင်းဈေးနှုန်းများမှာ မြေပဲဆီတစ်ပိဿာလျှင် ၁၆၀၀၀ကျပ်၊ ပဲဖတ်တစ်ပိဿာ ၂၇၀၀ကျပ် ဖြင့် မြို့နယ်တွင်း ဖြန့်ဖြူးရောင်းချလျက်ရှိကြောင်း၊ ဆီစက်(ဆုံဆီ)လုပ်ငန်းရှင်သည် ပဲဖတ်များကို ပွဲစားများမှတစ်ဆင့် မြစ်ကြီးနားမြို့ထိ တင်ပို့ရောင်းချလျက်ရှိကြောင်း သိရပါသည်။

  မြို့နယ်တာဝန်ခံသည် စားသုံးသူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်း ရောင်းချလျက်ရှိသော ကုန်စည်များပေါ်တွင် ကုန်စည်အမျိုးအစားအလိုက် ကုန်အညွှန်းအမှတ်အသားများ ပြည့်စုံမှန်ကန်မှုရှိစေရေးနှင့် မြန်မာနိုင်ငံစားသုံးသူကော်မရှင်မှ ထုတ်ပြန်ထား သည့် (၂/၂၀၁၉)ညွှန်ကြားချက်အား အသိပညာပေး ဆွေးနွေးခဲ့ပါသည်။

DOCA(စစ်ကိုင်း)

     စားသုံးသူရေးရာဦးစီးဌာန၊ ရန်ကုန်မြောက်ပိုင်းခရိုင်၊ တိုက်ကြီးမြို့နယ်ခွဲရုံးမှ ရုံးအုပ် ဒေါ်တင်တင်ဌေးသည် တိုက်ကြီးမြို့နယ်၊ မြို့မဈေးအတွင်း ဝက်သားသတ်လိုင်စင်ရရှိသူ ဦးဝေယံရဲမြင့်အား တွေ့ဆုံမေးမြန်းခဲ့ပါသည်။

      တိုက်ကြီးမြို့နယ်၌ ယခင်နှစ်များအတွင်း လိုင်စင်ရရှိသူများသည် ဈေးအတွင်း/ ဈေးပြင်ကိုဖြန့်ဖြူးမှုမရှိဘဲ ၎င်းဆိုင်၌သာဝယ်ယူရပြီး ပြင်ပရောင်းချခွင့်မပြုခဲ့ပါ။ (၂၀၂၄-၂၀၂၅) ဘဏ္ဍာနှစ် ဝက်သားလိုင်စင်ရရှိသူ ဦးဝေယံရဲမြင့်က ဈေးအတွင်း/အပြင်ရှိ ဝက်သားအရောင်းဆိုင်များကိုလည်း ဆက်လက်ဖြန့်ဖြူးရောင်းချပေးခဲ့ပြီး   ဝက်သားသန့်သန့်တစ်ပိဿာလျှင် ၈၄၀၀ကျပ်၊ သုံးထပ်သားတစ်ပိဿာလျှင် ၆၄၀၀ကျပ်၊ ဝက်တွင်း(ကလီစာ)တစ်ပိဿာလျှင် ၅၂၀၀ကျပ်၊ ရိုးရိုးသားတစ်ပိဿာလျှင် ၄၅၀၀ကျပ်၊ အရိုးအသားတစ်ပိဿာလျှင် ၃၉၀၀ကျပ်၊ နံရိုး/ ခေါင်းသားတစ်ပိဿာလျှင် ၅၂၀၀ကျပ်နှင့် ဝက်ခြေထောက်တစ်ပိဿာလျှင် ၃၂၀၀ကျပ်ဖြင့် လက်လီ/ လက်ကားရောင်းချလျက်ရှိကြောင်းသိရှိရပါသည်။

DOCA(ရန်ကုန်)

       စားသုံးသူရေးရာဦးစီးဌာန၊ မြောက်ပိုင်းခရိုင်၊ မှော်ဘီမြို့နယ်၊ မြို့မဈေးအတွင်းရှိ စည်ပင်သာယာခန်းမတွင် (၂၉-၄-၂၀၂၄)ရက်နေ့၊ နေ့လယ်(၁၄:၃၀)နာရီအချိန်၌ မှော်ဘီမြို့မဈေးရှိ စားအုန်းဆီ ရောင်းချသော ကုန်မျိုးစုံဆိုင်များနှင့် ဈေးသူ/ဈေးသားများအား ကွင်းဆင်းအသိပညာပေးဟောပြောခဲ့ပါသည်။

      ထိုသို့ကွင်းဆင်းဟောပြောဆွေးနွေးရာတွင် ဝိသမလောဘဖြင့် ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့်လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ ဆောင်ရွက်သွားမည်ဖြစ်ကြောင်း၊ နိုင်ငံတော်မှသတ်မှတ်ထားသည့် ရည်ညွှန်းဈေး၊ (၂%)အမြတ်၊ သယ်ယူစရိတ်+လုပ်သားခတွက်ချက်၍ ရောင်းချရန် ညွှန်ကြားခဲ့ပြီးဖြစ်၍ သိရှိလိုက်နာဆောင်ရွက်ကြရန်နှင့် ဟင်းသီးဟင်းရွက်ဆီ၊ ပဲဆီ၊ နေကြာဆီများတွင်လည်း အသားတင်ပမာဏကို မြန်မာအလေးချိန်ယူနစ်ဖြစ်သော ပိဿာ/ကျပ်သား စသည်တို့ကို မြန်မာဘာသာဖော်ပြရမည်ဟု စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ထုတ်ပြန်ခဲ့သော ညွှန်ကြားချက် (၁/၂၀၂၁)အရ ညွှန်ကြားချက်များအား ကုန်မျိုးစုံဆိုင်ရှင်နှင့် ဈေးသူ/ ဈေးသားများအနေဖြင့် လိုက်နာဆောင်ရွက်ကြရန်လိုအပ်ကြောင်း ဆွေးနွေးပြောကြားခဲ့မှုကိုသိရှိရပါသည်။

DOCA(ရန်ကုန်)

    တနင်္သာရီတိုင်းဒေသကြီး၊ မြိတ်ခရိုင် စားသုံးသူရေးရာဦးစီးဌာနမှ ခေတ္တခရိုင်ဦးစီးမှူးနှင့် ခရိုင်စီမံအုပ်ချုပ်ရေးအဖွဲ့၊ ခရိုင်အစားအသောက်‌နှင့်ဆေးဝါးကွပ်ကဲရေးဦးစီးဌာန၊ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့မှ ဝန်ထမ်းများသည် ၂၀၂၄ခုနှစ်၊ မေလ (၆)ရက်နေ့၊ နံနက် (၁၀း၀၀)အချိန်တွင် မြိတ်မြို့ပေါ်ရှိ အိမ်သုံးဆေးဝါးအရောင်းဆိုင်းများသို့ တရားမဝင်ဆေးဝါးရောင်းချနေခြင်းရှိ/မရှိ ကွင်းဆင်းစစ်ဆေးခဲ့ကြပါသည်။

     တရားမဝင်ဆေးဝါး စစ်ဆေးရာတွင် Register No ၊ DRC No ဖော်ပြပါရှိခြင်းမရှိသော Air-x အမည်နှင့်ဆေးဝါးအား အဓိကစစ်ဆေးခဲ့ပြီး သက်တမ်းလွန်ဆေးဝါးများနှင့် သုံးစွဲရန်မသင့် ဆေးဝါးများ ဝယ်ယူရောင်းချခြင်းမပြုရန်‌ ပြောကြားခဲ့ပါသည်။ စစ်ဆေးတွေ့ရှိချက်အရ အဆိုပါဆိုင်များတွင် တရားမဝင်ဆေးဝါးများရောင်းချနေခြင်း မရှိကြောင်းသိရှိရပြီး လက်ကမ်းစာစောင်များ ဖြန့်ဝေပေးခဲ့ ကြောင်း သိရှိရပါသည်။

DOCA(တနင်္သာရီ)