သတင်းနှင့် လှုပ်ရှားမှုများ

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရှမ်းပြည်နယ် ဦးစီးမှူးရုံးအနေဖြင့် စားသုံးသူကာကွယ်ရေး အသိပညာပေးဟောပြောပွဲများ၊  စီးပွားရေးလုပ်ငန်းရှင်များနှင့် တွေ့ဆုံပြီး ဥပဒေ၊ အမိန့်နှင့် ညွှန်ကြားချက်များအား ရှင်းလင်းဆွေးနွေးခြင်းများ၊ ထုတ်ကုန်များ လုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြရေးအတွက် ဈေးကွက်စောင့်ကြည့်စစ်ဆေးခြင်းများကို ဆောင်ရွက်လျက်ရှိသည့်အပြင် စားသုံးသူပြည်သူများအနေဖြင့် စားသုံးသူရေးရာဦးစီးဌာနနှင့် ပတ်သက်သောသတင်းအချက်အလက်များကို အလွယ်တကူ မေးမြန်းစုံစမ်းနိုင်ရန်၊ ကုန်စည်နှင့် ဝန်ဆောင်မှုများ ဝယ်ယူသုံးစွဲရာတွင် နစ်နာဆုံးရှုံးမှုကြုံရပါက ဌာနသို့ အလွယ်တကူဆက်သွယ်တိုင်ကြားနိုင်ရန်နှင့် စီးပွားရေးလုပ်ငန်းရှင်များအနေဖြင့် ၎င်းတို့၏ ကုန်စည်နှင့်ဝန်ဆောင်မှုများ ထုတ်လုပ်ဖြန့်ဖြူးရောင်းချရာတွင် လိုက်နာဆောင်ရွက်ရမည့် သတင်းအချက်အလက်များကို ဌာနသို့ အလွယ်တကူဆက်သွယ်မေးမြန်းစုံစမ်းနိုင်ရန်ရည်ရွယ်၍ ၂၀၂၁ခုနှစ်၊ ဇွန်လမှစတင်၍ Consumer Call Center Hotlineနံပါတ် (၁၅၃၅)ကို နေပြည်တော် ရုံးချုပ်တွင်လိုင်းခွဲ(၁)၊ ရန်ကုန်တိုင်းဒေသကြီးဦးစီးမှူးရုံးတွင်လိုင်းခွဲ(၂)နှင့် မန္တလေးတိုင်းဒေသကြီး ဦးစီးမှူးရုံးတွင် လိုင်းခွဲ(၃)တို့ကို ဖွင့်လှစ်ထားပြီ ရုံးဖွင့်ရက်ရုံးချိန်အတွင်း ဖုန်းခေါ်ဆိုမေးမြန်းနိုင်ကြောင်း အသိပညာပေးခြင်းများကိုလည်း ဆောင်ရွက်လျက်ရှိရာ (၁၂.၅.၂၀၂၆)ရက်နေ့  နံနက် (၁0:၀၀) နာရီအချိန်တွင် တောင်ကြီးမြို့၊ စဝ်စံထွန်းဈေးအတွင်းရှိ စားသုံးသူတစ်ဦးမှ Consumer Call Center (၁၅၃၅) လိုင်းခွဲ (၁) နေပြည်တော်မြို့သို့  တိုင်ကြားမှုနှင့်ပတ်သက်၍ ဆက်သွယ်မေးမြန်းရာ တာဝန်ရှိသူဝန်ထမ်းမှသိရှိလိုသည်များကို ရှင်းလင်းဖြေကြားပေးခဲ့ကြောင်း သတင်းရရှိပါသည်။

DOCA(ရှမ်း)

                    စားသုံးသူရေးရာဦးစီးဌာန၊ သာယာဝတီခရိုင်၊ သာယာဝတီမြို့နယ်၌ ခရိုင်ဦးစီးမှူး၏ လမ်းညွှန်မှု ဖြင့် ၇.၅.၂၀၂၆ ရက်နေ့ နံနက်(၉:၃၀)နာရီအချိန်တွင် ဈေးအတွင်းရှိ ဦးအေးမောင် ကုန်မျိုးစုံနှင့် ရောင်းဝယ်ရေးဆိုင်များအား ကုန်အညွှန်း အမှတ်အသားများ  ပြည်စုံစွာဖော်ပြခြင်း ရှိ/မရှိ မြို့နယ်တာဝန်ခံဒေါ်အေးသန္တာထွန်းနှင့် ဝန်ထမ်းတို့မှ ဈေးကွက်စောင့်ကြည့် စစ်ဆေးခဲ့ ပါသည်။

                အဆိုပါ ဈေးကွက်စောင့်ကြည့်စစ်ဆေးရာတွင် စားသုံးသူများကို   တိကျမှန်ကန်ရှင်းလင်းသော သတင်းအချက်များသိရှိစေရန်၊ စားသုံးသူများ ဘေးအန္တရာယ် ကင်းရှင်း စေရန်၊  စိတ်ကျေနပ်မှုရှိစေရန် အတွက်အာမခံ ချက် ပေး နိုင်သည့် အရည် အသွေးမြင့်မားသော ကုန်စည် ဝန်ဆောင်မှုများ ဖော်ဆောင်ဖြည့်ဆည်း ပေးနိုင်စေရေးနှင့် စီးပွားရေးလုပ်ငန်းရှင်များအနေဖြင့် စားသုံးသူကာကွယ် ရေးဥပဒေအား သိရှိ လိုက်နာဆောင်ရွက်ရန် အသိပညာပေးခြင်း ကုန်စည်အမျိုးအစားအလိုက် သတ်မှတ်ချက်များ နှင့်အညီ ပြည့်စုံစွာ ဖော်ပြခြင်း ရှိ/မရှိ ဈေးကွက် စောင့်ကြည့်စစ်ဆေးခဲ့ပြီး လက်ကမ်းစာစောင်များ ဖြန့်ဝေခဲ့ပါသည်။

DOCA(ပဲခူး)

                    ပဲခူးတိုင်းဒေသကြီး၊ ပြည်ခရိုင်အတွင်း ၂၀၂၆ခုနှစ်၊ ဧပြီလအတွင်း အစားအသောက် ဝန်ဆောင်မှုလုပ်ငန်းများ ရရှိစေရန် စားသုံးသူများ၏ လူနေမှုဘဝ အဆင်ပြေချောမွေ့ စေရန် ရည်ရွယ်၍ ပြည်မြို့နယ်တာဝန်ခံနှင့် ဝန်ထမ်းများသည် ပြည်မြို့၊ လမ်းမတော်လမ်း၊ ကျောင်းအိုးရပ်ကွက်ရှိ “လိုတရ” စားသောက်ဆိုင်သို့လည်းကောင်း၊ ရွှေတောင်မြို့နယ်တာဝန်ခံနှင့် ဝန်ထမ်းများသည် ရွှေတောင်မြို့၊ ကြာနီကန်ရပ်ကွက်၊ တာလမ်းကြီးရှိ “ရွှေသရဖူ” စားသောက်ဆိုင် သို့လည်းကောင်း၊ ပန်းတောင်းမြို့နယ် တာဝန်ခံနှင့် ဝန်ထမ်းများသည် ပန်းတောင်းမြို့၊ ဝန်လိုရပ်ကွက်(၁)ရှိ “ငွေသော်တာ” စားသောက်ဆိုင်သို့လည်းကောင်း၊ ပေါက်ခေါင်းမြို့နယ် တာဝန်ခံနှင့် ဝန်ထမ်းများသည် ပေါက်ခေါင်းမြို့၊ ပြည်-တောင်ငူလမ်း အမှတ်(၁)ရပ်ကွက်ရှိ အောင်မြေစားသောက်ဆိုင် လုပ်ငန်းသို့လည်းကောင်း အစားအသောက် ဝန်ဆောင်မှုလုပ်ငန်းများ ဆောင်ရွက်နေသည်ကို ကွင်းဆင်းစစ်ဆေး၍ အစားအသောက်ပြုပြင် ရောင်းချသည့်နေရာများ သန့်ရှင်းမှုရှိ/မရှိ၊ အစားအသောက်ကိုင်တွယ် ချက်ပြုတ်သူများနှင့် ဝန်ဆောင်မှုပေးသူများ၏ တစ်ကိုယ်ရည်သန့်ရှင်းမှုရှိ/မရှိ၊ အစားအသောက်များ သန့်ရှင်းလတ်ဆက်မှု ရှိ/မရှိ၊ စားသောက်ဆိုင် များသည် မိမိတို့ဆိုင်များမှပေးအပ်သည့် ဝန်ဆောင်မှုနှင့်စပ်လျဉ်း၍ စားသုံးသူများအားလုံလောက် သည့် သတင်းအချက်အလက်များကို အသိပေးဖော်ပြခြင်း ရှိ/မရှိနှင့် ရောင်းချသည့် စားသောက် ဖွယ်ရာ များ၏ အမျိုးအစား၊ အရွယ်အစား(size) ပမာဏအလိုက် ဈေးနှုန်းအား ပွင့်လင်းမြင်သာစွာ ကြိုတင်ဖော်ပြထားခြင်း ရှိ/မရှိ ၊ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ရာ သန့်ရှင်းလတ်ဆက်မှုရှိခြင်း၊ ဝန်ဆောင်မှုနှင့် စပ်လျဉ်း၍ သီးခြားရယူထားမှုမရှိခြင်းနှင့် ဈေးနှုန်းများ ဖော်ပြထားသည့် Menuစာရွက်များကို စားပွဲများတွင် တင်ထားသည်ကို စစ်ဆေးတွေ့ရှိခဲ့ပါကြောင်း နှင့်အစားအသောက် ရောင်းချသည့် ဝန်ဆောင်မှုလုပ်ငန်းများ အနေဖြင့် စားသုံးသူများအား ဝန်ဆောင်မှုပေးရာတွင် စားသုံးသူစိတ် ကျေနပ်မှုရှိစေရေး၊ စားသုံးသူဘေးအန္တရာယ် ကင်းရှင်းစွာ စားသောက်နိုင်ရေး၊ စားသုံးသူနစ်နာ ဆုံးရှုံးမှု မဖြစ်စေရေးတို့ကို ဦးစားပေး ဆောင်ရွက်ရန် အသိပညာပေးဆွေးနွေးခြင်းများ ဆောင်ရွက်ခဲ့ပါကြောင်း သတင်းရရှိပါသည်။

DOCA(ပဲခူး)

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် တိုင်းဒေသကြီးဦးစီးမှူး၏လမ်းညွှန်မှုဖြင့် ထုတ်ကုန်များလုံခြုံစိတ်ချရမှုရှိစေရေး၊ ကုန်စည်များတွင် ကုန်အညွှန်းအမှတ်အသားများ ပြည့်စုံစွာ ထည့်သွင်းဖော်ပြထားခြင်း ရှိ/မရှိ၊ စားသုံး သူများ နေ့စဉ်အသုံးပြုလျက်ရှိသော ကုန်စည်နှင့်ဝန်ဆောင်မှု များဘေးအန္တရာယ်ကင်းရှင်းပြီး လုံခြုံစိတ် ချရမှုရှိစေရန် ရည်ရွယ်၍ လစဉ်သတ်မှတ်ထားသော ဦးစားပေး ကုန်စည်အမျိုးမျိုးနှင့် အခြားကုန်စည် များကို သတ်မှတ်စံချိန်စံညွှန်းများ၊ ညွှန်ကြားချက်များနှင့် ကိုက်ညီ မှုရှိ/မရှိ ဈေးကွက်စောင့်ကြည့် စစ်ဆေးခြင်းများ ဆောင်ရွက်လျက်ရှိပြီး ဝန်ဆောင်မှုလုပ်ငန်းများနှင့်စပ်လျဉ်း၍ ကွင်းဆင်းစောင့် ကြည့်စစ်ဆေးမှုများကိုလည်း ဆောင်ရွက်လျက်ရှိပါသည်။ ဈေးကွက်စောင့် ကြည့်စစ်ဆေးရာတွင် မိတ်ဘက်ဌာနဆိုင်ရာများဖြစ်သော မြို့နယ်စည်ပင်သာယာရေးအဖွဲ့၊ အစားအသောက်နှင့် ဆေးဝါး ကွပ်ကဲရေးဦးစီးဌာနတို့နှင့် ပူးပေါင်း၍လည်းကောင်း၊ စားသုံးသူကာကွယ်ရေးဥပဒေ အရ ခန့်အပ်ထား သော စစ်ဆေးရေးအရာရှိများက ဦးဆောင်၍ သော်လည်းကောင်း ဆောင်ရွက်လျက်ရှိပါသည်။

     ပခုက္ကူခရိုင်အနေဖြင့် ဧပြီလအတွင်း ခရိုင်ဦးစီးမှူးနှင့် ဒု-ခရိုင်ဦးစီးမှူးတို့မှ ဦးဆောင်၍ ပခုက္ကူ မြို့နယ်တာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် ဝန်ထမ်းများသည် အသင့်စားမုန့် အမျိုး မျိုးအား ဦးစားပေးကုန်စည်အဖြစ် ကုန်အညွှန်းအမှတ်အသားများ ပြည့်စုံစွာထည့်သွင်း ဖော်ပြထား ခြင်း ရှိ/မရှိ ဈေးကွက်စောင့်ကြည့်စစ်ဆေးရာတွင် ပခုက္ကူမြို့ပေါ်ရပ်ကွက်များတွင် ရောင်းချလျက် ရှိသော ကုန်စုံဆိုင်နှင့်စတိုးများ၊ ရောင်းချနေသောကုန်စည်များ၌ ကုန်အညွှန်းအမှတ်အသားများ ပြည့်စုံစွာထည့် သွင်းဖော်ပြထားခြင်းရှိ/မရှိ(၁)ကြိမ်၊ စားသုံးဆီအမျိုးမျိုးအားဈေးကွက် စောင့်ကြည့် စစ်ဆေးခြင်း(၂)ကြိမ်၊ ဈေးကွက်မရောက်မီ ထုတ်လုပ်ဖြန့်ဖြူးရောင်းချသည့် သောက်ရေသန့် လုပ်ငန်း ရှင်များထံသို့ ကွင်းဆင်း ဆောင်ရွက်ခြင်းအား ပခုက္ကူမြို့မှ(၁)ကြိမ်၊ ဆိပ်ဖြူမြို့မှ(၁)ကြိမ်၊ စုစုပေါင်း ဈေးကွက်စောင့်ကြည့် စစ်ဆေးခြင်း(၅)ကြိမ်၊ အထူးဈေးကွက်အနေဖြင့် စားသုံးဆီ၊ စက်သုံးဆီနှင့် ဆေးဝါးများအား သတ်မှတ်ရည်ညွှန်း ဈေးများနှင့် အချဉ်အတွယ်မှန်ကန်မှုရှိစေရန် မိတ်ဖက်ဌာနများနှင့် ပူးပေါင်းဆောင်ရွက်ကွင်းဆင်းခဲ့ပြီး ဌာန၏ဥပဒေ၊ အမိန့်နှင့်ညွှန်ကြားချက်ပါ အကြောင်းအရာများ ကိုအသိပညာပေး ဆွေးနွေးဆောင်ရွက်ခဲ့ပါသည်။

   ထို့ပြင် အွန်လိုင်းမှတ်ပုံတင်ခြင်းဆိုင်ရာများနှင့်စပ်လျဉ်း၍ ပခုက္ကူမြို့ပေါ်ရှိ အွန်လိုင်းစနစ်ဖြင့် ရောင်းချနေသော ယခင်အွန်လိုင်းမှတ်ပုံတင်ထားသည့်လုပ်ငန်းရှင်များအား အွန်လိုင်းစနစ်ဖြင့် ရောင်းချ သည့်လုပ်ငန်းဆိုင်ရာအမိန့်ကြော်ငြာစာများ၊ စားသုံးသူကာကွယ်ရေးဥပဒေပါစီးပွားရေး လုပ်ငန်းရှင်၏ တာဝန်မျာနှင့် ကုန်အညွှန်းအမှတ်အသား ဖော်ပြချက်များသိရှိစေရန် အသိပညာပေးခြင်းနှင့် အွန်လိုင်း စနစ် ဖြင့်ရောင်းချနေသော လုပ်ငန်းရှင်များနှင့်တွေ့ဆုံ၍ အွန်လိုင်းမှတ်ပုံတင်ရန်အတွက် လိုအပ်သည့် အချက် အလက်များအား အသေးစိတ်ရှင်းလင်းဆွေးနွေးခြင်း၊ အစားအသောက်ဝန်ဆောင်မှုနှင့် စပ်လျဉ်း၍ စားသောက်ဆိုင်များသို့ သွားရောက်၍ သန့်ရှင်းသပ်ရပ်မှုများ၊ သတင်းအချက်အလက်များ ပွင့်လင်းမြင်သာမှုရှိ/မရှိ စားသုံးသူများနစ်နာဆုံးရှုံးမှုများ မရှိစေရန် အသိပညာပေးကွင်းဆင်း စစ်ဆေးမှုများ ပြုလုပ်ဆောင်ရွက်ခဲ့ကြောင်း သိရှိရပါသည်။

DOCA(မကွေး)

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ငွေစာရင်းတာဝန်ခံဒု-ဦးစီးမှူး ဒေါ်တင်တင်မော် သည် (၁၀.၅.၂၀၂၆)ရက်နေ့၊ နေ့လယ်(၁၄:၀၀)အချိန်တွင်  ပခုက္ကူမြို့၊ အမှတ် (၁၅) ရပ်ကွက်ရှိ “ဗညားသူရ” မုန့်ဟင်းခါးဖတ် လုပ်ငန်းရှင်နှင့်တွေ့ဆုံ၍ မုန့်ဖတ်လုပ်ကိုင်ပုံအဆင့်ဆင့် နှင့် ဈေးနှုန်း၊ ဈေးကွက်များမေးမြန်းခဲ့ပါသည်။

     လုပ်ငန်းရှင်မှ မုန့်ဖတ်လုပ်ငန်း လုပ်ကိုင်ပုံအဆင့်အဆင့်ကို ရှင်းလင်းရာ ပထမဦးစွာ ကုန်ကြမ်း ဆန်ကို မနောသုခဆန်(ဆန်လတ်)ကိုအသုံးပြုကြောင်း၊  ဆန်ကို (၂)နာရီခန့် ရေစိမ်ပြီး ကြိတ်ကြောင်း၊ ထွက်ရှိလာသော မုန့်အရည်ကို တစ်ညထားပြီး အိတ်ထဲသို့ ထည့်၍ နောက်တစ်ည ထပ်မံထားရှိကြောင်း၊ မုန့်နှစ်များ မာသွားပြီးလျှင် မွှေစက်ထဲသို့ထည့်၍ သမအောင်မွှေပြီး ညှစ်စက်ထဲသို့ ထည့်ကာ မိမိ လိုချင်သော မုန့်ဖတ်ဆိုဒ်(မုန့်တီ၊ နန်းသေး၊ နန်းလတ်၊ အာပူနန်း)ဟူ၍ အရွယ်အစားအမျိုးမျိုး ထုတ် လုပ်ကြောင်း၊မနောသုခ(ဆန်လတ်)(၂၄)ပြည်ပါ တစ်အိတ်လျှင် ကျပ်(၇၀၀၀၀)ဖြင့် မြို့ပေါ် ဆန်ပွဲရုံများမှ ဝယ်ယူရပြီး  ဆန်တစ်အိတ်လျှင် မုန့်ဖတ်(၆၅)ပိဿာ ထွက်ရှိကြောင်း၊ ဈေးနှုန်းအနေဖြင့် မုန့်ဖတ် တစ်ပိဿာလျှင် လက်လီဈေး ကျပ်(၂၈၀၀)၊ လက်ကားဈေး ကျပ်(၂၂၀၀) ဖြင့် ပခုက္ကူမြို့မဈေးနှင့် ရပ်ကွက်အတွင်းရှိ စားသောက်ဆိုင်(ခေါက်ဆွဲ/အသုပ်စုံ)ဆိုင်များသို့ ရောင်းချကြောင်း၊ လုပ်သား ဦးရေ(၆)ဦးရှိပြီး ကျား(၃)ဦး၊ မ(၃)ဦးရှိကြောင်း၊ လုပ်သားခမှာ ကျားတစ်ဦးလျှင် ကျပ်(၁၀၀၀၀)၊ မတစ်ဦး လျှင် ကျပ်(၆၀၀၀)ပေးရကြောင်း၊ တစ်နေ့လျှင် ဆန်(၄)အိတ် အသုံးပြု ထုတ်လုပ်ရပြီး မုန့်ဖတ်ထွက်ရှိမှု မှာ ပိဿာချိန်(၂၆၀)ထွက်ရှိကြောင်း၊ လုပ်ငန်းရှင်အသားတင် အကျိုးအမြတ်မှာ တစ်ရက်လျှင် ကျပ် (၉၀၀၀၀-၁၀၀၀၀၀)ခန့် ကျန်ရှိကြောင်း လုပ်ငန်းရှင် ဦးဗညား၏ ပြောပြချက်အရ သိရှိရပါသည်။

DOCA(မကွေး)