သတင်းနှင့် လှုပ်ရှားမှုများ

      ၂၀၂၅ခုနှစ်၊ ဇူလိုင်လ(၂၁)ရက်နေ့၊နံနက်(၇း၀၀)နာရီအချိန်တွင် မြို့နယ်စီမံအုပ်ချုပ်ရေးအဖွဲ့မှ ဦးဆောင်၍ ခရိုင်ပြည်သူ့ကျန်းမာရေးဦးစီးဌာန၊ စားသုံးသူရေးရာဦးစီးဌာန၊ မြို့နယ်သမဝါယမဦးစီးဌာန၊ မြို့နယ်စည်ပင်သာယာရေးအဖွဲ့များနှင့် သက်ဆိုင်ရာအဖွဲ့များဖြင့် မြိတ်မြို့၊ ကန်ဖျားရပ်ရှိ  မြန့်မာ့စီးပွားရေးဘဏ်တွင် ပင်စင်လာရောက်ထုတ်ယူသူများအား ကျန်းမာရေးစောင့်ရှောက်ပေးခြင်းနှင့် စျေးနှုန်းသက်သာစွာဖြင့် အခြေခံစားကုန်များဝယ်ယူနိုင်ရေး ဆောင်ရွက်ပေးခဲ့ကြောင်း သိရှိရပါသည်။ အခြေခံစားသောက်ကုန်များရောင်းချရာတွင် ဆန်၊ စားအုန်းဆီ၊ ငရုတ်၊ ကြက်သွန်၊ ဟင်သီးဟင်းရွက်များ ရောင်းချခဲ့ကြောင်း သိရှိရပါသည်။

DOCA(တနင်္သာရီ)

          ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့တွင် စက်မှုလယ်ယာဦးစီးဌာန၊ အမှတ်(၁၉) စက်မှုလယ်ယာစခန်းမှ ကောက်စိုက်စက်ဖြင့် မိုးစပါးစိုက်ပျိုးခြင်း သရုပ်ပြပွဲကို (၁၇-၇-၂၀၂၅) ရက်နေ့ နံနက်(၀၉း၀၀)နာရီအချိန်တွင် တောင်သူ ဒေါ်ဝင်းနွဲ့၏ ဧက(၁၀၀)စံပြကွက်၊ ကွင်းအမှတ်(၇၅၄)၊ ဦးပိုင် အမှတ်(၄၃/၁)တွင် ကျင်းပပြုလုပ်ခဲ့သည်။

         ကောက်စိုက်စက်ဖြင့် မိုးစပါးစိုက်ပျိုးခြင်းအားဖြင့် လုပ်အားခသက်သာခြင်း၊ မျိုးစေ့ကုန်ကျမှု နည်းပါးခြင်း၊ ပျိုးထောင်ဧရိယာ အနည်းငယ်သာလိုအပ်ခြင်း၊ သန်မာ၍ ရောဂါကင်းသော ပျိုးပင်များရရှိစေခြင်း၊ ကောက်စိုက်ရာတွင် လူအင်အားအသုံးပြုမှု နည်းပါးခြင်းနှင့် သက်တောင့်သက်သာစိုက်ပျိုးနိုင်ခြင်း၊ လုပ်ငန်းတွင်ကျယ်၍ ပြီးစီးမှုပိုမိုခြင်း၊ လေဝင်လေထွက်ကောင်းခြင်း၊ ကောက်ပင်လှန်ရက် စောင့်ဆိုင်းရန်မလိုခြင်း၊ ပင်ပွားနှုန်းကောင်းပြီး စပါးအထွက်နှုန်း ကောင်းစေခြင်းနှင့် ကောက်စိုက်စက်ဖြင့် စိုက်ပျိုးထားသည့် စပါးခင်းအားရိတ်စက်၊ ရိတ်သိမ်းခြွေလှေ့ စက်များဖြင့် အလွယ်တကူရိတ်သိမ်းနိုင်ခြင်းစသည့် အကျိုးကျေးဇူးများ ရရှိနိုင်ကြောင်း စက်မှု လယ်ယာဦးစီးဌာနမှ သိရသည်။

            အဆိုပါ ကောက်စိုက်စက်ဖြင့် မိုးစပါးစိုက်ပျိုးခြင်း သရုပ်ပြပွဲသို့ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးတိုးတိုးဝင်း၊ ခရိုင်စက်မှုလယ်ယာဦးစီးဌာနမှူး ဦးသန်းဇော်ဦး၊ အမှတ်(၅)အလတ်စား စက်ပြင်အလုပ်ရုံစက်ရုံမှူး ဦးစိုးနိုင်လင်း၊ မြို့နယ်ဦးစီးဌာနမှူး ဦးငြိမ်းချမ်းမြင့်၊ ဦးစီးမှူး ဦးအောင်ကျော်မိုးနှင့် ဝန်ထမ်းများ၊ ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးနှင့် ဌာနဆိုင်ရာ အကြီးအကဲများနှင့် ဒေသခံတောင်သူများ တက်ရောက်ကြည့်ရှုအားပေးခဲ့ကြကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်တွင် စားသုံးသူရေးရာဦးစီးဌာနနှင့် မြို့နယ်စည်ပင်သာယာ ရေးအဖွဲ့တို့ပူးပေါင်း၍ မြို့နယ်အတွင်းရောင်းချလျက်ရှိသော အိမ်ဆောက်ပစ္စည်း အရောင်းဆိုင်များတွင် ရောင်းချလျက်ရှိသော ဆောက်လုပ်ရေးလုပ်ငန်းသုံးပစ္စည်းများ အရည်အသွေးပြည်ဝပြီး စျေးနှုန်းမှန်ကန်စေရေး လိုက်လံစစ်ဆေးခြင်းကို ဇန်နဝါရီလ (၁၆-၇-၂၀၂၅) ရက်နေ့ နံနက် (၁၀း၀၀)နာရီအချိန်တွင် ဖျာပုံမြို့နယ်အတွင်း လိုက်လံစစ်ဆေးကြသည်။

             အဆိုပါ ဆောက်လုပ်ရေးလုပ်ငန်းသုံးပစ္စည်းများ အရည်အသွေးပြည်ဝပြီး စျေးနှုန်းမှန်ကန်စေရေး လိုက်လံစစ်ဆေးရာတွင်ဖျာပုံခရိုင်စားသုံးသူရေးရာဦးစီးဌာန မြို့နယ်တာဝန်ရှိသူ နှင့်ဝန်ထမ်း များ၊ မြို့နယ်စည်ပင် သာယာရေးအဖွဲ့သည် မြို့နယ်အတွင်း ရောင်းချလျက်ရှိကြသော အိမ်ဆောက်ပစ္စည်း အရောင်းဆိုင်များတွင် ရောင်းချလျက်ရှိကြသော ဆောက်လုပ်ရေးလုပ်ငန်းသုံးပစ္စည်း သံချောင်းလုံးများဖြစ်သော HRB-500၊ HRB - 400 အမျိုးအစားများနှင့် လုပ်ငန်းသုံး သံမဏိများဖြစ်သည့် H -Beam၊ l- Beam နှင့် Hollow အမျိုးအစားများအား၊ ပြည်ပနိုင်ငံများမှ တင်သွင်း၍လည်းကောင်း၊ ပြည်တွင်း ထုတ်လုပ်၍လည်းကောင်း စျေးကွက်အတွင်း အရည်အသွေးပြည့်ဝပြီး စျေးနှုန်းမှန်ကန်စေရေး၊ ဈေးကွက်အတွင်းရောင်းချနေသော ကုန်ပစ္စည်းအမျိုးအစားအလိုက် ဈေးနှုန်းများကိုလိုက်လံစစ်ဆေး၊ ကောက်ယူခြင်းကို ဆောင်ရွက်ခဲ့ကြကြောင်းသိရှိရပါသည်။

DOCA(ဧရာဝတီ)

       ၁၈.၇.၂၀၂၅ ရက်နေ့ (၁၁:၀၀) နာရီအချိန်တွင် အနောက်ပိုင်းခရိုင်ဦးစီးမှူးရုံးမှ ဝန်ထမ်း များသည် အမှတ်(၃၅၇)၊ မဟာဗန္ဓုလလမ်း၊ (၂၁) လမ်းနှင့် (၂၂) လမ်းကြား၊ လသာမြို့နယ်ရှိ ချစ်စရာ မုန့်တိုက်သို့ ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ကြောင်း သိရှိရပါသည်။

          ကွင်းဆင်းစစ်ဆေးရာတွင် အနောက်ပိုင်းခရိုင်ဦးစီးမှူးရုံးမှ စစ်ဆေးရေးမှူး ဒေါ်ခိုင်သဉ္ဇာဦးနှင့် ဝန်ထမ်း(၂) ဦး၊ မြို့နယ်မှစည်ပင်မှ ဝန်ထမ်း(၃) ဦးတို့ ပူးပေါင်းပါဝင်စစ်ဆေးခဲ့ကြပါသည်။

          ထိုသို့စစ်ဆေးရာတွင် မုန့်တိုက်မှထုတ်လုပ်သော မုန့်အမျိုးအစားများတွင် ကုန်အညွှန်းအမှတ် အသားများ ပြည့်စုံစွာပါဝင်ခြင်း မရှိကြောင်း စစ်ဆေးတွေ့ရှိခဲ့ရသဖြင့် ဈေးကွက်မရောက်မီ ၎င်းတို့၏ ကုန်ပစ္စည်းများတွင် စားသုံးသူများအား ဘေးဥပါဒ်အန္တရာယ်မရှိစေရန် ထုတ်လုပ်သည့်ရက်စွဲ၊ ကုန်ဆုံးသည့်ရက်စွဲ၊ ထားသိုသိမ်းဆည်းမှု၊ ဓါတ်မတည့်ကြောင်းဖော်ပြချက်များအား ပြည့်စုံစွာထည့် သွင်းရန်လိုအပ်ကြောင်း  အသိပညာပေးမှုများအား ပြုလုပ်ခဲ့ပြီး ၂၀၂၅ ဩဂုတ်လတွင် ပြန်လည်စစ် ဆေးသွားမည်ဖြစ်ကြောင်း သိရှိခဲ့ရပါသည်။

DOCA (ရန်ကုန်)

            ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ် စားသုံးသူရေးရာဦးစီးဌာန မြို့နယ်ဦးစီးမှူး ဦး​ဝင်းမင်းစိုးနှင့် ဝန်ထမ်းများသည် (၁၆-၇-၂၀၂၅)ရက်နေ့ နံနက်ပိုင်းတွင် ဓနုဖြူမြို့ပေါ်ရှိ  အလှကုန်ပစ္စည်းများ ရောင်းချနေ​သော ကုန်စုံဆိုင်များ သို့သွားရောက်၍ ကုန်စည်များပေါ်တွင် စားသုံးသူကာကွယ်ရေး ဥပဒေအခန်း ၁၈ ပါ ပြဌာန်းချက်များအရ ကုန်အညွှန်း အမှတ် အသားများ ပြည့်စုံစွာဖော်ပြခြင်းရှိ/ မရှိ ကိုမြို့နယ်ကျန်းမာရေးဦးစီးဌာန၊ တိုင်းရင်ဆေးပညာဦးစီးဌာန၊ စည်ပင်သာယာရေး အဖွဲ့တို့၏ ကွင်းဆင်းစစ်ဆေးခဲ့​ကြောင်း သိရသည်။

           ထိုသို့စစ်ဆေးရာတွင်  စျေးကွက်အတွင်း ထုတ်လုပ်တင်သွင်းရောင်းချလျက်ရှိ​သော အလှကုန်ပစ္စည်းအမျိုးမျိုးပေါ်တွင် စီးပွားရေးလုပ်ငန်းရှင်များသည် စားသုံးသူကာကွယ်ရေး ဥပ​ဒေ ပုဒ်မ (၄၃)အရ ကုန်အညွှန်းအမှတ်အသားများဖော်ပြရာတွင် မြန်မာဘာသာဖြင့်ဖြစ်​စေ၊ မြန်မာဘာသာနှင့် အခြားဘာသာ တစ်ခု(သို့) တစ်ခုထက်ပို၍ဖြစ်​စေ တွဲလျက်ဖော်ပြရမည်ဖြစ်​ကြောင်း စီးပွားရေးလုပ်ငန်းရှင်များအ​နေဖြင့်  လိုက်နာ​ဆောင်ရွက်ခြင်းရှိ/ မရှိ စျေးကွက်​စောင့်ကြည့်စစ်​ဆေးခြင်း​ဖြစ်ကြောင်း သိရှိရပါသည်။

DOCA(ဧရာဝတီ)