ပြည်ပကုန်သွယ်မှုသတင်းများ

           ကမ္ဘောဒီးယားနိုင်ငံသည် Techo အပြည်ပြည်ဆိုင်ရာလေဆိပ်ကို တရားဝင်စတင်လည်ပတ်ရန်အတွက်  ၉-၉-၂၀၂၅ ရက်နေ့တွင် သတ်မှတ်ထားကြောင်း ၅-၉-၂၀၂၅ ရက်နေ့က ထုတ်ပြန်ထားသည်။ Cambodia Airport Investment Co., Ltd မှ ရင်းနှီးမြုပ်နှံထားသည့် အမေရိကန်ဒေါ်လာ ၁.၅ ဘီလီယံတန် လေဆိပ်သည် ကမ္ဘောဒီးယားနိုင်ငံ၏မြို့တော် ဖနွမ်းပင်မှ ကီလိုမီတာ ၂၀ ခန့်အကွာ Takeo ခရိုင်တွင် တည်ဆောက်လျက်ရှိပြီး ဟက်တာ ၂,၆၀၀ ကျယ်ဝန်းသည်။ အဆိုပါ လေဆိပ်စီမံကိန်းကို ၂၀၂၀ ခုနှစ်တွင် စတင်လုပ်ဆောင်ခဲ့ပြီး၎င်းကို ကမ္ဘာ့အဆင့်အမြင့်ဆုံး 4F အဆင့်လေဆိပ်အဖြစ် သတ်မှတ်ထားသည်။ လေဆိပ်သစ်သည် ကမ္ဘောဒီးယားနိုင်ငံ၏ ပုံရိပ်ကို ခေတ်မီစေပြီး သွားလာရလွယ်ကူသော နေရာတစ်ခုအဖြစ် မြှင့်တင်ပေးမည်ဖြစ်ကြောင်း ပစိဖိတ်အာရှ ခရီးသွားအသင်း(ကမ္ဘောဒီးယား) ၏ ဥက္ကဋ္ဌဖြစ်သူ Thourn Sinan က ပြောကြားခဲ့သည်။ လေဆိပ်သည် အလုပ်အကိုင်များဖန်တီးပေးခြင်း၊ ပြည်တွင်းစီးပွားရေး လုပ်ငန်းများမြှင့်တင်ပေးခြင်းနှင့် အခြေခံအဆောက်အဦများတွင် ရင်းနှီးမြှုပ်နှံမှုများ တိုးမြှင့်ခြင်းဖြင့် စီးပွားရေးတိုးတက်မှုကို လှုံ့ဆော်ပေးမည်ဟု မျှော်လင့်ကြောင်းနှင့်  ခရီးသွားလုပ်ငန်းအပြင်ကဏ္ဍအသီးသီးကို မြှင့်တင်ပေးနို်ငမည့် ကုန်သွယ်မှုနှင့် ကူးသန်းရောင်းဝယ်ရေးတို့ကို အဆင်ပြေချောမွေ့စေမည်ဖြစ်ကြောင်း Sinan မှ ပြောကြားခဲ့ကြောင်း သိရှိရပါသည်။ 

Source: Khmer Times

DOCA(ရန်ကုန်)

            ကမ္ဘောဒီးယားနိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ လက်ထောက် အတွင်းဝန် Lim Phanphearak သည် ၂၀၂၅ ခုနှစ်၊ စက်တင်ဘာ ၃ ရက်မှ ၆ ရက်အထိ ရုရှားနိုင်ငံ၊ Vladivostok မြို့၌ ကျင်းပသည့် 10th Eastern Economic Forum (EEF) တွင် ကမ္ဘောဒီးယားနိုင်ငံ ကိုယ်စားပြုတက်ရောက်ခဲ့ပြီး အာဆီယံ-ရုရှား မူဘောင်အောက်တွင် ပူးပေါင်းဆောင်ရွက်မှု အားကောင်းစေရန် နိုင်ငံတော်၏ကတိကဝတ်ကိုများကို အလေးပေး ဖော်ပြခဲ့သည်။ နည်းပညာ၊ အခြေခံအဆောက်အအုံနှင့် ဒေသတွင်းပေါင်းစည်းမှုတွင် ပူးပေါင်းဆောင်ရွက်မှုကို မြှင့်တင်ပေးသည့် အဆိုပါပြပွဲ့သို့ အစိုးရအရာရှိများ၊ စီးပွားရေး ခေါင်းဆောင်များ၊ ပညာရှင်များနှင့် အရပ်ဘက်လူမှုအဖွဲ့အစည်းများမှကိုယ်စားလှယ်များ အပါအဝင် နိုင်ငံပေါင်း ၃၅ နိုင်ငံမှ တက်ရောက်သူ ၇,၀၀၀ ခန့် ပါဝင်ခဲ့ကြသည်။ ရုရှား-အာဆီယံ စီးပွားရေး ဆွေးနွေးပွဲ၌ မိန့်ခွန်းပြောကြားရာတွင် Phanphearak က ဒေသနှစ်ခုကြား စီးပွားရေး ဆက်ဆံရေး အားကောင်းလာမှုကိုအလေးပေးပြောကြားခဲ့ပြီး နှစ်နိုင်ငံကုန်သွယ်မှုသည် ၂၀၂၄ ခုနှစ်တွင် အမေရိကန်ဒေါ်လာ (USD) ၁၇ ဘီလီယံအထိရောက်ရှိခဲ့ပြီး တစ်နှစ်ထက်တစ်နှစ် ၁၂ ရာခိုင်နှုန်းတိုးလာကာ အာဆီယံအတွက် အဓိကကုန်သွယ်ဖက်အဖြစ် ရုရှား၏ရပ်တည်ချက်ကို ခိုင်မာစေကြောင်း မှတ်ချက်ပြုခဲ့သည်။  ကမ္ဘောဒီးယားသည် ကုန်သွယ်မှုနှင့် ရင်းနှီးမြှုပ်နှံမှု ၂၀၂၆-၂၀၃၅ ဆိုင်ရာ အာဆီယံ-ရုရှား မဟာဗျူဟာ အစီအစဉ်မူကြမ်းတွင် ကုန်သွယ်မှု ပံ့ပိုးကူညီမှု၊ ရင်းနှီးမြှုပ်နှံမှု အာမခံချက်များ၊ မက်လုံးများနှင့် မက်ခရိုစီးပွားရေး တည်ငြိမ်ရေးတို့ကို မြှင့်တင်ပေးခြင်းဖြင့် ကမ္ဘောဒီးယားတွင် ပံ့ပိုးကူညီရန် အသင့်ရှိကြောင်း Phanphearak  က အလေးအနက်ပြောကြားခဲ့ကြောင်း သိရှိရပါသည်။

Source: Khmer Times

DOCA(ရန်ကုန်)

           စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနိုင်ငံခြားရေး၀န်ကြီး Rath Saravuth သည် ကမ္ဘောဒီးယားနိုင်ငံဆိုင်ရာ အမေရိကန်သံရုံး၏ စီးပွားရေးနှင့်ကူးသန်းရောင်းဝယ်ရေး အကြီးအကဲ Blake Dawgert နှင့်တွေ့ဆုံပြီး နှစ်နိုင်ငံကြား ကုန်သွယ်မှုနှင့် စီးပွားရေး ပူးပေါင်းဆောင်ရွက်မှု အားကောင်းလာစေရန် ဆွေးနွေးခဲ့ကြသည်။ ဆွေးနွေးပွဲတွင် အမေရိကန် ရင်းနှီးမြှုပ်နှံသူများအား ပိုမိုဆွဲဆောင်ရန်နှင့် ကမ္ဘောဒီးယားဈေးကွက်သို့ အမေရိကန်ထုတ်ကုန်များ တိုးပွားလာစေရေးတို့ကို အဓိကထား ဆွေးနွေးခဲ့သည်။ ဆွေးနွေးပွဲတွင် ဦးစားပေး ကဏ္ဍများတွင် ရင်းနှီးမြှုပ်နှံမှုအခွင့်အလမ်းများကို အဓိကထားကာ အမေရိကန်ကုမ္ပဏီများအတွက် အဆင်ပြေသောစီးပွားရေး ပတ်ဝန်းကျင်တစ်ခုဖန်တီးရန် ကမ္ဘောဒီးယားနိုင်ငံမှ ကတိပြုခဲ့သည်။  Blake Dawgert က အပြန်အလှန် ပံ့ပိုးကူညီမှုနှင့် ပူးပေါင်းဆောင်ရွက်မှုများကို မြှင့်တင်ပေးမည့် ဦးစားပေးလုပ်ငန်းအချို့အတွက် ကျေးဇူးတင်ရှိကြောင်း၊ သဘောတူညီချက်များ ဆက်လက်ဆွေးနွေးခြင်း၊ ကုန်သွယ်မှုလွယ်ကူချောမွေ့စေရေးနှင့် ကမ္ဘောဒီးယားရှိ ဦးစားပေး ကဏ္ဍအချို့တွင် အမေရိကန်ရင်းနှီးမြှုပ်နှံသူများကို ဆွဲဆောင်ရန် ပံ့ပိုးကူညီသွားမည်ဖြစ်ကြောင်း ပြောကြားခဲ့သည်။  ကမ္ဘောဒီးယား လုပ်ငန်းရှင်များအား ၎င်းတို့၏ကုန်ပစ္စည်းများအား အမေရိကန်ကို တင်ပို့ရာတွင် ကူညီရန် အမေရိကန်သံရုံးအနေဖြင့် အဆင်သင့်ဖြစ်နေကြောင်း ထပ်လောင်းပြောကြားခဲ့သည်။ Rath Saravuth က Trump အုပ်ချုပ်ရေးမှ ကမ္ဘောဒီးယား ကုန်စည်များအပေါ် အခွန် ၃၆ ရာခိုင်နှုန်းမှ ၁၉ ရာခိုင်နှုန်းအထိ လျှော့ချပေးသည့်အတွက် အမေရိကန်နိုင်ငံအား ကျေးဇူးတင်ရှိကြောင်း၊ အဆိုပါ အခွန်လျော့ချမှုသည် ကုန်သွယ်မှု ဆက်ဆံရေးတွင် သိသာထင်ရှားသော အောင်မြင်မှုများဖြစ်ပြီး အမေရိကန်နှင့် ကမ္ဘောဒီးယား၏ စီးပွားရေးသံတမန်ဆက်ဆံရေးကို မြှင့်တင်ပေးနေကြောင်း ပြောကြားခဲ့သည်။ ကမ္ဘောဒီးယားနိုင်ငံသည် အမေရိကန်ပြည်ထောင်စုနှင့် ၂၀၂၄ ခုနှစ်တွင် စုစုပေါင်း တင်ပို့မှု၏ ၃၇.၉ ရာခိုင်နှုန်း (အမေရိကန်ဒေါ်လာ ၁၀ ဘီလီယံနီးပါး) ရှိခဲ့ကြောင်း စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနမှ တရားဝင်အချက်အလက်များအရ သိရှိရပါသည်။

Source: Khmer Times

DOCA(ရန်ကုန်)

          ကမ္ဘောဒီးယားနိုင်ငံဆိုင်ရာ အမေရိကန်သံရုံးမှ ကုန်သွယ်ရေးနှင့်စီးပွားရေးဆိုင်ရာ အကြီးအကဲ Blake Dawgert  က ကမ္ဘောဒီးယားနိုင်ငံနှင့် စီးပွားရေးဆိုင်ရာ ဆက်ဆံရေးကို ပိုမိုမြှင့်တင်ရန် အမေရိကန်အနေဖြင့် ကြိုးစားနေကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ နိုင်ငံခြားရေးဝန်ကြီး Rath Sarawut က ၅-၉-၂၀၂၅ ရက်နေ့တွင် ပြုလုပ်ခဲ့သည့် အစည်းအဝေးတွင် ပြောကြားခဲ့ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ထုတ်ပြန်ခဲ့သည်။ နိုင်ငံတော်အတွင်း အမေရိကန် ရင်းနှီးမြှုပ်နှံမှုများ ပိုမိုအဆင်ပြေချောမွေ့စေရန် Blake Dawgert ကို နိုင်ငံခြားရေးဝန်ကြီးက တိုက်တွန်းခဲ့သည်။  ကမ္ဘောဒီးယားနိုင်ငံသည် လာမည့်နှစ်များတွင် အမေရိကန်ထုတ်ကုန်များ ပိုမိုတင်သွင်းနိုင်မည်ဟု မျှော်လင့်ကြောင်းလည်း Rath Sarawut က ပြောကြားခဲ့သည်။  Blake က နိုင်ငံခြားရေး၀န်ကြီးအား ကျေးဇူးတင်ရှိပါကြောင်း အပြန်အလှန်ပံ့ပိုးကူညီမှုနှင့် ပူးပေါင်းဆောင်ရွက်မှုကို အားပေးမည့် ဦးစားပေးလုပ်ငန်းအများအပြားကို အလေးပေးဖော်ပြခဲ့ပြီး ဆွေးနွေးမှုများ ဆက်လက်ပြုလုပ်ရန်၊ ကုန်သွယ်မှုသဘောတူညီချက်များနှင့် နိုင်ငံတော်၏ ဦးစားပေးကဏ္ဍအချို့တွင် အမေရိကန် ရင်းနှီးမြှုပ်နှံသူများကို ပိုမိုများပြားလာစေရန် ထောက်ပံ့ပေးမည်ဖြစ်ကြောင်း ပြောကြားခဲ့သည်။ ထို့အပြင် ကမ္ဘောဒီးယားနိုင်ငံဆိုင်ရာ အမေရိကန်သံရုံးမှ ၎င်းတို့၏ ထုတ်ကုန်များကို မိတ်ဆက်ပေးခြင်းဖြင့် သို့မဟုတ် ရင်းနှီးမြှုပ်နှံသူများအနေဖြင့် အမေရိကန်ဈေးကွက်များကို စူးစမ်းလေ့လာလိုသည့် ကမ္ဘောဒီးယား ကုန်သည်များနှင့် လုပ်ငန်းရှင်များကို အားပေးမည်ဖြစ်ကြောင်း Blake က ဆက်လက်ပြောကြားခဲ့သည်။ နှစ်နိုင်ငံအကြား အပြန်အလှန်ကုန်သွယ်မှုမြှင့်တင်ရန်အတွက် နှစ်ဖက်စလုံးသည် အလေးပေးဆွေးနွေးမှုများ ပြုလုပ်ခဲ့ကြောင်း MOC မှ ထုတ်ပြန်ထားကြောင်း သိရှိရပါသည်။

Source: Khmer Times

DOCA(ရန်ကုန်)

     ထိုင်းဆန်၏ ဈေးကွက်ယှဉ်ပြိုင်နိုင်စွမ်းနှင့် လယ်သမားများ၏ ဝင်ငွေရရှိမှုတို့ကို ကာကွယ်ပေးရန် ကြိုးပမ်းမှုအဖြစ် ဘတ်ငွေတန်ဖိုး တည်ငြိမ်စေရေးအတွက် လက်တွေ့ကျသော အစီအမံများကို ထုတ်ပြန်ဆောင်ရွက်ရန် အစိုးရနှင့် ထိုင်းဗဟိုဘဏ်တို့အား ထိုင်းဆန်တင်ပို့ရောင်းချသူများ အသင်းက တောင်းဆိုလျက်ရှိသည်ဟု ဘန်ကောက်ပို့စ် သတင်းဌာနက ဖော်ပြပါသည်။

     အဆိုပါအသင်း၏ ဥက္ကဋ္ဌ Charoen Laothammatas က အစိုးရနှင့် ဗဟိုဘဏ်တို့အနေဖြင့် ဘတ်ငွေ အလွန်အမင်း ခိုင်မာအားကောင်းလာခြင်းမှ ကာကွယ်ရန် အရေးပေါ်စီမံဆောင်ရွက်မှု များ ပြုလုပ်သင့်ကြောင်း၊ ငွေကြေးတည်ငြိမ်မှုကို ခိုင်မာစေပြီး အတက်အကျပြောင်းလဲလွယ်မှုကို လျှော့ချလျက် ပိုမို၍ ဈေးကွက်ယှဉ်ပြိုင်နိုင်သည့်အဆင့်၌ ရှိစေရေးအတွက် ငွေကြေးတန်ဖိုး ချိန်ညှိ ရမည်ဖြစ်ကြောင်း၊ လက်ငင်းအရေးယူဆောင်ရွက်မှုများ မရှိပါက အားကောင်းပြီး အတက်အကျ ရှိသည့် ဘတ်ငွေသည် ထိုင်းဆန်၏ ကမ္ဘာလုံးဆိုင်ရာယှဉ်ပြိုင်နိုင်စွမ်းနှင့် တောင်သူများ၏ ဝင်ငွေ ကို ထိခိုက်စေမည်ဖြစ်ကြောင်း ပြောကြားခဲ့သည်။

    ယခုနှစ်တွင် ထိုင်းဘတ်ငွေသည် အမေရိကန်ဒေါ်လာနှင့် နှိုင်းယှဉ်ပါက ၇ ရာခိုင်နှုန်းကျော် တန်ဖိုးမြင့်တက်ခဲ့ချိန်၌ အိန္ဒိယ၊ ဗီယက်နမ်နှင့် ပါကစ္စတန်ကဲ့သို့သော အဓိက ဆန်တင်ပို့သည့် နိုင်ငံများ ငွေကြေးများမှာ တန်ဖိုးကျဆင်းလျက်ရှိခဲ့သည်။ ဤအခြေအနေက ဈေးကွက်အတွင်း ထိုင်းနိုင်ငံနှင့် ၎င်း၏ပြိုင်ဘက်များအကြား ငွေလဲနှုန်းကွာဟချက်သည် ၁၀ ရာခိုင်နှုန်းကျော်ဖြင့် သိသာစွာ ခြားနားမှုဖြစ်စေကြောင်း၊ အကယ်၍ ထိုင်း၊ အိန္ဒိယ၊ ဗီယက်နမ်နှင့် ပါကစ္စတန်တို့မှ ကုန်သည်များသည် ဆန်ကွဲ ၅ ရာခိုင်နှုန်းပါဝင်သည့် ဆန်ဖြူ တစ်တန်လျှင် အမေရိကန်ဒေါ်လာ ၃၅၀ နှုန်းဖြင့် ဈေးနှုန်းတူညီစွာ တင်ပို့ရောင်းချမည်ဆိုပါက ပြည်တွင်းသုံးငွေဖြင့် ဝင်ငွေရရှိမှုမှာ သိသာထင်ရှားစွာ ကွာခြားသွားမည်ဖြစ်ကြောင်း၊ ပြိုင်ဘက်များသည် ထိုင်းကုန်သည်များထက် ဆန်တစ်တန်အပေါ် ဘတ် ၁၀၀၀ မှ ၁၂၅၀ အထိ ဝင်ငွေပိုမိုရရှိမည်ဖြစ်ကြောင်း Mr. Charoen က ပြောဆိုသည်။

    ထိုင်းဆန်၏ စျေးနှုန်းသက်သာမှုကြောင့် မဟုတ်ပဲ နိုင်ငံခြားငွေလဲနှုန်းအရ အကြောင်းမညီ ညွတ်မှုကြောင့် ထိုကဲ့သို့ ကွာဟချက်ဖြစ်ပေါ်ခြင်းသည် ထိုင်းလယ်သမားများ အနေဖြင့် ပြည်ပရှိ ဆန်စပါး စိုက်ပျိုးထုတ်လုပ်သူများထက် ဈေးနှုန်းလျော့နည်းစွာရရှိသည်ကို ဖော်ပြလျက်ရှိသည်။

    ဆန်ဈေးနှုန်းမြင့်မားမှုနှင့်အတူ ပို့ကုန်အမှာစာများရရှိမှု ကျဆင်းလာခြင်းက အထူးသဖြင့် ပင်မသီးနှံရိတ်သိမ်းရန် နီးကပ်လာချိန်၌ လယ်သမားများကို တိုက်ရိုက်ထိခိုက်လျက်ရှိကြောင်း၊  ပြည်ပမှဝယ်လိုအား ဆက်လက်ကျဆင်းနေပါက ပြည်တွင်းဆန်ဈေးနှုန်းများသည် သိသိသာသာ ကျဆင်းသွားနိုင်ကြောင်း၊ မကြာသေးမီက တစ်ရက်တာအတွင်း ဘတ်ငွေတန်ဖိုး ၂ ရာခိုင်နှုန်း မြင့် တက်ခဲ့ရာ ပို့ကုန်လုပ်ငန်းရှင်များကို ဆန်တင်ပို့ရောင်းချရန် တွန့်ဆုတ်မှုဖြစ်စေခဲ့ပြီး  ဝယ်လက်များ အနေဖြင့် ငွေလဲနှုန်း ပိုမိုအလေးသာမှုမှ အကျိုးအမြတ်ရရှိနိုင်သည့် ပြိုင်ဘက်များထံသို့ ဦးလှည့် သွားကြကြောင်း Mr. Charoen က ပြောကြားခဲ့သည်။

    တင်ပို့သူများသည် ပုံမှန်အားဖြင့် ကုန်ဖိုးငွေရရှိရန် ၁ လမှ ၃ လကြာအထိ စောင့်ဆိုင်းရလေ့ ရှိကြောင်း၊ ယနေ့ ဆန်ကို တစ်ဒေါ်လာလျှင် ၃၁ ဘတ် ငွေလဲနှုန်းဖြင့် ရောင်းချခဲ့ပြီးနောက် သုံးလ အတွင်း တစ်ဒေါ်လာလျှင် ၃၀ ဘတ်နှုန်းအထိ ဘတ်ငွေတန်ဖိုး မြင့်တက်လာပါက အရှုံးပေါ်မည် ဖြစ်ကြောင်း၊ ထို့အပြင် စျေးကွက်အတွင်းသို့ ဆန်တန်ချိန် သန်း ၂၀ ခန့် ဖြန့်ချိရောင်းချမည့် အိန္ဒိယ၏ အစီအစဉ်အတွက် စိုးရိမ်မှုများရှိနေကြောင်း ၎င်းက ထပ်လောင်းပြောကြားခဲ့သည်။

    ထိုင်းနိုင်ငံခြားကုန်သွယ်မှုဌာန၏ အချက်အလက်များအရ ထိုင်းနိုင်ငံသည် ၂၀၂၅ ခုနှစ် ပထမ ၇ လအတွင်း ဆန်တန်ချိန် ၄.၃၀ သန်း တင်ပို့ခဲ့ရာ ယခင်နှစ်ကာလတူ တင်ပို့နိုင်မှုအောက် ၂၅.၁ ရာခိုင်နှုန်း လျော့ကျခဲ့ကြောင်း၊ တန်ဖိုးအားဖြင့် ဘတ် ၈၆.၄ ဘီလီယံ (ဒေါ်လာ ၂.၅၉ ဘီလီယံ ခန့်) ရှိပြီး ယခင်နှစ်ကာလတူ တင်ပို့မှုတန်ဖိုးအပေါ် ၃၅.၄ ရာခိုင်နှုန်း ကျဆင်းခဲ့ဖြစ်ကြောင်း သိရ သည်။ ဘတ်ငွေတန်ဖိုး မတည်ငြိမ်မှုနှင့် ငွေတန်ဖိုးမြင့်တက်ခြင်းတို့က ဆန်ပို့ကုန်အပေါ် ဖိအား များ တိုးလာစေကြောင်း အဆိုပါဌာနက ပြောဆိုထားသည်။

Source: Bangkok Post, 11 Sept 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)