ကမ္ဘောဒီးယားနှင့် တရုတ်တို့သည် ခရီးသွားလာရေးဆိုင်ရာ ဆက်ဆံမှုများ ပိုမိုမြှင့်တင်ရန် သဘောတူညီခဲ့ကြ

          ကမ္ဘောဒီးယားနှင့် တရုတ်နိုင်ငံတို့သည် နှစ်နိုင်ငံအကြား တရုတ်ခရီးသွားလုပ်ငန်းနှင့် လေကြောင်းဆက်သွယ်မှု သိသိသာသာ တိုးမြင့်လာစေရန် အသေးစိတ် လုပ်ဆောင်မှု အစီအစဉ်တစ်ရပ်ကို ၁၅-၉-၂၀၂၅ ရက်နေ့က ကတိပြုခဲ့ကြသည်။ ကမ္ဘောဒီးယားနိုင်ငံ ခရီးသွားလာရေး ဝန်ကြီးဌာန၊ ကမ္ဘောဒီးယားနိုင်ငံဆိုင်ရာ တရုတ်သံရုံနှင့် တရုတ်ခရီးသွား ကုမ္ပဏီများအဖွဲ့တို့ အကြား virtual စနစ်ဖြင့်ဆွေးနွေးမှုများပြုလုပ်ခဲ့ကြသည်။ အစည်းအဝေး၏ အဓိကဦးတည်ချက်မှာ ကမ္ဘောဒီးယားသို့ တရုတ်ဧည့်သည်များ လည်ပတ်မှုတိုးမြင့်လာစေရန် အထူးအလေးပေးကာ နှစ်နိုင်ငံချစ်ကြည်ရေးနှင့် တိုးတက်မှုရလာဒ်များကို မြင်တွေ့နိုင်ရန် မျှော်မှန်းထားသည်။ အသစ်ဖွင့်လှစ်ထားသော Techo အပြည်ပြည်ဆိုင်ရာလေဆိပ် အပါအဝင် ကမ္ဘောဒီးယားနိုင်ငံရှိ အဓိကလေဆိပ်များသို့ တိုက်ရိုက်နှင့် ပုံမှန်လေကြောင်းခရီးစဉ်များ တိုးမြှင့်ရန် နှစ်ဖက်စလုံးမှ တရုတ်လေကြောင်းလိုင်းများကို တွန်းအားပေးရန် သဘောတူညီခဲ့ကြ သည်။ ကမ္ဘောဒီးယားနိုင်ငံ၏ ခရီးသွားကဏ္ဍအတွင်း ဝန်ဆောင်မှုများနှင့် လူ့စွမ်းအား အရင်းအမြစ်များ အရည်အသွေးမြှင့်တင်ရာတွင်လည်း တရုတ်ခရီးသွားများအတွက် ဘေးကင်းလုံခြုံသော ပတ်ဝန်းကျင်တစ်ခုပေးရန် လိုအပ်ကြောင်းကိုလည်း တရုတ်ခရီးသွားအဖွဲ့က ပြောကြားခဲ့သည်။ တွေ့ဆုံပွဲတွင် ခရီးသွားလာရေးဝန်ကြီး Huot Hak မှ တရုတ်နိုင်ငံ သံအမတ်ကြီး Wang Wenbin ၊ Jiangsu နှင့် Yunnan ပြည်နယ် ယဉ်ကျေးမှုနှင့် ခရီးသွားလာရေး ဦးစီးဌာနများ အပါအဝင် တရုတ်ပုဂ္ဂလိက လုပ်ငန်းရှင်များအနေဖြင့် တရုတ်နိုင်ငံရှိ ၎င်းတို့၏ ပြည်နယ်များမှ လေကြောင်းလိုင်းများကို ဆွဲဆောင်ကာ ကမ္ဘောဒီးယားနိုင်ငံ အဓိက ခရီးသွား နေရာများဖြစ်သည့် Siem Reap နှင့် Preah Sihanouk ပြည်နယ်များသို့ တိုးချဲ့ပျံသန်းပြေးဆွဲ နိုင်ရေးကူညီပေးရန် တောင်းဆိုခဲ့သည်။ ခရီးသွားလာရေး ဝန်ကြီးဌာန၏ ကိန်းဂဏန်းများအရ တရုတ်ခရီးသွားဝင်ရောက်မှုသည် ၂၀၂၅ ခုနှစ် ပထမ (၇)လတွင် ၄၈.၂ ရာခိုင်နှုန်း တိုးလာခဲ့ပြီး ဧည့်သည် ၆၉၀,၀၀၀ နီးပါး ဝင်ရောက်ခဲ့ကြောင်း ထုတ်ပြန်ထားကြောင်း သိရှိရပါသည်။

DOCA(ရန်ုကုန်)

Source: Khmer Times